Program om jou vermoë as ’n spreker en onderrigter te ontwikkel
HETSY jy jonk of oud, ’n man of ’n vrou is, hierdie kursus kan jou help om jou beter uit te druk en om bekwamer te word as ’n onderrigter van God se Woord.
Die skoolopsiener gee vir diegene wat by die Teokratiese Bedieningskool aangesluit het, hulle toewysings. Op die volgende drie bladsye sal jy jou persoonlike raadgewingsvorm vind. Die nommers voor die verskillende punte stem ooreen met die studies op die bladsye wat volg. In daardie studies sal jy ’n verduideliking vind van wat dit verg om hierdie aspekte van die spreek- en onderrigkuns te bemeester en waarom elkeen belangrik is. Jy sal ook nuttige riglyne vind wat jou sal help om die wenke toe te pas.
Die kleurkode op die raadgewingsvorm dui aan watter punte van toepassing is op toewysings wat (1) voorlesing, (2) ’n demonstrasie met twee of meer persone of (3) ’n toespraak voor die gemeente behels. Die skoolopsiener sal vir jou sê aan watter punt jy moet werk. Werk verkieslik aan net een punt op ’n slag. Jy sal dit nuttig vind om die oefeninge te doen wat aan die einde van die toegewese studie aanbeveel word. As dit duidelik is dat jy die raad in die toegewese studie suksesvol toegepas het, sal jou raadgewer jou ’n ander punt gee om aan te werk.
As jou toewysing in die vorm van ’n demonstrasie is, sal jy ’n agtergrond nodig hê. ’n Lys van agtergronde verskyn op bladsy 82, maar jy is nie tot hierdie lys beperk nie. Jou raadgewer sal dalk voorstel dat jy ’n sekere agtergrond gebruik om ondervinding op te doen, of hy laat jou dalk jou eie agtergrond kies.
As jy hierdie boek lees en die oefeninge doen, selfs wanneer jy nie vir skooltoewysings voorberei nie, kan dit baie tot jou vooruitgang bydra. Miskien kan jy elke week ’n ander studie dek.
Ongeag hoe lank jy al aan die skool of aan die veldbediening deelneem, daar is ruimte vir verbetering. Mag jy ten volle baat vind by die opleiding wat deur die Teokratiese Bedieningskool voorsien word.