’n Waarskuwing uit die verlede

Jehovah sal nie toelaat dat slegte mense die Paradys bederf nie. Net sy vriende sal daarin woon. Wat sal met slegte mense gebeur? Om die antwoord te kry, kan ons na die ware verhaal van Noag kyk. Noag het duisende jare gelede gelewe. Hy was ’n goeie man wat altyd hard probeer het om Jehovah se wil te doen. Maar die ander mense op die aarde het slegte dinge gedoen. Daarom het Jehovah vir Noag gesê dat Hy ’n vloed gaan bring om al daardie goddelose mense te vernietig. Hy het vir Noag gesê om ’n ark te bou sodat hy en sy gesin nie sou sterf wanneer die Vloed kom nie.—Genesis 6:9-18.

Noag en sy gesin het die ark gebou. Noag het die mense gewaarsku dat die Vloed gaan kom, maar hulle het nie na hom geluister nie. Hulle het aangehou om slegte dinge te doen. Nadat die ark klaar gebou is, het Noag die diere in die ark ingeneem, en hy en sy gesin het ook ingegaan. Toe het Jehovah ’n groot storm gebring. Dit het 40 dae en 40 nagte gereën. Die water het die hele aarde oorstroom.—Genesis 7:7-12.

Die goddelose mense het hulle lewe verloor, maar Noag en sy gesin is gered. Jehovah het hulle veilig deur die Vloed heen bewaar en hulle laat woon op ’n aarde wat van goddeloosheid gereinig is (Genesis 7:22, 23). Die Bybel sê dat daar weer ’n tyd sal kom wanneer Jehovah diegene gaan vernietig wat weier om te doen wat reg is. Goeie mense sal nie vernietig word nie. Hulle sal vir ewig op die Paradysaarde woon.—2 Petrus 2:5, 6, 9.

Vandag doen baie mense slegte dinge. Die wêreld is vol probleme. Jehovah stuur sy Getuies keer op keer om die mense te waarsku, maar die meeste mense wil nie na Jehovah se woorde luister nie. Hulle wil nie hulle lewe verander nie. Hulle wil nie aanvaar wat God omtrent reg en verkeerd sê nie. Wat sal met hierdie mense gebeur? Sal hulle eendag verander? Baie sal nooit verander nie. Die tyd kom wanneer goddelose mense vernietig sal word en nooit weer sal lewe nie.—Psalm 92:7.

Die aarde sal nie vernietig word nie; dit sal in ’n paradys omskep word. Diegene wat God se vriende word, sal vir ewig in die Paradys op aarde lewe.—Psalm 37:29.