Onthou jy?

Het jy die laaste paar nommers van “Die Wagtoring” geniet? Kyk of jy die volgende gedagtes kan onthou:

◻ Wat behels dit ‘om in die Here Jesus Christus te glo en gered te word’? (Handelinge 16:30, 31).

Dit is meer as net ’n kort, emosionele ervaring. Dit beteken dat ’n persoon die waarheid van God se Woord leer, die Skrif gereeld bestudeer en dit in sy lewe toepas (Handelinge 2:41, 42; 17:11). Dit behels ook dat ons Jesus Christus as ons Vrykoper aanvaar en hom gehoorsaam en erken as Jehovah se Koning en Verdediger (1 Timotheüs 2:5, 6; Hebreërs 5:9; Openbaring 7:10).—1/11, bladsye 6-8.

◻ Hoe kan ons ons hartgrondige waardering vir die Skepper toon?

Ons liefde en dankbaarheid vir die Skepper behoort ons te beweeg om hom uit vrye wil te dien. Dit behels meer as om ’n rein lewe te lei en nie dinge te doen wat verkeerd is in God se oë nie. Godvrugtige gedrag is noodsaaklik, maar ons diens aan Jehovah sluit ook in dat ons hom aktief en met vreugde loof en dat ons vir ander van sy groot dade en wonderlike voornemens vertel (Psalm 96:2-4).—15/11, bladsy 7.

◻ ln hoeveel godsdiensgroepe is die mensdom verdeel?

Daar word geskat dat daar 10 groot gelowe en 10 000 sektes is.—1/12, bladsy 3.

◻ Waarom is Jehovah se Getuies nie ’n sekte nie?

Jehovah se Getuies is nie die dissipels van ’n menseleier of -leraar nie. Jehovah God en Christus Jesus is hulle onderrigters. Daarom is Jehovah se Getuies nie ’n sekte nie.—1/12, bladsy 9.

◻ Vir watter wêreld het Jesus nie gebid nie? (Johannes 17:9).

Dit is die georganiseerde mense-gemeenskap wat afsonderlik van of buitekant God se sigbare organisasie bestaan. Dit bestaan uit drie dele wat nou met mekaar verband hou: valse godsdiens, politieke regerings en kommersiële stelsels (Openbaring 17:3, 5; 13:1, 2; 18:11, 15).—1/12, bladsy 22.

◻ Wat is party van die dinge wat ons uit die boek Exodus kan leer?

Jehovah word in die boek Exodus uitgebeeld as ’n God wat sy volk onderskraag, as die onvergelyklike Verlosser en as die God van teokratiese organisasie. Dit versterk die vertroue wat Jehovah se Getuies vandag het dat hy net so teenoor hulle sal optree.—1/12, bladsy 31.

◻ Wat is nodig voordat hierdie aarde ’n paradys kan word?

Paradys behels veel meer as natuurskoon en vrede in die diereryk en tussen diere en mense. Paradys behels ook mense wat godvrugtige persoonlikhede met vredeliewende geaardhede aangekweek het, mense wat in liefde met mekaar oor die weg kom.—15/12, bladsye 3, 4.

◻ ln watter sin bestaan daar vandag ’n paradys op aarde?

Vergeleke met die tweedrag, onenigheid en onsedelikheid in die wêreld vandag, vorm die liefde, gemoedsrus en eenheid onder Jehovah se Getuies ’n geestelike paradys vir hulle. Dit is ’n voorsmaak van hoe mense gedurende die Duisendjarige Heerskappy van Christus Jesus vreedsaam in ’n fisiese paradys op hierdie aarde sal lewe (Jesaja 11:6-9).—15/12, bladsye 4-7.

◻ Wat het Jesus bedoel toe hy vir die kwaaddoener gesê het: “Jy sal saam met my in die Paradys wees”? (Lukas 23:43, NW).

Die kwaaddoener was nie ’n getroue Christenoorwinnaar wat die lewe kon beërf as ’n medeheerser van Christus in die hemel nie. Jesus het derhalwe nie aan die sterwende dief ’n hemelse paradys beloof nie. Jesus se, woorde beteken dat hy saam met die kwaaddoener sal wees deur hom uit die dood tot ’n aardse paradys op te wek en dan in sy fisiese en geestelike behoeftes sal voorsien.—1/1, bladsye 4-6.

◻ Wat is die ware betekenis van die woord “Armageddon”?

Die woord beteken “berg van troepemagte”. Armageddon is dus nie ’n letterlike plek op aarde nie, maar is die toestand waarin wêreldheersers hulle bevind wanneer hulle hulle teen die almagtige God versamel vir oorlog (Openbaring 16:13-16).—15/1, bladsye 3-6.

◻ Hoe kan ’n Christen plesier op sy plek hou?

Plesier kan op sy plek gehou word deur ons te onderwerp aan die leidende beginsels van die Bybel ten opsigte van die kwaliteit, kwantiteit, tyd en koste van dinge.—15/1, bladsy 26.

◻ Wat is die herskepping waarvan Jesus in Mattheüs 19:28 (NW) praat?

Jehovah het oorspronklik bedoel dat mense vir ewig op aarde moet lewe en ware vrede en veiligheid moet geniet. Hierdie voorneme sal gedurende Christus se Duisendjarige Heerskappy verwesenlik word, en dit sal lei tot ’n herstelling van Edeniese toestande. Met ander woorde, die teokratiese stelsel waaronder mense aanvanklik op hierdie aarde gelewe het, sal herskep word.—1/2, bladsye 8, 9.

◻ Watter voordele hou dit in om die Bybelse voorbeeld te volg en God se eienaam te gebruik?

Dit help ons om God as ’n persoon te beskou en nie net as ’n krag nie. Dit help ons om nader aan hom te kom, skakel verwarring uit, gee ons ’n duideliker insig van hom en bring ons gedagtes nader aan wat die Bybel werklik leer.—15/2, bladsye 10-13.