Geloof

Definisie: “Die geloof dan is ’n vaste vertroue op die dinge wat ons hoop, ’n bewys van die dinge wat ons nie sien nie” (Hebr. 11:1). Ware geloof is nie liggelowigheid nie, dit wil sê, die neiging om iets sonder gegronde getuienis te glo of net omdat ’n persoon dit so verkies nie. Opregte geloof verg basiese of fundamentele kennis, vertroudheid met getuienis, asook hartgrondige besef van wat daardie getuienis aandui. Hoewel dit dus onmoontlik is om ware geloof sonder juiste kennis te hê, sê die Bybel dat ’n mens “met die hart” glo.—Rom. 10:10.

Waarom het baie mense nie geloof nie?

Geloof is ’n vrug van God se gees, en God gee met graagte sy gees aan diegene wat daarna soek (Gal. 5:22, NW; Luk. 11:13). Persone sonder geloof soek dus nie daardie gees nie, of hulle doen dit om ’n verkeerde rede of hulle weerstaan die werking daarvan in hulle lewens. Baie dinge speel ’n rol:

Hulle het ’n gebrek aan juiste Bybelkennis: Die Bybel is ’n produk van God se gees, daar dit deur God geïnspireer is (2 Tim. 3:16, 17; 2 Sam. 23:2). As ’n mens in gebreke bly om dit te bestudeer, verhinder dit die ontwikkeling van ware geloof. Al het kerklidmate Bybels, sal hulle nie ware geloof in God en sy voorneme hê as hulle die idees van mense in plaas van die Woord van God geleer is nie. Hulle sal geneig wees om op hulle eie idees en die van ander mense staat te maak om lewensprobleme op te los.—Vergelyk Mattheüs 15:3-9.

Hulle is ontnugter deur godsdiens: Baie is ontnugter deur die geveinsdheid van die kerke van die Christendom, wat beweer dat hulle God se Woord verkondig maar nie lewe volgens wat dit sê nie. Ander was aanhangers van ’n nie-Christelike geloof, maar hulle het die slegte vrugte van die gebruike daarvan gesien of gevind dat hulle opvattings hulle nie werklik gehelp het om die lewensprobleme die hoof te bied nie. Omdat hulle nie juiste kennis van die ware God het nie, keer sulke persone hulle af van enigiets wat met godsdiens te doen het.—Vergelyk Romeine 3:3, 4; Mattheüs 7:21-23.

Hulle verstaan nie waarom God goddeloosheid toegelaat het nie: Die meeste mense verstaan nie waarom God goddeloosheid toegelaat het nie en beskuldig hom gevolglik van al die slegte dinge wat gebeur. Hulle besef nie dat die mens se neiging tot boosheid nie aan God se wil te wyte is nie, maar aan Adam se sonde (Rom. 5:12). Hulle is dalk nie bewus van die bestaan van Satan die Duiwel en sy invloed op wêreldaangeleenthede nie, en daarom skryf hulle die gemene dinge wat deur Satan gedoen word aan God toe (1 Joh. 5:19; Openb. 12:12). Indien hulle in ’n mate van hierdie dinge bewus is, meen hulle dalk dat God traag is om op te tree, omdat hulle nie die geskil oor universele soewereiniteit duidelik insien nie en nie begryp dat God se geduld tot vandag toe hulle ’n onverdiende geleentheid bied om gered te word nie (Rom. 2:4; 2 Pet. 3:9). Hulle besef ook nie ten volle dat God ’n vasgestelde tyd het wanneer hy al die boosdoeners vir ewig gaan vernietig nie.—Openb. 22:10-12; 11:18; Hab. 2:3.

Hulle lewens word deur vleeslike begeertes en beskouings oorheers: Persone met ’n gebrek aan ware geloof gaan in die reël op in die najaging van ander belange. Sommige sê dat hulle die Bybel glo, maar hulle het dit nog nooit behoorlik bestudeer of met waardering nagedink oor wat hulle gelees het, oor die redes daarvoor en hoe dit op die daaglikse lewe van toepassing is nie. (Vergelyk 1 Kronieke 28:9.) In sommige gevalle het hulle nie die geloof wat hulle wel gehad het, gevoed nie, maar eerder toegelaat dat ’n begeerte na onregverdige dinge hulle hart oorheers sodat hulle van God en sy weë afvallig geword het.—Hebr. 3:12.

Hoe kan ’n persoon geloof verkry?

Rom. 10:17: “Die geloof is dus uit die gehoor.” (Vergelyk Handelinge 17:11, 12; Johannes 4:39-42; 2 Kronieke 9:5-8. ’n Persoon moet eers uitvind wat die Bybel sê, en hy sal sy oortuiging versterk as hy dit noukeurig ondersoek sodat hy oortuig is van die betroubaarheid daarvan.)

Rom. 10:10: “Met die hart glo ons.” (Deur oor godvrugtige dinge te peins ten einde sy waardering daarvoor te vergroot, skerp ’n persoon daardie dinge by sy figuurlike hart in.)

Geloof word versterk wanneer ’n persoon op God se beloftes handel en dan God se seën op sy arbeid sien.—Kyk Psalm 106:9-12.

Ter toeligting: Jy het moontlik ’n vriend waarvan jy sal sê: ‘Ek vertrou daardie man. Ek kan daarop reken dat hy sy woord sal hou; en ek weet dat as ek ’n probleem het, hy my sal help.’ Dit is onwaarskynlik dat jy dit sou sê van iemand wat jy gister vir die eerste keer ontmoet het, nie waar nie? Dit sal iemand moet wees met wie jy al lank omgaan, iemand wat sy betroubaarheid herhaaldelik bewys het. So ook met godsdienstige geloof. Om geloof te hê, moet jy tyd daaraan afstaan om Jehovah en sy handelwyse te leer ken.

Geloof in die bestaan van God

Kyk bladsye 160-166, onder “God”.

Geloof in die vooruitsig op ’n regverdige nuwe stelsel

Wanneer ’n persoon goed vertroud raak met die verslag van Jehovah se handelinge met sy knegte, huldig hy mettertyd die beskouing van Josua, wat gesê het: “Julle moet erken met jul hele hart en met jul hele siel dat nie een woord van al die goeie woorde wat die HERE julle God oor julle gespreek het, onvervuld gebly het nie; alles het vir julle uitgekom, nie een woord daarvan het onvervuld gebly nie.”—Jos. 23:14.

Die Bybel se beloftes van hernieude gesondheid, die opstanding van die dode, ensovoorts, word versterk deur die verslag oor Jesus Christus se wonderwerke. Dit is nie fabels nie. Lees die Evangelieverslae en sien die getuienis dat hulle al die kenmerke van geskiedkundige egtheid bevat. Plekke word gemeld; die name van destydse sekulêre heersers word verstrek; meer as een ooggetuieverslag is bewaar. Meditasie oor hierdie getuienis kan jou geloof in die Bybel se beloftes versterk.

Besoek die Koninkryksale van Jehovah se Getuies en woon hulle byeenkomste by, en jy sal self die getuienis sien dat die toepassing van Bybelraad lewens verander, dat dit mense eerlik en moreel onkreukbaar kan maak, dat dit mense van alle rasse en nasionaliteite in staat kan stel om in ’n gees van ware broederskap saam te leef en te werk.

Is werke werklik nodig as ’n mens geloof het?

Jak. 2:17, 18, 21, 22, 26: “Net so is ook die geloof, as dit geen werke het nie, in sigself dood. Maar iemand sal sê: Jy het die geloof en ek die werke. Toon my jou geloof [sonder] jou werke, en ek sal jou uit my werke my geloof toon. . . . Is Abraham, ons vader, nie uit die werke geregverdig toe hy Isak, sy seun, op die altaar geoffer het nie? Sien jy dat die geloof saamgewerk het met sy werke en dat die geloof volkome geword het uit die werke? . . . Want soos die liggaam sonder gees dood is, so is ook die geloof sonder die werke dood.”—Vgl. NW, NAV.

Ter toeligting: ’n Jongman maak dalk ’n jongmeisie die hof en sê vir haar dat hy haar liefhet. Maar toon hy werklik dat sy liefde eg is as hy haar nooit vra om met hom te trou nie? Werke is eweneens ’n manier om die egtheid van ons geloof en ons liefde te toon. As ons God nie gehoorsaam nie, het ons hom nie werklik lief nie en glo ons nie werklik in die korrektheid van sy weë nie (1 Joh. 5:3, 4). Maar dit maak nie saak watter werke ons doen nie, ons kan nooit redding verdien nie. Die ewige lewe is ’n gawe van God deur Jesus Christus, nie die loon vir ons werke nie.—Ef. 2:8, 9.