Waarom sterf ons?
“Bo al die heuweltoppe is dit nou stil, in al die boomtoppe hoor jy beswaarlik ’n geluid; die voëls slaap in die bome: wag; binnekort sal jy soos hulle rus.”—JOHANN WOLFGANG VON GOETHE, DUITSE DIGTER.
1, 2. (a) Met watter begeerte is mense geskep? (b) Watter soort lewe het die eerste mensepaar geniet?
GOD het mense geskep met ’n begeerte om vir ewig te lewe. Trouens, die Bybel sê dat hy “’n gevoel van ewigheid in hulle hart” gesit het (Prediker 3:11, Beck). Maar God het mense nie net die begeerte gegee om vir ewig te lewe nie. Hy het hulle ook die geleentheid gegee om dit te doen.
2 Ons eerste ouers, Adam en Eva, is volmaak geskep, sonder enige verstandelike of liggaamlike gebrek (Deuteronomium 32:4). Stel jou voor—geen chroniese pyn en lyding nie, geen morbiede vrees of angs nie! Wat meer is, God het hulle in ’n pragtige paradystuiste geplaas. God se voorneme vir die mens was dat hy vir ewig sou lewe en dat die aarde mettertyd met sy volmaakte nageslag gevul sou word (Genesis 1:31; 2:15). Waarom sterf ons dan?
Ongehoorsaamheid bring die dood mee
3. Waarvan het ewige lewe vir Adam en Eva afgehang?
3 God het Adam beveel: “Van al die bome van die tuin mag jy vry eet, maar van die boom van die kennis van goed en kwaad, daarvan mag jy nie eet nie; want die dag as jy daarvan eet, sal jy sekerlik sterwe” (Genesis 2:16, 17). Vir Adam en Eva was ewige lewe dus iets voorwaardeliks; dit het van hulle gehoorsaamheid aan God afgehang.
4. Waarom het Adam en Eva die vooruitsig op ewige lewe in die Paradys verloor toe hulle gesondig het?
4 Maar ongelukkig was Adam en Eva ongehoorsaam aan God se wet (Genesis 3:1-6). Sodoende het hulle sondaars geword, want “sonde [is] wetteloosheid” (1 Johannes 3:4). Gevolglik het Adam en Eva nie meer die vooruitsig op ewige lewe gehad nie. Waarom nie? Want “die loon wat die sonde betaal, is die dood” (Romeine 6:23). Toe God oordeel oor Adam en Eva uitgespreek het, het hy dus gesê: “Stof is jy, en tot stof sal jy terugkeer.” Ons eerste ouers is toe uit hulle paradystuiste gesit. Dié dag waarop Adam en Eva gesondig het, het hulle stadig maar geleidelik begin sterf.—Genesis 3:19, 23, 24.
‘Die dood het tot alle mense deurgedring’
5. Hoe het die dood tot die hele menseras deurgedring?
5 Sonde is toe diep in Adam en Eva se gene ingegrif. Gevolglik kon hulle nie ’n volmaakte nageslag voortbring nie, net so min as wat ’n onvolmaakte gietvorm ’n volmaakte voorwerp kan voortbring (Job 14:4). Trouens, elke mens wat gebore word, bevestig dat ons eerste ouers volmaakte gesondheid en ewige lewe vir hulleself en hulle nageslag verloor het. Die Christenapostel Paulus het geskryf: “Deur een mens [het] die sonde in die wêreld ingekom . . . en die dood deur die sonde, en die dood [het] só tot alle mense deurgedring . . . omdat hulle almal gesondig het.”—Romeine 5:12; vergelyk Psalm 51:7.
6. Waarom sterf ons?
6 Vandag weet wetenskaplikes nie presies waarom mense oud word en sterf nie. Die Bybel verduidelik egter dat ons sterf omdat ons met sonde gebore word en hierdie toestand van ons eerste menseouers oorgeërf het. Maar wat gebeur met ons wanneer ons sterf?