Wil jy graag die Bybel beter leer ken?

Waarom moet jy die Bybel lees?

DIE Bybel is soos geen ander boek nie—dit bevat liefdevolle onderrigting van God af (1 Tessalonisense 2:13). As jy toepas wat die Bybel leer, sal jy baie voordele geniet. Jy sal ’n groter liefde vir God ontwikkel en nader aan hom kom as die Gewer van “elke goeie gawe en elke volmaakte geskenk” (Jakobus 1:17). Jy sal leer hoe om hom in gebed te nader. In moeilike tye kan God jou help. As jy jou lewe in ooreenstemming met die standaarde in die Bybel bring, sal God jou die ewige lewe gee.—Romeine 6:23.

Die Bybel bevat waarhede wat geestelike verligting gee. Diegene wat Bybelkennis opdoen, word bevry van die wanopvattings wat so ’n sterk invloed op miljoene se lewe het. As ons byvoorbeeld weet wat die waarheid is omtrent die dood en wat met ons gebeur wanneer ons sterf, word ons bevry van vrees dat die dooies ons kwaad kan aandoen of dat ons afgestorwe familielede en vriende ly (Esegiël 18:4). Die opstandingsleer in die Bybel vertroos diegene wat geliefdes aan die dood afgestaan het (Johannes 11:25). Kennis van die waarheid omtrent bose engele stel ons op ons hoede vir die gevare van spiritisme en help ons om te verstaan waarom daar soveel probleme op die aarde is.

Die Goddelike beginsels in die Bybel wys ons hoe om te lewe sodat dit vir ons fisiese voordele meebring. Dit bevorder byvoorbeeld goeie gesondheid as ’n mens “matig in gewoontes” is (1 Timoteus 3:2). Deur ons “van elke verontreiniging van die vlees en die gees [te] reinig”, benadeel ons nie ons gesondheid nie (2 Korintiërs 7:1). Dit bevorder ook geluk in die huwelik sowel as selfrespek wanneer ons God se raad in die Bybel toepas.—1 Korintiërs 6:18.

As jy God se Woord toepas, sal jy ’n gelukkiger mens wees. Bybelkennis help ons om gemoedsrus en tevredenheid te vind en gee ons hoop. Dit help ons om aantreklike eienskappe aan te kweek, soos medelye, liefde, vreugde, vrede, goedheid en geloof (Galasiërs 5:22, 23; Efesiërs 4:24, 32). Sulke eienskappe help ons om ’n beter man of vrou, vader of moeder, seun of dogter te wees.

Het jy al ooit gewonder wat die toekoms inhou? Bybelprofesieë help ons om te sien waar ons in die tydstroom is. Hierdie profesieë beskryf nie net wêreldtoestande van vandag nie, maar dit toon ook dat God binnekort die aarde in ’n paradys gaan omskep.—Openbaring 21:3, 4.

Hulp om die Bybel te verstaan

Miskien het jy al die Bybel probeer lees, maar dit moeilik gevind om te verstaan. Dalk weet jy nie waar om in die Bybel te kyk om antwoorde op jou vrae te vind nie. Indien wel, is jy nie alleen nie. Ons almal het hulp nodig om God se Woord te verstaan. In ongeveer 235 lande gee Jehovah se Getuies gratis Bybelonderrig aan miljoene mense. Hulle sal jou ook met graagte help.

Dit is gewoonlik die beste om ’n progressiewe studie van die Bybel te maak en by die grondleerstellings te begin (Hebreërs 6:1). Namate jy vordering maak, sal jy dit makliker vind om “vaste voedsel”—dit wil sê dieper waarhede—in te neem (Hebreërs 5:14). Die Bybel is die gesag. Bybelpublikasies, soos die brosjure Wat vereis God van ons?, sal jou help om teksverwysings oor ’n verskeidenheid onderwerpe te verstaan.

Is jy bereid om elke week tyd in te ruim om die Bybel te verstaan?

’n Bybelstudie kan gewoonlik gehou word op ’n tyd en plek wat vir jou geleë is. Baie studeer in hulle eie huis. Party studeer selfs oor die telefoon. Die studieprogram is nie ’n kursus saam met baie mense nie, maar ’n private bespreking wat by jou persoonlike omstandighede, insluitende jou kennis en geleerdheid, aangepas word. Daar is geen eksamens nie, en jy sal nie in die verleentheid gestel word nie. Jou Bybelvrae sal beantwoord word, en jy sal leer hoe om nader aan God te kom.

Jy hoef nie vir so ’n Bybelstudie te betaal nie (Matteus 10:8). Dit word gratis aangebied vir mense van alle godsdienste en ook vir diegene wat nie aan ’n godsdiens behoort nie, maar baie graag meer kennis van God se Woord wil opdoen.

Wie kan aan hierdie bespreking deelneem? Jou hele gesin. Enige vriende wat jy nooi, kan dit ook bywoon. Of as jy dit verkies, kan die bespreking met jou alleen gehou word.

Baie mense sit elke week ’n uur opsy om die Bybel te bestudeer. As jy elke week meer tyd kan afstaan of as jou tyd baie beperk is, sal die Getuies hulle daarby aanpas sodat hulle jou kan help.

’n Uitnodiging om te leer

Ons nooi jou om met Jehovah se Getuies in aanraking te kom. Een manier is deur na ’n adres hieronder te skryf. Dan sal reëlings getref word sodat iemand ’n gratis tuisbybelstudie met jou kan hou.

□ Lewer asseblief die brosjure Wat vereis God van ons? by my af.

Dui taalvoorkeur aan.

□ Tree asseblief met my in verbinding in verband met ’n gratis tuisbybelstudie.

Tensy anders aangedui, kom alle Skrifaanhalings uit die Nuwe Wêreld-vertaling van die Heilige Skrif.