Hoofstuk 4

Swanger maar ongetroud

MARIA is in die derde maand van haar swangerskap. Jy sal onthou dat sy die vroeë deel van haar swangerskap by Elisabet deurgebring het, maar nou het sy na Nasaret teruggekeer. Almal in haar tuisdorp sal binnekort van haar toestand weet. Sy is inderdaad in ’n angswekkende situasie!

Wat die situasie vererger, is die feit dat Maria aan die timmerman Josef verloof is. En sy weet dat God se wet aan Israel bepaal dat ’n vrou wat aan een man verloof is maar gewillig met ’n ander man geslagsomgang het, gestenig moet word. Hoe kan sy haar swangerskap aan Josef verduidelik?

Aangesien Maria drie maande lank weg was, kan ons seker wees dat Josef haar graag wil sien. Wanneer hulle mekaar ontmoet, vertel Maria waarskynlik vir hom die nuus. Sy doen moontlik haar bes om te verduidelik dat sy deur God se heilige gees swanger is. Maar soos jy jou kan voorstel, is dit vir Josef baie moeilik om dit te glo.

Josef weet dat Maria ’n voortreflike reputasie het. En hy is klaarblyklik baie lief vir haar. Maar ten spyte van wat sy sê, lyk dit werklik asof sy ’n ander man se kind verwag. Josef wil nietemin nie hê dat sy gestenig moet word of in die openbaar in die skande moet kom nie. Hy besluit dus om in die geheim van haar te skei. Destyds is verloofdes as getroud beskou, en ’n egskeiding was nodig om ’n verlowing te verbreek.

Later, terwyl Josef nog oor hierdie sake nadink, raak hy aan die slaap. Jehovah se engel verskyn in ’n droom aan hom en sê: “Wees nie bevrees om Maria, jou vrou, by jou te neem nie, want wat in haar verwek is, is uit die Heilige Gees; en sy sal ’n seun baar, en jy moet Hom Jesus noem, want dit is Hy wat sy volk van hulle sondes sal verlos.”

Hoe dankbaar is Josef tog wanneer hy wakker word! Hy doen onmiddellik wat die engel hom beveel het. Hy neem Maria na sy huis toe. Hierdie openbare optrede is in werklikheid ’n huweliksplegtigheid wat aandui dat Josef en Maria nou amptelik getroud is. Maar terwyl Maria Jesus verwag, het Josef nie geslagsomgang met haar nie.

Kyk! Maria is ver heen in haar swangerskap en tog tel Josef haar op ’n donkie. Waar gaan hulle heen, en waarom onderneem hulle ’n reis wanneer Maria se swangerskap so ver gevorderd is? Lukas 1:39-41, 56; Mattheüs 1:18-25; Deuteronomium 22:23, 24.

▪ Hoe voel Josef wanneer hy van Maria se swangerskap hoor, en waarom?

▪ Hoe kan Josef van Maria skei al is hulle nog nie getroud nie?

▪ Watter openbare optrede dien as Josef en Maria se huweliksplegtigheid?