Hoofstuk 127

Vrydag begrawe—Sondag ’n leë graf

DIT is nou al laat Vrydagmiddag, en die Sabbat van 15 Nisan sal ná sononder begin. Jesus se dooie liggaam hang slap aan die paal, maar die twee rowers weerskante van hom lewe nog. Vrydagmiddag word die Voorbereiding genoem omdat dit die tyd is wanneer mense maaltye voorberei en enige ander dringende werk klaarmaak wat nie tot ná die Sabbat uitgestel kan word nie.

Die Sabbat wat binnekort gaan begin, is nie net ’n gewone Sabbat (die sewende dag van die week) nie, maar ook ’n dubbele, of “groot”, Sabbat. Dit word so genoem omdat 15 Nisan, wat die eerste dag van die sewedaagse Fees van die Ongesuurde Brode is (en altyd ’n Sabbat is, ongeag op watter dag van die week dit val), op dieselfde dag as die gewone Sabbat val.

Volgens God se Wet mag liggame nie oornag aan ’n paal bly hang nie. Daarom vra die Jode Pilatus dat die dood van diegene wat tereggestel word, bespoedig moet word deur hulle bene te breek. Die soldate breek gevolglik die twee rowers se bene. Maar aangesien Jesus klaarblyklik reeds dood is, word sy bene nie gebreek nie. Dit vervul die teks: “Geen been van Hom sal gebreek word nie.”

Om egter seker te maak dat Jesus werklik dood is, steek een van die soldate ’n spies in sy sy. Die spies deurboor Jesus naby sy hart, en bloed en water stroom onmiddellik uit die wond. Die apostel Johannes, wat ’n ooggetuie is, berig dat dit ’n ander teks vervul: “Hulle sal opsien na die Een wat hulle deurboor het.”—NW.

Josef van die stad Arimathea, ’n vername lid van die Sanhedrin, is ook by die teregstelling. Hy het geweier om ten gunste van die hoër hof se onregverdige veroordeling van Jesus te stem. Josef is in werklikheid ’n dissipel van Jesus, hoewel hy tot dusver te bang was om homself as een te identifiseer. Nou toon hy egter moed en gaan na Pilatus om vir Jesus se liggaam te vra. Pilatus laat die hoofman oor honderd roep, en nadat die hoofman bevestig het dat Jesus dood is, beveel Pilatus dat die lyk vir Josef gegee moet word.

Josef neem die liggaam en draai dit in skoon, fyn linne toe ter voorbereiding vir die begrafnis. Hy word deur Nikodemus, ’n ander lid van die Sanhedrin, bygestaan. Nikodemus het ook nie sy geloof in Jesus bely nie omdat hy bang was om sy posisie te verloor. Maar nou bring hy ’n mengsel van mirre en duur aalwee van omtrent 33 kilogram. Jesus se liggaam word in doeke toegedraai wat hierdie speserye bevat, net soos dit die Jode se gewoonte is om liggame vir die begrafnis voor te berei.

Die liggaam word dan in Josef se nuwe graf neergelê, wat in ’n tuin daar naby in die rots gekap is. Laastens word ’n groot klip voor die graf gerol. Die voorbereiding van die liggaam word baie vinnig gedoen om die begrafnis voor die Sabbat af te handel. Daarom gaan Maria Magdalena en Maria die moeder van Jakobus die kleine, wat moontlik met die voorbereiding gehelp het, vinnig huis toe om nog speserye en salf te berei. Hulle is van plan om Jesus se liggaam ná die Sabbat verder te behandel sodat dit langer behoue sal bly.

Die volgende dag, wat ’n Saterdag (die Sabbat) is, gaan die owerpriesters en die Fariseërs na Pilatus en sê: “My heer, ons herinner ons dat dié verleier, toe hy in die lewe was, gesê het: Oor drie dae staan ek op. Gee dan bevel dat die graf verseker word tot die derde dag toe, dat sy dissipels nie miskien in die nag kom en Hom steel nie, en vir die volk sê: Hy het opgestaan uit die dode. En die laaste dwaling sal erger wees as die eerste.”

“Julle sal ’n wag kry”, antwoord Pilatus. “Gaan verseker dit soos julle dit verstaan.” Hulle gaan dus en verseker die graf deur die steen te verseël en Romeinse soldate as wagte daar te stel.

Vroeg Sondagoggend bring Maria Magdalena en Maria die moeder van Jakobus saam met Salome, Johanna en ander vroue speserye na die graf om Jesus se liggaam te behandel. Op pad vra hulle vir mekaar: “Wie sal vir ons die steen voor die opening van die graf wegrol?” Maar toe hulle daar kom, sien hulle dat ’n aardbewing plaasgevind het en dat Jehovah se engel die steen weggerol het. Die wagte is weg, en die graf is leeg! Mattheüs 27:57–28:2; Markus 15:42–16:4; Lukas 23:50–24:3, 10; Johannes 19:14, 31–20:1; 12:42; Levitikus 23:5-7; Deuteronomium 21:22, 23; Psalm 34:21; Sagaria 12:10.

▪ Waarom word Vrydag die Voorbereiding genoem, en wat is ’n “groot” Sabbat?

▪ Watter tekste in verband met Jesus se liggaam word vervul?

▪ Watter aandeel het Josef en Nikodemus in Jesus se begrafnis, en wat is hulle verhouding met Jesus?

▪ Watter versoek rig die priesters aan Pilatus, en wat is sy antwoord?

▪ Wat gebeur vroeg Sondagoggend?