Les 3

Wie is Jesus Christus?

Waarom word Jesus God se ‘eersgebore’ Seun genoem? (1)

Waarom word hy “die Woord” genoem? (1)

Waarom het Jesus as ’n mens aarde toe gekom? (2-4)

Waarom het hy wonderwerke verrig? (5)

Wat gaan Jesus in die nabye toekoms doen? (6)

1. Jesus het in die hemel as ’n geespersoon gelewe voordat hy aarde toe gekom het. Hy was God se eerste skeppingswerk, en daarom word hy die ‘eersgebore’ Seun van God genoem (Kolossense 1:15; Openbaring 3:14). Jesus is die enigste Seun wat deur God self geskep is. Jehovah het die voormenslike Jesus as sy “meesterwerker” gebruik om alle ander dinge in die hemel en op aarde te skep (Spreuke 8:22-31, vgl. NW; Kolossense 1:16, 17). God het hom ook as Sy hoofwoordvoerder gebruik. Dit is waarom Jesus “die Woord” genoem word.—Johannes 1:1-3; Openbaring 19:13.

2. God het Sy Seun na die aarde toe gestuur deur sy lewe na die baarmoeder van Maria oor te plaas. Jesus het dus nie ’n menslike vader gehad nie. Dit is waarom hy geen sonde of onvolmaaktheid geërf het nie. God het Jesus om drie redes aarde toe gestuur: (1) om ons die waarheid omtrent God te leer (Johannes 18:37), (2) om volmaakte onkreukbaarheid te handhaaf en ’n voorbeeld te laat vir ons om te volg (1 Petrus 2:21) en (3) om sy lewe op te offer om ons van sonde en die dood te bevry. Waarom was dit nodig?—Matteus 20:28.

3. Deur nie God se gebod te gehoorsaam nie, het die eerste mens, Adam, dit wat die Bybel “sonde” noem, gepleeg. Daarom het God hom ter dood veroordeel (Genesis 3:17-19). Hy het nie meer aan God se standaarde voldoen nie; daarom was hy nie meer volmaak nie. Hy het mettertyd oud geword en gesterf. Adam het sonde aan al sy kinders oorgedra. Dit is waarom ons oud word, siek word en sterf. Hoe kon die mensdom gered word?—Romeine 3:23; 5:12.

4. Jesus was ’n volmaakte mens net soos Adam. Maar in teenstelling met Adam was Jesus volmaak gehoorsaam aan God onder selfs die grootste toets. Hy kon dus sy volmaakte menselewe opoffer om vir Adam se sonde te betaal. Dit is waarna die Bybel verwys as die “losprys”. Adam se kinders kon derhalwe van veroordeling tot die dood verlos word. Almal wat hulle geloof in Jesus stel, kan van hulle sondes vergewe word en die ewige lewe ontvang.—1 Timoteus 2:5, 6; Johannes 3:16; Romeine 5:18, 19.

5. Toe Jesus op die aarde was, het hy die siekes genees, diegene gevoed wat honger was en storms laat bedaar. Hy het selfs die dooies opgewek. Waarom het hy wonderwerke verrig? (1) Hy het medelye gevoel vir mense wat gely het, en hy wou hulle help. (2) Sy wonderwerke het bewys dat hy God se Seun is. (3) Dit het getoon wat hy vir die gehoorsame mensdom gaan doen wanneer hy as Koning oor die aarde heers.—Matteus 14:14; Markus 2:10-12; Johannes 5:28, 29.

6. Jesus het gesterf en is deur God as ’n geesskepsel opgewek, en hy het na die hemel toe teruggekeer (1 Petrus 3:18). Sedertdien het God hom ’n Koning gemaak. Jesus gaan binnekort alle goddeloosheid en lyding van hierdie aarde verwyder.—Psalm 37:9-11; Spreuke 2:21, 22.

[Prente op bladsy 7]

Jesus se bediening het onderrigting, die verrigting van wonderwerke en selfs die opoffering van sy lewe vir ons ingesluit