Deel 8
God se voorneme nader vervulling
1, 2. Hoe het God voorsiening gemaak om lyding uit die weg te ruim?
DIE heerskappy van opstandige mense en demone oefen al eeue lank ’n nadelige invloed op die mensdom uit. Tog het God nie ons lyding geïgnoreer nie. Inteendeel, hy was deur al hierdie eeue heen besig om voorsiening te maak sodat die mens uit die greep van goddeloosheid en lyding verlos kan word.
2 Tydens die opstand in Eden het God sy voorneme begin bekend maak om ’n regering tot stand te bring wat hierdie aarde in ’n paradystuiste vir die mens sal omskep (Genesis 3:15). Later het Jesus as God se hoofwoordvoerder hierdie komende regering van God die tema van sy onderrigting gemaak. Hy het gesê dat dit die mensdom se enigste hoop is.—Daniël 2:44; Mattheüs 6:9, 10; 12:21, NAV.
3. Wat het Jesus die komende regering vir die aarde genoem, en waarom?
3 Jesus het daardie komende regering van God “die koninkryk van die hemele” genoem, aangesien dit uit die hemel sal regeer (Mattheüs 4:17). Hy het dit ook “die koninkryk van God” genoem omdat God die Insteller daarvan is (Lukas 17:20). Deur die eeue heen het God skrywers geïnspireer om profesieë neer te skryf aangaande diegene wat deel van daardie regering sal uitmaak en wat daardie regering tot stand gaan bring.
Die aarde se nuwe Koning
4, 5. Hoe het God getoon dat Jesus sy goedgekeurde Koning is?
4 Dit was Jesus wat amper tweeduisend jaar gelede die talle profesieë vervul het oor die een wat Koning van God se Koninkryk sal wees. Hy is deur God gekies om die Heerser van daardie hemelse regering oor die mensdom te wees. En ná sy dood het God Jesus opgewek tot lewe as ’n magtige onsterflike geesskepsel in die hemel. Daar was baie wat van sy opstanding kon getuig.—Handelinge 4:10; 9:1-9; Romeine 1:1-4; 1 Korinthiërs 15:3-8.
5 Jesus het toe ‘aan die regterhand van God gaan sit’ (Hebreërs 10:12). Daar het hy op die tyd gewag wanneer God hom sou magtig om as Koning van God se hemelse Koninkryk op te tree. Dit het die profesie in Psalm 110:1 vervul, waar God vir hom sê: “Sit aan my regterhand, totdat Ek u vyande maak ’n voetbank vir u voete.”
6. Hoe het Jesus getoon dat hy bevoeg is om Koning van God se Koninkryk te wees?
6 Terwyl Jesus op aarde was, het hy getoon dat hy bevoeg is vir so ’n posisie. Hy het ten spyte van vervolging sy onkreukbaarheid teenoor God gehandhaaf. Deur dit te doen, het hy getoon dat Satan ’n leuen vertel het toe hy beweer het dat geen mens onder beproewing aan God getrou sou bly nie. Jesus, ’n volmaakte mens, die ‘tweede Adam’, het getoon dat God nie ’n fout begaan het toe hy volmaakte mense geskep het nie.—1 Korinthiërs 15:22, 45; Mattheüs 4:1-11.
7, 8. Watter goeie dinge het Jesus gedoen terwyl hy op aarde was, en wat het hy hierdeur getoon?
7 Watter heerser het al ooit soveel goeie dinge verrig as wat Jesus in die paar jaar van sy bediening gedoen het? Met die krag van God se heilige gees het Jesus die siekes, die kreupeles, die blindes, die dowes en die stommes genees. Hy het selfs die dooies opgewek! Hy het op ’n klein skaal getoon wat hy op ’n wêreldskaal vir die mensdom sal doen wanneer hy sy Koninkryksmag ontvang.—Mattheüs 15:30, 31; Lukas 7:11-16.
8 Jesus het soveel goeie dinge gedoen terwyl hy op aarde was dat sy dissipel Johannes gesê het: “Daar is nog baie ander dinge wat Jesus alles gedoen het; maar as hulle een vir een beskrywe moes word, sou die wêreld self, dink ek, die geskrewe boeke nie bevat nie.”—Johannes 21:25.a
9. Waarom het skares regskape mense na Jesus toe gekom?
9 Jesus was goedhartig en medelydend, en hy het ’n groot liefde vir mense gehad. Hy het die armes en die verdruktes gehelp, maar hy het nie teen die rykes of mense in gesagsposisies gediskrimineer nie. Regskape mense het gunstig op Jesus se liefdevolle uitnodiging gereageer toe hy gesê het: “Kom na My toe, almal wat vermoeid en belas is, en Ek sal julle rus gee. Neem my juk op julle en leer van My, want Ek is sagmoedig en nederig van hart, en julle sal rus vind vir julle siele; want my juk is sag en my las is lig” (Mattheüs 11:28-30). Godvresende mense het in groot skares na hom toe gekom en uitgesien na sy heerskappy.—Johannes 12:19.
Medeheersers
10, 11. Wie sal saam met Jesus oor die aarde heers?
10 Net soos ’n menseregering medeadministrateurs het, het God se hemelse Koninkryk ook medeheersers. Daar is ander wat saam met Jesus oor die aarde gaan heers, want Jesus het sy intieme metgeselle belowe dat hulle saam met hom as konings oor die mensdom gaan regeer.—Johannes 14:2, 3; Openbaring 5:10, NAV; 20:6.
11 Saam met Jesus word daar gevolglik ook ’n beperkte getal mense tot hemelse lewe opgewek. Hulle vorm die Koninkryk van God wat ewige seëninge vir die mensdom gaan bring (2 Korinthiërs 4:14; Openbaring 14:1-3). Jehovah het dus deur die eeue heen die grondslag vir ’n heerskappy gelê wat ewige seëninge vir die mensdom gaan bring.
Onafhanklike heerskappy gaan tot ’n einde kom
12, 13. Wat staan God se Koninkryk nou op die punt om te doen?
12 God het in hierdie eeu direk in die aarde se aangeleenthede ingegryp. Soos Deel 9 van hierdie brosjure gaan bespreek, toon Bybelprofesieë dat God se Koninkryk onder Christus in 1914 opgerig is en dat dit nou op die punt staan om Satan se hele stelsel te verbrysel. Daardie Koninkryk is gereed om ‘te midde van Christus se vyande te onderwerp’.—Psalm 110:2, NW.
13 Die profesie in Daniël 2:44 sê in hierdie verband: “In die dae van dié konings [wat nou bestaan] sal die God van die hemel ’n koninkryk verwek [in die hemel] wat in ewigheid nie vernietig sal word nie, en die heerskappy daarvan sal aan geen ander volk oorgelaat word nie [menseheerskappy sal nooit weer toegelaat word nie]; dit [God se Koninkryk] sal al daardie koninkryke verbrysel en daar ’n einde aan maak, maar self sal dit vir ewig bestaan.”
14. Wat is van die voordele wat uit die einde van menseheerskappy sal voortspruit?
14 Wanneer alle heerskappy wat onafhanklik van God is uit die weg geruim is, sal God se Koninkryksheerskappy oor die aarde volkome wees. En omdat die Koninkryk uit die hemel regeer, kan dit nooit deur mense bederf word nie. Regeringsmag sal wees waar dit in die eerste plek was, in die hemel by God. En aangesien God se heerskappy beheer oor die hele aarde sal uitoefen, sal niemand meer deur valse godsdiens of onbevredigende menslike filosofieë en politieke teorieë mislei word nie. Nie een van hierdie dinge sal toegelaat word om te bestaan nie.—Mattheüs 7:15-23; Openbaring, hoofstukke 17 tot 19.
[Voetnoot]
a Sien die boek Die grootste mens wat nog geleef het, wat in 1991 deur die Wagtoringgenootskap uitgegee is, vir ’n volledige bespreking oor Jesus se lewe.
[Prente op bladsy 18]
Terwyl Jesus op aarde was, het hy die siekes gesond gemaak en die dooies opgewek om te toon wat hy in die nuwe wêreld gaan doen
[Prent op bladsy 19]
God se hemelse Koninkryk gaan alle vorme van heerskappy wat onafhanklik van hom is, verbrysel