Die goeie nuus wat hulle wil hê jy moet hoor
TOE Jesus op aarde was, het sy dissipels na hom gekom en gevra: “Wat sal die teken van u teenwoordigheid en van die voleinding van die stelsel van dinge wees?” Hy het geantwoord dat daar oorloë tussen baie nasies sou wees, asook voedseltekorte, pessiektes, aardbewings, ’n toename in wetteloosheid, valse godsdiensleiers wat talle mislei, haat teenoor en vervolging van sy ware volgelinge en ’n afname van baie mense se liefde vir regverdigheid. Wanneer hierdie dinge begin gebeur, sou dit aandui dat Christus onsigbaar teenwoordig is en dat die hemelse Koninkryk op hande is. Dit sou waarlik nuus wees—goeie nuus! Jesus het dus hierdie woorde as deel van die teken bygevoeg: “Hierdie goeie nuus van die koninkryk sal in die hele bewoonde aarde verkondig word tot ’n getuienis vir al die nasies; en dan sal die einde kom.”—Matteus 24:3-14.
Onlangse wêreldgebeure is op sigself sleg, maar wat daardeur aangedui word, naamlik Christus se teenwoordigheid, is goed. Die toestande wat vroeër genoem is, het duidelik begin word in die jaar 1914 wat wyd en syd bekend gemaak is! Dit was die einde van die Heidense Tye en die begin van die oorgangstydperk van menseheerskappy tot die Duisendjarige Heerskappy van Christus.
Die 110de Psalm, verse 1 en 2, en Openbaring 12:7-12 het aangedui dat daar ’n oorgangstydperk sou wees. Daar toon dit dat Christus aan God se regterhand in die hemel sou sit totdat die tyd aanbreek vir hom om Koning te word. Dan sou oorlog in die hemel daartoe lei dat Satan na die aarde neergewerp word. Daar sou wee op die aarde wees, en Christus sou te midde van sy vyande heers. Die algehele einde van goddeloosheid sou kom deur middel van ’n “groot verdrukking” wat ’n hoogtepunt in die oorlog by Armageddon bereik, en dit sal gevolg word deur Christus se Duisendjarige Heerskappy van vrede.—Matteus 24:21, 33, 34; Openbaring 16:14-16.
“Maar weet dít,” sê die Bybel, “dat daar in die laaste dae kritieke tye sal wees wat moeilik is om deur te kom. Want mense sal liefhebbers van hulleself wees, liefhebbers van geld, aanmatigend, hoogmoedig, lasteraars, ongehoorsaam aan ouers, ondankbaar, dislojaal, sonder natuurlike geneentheid, nie bereid tot enige ooreenkoms nie, kwaadsprekers, sonder selfbeheersing, wreedaardig, sonder liefde vir goedheid, verraaiers, eiesinnig, opgeblase van trots, liefhebbers van genot eerder as liefhebbers van God, wat ’n vorm van godvrugtige toegewydheid het maar die krag daarvan verloën; en keer jou van hierdie mense af.”—2 Timoteus 3:1-5.
Party sê moontlik dat hierdie dinge al voorheen in die mensegeskiedenis gebeur het, maar feit is dat dit nog nooit op dieselfde skaal plaasgevind het nie. Soos geskiedkundiges en kommentators sê, was daar nog nooit ’n tydperk op aarde soos die tyd wat ons sedert 1914 beleef nie. (Sien bladsy 7.) Die weë is baie algemener as ooit tevore. Maar wat die ander aspekte van Christus se teken van die laaste dae betref, moet die volgende feite in aanmerking geneem word: Die omvang van die wêreldwye verkondiging van Christus se teenwoordigheid en Koninkryk is ongeëwenaard in die geskiedenis. Nog nooit tevore is mense weens hulle predikingswerk vervolg soos wat Jehovah se Getuies vervolg is nie. Etlike honderde van hulle is in Nazi-konsentrasiekampe tereggestel. Daar is vandag nog ’n verbod op Jehovah se Getuies in sommige plekke, en in ander word hulle in hegtenis geneem, opgesluit, gemartel en doodgemaak. Dit is alles ’n deel van die teken wat Jesus gegee het.
Soos Openbaring 11:18 voorspel het, het ‘die nasies se gramskap ontvlam’ teen Jehovah se getroue Getuies, en dit toon dat Jehovah se “eie gramskap” oor daardie nasies sal kom. Dieselfde teks sê dat God ‘die verderwers van die aarde gaan verderf’. Nog nooit tevore in die mensegeskiedenis is die aarde se vermoë om lewe te onderhou, bedreig nie. Maar nou is dit anders! Baie wetenskaplikes het al gewaarsku dat die aarde onbewoonbaar sal word as die mens dit aanhou besoedel. Maar Jehovah het dit “geformeer . . . om bewoon te word”, en hy sal van die besoedelaars ontslae raak voordat hulle die aarde heeltemal verderf.—Jesaja 45:18.
AARDSE SEËNINGE ONDER DIE KONINKRYK
Die gedagte dat mense op aarde as onderdane van God se Koninkryk gaan lewe, klink dalk vreemd vir baie mense wat in die Bybel glo en dink dat almal wat gered is in die hemel is. Die Bybel toon dat slegs ’n beperkte getal hemel toe gaan en dat diegene wat vir ewig op die aarde gaan lewe ’n onbeperkte groot skare sal wees (Psalm 37:11, 29; Openbaring 7:9; 14:1-5). ’n Profesie in die Bybelboek Daniël toon dat God se Koninkryk in die hande van Christus die aarde sal vul en daaroor sal heers.
Christus se Koninkryk word daar voorgestel as ’n klip wat uit Jehovah se bergagtige soewereiniteit gekap is. Dit tref en vernietig ’n beeld wat magtige nasies op die aarde voorstel, en ‘die klip wat die beeld getref het, het ’n groot berg geword en die hele aarde gevul’. Die profesie sê voorts: “In die dae van dié konings sal die God van die hemel ’n koninkryk oprig wat nooit vernietig sal word nie. En die koninkryk sal aan geen ander volk oorgedra word nie. Dit sal al hierdie koninkryke verbrysel en daar ’n einde aan maak, en self sal dit tot onbepaalde tye bly staan.”—Daniël 2:34, 35, 44.
Dit is hierdie Koninkryk en die skriftuurlike hoop van ewige lewe op ’n gereinigde en pragtige aarde waarvan Jehovah se Getuies jou graag wil vertel. Miljoene wat nou lewe en miljoene der miljoene wat nou in hulle graf is, sal die geleentheid hê om vir ewig daarop te woon. Dan, onder die Duisendjarige Heerskappy van Christus Jesus, sal Jehovah se oorspronklike voorneme met die aarde wat hy geskep het en die eerste mensepaar wat hy daarop geplaas het, verwesenlik word. Op hierdie aardse Paradys sal lewe nooit vervelig word nie. Net soos Adam werk in die tuin van Eden gegee is, sal die mensdom uitdagende projekte hê om na die aarde en die plante- en dierelewe daarop om te sien. Hulle “sal die werk van hulle hande lank geniet”.—Jesaja 65:22, Revised Standard Version; Genesis 2:15.
Baie tekste kan aangehaal word om te toon watter toestande sal bestaan wanneer die gebed wat Jesus ons geleer het, verhoor word: “Laat u koninkryk kom. Laat u wil geskied, soos in die hemel, so ook op die aarde” (Matteus 6:10). Maar hierdie een vers is vir eers genoeg: “Toe het ek ’n harde stem van die troon af hoor sê: ‘Kyk! Die tent van God is by die mense, en hy sal by hulle woon, en hulle sal sy volke wees. En God self sal by hulle wees. En hy sal elke traan van hulle oë afvee, en die dood sal daar nie meer wees nie, en ook verdriet en geskreeu en pyn sal daar nie meer wees nie. Die vorige dinge het verbygegaan.’ En die Een wat op die troon sit, het gesê: ‘Kyk! Ek maak alles nuut.’ Ook sê hy: ‘Skryf, want hierdie woorde is betroubaar en waaragtig.’”—Openbaring 21:3-5.
[Lokteks op bladsy 15]
‘Kritieke tye wat moeilik is om deur te kom’
MAAR “dan sal die einde kom”
[Prent op bladsy 18]
Nederland
[Prent op bladsy 18]
Nigerië