Wanneer ’n tragedie plaasvind

Hoewel julle julle bes doen om ’n gelukkige huwelik en gesin te hê, kan onverwagte dinge gebeur wat dit vir julle moeilik maak om julle vreugde te behou (Prediker 9:11). Omdat God vir ons lief is, help hy ons wanneer ons voor probleme te staan kom. As julle die volgende skriftuurlike beginsels toepas, sal julle gesin selfs die moeilikste situasies die hoof kan bied.

1 VERTROU OP JEHOVAH

WAT DIE BYBEL SÊ: “[Werp] al julle sorge op hom . . . , want hy sorg vir julle” (1 Petrus 5:7). Hou altyd in gedagte dat God nie vir julle probleme verantwoordelik is nie (Jakobus 1:13). Terwyl julle nader aan hom kom, sal hy julle op die beste moontlike manier help (Jesaja 41:10). “Stort julle hart voor hom uit.”—Psalm 62:8.

Jy sal ook vertroosting vind as jy jou Bybel elke dag lees en bestudeer. Gevolglik sal jy ondervind hoe Jehovah “ons in al ons verdrukking vertroos” (2 Korintiërs 1:3, 4; Romeine 15:4). Hy belowe dat hy jou “die vrede van God wat alle denke te bowe gaan”, sal gee.—Filippense 4:6, 7, 13.

WAT JY KAN DOEN:

• Bid vir Jehovah se hulp om kalm te bly en helder te dink

• Oorweeg al jou opsies en kies die beste handelswyse wat jy kan

2 SIEN OM NA JOUSELF EN NA JULLE GESIN

WAT DIE BYBEL SÊ: “Die hart van iemand met begrip verwerf kennis, en die oor van die wyses probeer kennis vind” (Spreuke 18:15). Kry al die feite. Vind uit wat die behoeftes van elke lid van die gesin is. Praat met hulle. Luister na hulle.—Spreuke 20:5.

Sê nou ’n geliefde sterf? Moenie bang wees om te sê hoe jy voel nie. Onthou dat selfs Jesus “trane gestort” het (Johannes 11:35; Prediker 3:4). Dit is ook belangrik om genoeg rus en slaap te kry (Prediker 4:6). Dit sal dit makliker maak om ’n ontstellende situasie die hoof te bied.

WAT JY KAN DOEN:

• Voordat ’n tragedie plaasvind, moet jy ’n gewoonte daarvan maak om met jou gesinslede te kommunikeer. Wanneer probleme ontstaan, sal dit vir hulle maklik wees om met jou te praat

• Praat met ander wat dalk al voor ’n soortgelyke situasie te staan gekom het

3 KRY DIE NODIGE ONDERSTEUNING

WAT DIE BYBEL SÊ: “’n Ware metgesel het te alle tye lief en is ’n broer wat gebore word vir die tyd wanneer daar benoudheid is” (Spreuke 17:17). Jou vriende wil jou help, maar weet dalk nie wat om te doen nie. Moenie huiwer om vir hulle te sê wat jy werklik nodig het nie (Spreuke 12:25). Soek ook geestelike hulp by dié wat die Bybel verstaan. Die Bybelse raad wat hulle jou kan gee, sal jou help.—Jakobus 5:14.

Jy sal die ondersteuning vind wat jy nodig het, as jy gereeld assosieer met mense wat werklik geloof in God het en wat hulle vertroue in sy beloftes stel. Jy sal ook groot vertroosting daaruit put wanneer jy ander help wat aanmoediging nodig het. Vertel hulle van jou geloof in Jehovah en sy beloftes. Bly besig deur ander te help, en moet jou nie afsonder van diegene wat vir jou lief is en vir jou omgee nie.—Spreuke 18:1; 1 Korintiërs 15:58.

WAT JY KAN DOEN:

• Praat met ’n hegte vriend, en laat toe dat hy jou help

• Wees spesifiek en eerlik oor wat jy nodig het