Wat glo Jehovah se Getuies?

“Ons wil graag hoor wat u dink, want al wat ons weet, is dat daar oral teenstand teen hierdie rigting is” (Handelinge 28:22, Nuwe Afrikaanse vertaling van 1983). Hierdie gemeenskapsleiers in eerste-eeuse Rome het ’n goeie voorbeeld gestel. Hulle wou van die bron self hoor, pleks van net na kritici aan die buitekant te luister.

Daar word eweneens vandag dikwels teen Jehovah se Getuies gespreek, en dit sou ’n fout wees om te verwag om die waarheid omtrent hulle uit bevooroordeelde bronne te wete te kom. Ons is dus bly om sommige van ons vernaamste opvattings aan jou te verduidelik.

Die Bybel, Jesus Christus en God

Ons glo “die hele Skrif is deur God geïnspireer en het groot waarde” (2 Timotheüs 3:16, NAV). En hoewel sommige beweer dat ons nie werklik Christene is nie, is dit eenvoudig nie waar nie. Ons stem volmondig saam met die apostel Petrus se getuienis aangaande Jesus Christus: “Daar is ook geen ander naam onder die hemel wat onder die mense gegee is, waardeur ons gered moet word nie.”—Handelinge 4:12.

Maar aangesien Jesus gesê het dat hy “die Seun van God” is en dat die “Vader My gestuur het”, glo Jehovah se Getuies dat God groter as Jesus is (Johannes 10:36; 6:57). Jesus self het erken: ‘My Vader is groter as Ek’ (Johannes 14:28; 8:28). Ons glo gevolglik nie dat Jesus aan die Vader gelyk is soos die Drie-eenheidsleer sê nie. Ons glo eerder dat hy deur God geskep is en dat hy ondergeskik aan Hom is.—Kolossense 1:15; 1 Korinthiërs 11:3.

In Afrikaans is God se naam Jehovah. Die Bybel sê: “So sal hulle weet dat U, wat Jehowa heet, U alleen, di Allerhoogste is o’er di ganse aarde” (Psalm 83:19, volgens S. J. du Toit se vertaling Di Psalme NW). In ooreenstemming met hierdie verklaring het Jesus God se naam sterk beklemtoon en sy volgelinge geleer om te bid: “Onse Vader wat in die hemele is, laat u Naam geheilig word.” En hyself het tot God gebid: “Ek het u Naam geopenbaar aan die mense wat U My uit die wêreld gegee het.”—Mattheüs 6:9; Johannes 17:6.

Jehovah se Getuies glo dat hulle Jesus moet navolg deur God se naam en voornemens aan ander bekend te maak. Ons het gevolglik die naam Jehovah se Getuies aangeneem omdat ons Jesus, “die getroue getuie”, navolg (Openbaring 1:5; 3:14). Jesaja 43:10 sê gepas aan God se volk wat hom verteenwoordig: “Júlle is my getuies, spreek die HERE, en my kneg wat Ek uitverkies het.”

Die Koninkryk van God

Jesus het sy volgelinge geleer om te bid: “Laat u koninkryk kom”, en hy het daardie Koninkryk die hooftema van sy leer gemaak (Mattheüs 6:10; Lukas 4:43). Jehovah se Getuies glo dat die Koninkryk ’n werklike regering vanuit die hemel is, dat dit oor die aarde gaan regeer en dat Jesus Christus die aangestelde, onsigbare Koning daarvan is. “Die heerskappy is op sy skouer”, sê die Bybel. “Tot vermeerdering van die heerskappy en tot vrede sonder einde.”—Jesaja 9:5, 6.

Jesus Christus sal egter nie die enigste koning van God se regering wees nie. Hy sal talle medeheersers in die hemel hê. “As ons verdra”, het die apostel Paulus geskryf, “sal ons met Hom regeer” (2 Timotheüs 2:12). Die Bybel toon dat die mense wat opgewek word om saam met Christus in die hemel te regeer, beperk is tot “die honderd-vier-en-veertigduisend wat van die aarde vrygekoop is”.—Openbaring 14:1, 3.

Enige regering moet natuurlik onderdane hê, en Jehovah se Getuies glo dat duisendmiljoene benewens hierdie hemelse heersers die ewige lewe sal kry. Die aarde, wat in ’n pragtige paradys omgeskep sal wees, sal uiteindelik vol van hierdie verdienstelike onderdane van God se Koninkryk wees wat hulle almal aan die heerskappy van Christus en sy medeheersers onderwerp. Jehovah se Getuies is dus vas daarvan oortuig dat die aarde nooit vernietig sal word nie en dat die Bybel se belofte vervul gaan word: “Die regverdiges sal die aarde besit en vir ewig daarop woon.”—Psalm 37:29; 104:5.

Maar hoe gaan God se Koninkryk kom? Deurdat alle volke hulle vrywillig aan God se regering onderwerp? Inteendeel, die Bybel toon realisties dat die koms van die Koninkryk sal vereis dat God regstreeks in die aarde se aangeleenthede moet ingryp: “Die God van die hemel [sal] ’n koninkryk verwek wat in ewigheid nie vernietig sal word nie, . . . dit sal al daardie koninkryke verbrysel en daar ’n einde aan maak, maar self sal dit vir ewig bestaan.”—Daniël 2:44.

Wanneer gaan God se Koninkryk kom? Op grond van Bybelprofesieë wat nou vervul word, glo Jehovah se Getuies dat dit binnekort gaan kom. Ons nooi jou om aandag te skenk aan profesieë wat aspekte van “die laaste dae” van hierdie goddelose stelsel voorspel. Dit is opgeteken in Mattheüs 24:3-14; Lukas 21:7-13, 25-31; en 2 Timotheüs 3:1-5.

Omdat ons ‘Jehovah ons God uit ons hele hart, siel, verstand en krag liefhet, en ons naaste soos onsself’, word ons nie deur nasionaliteit, ras en stand verdeel nie (Markus 12:30, 31). Ons is algemeen bekend vir die liefde wat geopenbaar word onder ons Christenbroers wat in alle nasies aangetref word (Johannes 13:35; 1 Johannes 3:10-12). Ons bly dus neutraal ten opsigte van die politieke aangeleenthede van daardie nasies. Ons probeer om soos Jesus se vroeë dissipels te wees van wie hy gesê het: “Hulle is nie van die wêreld nie, net soos Ek nie van die wêreld is nie” (Johannes 17:16). Ons glo dat ’n mens die onsedelike gedrag wat vandag so algemeen is, onder meer leuens, diefstal, hoerery, owerspel, homoseksualiteit, die misbruik van bloed, afgodediens en ander soortgelyke dinge wat deur die Bybel veroordeel word, moet vermy om afgesonder van die wêreld te bly.—1 Korinthiërs 6:9-11; Efesiërs 5:3-5; Handelinge 15:28, 29.

Toekomsverwagtinge

Jehovah se Getuies glo dat ons teenswoordige lewe in hierdie wêreld nie al is wat daar is nie. Ons glo dat Jehovah Christus na die aarde gestuur het om sy lewensbloed as ’n losprys uit te stort sodat mense ’n regverdige naam by God kan hê en die ewige lewe in ’n nuwe stelsel kan ontvang. ’n Apostel van Jesus het gesê dat ons “nou . . . geregverdig is in sy bloed” (Romeine 5:9; Mattheüs 20:28). Jehovah se Getuies is God en sy Seun innig dankbaar vir hierdie losprysvoorsiening wat lewe in die toekoms moontlik maak.

Jehovah se Getuies het volle vertroue in ’n toekomstige lewe, gegrond op ’n opstanding uit die dode onder God se Koninkryk. Ons glo dat wanneer ’n persoon sterf hy werklik ophou om te bestaan, dat dit ‘op daardie dag met sy planne gedaan is’, soos die Bybel leer (Psalm 146:3, 4; Esegiël 18:4; Prediker 9:5). Ja, toekomstige lewe vir die dooies hang daarvan af of God hulle tydens ’n opstanding gaan onthou.—Johannes 5:28, 29.

Maar Jehovah se Getuies is daarvan oortuig dat baie wat nou lewe behoue sal bly wanneer God se Koninkryk ’n einde maak aan alle teenswoordige regerings en dat hulle, net soos Noag en sy gesin die Vloed oorlewe het, bewaar sal word om die lewe vir ewig op ’n gereinigde aarde te geniet (Mattheüs 24:36-39; 2 Petrus 3:5-7, 13). Ons glo egter dat oorlewing slegs moontlik is as ’n mens voldoen aan Jehovah se vereistes, soos die Bybel sê: “Die wêreld gaan verby . . . , maar hy wat die wil van God doen, bly vir ewig.”—1 Johannes 2:17; Psalm 37:11; Openbaring 7:9, 13-15; 21:1-5.

Dit is uiteraard nie moontlik om al die opvattings van Jehovah se Getuies hier te bespreek nie, maar ons nooi jou om meer inligting te bekom.

Tensy anders aangedui, kom alle Skrifgedeeltes uit die hersiene uitgawe van die Afrikaanse Bybel van 1933.

[Lokteks op bladsy 4]

Ons het die naam Jehovah se Getuies aangeneem omdat ons Jesus navolg