Hoofstuk 26

Wat van los seks?

“Party seuns en meisies reël om met mekaar alleen te wees om te sien hoe ver hulle kan gaan en met hoeveel verskillende persone hulle seks kan hê.”—Penny.

“Seuns praat openlik daaroor. Hulle spog dat hulle ’n meisie het, maar dat hulle nog steeds met baie ander meisies seks het.”—Edward.

BAIE jongmense van vandag spog dat hulle seks met iemand het sonder dat hulle enige emosionele verbintenis met daardie persoon het, oftewel dat hulle los seks het. Party het selfs kennisse met wie hulle seks kan hê sonder die “komplikasies” van ’n verhouding.

Moenie verbaas wees as dit vir jou aanloklik klink nie! (Jeremia 17:9). Edward, wat vroeër aangehaal is, sê: “Baie meisies het al aangebied om met my seks te hê, en om dit te weerstaan, is die moeilikste stryd wat ek as ’n Christen het. Dis moeilik om nee te sê!” Watter Bybelbeginsels moet jy in gedagte hou as jy gevra word om los seks te hê?

Jy moet weet waarom los seks verkeerd is

Hoerery is so ’n ernstige sonde dat diegene wat dit beoefen, “God se koninkryk nie sal beërf nie” (1 Korintiërs 6:9, 10). Dit is natuurlik waar hetsy twee mense “verlief” is of net los seks het. Om die versoeking in enige van die twee gevalle te weerstaan, moet jy Jehovah se beskouing van hoerery hê.

“Ek glo vas dat Jehovah se weg die beste weg is om te volg.”—Karen, Kanada.

“Onthou, jy is iemand se seun of dogter, baie mense se vriend en deel van ’n gemeente. Jy sal al hierdie mense teleurstel as jy voor die versoeking swig!”—Peter, Brittanje.

As jy Jehovah se beskouing van hoerery verkry, sal dit vir jou moontlik wees om ‘die kwaad te haat’, al is dit vir die vlees aanloklik.—Psalm 97:10.

Voorgestelde leesgedeelte: Genesis 39:7-9. Let op die moedige standpunt wat Josef teen seksuele versoeking ingeneem het en wat hom in staat gestel het om dit te weerstaan.

Wees trots op jou oortuigings

Dit is nie ongewoon vir jongmense om met trots standpunt in te neem vir iets waarin hulle glo nie. Jy het die voorreg om God se standaarde deur jou gedrag hoog te hou. Moenie skaam wees oor jou beskouing van voorhuwelikse seks nie.

“Maak dit van die begin af duidelik dat jy sedelike beginsels het.”—Allen, Duitsland.

“Die seuns saam met wie ek op hoërskool was, het geweet wie ek is en dat dit ’n mors van asem sou wees om my te probeer ompraat om seks te hê.”—Vicky, Verenigde State.

As jy ’n standpunt vir jou oortuigings inneem, is dit ’n teken dat jy ’n volwasse Christen word.—1 Korintiërs 14:20.

Voorgestelde leesgedeelte: Spreuke 27:11. Kyk watter uitwerking jou goeie gedrag op Jehovah se hart kan hê!

Wees ferm!

Dit is belangrik om nee te sê. Maar party sal dit dalk misverstaan en dink dat jy net maak asof jy nie belangstel nie.

“Alles omtrent jou—insluitende hoe jy aantrek, hoe jy praat, met wie jy praat en jou interaksie met ander—moet wys dat jy glad nie belangstel nie.”—Joy, Nigerië.

“Jy moet die persoon duidelik laat verstaan dat jy nooit gaan ingee nie. Moet nooit geskenke aanvaar van seuns wat jou probeer oorreed om met hulle seks te hê nie. Hulle kan dit teen jou gebruik, asof jy hulle iets daarvoor skuld.”—Lara, Brittanje.

Jehovah sal jou help as jy toon dat jy ferm standpunt inneem vir wat reg is. Die psalmis Dawid kon uit eie ondervinding van Jehovah sê: “Met iemand wat lojaal is, sal u lojaal handel.”—Psalm 18:25.

Voorgestelde leesgedeelte: 2 Kronieke 16:9. Let op dat Jehovah gretig is om diegene te help wat wil doen wat reg is.

Probeer dinge vooruitsien

Die Bybel sê: “Skerpsinnig is die een wat die rampspoed gesien en hom verberg het” (Spreuke 22:3). Hoe kan jy hierdie raad volg? Deur dinge vooruit te probeer sien!

“Bly sover moontlik weg van mense wat oor sulke dinge praat.”—Naomi, Japan.

“Moenie persoonlike inligting, soos jou adres of telefoonnommer, vir ander gee nie.”—Diana, Brittanje.

Dink aan jou spraak, gedrag, vriende sowel as die plekke wat jy dikwels besoek. Vra jou dan af: ‘Skep ek onwetend die indruk dat ander my maar kan vra om seks te hê?’

Voorgestelde leesgedeelte: Genesis 34:1, 2. Let op hoe ’n meisie met die naam Dina tragiese gevolge ervaar het omdat sy op die verkeerde plek was.

Onthou, los seks is vir Jehovah God ’n baie ernstige saak, en jy moet dit ook so beskou. Deur ’n standpunt in te neem vir wat reg is, kan jy jou selfrespek asook ’n rein gewete voor God behou. ’n Meisie met die naam Carly stel dit so: “Waarom sou jy toelaat dat iemand jou ‘gebruik’ vir sy eie onmiddellike bevrediging? Moenie alles waarvoor jy so hard gewerk het, sommer net weggooi nie!”

SLEUTELTEKSTE

“Julle [moet] julle uiterste bes doen om uiteindelik deur [God] vlekkeloos en smetloos en in vrede bevind te word.”—2 Petrus 3:14.

WENK

Werk daaraan om jou innerlike eienskappe te verbeter (1 Petrus 3:3, 4). Hoe beter jy as ’n persoon is, hoe beter sal die persoon wees wat tot jou aangetrokke voel.

HET JY GEWEET . . . ?

Jehovah wil hê dat jy seks geniet soos hy bedoel het dit moet wees—’n bron van genot in die huwelik—sonder die bekommernisse, spyt en onsekerheid wat so dikwels met hoerery gepaardgaan.

AKSIEPLAN!

Ek kan Josef se vasbeslotenheid om sedelik rein te bly, navolg as ek ․․․․․

Ek sal die fout vermy wat Dina gemaak het as ek ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom is voorhuwelikse seks verkeerd, al is dit vir die onvolmaakte vlees aanloklik?

● Wat sal jy doen as iemand jou vra om seks te hê?

[Lokteks op bladsy 185]

Wees ferm! Toe ’n jong man ’n onsedelike voorstel aan my gemaak het, het ek gesê: ‘Haal jou hand van my skouer af!’ en ek het met ’n kwaai uitdrukking op my gesig weggeloop.’’—Ellen.

[Prent op bladsy 187]

As jy los seks het, maak jy jou goedkoop