Hoofstuk 51

Moord gedurende ’n verjaarsdagparty

NA JESUS instruksies aan sy apostels gegee het, stuur hy hulle in pare in die gebied uit. Waarskynlik gaan die broers Petrus en Andreas saam uit, en so ook Jakobus en Johannes, Filippus en Bartholomeüs, Thomas en Mattheüs, Jakobus en Thaddeüs, en Simon en Judas Iskariot. Die ses pare evangeliste verkondig die goeie nuus van die Koninkryk en verrig wondergenesings oral waar hulle gaan.

Intussen is Johannes die Doper steeds in die tronk. Hy is nou al byna twee jaar daar. Jy onthou miskien dat Johannes in die openbaar gesê het dat dit verkeerd van Herodes Antipas was om Herodias, die vrou van sy broer Filippus, vir hom te neem. Aangesien Herodes Antipas beweer het dat hy die Mosaïese Wet volg, het Johannes tereg hierdie owerspelige verbintenis blootgelê. Herodes het Johannes dus in die tronk gegooi, miskien op aanhitsing van Herodias.

Herodes Antipas besef dat Johannes ’n regverdige man is en luister selfs graag na hom. Gevolglik weet hy nie wat om met hom te doen nie. Herodias daarenteen haat Johannes en soek voortdurend ’n geleentheid om hom om die lewe te laat bring. Uiteindelik doen die geleentheid waarvoor sy gewag het hom voor.

Kort voor die Pasga van 32 G.J. reël Herodes ’n groot viering van sy verjaarsdag. Al Herodes se hooggeplaaste amptenare en militêre offisiere, sowel as die vername burgers van Galilea, is by die party. Later in die aand word Salome, die jong dogter van Herodias by haar vorige man Filippus, ingestuur om vir die gaste te dans. Haar vertoning betower die mans.

Herodes is baie ingenome met Salome. “Vra my net wat jy wil, en ek sal dit aan jou gee”, sê hy. Hy het selfs vir haar gesweer: “Net wat jy my vra, sal ek jou gee, al was dit ook die helfte van my koninkryk.”

Voor sy antwoord, gaan raadpleeg Salome haar moeder. “Wat sal ek vra?” wil sy weet.

Uiteindelik het die geleentheid aangebreek! “Die hoof van Johannes die Doper”, antwoord Herodias sonder aarseling.

Salome gaan dadelik terug na Herodes en rig die versoek: “Ek wil hê dat u my op die daad die hoof van Johannes die Doper op ’n skottel gee.”

Herodes is baie ontsteld. Maar omdat sy gaste sy eed gehoor het, sal dit vir hom ’n verleentheid wees om dit nie toe te staan nie, al beteken dit dat ’n onskuldige man vermoor word. ’n Laksman word dadelik met sy grusame instruksies na die tronk gestuur. Kort daarna keer hy terug met Johannes se hoof op ’n skottel, en hy gee dit vir Salome. Sy neem dit weer na haar moeder. Wanneer Johannes se dissipels hoor wat gebeur het, kom haal hulle sy lyk en begrawe dit, en gaan vertel dan vir Jesus daarvan.

Later, wanneer Herodes hoor hoe Jesus mense genees en die demone uitdryf, is hy bang, want hy vrees dat Jesus in werklikheid Johannes is wat uit die dode opgewek is. Daarna wil hy Jesus baie graag sien, nie om sy prediking te hoor nie, maar om vas te stel of sy vrese gegrond is of nie. Mattheüs 10:1-5; 11:1; 14:1-12; Markus 6:14-29; Lukas 9:7-9.

▪ Waarom is Johannes in die tronk, en waarom wil Herodes hom nie laat doodmaak nie?

▪ Hoe slaag Herodias uiteindelik daarin om Johannes om die lewe te laat bring?

▪ Waarom wil Herodes Jesus ná Johannes se dood sien?