Aanbid God op sy voorwaardes
JESUS het in gebed tot God gesê: “En dit is die ewige lewe, dat hulle U ken [“kennis van u opdoen”, NW], die enige waaragtige God, en Jesus Christus wat U gestuur het” (Johannes 17:3). Watter soort kennis? “[God] wil hê dat alle mense gered word en tot [juiste] kennis van die waarheid kom” (1 Timotheüs 2:4, vgl. NW). The Amplified Bible gee die laaste sinsdeel só weer: “Die [goddelike] Waarheid noukeurig en korrek ken.”
God wil dus hê dat ons hom en sy voornemens akkuraat moet ken, ooreenkomstig goddelike waarheid. En God se Woord, die Bybel, is die bron van daardie waarheid (Johannes 17:17; 2 Timotheüs 3:16, 17). Wanneer mense op akkurate wyse leer wat die Bybel van God sê, sal hulle nie wees soos diegene wat in Romeine 10:2, 3 (vgl. NW) gemeld word nie, wat “’n ywer vir God het, maar sonder [juiste] kennis”. Of soos die Samaritane vir wie Jesus gesê het: “Julle aanbid wat julle nie weet nie.”—Johannes 4:22.
As ons God se goedkeuring wil hê, moet ons ons gevolglik afvra: “Wat sê God van homself? Hoe wil hy aanbid word? Wat is sy voornemens, en hoe moet ons ons daarna skik? Juiste kennis van die waarheid gee ons die regte antwoorde op sulke vrae. Dan kan ons God op sy voorwaardes aanbid.
’n Godonterende leerstelling
“DIE wat My eer, sal Ek eer”, sê God (1 Samuel 2:30). Eer dit God wanneer iemand sy gelyke genoem word? Eer dit hom wanneer Maria in die New Catholic Encyclopedia “die moeder van God” en die “Middelares . . . tussen die Skepper en Sy skepsele” genoem word? Nee, hierdie opvattings smaad God. Niemand is sy gelyke nie; en hy het nie ’n vleeslike moeder gehad nie, want Jesus was nie God nie. En daar is geen “Middelares” nie, want God het net “een Middelaar tussen God en die mense” aangestel, naamlik Jesus.—1 Timotheüs 2:5; 1 Johannes 2:1, 2.
Die Drie-eenheidsleer het ongetwyfeld mense se begrip van God se ware posisie vertroebel en afgewater. Dit verhinder mense om die Universele Soewerein, Jehovah God, akkuraat te ken en hom op sy voorwaardes te aanbid. Soos teoloog Hans Küng gesê het: “Waarom sou iemand iets by die begrip van God se eenheid en enigheid wil voeg as dit daardie eenheid en enigheid slegs kan afwater of uitwis?” Maar dit is wat geloof in die Drie-eenheid gedoen het.
Diegene wat aan die Drie-eenheid glo, ‘hou God nie in erkentenis [“juiste kennis”, NW] nie’ (Romeine 1:28). Daardie vers sê ook: “God [het] hulle oorgegee aan ’n slegte gesindheid, om te doen wat nie betaam nie.” Vers 29 tot 31 meld party van hierdie ‘onbetaamlike’ dinge soos ‘moord, twis, ontrouheid, gebrek aan natuurlike liefde, onbarmhartigheid’. Godsdienste wat die Drie-eenheid aanvaar, het hulle aan hierdie einste dinge skuldig gemaak.
Trinitariërs het byvoorbeeld dikwels diegene wat die Drie-eenheidsleer verwerp, vervolg en selfs doodgemaak. En hulle het selfs verder gegaan. Hulle het hulle mede-Trinitariërs in oorlogstyd doodgemaak. Wat kan ‘onbetaamliker’ wees as Katolieke wat Katolieke doodmaak, lidmate van die Ortodokse Kerk wat lidmate van die Ortodokse Kerk doodmaak, Protestante wat Protestante doodmaak—alles in naam van dieselfde Drie-enige God?
En tog het Jesus onomwonde gesê: “Hieraan sal almal weet dat julle my dissipels is, as julle liefde onder mekaar het” (Johannes 13:35). God se Woord wei hieroor uit en sê: “Hierin is die kinders van God en die kinders van die duiwel openbaar: elkeen wat die geregtigheid nie doen nie, is nie uit God nie, en hy ook wat sy broeder nie liefhet nie.” Dit vergelyk diegene wat hulle geestelike broers doodmaak met “Kain wat uit die Bose [Satan] was en sy broer doodgeslaan het”.—1 Johannes 3:10-12.
Die verwarrende leerstellings wat oor God verkondig is, het dus aanleiding gegee tot dade wat sy wette skend. Trouens, die gebeure dwarsdeur die Christendom klop met Deense teoloog Søren Kierkegaard se beskrywing: “Die Christendom het die Christelike godsdiens weggedoen sonder om dit eintlik te besef.”
Die Christendom se geestelike toestand strook met die apostel Paulus se woorde: “Hulle bely dat hulle God ken, maar hulle verloën Hom deur die werke, omdat hulle gruwelik en ongehoorsaam is en ongeskik vir elke goeie werk.”—Titus 1:16.
God sal binnekort, wanneer hy hierdie goddelose stelsel van dinge beëindig, rekenskap eis van die Trinitariese Christendom. En die Christendom sal veroordeel word vir haar godonterende dade en leerstellings.—Mattheüs 24:14, 34; 25:31-34, 41, 46; Openbaring 17:1-6, 16; 18:1-8, 20, 24; 19:17-21.
Verwerp die Drie-eenheid
’N MENS kan nie ’n kompromis aangaan wat God se waarhede betref nie. Gevolglik moet ’n mens die Drie-eenheidsleer verwerp om God op sy voorwaardes te aanbid. Dié leerstelling is strydig met wat die profete, Jesus, die apostels en die vroeë Christene geglo en geleer het. Dit is strydig met wat God in sy eie geïnspireerde Woord van homself sê. Hy gee dus hierdie raad: “Erken dat ek alleen God is en dat daar niemand anders soos ek is nie.”—Jesaja 46:9, TEV.
Die feit dat God verwarrend en misterieus voorgestel word, bevorder nie sy belange nie. Inteendeel, hoe meer verwarring daar onder mense oor God en sy voornemens bestaan, des te beter pas dit God se Teenstander, Satan die Duiwel, die “god van hierdie wêreld”. Dit is hy wat sulke valse leerstellings propageer om ‘die sinne van die ongelowiges te verblind’ (2 Korinthiërs 4:4). En die Drie-eenheidsleer bevorder ook die belange van geestelikes wat hulle houvas op mense wil behou, want hulle laat dit lyk asof slegs teoloë dit kan verstaan.—Sien Johannes 8:44.
Juiste kennis van God bring groot verligting. Dit bevry ons van leerstellings wat strydig is met God se Woord en van organisasies wat afvallig geword het. Soos Jesus gesê het: “Julle sal die waarheid ken, en die waarheid sal julle vrymaak.”—Johannes 8:32.
Ons kan die oordeel wat God binnekort aan die afvallige Christendom gaan voltrek, vermy deur hom as die Allerhoogste te eer en hom op sy voorwaardes te aanbid. Dan kan ons na God se goedkeuring uitsien wanneer hierdie stelsel eindig: “Die wêreld gaan verby en sy begeerlikheid, maar hy wat die wil van God doen, bly vir ewig.”—1 Johannes 2:17.
[Prent op bladsy 31]
Hierdie eeue-oue beeldhouwerk in Frankryk is ’n afbeelding van hoe die “maagd” Maria deur die Drie-eenheid gekroon word. Aanvaarding van die Drie-eenheid het gelei tot die verering van Maria as die “Moeder van God”