Les 8

Gesinslewe wat God behaag

Wat is die man se posisie in die gesin? (1)

Hoe moet ’n man sy vrou behandel? (2)

Watter verantwoordelikhede het ’n vader? (3)

Wat is die vrou se rol in die gesin? (4)

Wat vereis God van ouers en van kinders? (5)

Wat is die Bybel se beskouing van egpare wat uitmekaargaan of wat skei? (6, 7)

1. Die Bybel sê dat ’n man die hoof van sy gesin is (1 Korintiërs 11:3). ’n Man moet net een vrou hê. Hulle moet wettig getroud wees.—1 Timoteus 3:2; Titus 3:1.

2. ’n Man moet sy vrou liefhê net soos hy homself liefhet. Hy moet haar behandel soos Jesus sy volgelinge behandel (Efesiërs 5:25, 28, 29). Hy moet nooit sy vrou slaan of haar op enige manier mishandel nie. Hy moet haar eerder eer en respekteer.—Kolossense 3:19; 1 Petrus 3:7.

3. ’n Vader moet hard werk om na sy gesin om te sien. Hy moet sy vrou en kinders van voedsel, klere en huisvesting voorsien. ’n Vader moet ook in sy gesin se geestelike behoeftes voorsien (1 Timoteus 5:8). Hy neem die leiding om sy gesin te help om aangaande God en Sy voornemens te leer.—Deuteronomium 6:4-9; Efesiërs 6:4.

4. ’n Vrou moet ’n goeie hulp vir haar man wees (Genesis 2:18). Sy moet haar man help om hulle kinders te onderrig en op te lei (Spreuke 1:8). Jehovah vereis van ’n vrou om liefdevol na haar gesin om te sien (Spreuke 31:10, 15, 26, 27; Titus 2:4, 5). Sy moet diep respek vir haar man hê.—Efesiërs 5:22, 23, 33.

5. God vereis van kinders om aan hulle ouers gehoorsaam te wees (Efesiërs 6:1-3). Hy verwag van ouers om hulle kinders te onderrig en tereg te wys. Ouers moet tyd saam met hulle kinders deurbring en die Bybel met hulle studeer, dit wil sê na hulle geestelike en emosionele behoeftes omsien (Deuteronomium 11:18, 19; Spreuke 22:6, 15). Ouers moet nooit hulle kinders op ’n harde of wrede manier dissiplineer nie.—Kolossense 3:21.

6. Wanneer huweliksmaats dit moeilik vind om met mekaar oor die weg te kom, moet hulle die Bybel se raad probeer toepas. Die Bybel spoor ons aan om liefde te betoon en vergewensgesind te wees (Kolossense 3:12-14). God se Woord moedig ’n egpaar nie aan om uitmekaar te gaan as ’n manier om geringe probleme op te los nie. Maar ’n vrou sal dalk besluit om haar man te verlaat as (1) hy koppig weier om sy gesin te onderhou, (2) hy so gewelddadig is dat haar gesondheid en lewe in gevaar is of (3) sy uiterste teenstand dit vir haar onmoontlik maak om Jehovah te aanbid.—1 Korintiërs 7:12, 13.

7. Huweliksmaats moet aan mekaar getrou wees. Egbreuk is ’n sonde teen God en teen ’n mens se maat (Hebreërs 13:4). Buite-egtelike geslagsomgang is die enigste skriftuurlike grond vir egskeiding wat ’n mens toelaat om weer te trou (Matteus 19:6-9; Romeine 7:2, 3). Jehovah haat dit wanneer mense sonder skriftuurlike grond skei en met iemand anders trou.—Maleagi 2:14-16.

[Prente op bladsy 16, 17]

God verwag van ouers om hulle kinders te onderrig en tereg te wys

[Prent op bladsy 17]

’n Liefdevolle vader sorg materieel en geestelik vir sy gesin