Aanhangsel B

Vanuit “die RNS-wêreld” of ’n ander wêreld?

Met die oog op die dooie punt oor die DNS-RNS-proteïen-span het party navorsers “die RNS-wêreld”-teorie geformuleer. Wat is dit? Hulle beweer nie dat DNS, RNS en proteïene tegelykertyd ontstaan het om lewe voort te bring nie, maar sê eerder dat RNS alleen die eerste lewensvonk was. Is dit ’n grondige teorie?

In die tagtigerjare het navorsers in hulle laboratorium ontdek dat RNS-molekules as hulle eie ensieme kan optree deur in twee te verdeel en dan weer te verbind. Daar is dus bespiegel dat RNS moontlik die eerste selfrepliserende molekule was. Daar is teorieë dat hierdie RNS-molekules mettertyd geleer het om selmembrane te vorm en dat die RNS-organisme uiteindelik DNS voortgebring het. “Die apostels van die RNS-wêreld”, skryf Phil Cohen in New Scientist, “glo dat hulle teorie, indien dit nie vir evangelie aangeneem word nie, dan as die naaste aan die waarheid beskou moet word.”

Maar nie alle wetenskaplikes aanvaar hierdie scenario nie. Skeptici, sê Cohen, “het aangevoer dat dit ’n te groot sprong is van die bewys dat twee RNS-molekules ’n mate van selfverminking in ’n proefbuis uitgevoer het tot die bewering dat RNS op sy eentjie ’n sel kon vorm en die verskyning van lewe op die Aarde kon meebring”.

Daar is ook ander probleme. Bioloog Carl Woese voer aan dat “die RNS-wêreld-teorie . . . ’n ernstige leemte het deurdat dit nie verklaar waar die energie vandaan gekom het om die vervaardiging van die eerste RNS-molekules teweeg te bring nie”. En navorsers het nog nooit ’n stuk RNS gevind wat hom uit niks kon repliseer nie. Daar is ook die kwessie van waar RNS in die eerste plek vandaan gekom het. Hoewel “die RNS-wêreld”-teorie in baie handboeke verskyn, sê navorser Gary Olsen dat die meeste daarvan “bespiegelende optimisme is”.

Nog ’n teorie wat party wetenskaplikes voorstaan, is dat lewe op ons planeet sy oorsprong in die buitenste ruimte gehad het. Maar hierdie teorie beantwoord nie werklik die vraag: Wat is die oorsprong van lewe? nie. Die bewering dat lewe vanuit die buitenste ruimte kom, sê wetenskapskrywer Boyce Rensberger, “verander bloot die ligging van die raaisel”. Dit verklaar nie die oorsprong van lewe nie. Dit ontwyk bloot die kwessie deur die oorsprong na ’n ander sonnestelsel of sterrestelsel te verplaas. Die eintlike kwessie bestaan nog steeds.