Was “die Woord” God?

MENSE wat glo dat God ’n Drie-eenheid is, en dat Jesus God is, haal Johannes 1:1 en Johannes 20:28 ter stawing van hierdie leerstelling aan.

In baie vertalings lui Johannes 1:1 soos volg: “In die begin was die Woord, en die Woord was by God, en die Woord was God.” Maar nougesette vertalers het dit nodig gevind om te erken dat daar ’n verskil is tussen die twee gebruike van die woord “God” in hierdie vers.

The New English Bible sê: “Wat God was, was die Woord.” Today’s English Version sê: “Hy was dieselfde as God.” An American Translation sê: “Die Woord was goddelik.”

Waarom sê hierdie vertalings nie doodeenvoudig dat die Woord ‘God was’ nie? Omdat die tweede gebruik van die woord “God” in Grieks, die taal waarin hierdie woorde oorspronklik geskryf is, nie dieselfde as die eerste is nie. Die bepaalde lidwoord “ho” (die) verskyn voor die eerste gebruik van die woord God maar nie voor die tweede nie. Gevolglik sê The Anchor Bible: “Om in Engels die verskillende nuanse van theos [god] met en sonder die lidwoord te bewaar, vertaal sommige (Moffatt) dit: ‘Die Woord was goddelik.’”

Ons kan Johannes se woorde hier beter verstaan as ons ontleed wat hy nou eintlik gesê het. Let weer daarop dat hy geskryf het: “In die begin was die Woord.” Hy praat natuurlik nie van God se begin nie, want God het geen begin gehad nie (Psalm 90:1, 2). Dit was die begin van die dinge wat Johannes hier bespreek, met inbegrip van die skepping van alle ander dinge deur “die Woord”. Dan sê Johannes: “Die Woord was by God.” ’n Persoon wat by iemand is, is uiteraard nie dieselfde as die een by wie hy is nie.

Die belangrike saak is natuurlik wat Johannes bedoel het toe hy hierdie woorde geskryf het. Skep dit ’n probleem? Ja, as jy wil hê dit moet sê dat Jesus “GOD” is, want dit is baie duidelik uit Johannes se geskrifte dat hy nie verstaan het dat Jesus “God” is in dieselfde sin as wat die Vader God is nie. In dieselfde hoofstuk het Johannes byvoorbeeld geskryf: “Niemand het ooit God gesien nie; die eniggebore Seun wat in die boesem van die Vader is, dié het Hom verklaar” (Johannes 1:18). Het iemand God al gesien? Nee. Het iemand Jesus gesien? Natuurlik!

Die Christendom se Geloofsbelydenis van Athanasius, wat die Drie-eenheid definieer, sê dat “geeneen groter of minder is as ’n ander nie”. En tog teken Johannes herhaaldelik Jesus se eie woorde op waarin hy sy onderdanigheid aan die Vader uitspreek. Hy is deur die Vader “gestuur”, deur die Vader werke gegee, deur die Vader gesê wat om te doen en te sê, en hy het gesê dat hy gekom het, nie om sy eie wil te doen nie, “maar die wil van Hom wat My gestuur het”.—Johannes 6:38; 3:17; 5:36; 8:28; 12:49, 50.

Johannes het ook Jesus se eie verklaring opgeteken dat die Vader “die enige waaragtige God” is, en dat “my Vader groter is as Ek” (Johannes 17:3; 14:28). Hy het vyf gevalle neergeskryf waar Jesus die Vader “my God” noem. Vier van hierdie gevalle was lank na Jesus se opstanding en hemelvaart (Johannes 20:17; Openbaring 3:12). En op minstens vyf ander plekke het Johannes versigtig die onderskeid getoon, nie net tussen die Vader en die Lam nie, maar tussen God en die Lam Jesus Christus (Openbaring 1:1; 7:10; 21:22; 22:1-3). Johannes sê dat hy geskrywe het, nie om te toon dat Jesus God, of selfs “God die Seun”, is nie, maar “dat julle kan glo dat Jesus die Christus is, die Seun van God”.—Johannes 20:31.

Hierdie woorde toon dat Johannes bewus was van die verhouding tussen Jesus en die een wat Johannes ons meedeel dat Jesus “God” genoem het. Johannes 1:1 is nie ’n weerspreking hiervan nie. Die korrekte vertaling is: “In die begin was die Woord, en die Woord was by God, en die Woord was ’n god.” Dit is dieselfde konstruksie as wat jy in Handelinge 28:6 sal aantref, waar die mense van Malta gedink het dat Paulus “’n god” was.

Wat dan van Thomas se uitroep van verbasing toe hy die verrese Jesus gesien het: “My Here en my God!”? (Johannes 20:24-29). Thomas was diep geroer deur die besef dat Jesus Christus inderdaad opgewek is en dat hy hom van aangesig tot aangesig gesien het. Daar is egter niks in die verslag wat aandui dat Thomas gedink het dat Jesus gelyk is aan die Vader nie. Johannes, wat Thomas se woorde opgeteken het, het vroeër geskryf dat Jesus gesê het dat selfs mense “gode” genoem is. Die verrese Here Jesus Christus is sekerlik groter as enige mens (Johannes 10:34, 35). En in die einste hoofstuk waarin ons Thomas se woorde lees, het Johannes Jesus se verklaring opgeteken dat die Vader Jesus se God is.—Johannes 20:17.

Paulus het getoon dat eersteeeuse Christene die korrekte begrip gehad het van die verhouding tussen Jesus en sy hemelse Vader toe hy geskryf het dat “daar vir ons maar een God, die Vader [is] . . . en een Here Jesus Christus”.—1 Korinthiërs 8:6.