Wie heers werklik oor die wêreld?
Baie mense sal die vraag hierbo met een woord beantwoord—God. Maar dit is opvallend dat die Bybel nêrens sê dat Jesus Christus of sy Vader die ware heersers van hierdie wêreld is nie. Inteendeel, Jesus het gesê: “Die heerser van hierdie wêreld [sal] uitgewerp word.” En hy het bygevoeg: “Die heerser van die wêreld kom. En hy het geen houvas op my nie.”—Johannes 12:31; 14:30; 16:11.
Die heerser van hierdie wêreld is dus ’n teenstander van Jesus. Wie kan dit wees?
Wêreldtoestande verskaf ’n leidraad
Ondanks welmenende mense se pogings het die wêreld deur die geskiedenis heen verskriklik gely. Soos wyle redaksionele skrywer David Lawrence, wonder baie mense dus: “‘Vrede op aarde’—byna almal begeer dit. ‘Welwillendheid teenoor mense’—omtrent al die nasies van die wêreld voel dit teenoor mekaar. Wat is dan verkeerd? Waarom is oorlog ’n bedreiging ten spyte van die aangebore begeertes van die nasies?”
Dit lyk soos ’n teenstrydigheid, nie waar nie? Terwyl dit mense se natuurlike begeerte is om in vrede te lewe, haat hulle mekaar en maak hulle mekaar dood—en dit op sulke wrede maniere. Neem byvoorbeeld die tallose koelbloedige gruweldade. Mense het al gaskamers, konsentrasiekampe, vlamwerpers, napalmbomme en ander grusame metodes gebruik om mekaar genadeloos te martel en uit te moor.
Glo jy dat mense, wat vrede en geluk begeer, uit hulle eie tot sulke afgryslike boosheid teen ander in staat is? Watter magte dryf mense daartoe om sulke afskuwelike dade te pleeg of manipuleer hulle in situasies in waar hulle verplig voel om sulke gruweldade te pleeg? Het jy al ooit gewonder of daar ’n bose, onsigbare mag is wat mense beïnvloed om sulke dade van geweld te pleeg?
Die heersers van die wêreld word geïdentifiseer
Dit is nie nodig om daaroor te wonder nie, want die Bybel toon duidelik dat ’n intelligente, onsigbare persoon mense en nasies beheer. Dit sê: “Die hele wêreld lê in die mag van die bose.” En die Bybel identifiseer hom waar dit sê: “Die een wat Duiwel en Satan genoem word, [mislei] die hele bewoonde aarde.”—1 Johannes 5:19; Openbaring 12:9.
Toe Jesus eenkeer “deur die Duiwel versoek” is, het Jesus nie Satan se rol as die heerser van hierdie wêreld in twyfel getrek nie. Die Bybel verduidelik wat gebeur het: “Die Duiwel [het] hom saamgeneem na ’n buitengewoon hoë berg en hom al die koninkryke van die wêreld en hulle heerlikheid gewys, en hy het vir hom gesê: ‘Al hierdie dinge sal ek jou gee as jy neerval en ’n daad van aanbidding teenoor my verrig.’ Toe het Jesus vir hom gesê: ‘Gaan weg, Satan!’”—Matteus 4:1, 8-10.
Dink daaroor na. Satan het Jesus versoek deur hom “al die koninkryke van die wêreld” aan te bied. Maar sou Satan se aanbod regtig ’n versoeking gewees het as Satan nie werklik die heerser van hierdie koninkryke is nie? Nee, dit sou nie. En let op dat Jesus nie ontken het dat al hierdie wêreldse regerings aan Satan behoort nie, en hy sou dit gedoen het as Satan nie mag oor hulle gehad het nie. Satan die Duiwel is dus in werklikheid die onsigbare heerser van die wêreld! Trouens, die Bybel noem hom “die god van hierdie stelsel van dinge” (2 Korintiërs 4:4). Maar hoe het so ’n bose persoon dan soveel mag bekom?
Die persoon wat Satan geword het, was ’n engel wat deur God geskep is, maar hy het God se posisie begin begeer. Hy het die regmatigheid van God se heerskappy betwis. Hiervoor het hy ’n slang as spreekbuis gebruik om die eerste vrou, Eva, te verlei, en op dié manier kon hy haar en haar man, Adam, oorhaal om hóm pleks van God te gehoorsaam (Genesis 3:1-6; 2 Korintiërs 11:3). Hy het ook beweer dat hy al Adam en Eva se ongebore kinders teen God kan laat draai. God het gevolglik tyd toegelaat sodat Satan sy bewering kon probeer bewys, maar Satan het nie daarin geslaag nie.—Job 1:6-12; 2:1-10.
Dit is interessant dat Satan nie alleen oor die wêreld heers nie. Hy het van die ander engele oorreed om by hom in sy opstand teen God aan te sluit. Hulle het demone, sy geestrawante, geword. Die Bybel praat van hulle waar dit Christene aanspoor: “[Staan vas] teen die sette van die Duiwel; want ons het ’n worstelstryd, nie teen bloed en vlees nie, maar . . . teen die wêreldheersers van hierdie duisternis, teen die bose geesmagte in die hemelse plekke.”—Efesiërs 6:11, 12.
Weerstaan die bose geeste
Hierdie onsigbare, bose wêreldheersers is vasbeslote om die hele mensdom te mislei en hulle God se aanbidding die rug te laat toekeer. Een manier waarop die bose geeste dit doen, is deur die idee van lewe na die dood te bevorder, hoewel God se Woord duidelik toon dat die dooies niks weet nie (Genesis 2:17; 3:19; Esegiël 18:4; Psalm 146:3, 4; Prediker 9:5, 10). ’n Bose gees kan byvoorbeeld die oorledene se stem namaak en deur ’n geesmedium of ’n “stem” uit die onsigbare geesteryk met die oorledene se familielede of vriende praat. Die “stem” gee voor dat dit die oorledene is, maar dit is in werklikheid ’n demoon!
As jy dus ooit so ’n “stem” hoor, moenie mislei word nie. Verwerp alles wat dit sê, en herhaal Jesus se woorde: “Gaan weg, Satan!” (Matteus 4:10; Jakobus 4:7). Moenie toelaat dat nuuskierigheid oor die geesteryk jou by bose geeste laat betrokke raak nie. Hierdie betrokkenheid word spiritisme genoem, en God waarsku sy aanbidders teen alle vorme daarvan. Die Bybel veroordeel elkeen “wat van waarsêery gebruik maak . . . of ’n geestemedium of ’n beroepsvoorspeller van gebeure om inligting vra of die dooies raadpleeg”.—Deuteronomium 18:10-12; Galasiërs 5:19-21; Openbaring 21:8.
Aangesien spiritisme ’n mens onder die invloed van die demone bring, moet ons al die gebruike van spiritisme weerstaan, al lyk dit ook na baie pret of opwinding. Hierdie gebruike sluit in die raadpleeg van kristalballe, die gebruik van Ouija-borde, BSW, die ondersoek van die lyne in ’n mens se hand (handlesery) en astrologie. Demone het ook al geluide en ander fisiese verskynsels veroorsaak in huise wat hulle as hulle gebied beskou.
Daarbenewens buit bose geeste die mens se sondige neiging uit deur leesstof, rolprente en televisieprogramme te bevorder wat onsedelike en onnatuurlike seksuele gedrag uitbeeld. Die demone weet dat verkeerde gedagtes wat nie uit die verstand verdryf word nie, onuitwisbare indrukke sal laat en daartoe sal lei dat mense—net soos die demone—hulle aan onsedelike gedrag skuldig maak.—Genesis 6:1, 2; 1 Tessalonisense 4:3-8; Judas 6.
Baie spot weliswaar met die idee dat bose geeste die heersers van hierdie wêreld is. Maar hulle ongeloof verbaas ons nie, want die Bybel sê: “Satan self hou aan om hom in ’n engel van lig te verander” (2 Korintiërs 11:14). Sy slimste set is dat hy baie mense verblind sodat hulle nie glo dat hy en sy demone werklik bestaan nie. Maar moet nie mislei word nie! Die Duiwel en sy demone bestaan werklik, en jy moet hulle voortdurend weerstaan.—1 Petrus 5:8, 9.
Gelukkig is die tyd nou naby wanneer Satan en sy trawante nie meer daar sal wees nie! “Die wêreld [waaronder sy demoonheersers] gaan verby”, verseker die Bybel ons, “maar hy wat die wil van God doen, bly vir ewig” (1 Johannes 2:17). Wat ’n verligting sal dit tog wees wanneer daardie bose invloed uit die weg geruim is! Mag ons derhalwe onder diegene wees wat God se wil doen en die ewige lewe in God se regverdige nuwe wêreld geniet.—Psalm 37:9-11, 29; 2 Petrus 3:13; Openbaring 21:3, 4.
Tensy anders aangedui, kom alle Skrifaanhalings uit die Nuwe Wêreld-vertaling van die Heilige Skrif.
[Prent op bladsy 4]
Kon Satan al hierdie wêreldregerings vir Jesus aangebied het as hulle nie aan hom behoort nie?