‘Eenheid van gees’ in ’n snel groeiende kudde
1. (a) Watter gepaste raad oor eenheid het Paulus in Efesiërs 4:1-6 gegee? (b) Waarom is daardie raad ook gepas vir ons dag?
TOE die apostel Paulus aan Christene in die gemeente in Efese geskryf het, het hy klem gelê op eenheid en hulle aangespoor om nederig te wees, om mekaar in liefde te verdra en om ernstig daarna te strewe om “die eenheid van gees te bewaar in die verenigende band van vrede” (Efesiërs 4:1-6, NW). Paulus het meer as twee jaar in Efese deurgebring en het die uiteenlopende agtergronde van die broers aldaar geken. Hy het ook geweet dat die verenigende invloede wat Jehovah onder sy volk in werking gestel het sulke verskille te bowe kon kom, en Paulus het hulle aangespoor om hierdie invloede te waardeer en daarmee saam te werk. Vandag is dit net so belangrik dat ons dit doen. Waarom? Omdat persone “uit alle nasies en stamme en volke en tale” in groot getalle in Jehovah se organisasie versamel word.—Openbaring 7:9, 10.
2. Hoe bewaar Jehovah die eenheid van sy sigbare organisasie?
2 In ooreenstemming met sy voorneme het Jehovah sy knegte “soos skape in ’n kraal” verenig (Miga 2:12). Hy gee aan hulle die nodige leiding om daardie eenheid te bewaar. Hoe? Hy het persoonlik sy eie Seun, Jesus Christus, as hoof van die Christengemeente aangestel. In die Bybel het Jehovah besonderhede aangaande sy voorneme laat opteken, en deur sy sigbare organisasie rig hy die werksaamheid van sy knegte langs weë wat met daardie voorneme strook. Dit is geloofversterkend om die getuienis van hierdie goddelike leiding in hedendaagse tye, sedert 1919, in oënskou te neem.
Voorbereid om ’n aardwye getuienis te gee
3. Watter werk in verband met die Koninkrykserfgename het die Bybel vir die voleinding van die stelsel voorspel?
3 Waar dit die voleinding van die stelsel bespreek, het die Skrif voorspel dat die verstrooide “uitverkorenes” weer in organisatoriese eenheid versamel sal word, en dat daar ’n insameling van die laaste lede van die Koninkryksklas sou wees (Mattheüs 24:31; 13:37-43, 47-50). Hoe is dit bewerkstellig?
4. (a) Watter tasbare middel het Christus en die engele gebruik om daardie byeenbrenging en insameling van die oorblyfsel te bewerkstellig? (b) Watter twee middele het Jehovah hier gebruik om sy knegte te verenig?
4 Die Skrif sê dat Christus sy engele sal stuur om dit te doen. Niemand op aarde kan daardie geesskepsele sien werk nie, maar die uitwerking van hulle aktiwiteit in Jehovah se sigbare organisasie is duidelik waarneembaar. Na die wrede vervolging wat Jehovah se knegte gedurende die Eerste Wêreldoorlog ondervind het, is hulle met nuwe krag besiel deur middel van Watch Tower-artikels met die titel “Geseënd is die onverskrokkenes”, wat in 1919 gepubliseer is. Jehovah het nog werk vir hulle gehad. By hulle byeenkoms daardie jaar te Cedar Point, Ohio, is daar in die toespraak “Kondig die Koninkryk aan” bekend gemaak dat ’n nuwe publikasie, The Golden Age (nou bekend as Ontwaak!), uitgegee gaan word vir algemene verspreiding onder die publiek om mense se aandag te vestig op “die Goue Eeu van die glorieryke heerskappy van die Messias”. Al die “uitverkorenes” is aangemoedig om aan hierdie werk deel te neem. In 1922, by nog ’n byeenkoms in Cedar Point, is die volgende kragtige aansporing gegee: “Adverteer, adverteer, adverteer die Koning en sy koninkryk.” In 1925 het die werk nog ’n groot stoot gekry toe Jehovah se knegte die betekenis van hulle na-oorlogse werksaamheid in die lig van Openbaring hoofstuk 12 begryp het. Toe, in 1931, deur ’n resolusie wat by ’n byeenkoms in Columbus, Ohio, en later by 50 ander byeenkomste aanvaar is, is die naam Jehovah se Getuies aangeneem, ’n naam wat hierdie Christene van al die sektes van die Christendom afgesonder en hulle Godgegewe werk beklemtoon het (Jesaja 43:10-12). Jehovah het dus sy knegte verenig (1) deur ’n progressiewe begrip van die Skrif en (2) deur hulle tot ywerige aktiwiteit as sy getuies aan te vuur.
5. Wat is aldus teen 1935 bereik danksy verenigde optrede onder Jehovah se leiding?
5 Hoewel hulle maar min was, het hulle verenigde optrede onder Jehovah se leiding tot gevolg gehad dat die Koninkryksboodskap die eindes van die aarde bereik het. Van 1921 tot 1935 het hulle 205 217 917 gebonde boeke en boekies in tientalle tale versprei. Honderdmiljoene traktate is ook uitgegee en daar is op groot skaal van die radio gebruik gemaak. Die gevolg was dat nog duisende hulle aan Jehovah toegewy het, gedoop is en met heilige gees gesalf is terwyl die insameling van die Koninkryksklas ten einde geloop het. Maar hulle openbare bediening was nog nie afgehandel nie. Jehovah het hulle voorberei vir wat voorgelê het.
Versterk om teenstand die hoof te bied
6. Waarvoor het Jehovah sy gesalfde knegte nog voorberei?
6 Gedurende die Eerste Wêreldoorlog is die gesalfdes deur die vyand verstrooi. En daar sou verdere boosaardige pogings wees om hulle werk te verpletter. Maar Jehovah het hulle versterk sodat hulle nooit weer ’n verstrooide kudde sou word nie. Hoe het hy dit gedoen?
7. Hoe het Jehovah sy volk ten tye van die herbouing van die tempel in staat gestel om eendragtig vooruit te gaan ondanks teenstand?
7 Toe teenstand die herbouing van Jehovah se tempel in die wiele gery het nadat die ballinge uit Babilon teruggekeer het, het Jehovah sy volk versterk deur profete, sigbare woordvoerders, te verwek en aan hulle tydige boodskappe te gee om oor te dra. Daarbenewens het Jehovah se gees bergagtige struikelblokke te bowe gekom en sy knegte in staat gestel om as ’n verenigde organisasie te funksioneer.—Haggai 1:1-8; Sagaria 4:1-14.
8. Op watter manier het Jehovah die broers in die eerste eeu versterk?
8 Toe ware aanbidders in die eerste eeu teenstand van die vyand ondervind het, het Jehovah die apostels beweeg om briewe te skryf waarin raad en vermaning gegee is. In hierdie briewe is die hoofaanstigter van teenstand duidelik geïdentifiseer as Satan die Duiwel, wat daarop uit is om die prediking van die goeie nuus te stuit deur middel van gewelddadige vervolging of deur die eenheid van die gemeentes deur die invloed van valse broers te ontwrig. So is almal gehelp om die betrokke geskille duidelik te sien (Efesiërs 6:10-13; 2 Korinthiërs 11:12-15; 1 Petrus 5:5-8). Hulle is liefdevol aangemoedig om ‘in een gees vas te staan en, een van siel, saam te stry vir die geloof van die evangelie, en om hulle in geen opsig deur die teenstanders te laat afskrik nie’.—Filippense 1:27, 28.
9 (a) Hoe het Jehovah in hedendaagse tye sulke hulp voorsien? (b) Gee voorbeelde hiervan.
9 In hedendaagse tye het Jehovah aangehou om sy knegte van die nodige hulp te voorsien. Hy doen dit deur “die getroue en verstandige dienskneg”, die oorblyfsel vandag op aarde, waarvan Jesus die aangestelde hoof is, en hierdie hulp kom presies op die regte tyd (Mattheüs 24:45-47). In 1925 het die “dienskneg”-klas, deur middel van The Watch Tower, sy lesers gehelp om te besef dat God se Koninkryk sedert 1914 in die hemele regeer en dat daar in werklikheid net twee organisasies is—Jehovah s’n en Satan s’n. In 1929 is daar sterk klem gelê op die Christelike verpligting om altyd aan God se wet meer gehoorsaam te wees as aan die mens s’n. Stap vir stap is daar organisatoriese aanpassings gemaak totdat, in 1938, alle opsieners in die gemeentes teokraties aangestel is in plaas van deur gemeentelike stemming. Dit alles het Jehovah se knegte verenig en versterk, en hoe tydig was dit tog!
10. (a) Hoekom was daardie hulp so tydig? (b) Watter verdere hulp het Jehovah aan hulle verleen toe die vervolging uitgebreek het?
10 Gedurende die dertigerjare en reg deur die Tweede Wêreldoorlog het Jehovah se Getuies in baie lande swaar vervolging verduur. Duisende is hof toe gesIeep. In tientalle lande is hulle werk deur die regering verbied. Baie is jare lank in totalitêre konsentrasiekampe aangehou. Toe hierdie vervolging begin het, het Jehovah sy knegte verder versterk. Watch Tower-studies in 1931 het bespreek hoe die Jode in die dae van koningin Ester nie net om hulle lewe geveg het nie, maar ook tot die aanval oorgegaan het teen hulle vyande, en daar is getoon hoe dit vandag op geestelike oorlogvoering van toepassing is. In 1934 het artikels oor “Die Smeltkroes” die verhaal van die drie Hebreërs in die vuuroond gebruik om Jehovah se Getuies te besiel met vasberadenheid om met volle vertroue in Jehovah vas te staan (Daniël 3:17, 18, 28). Jehovah het nog ’n groot werk gehad wat gedoen moes word, en hy sou nie toelaat dat sataniese teenstand dit dwarsboom nie.
Die insameling van ’n “groot menigte” vir oorlewing
11. (a) Vir watter groter predikingswerk het Jehovah sy knegte voorberei? (b) Meld sommige van die stappe in hierdie goddelik beskikte voorbereidingsprogram.
11 Toe die insameling van die “klein kuddetjie” Koninkrykserfgename voltooiing genader het, het Jehovah die aandag op ’n selfs groter werk gevestig, naamlik die opvoeding van ’n “groot menigte” wat die “groot verdrukking” sal oorleef om in ’n herstelde paradys op aarde te lewe. In 1918 het die president van die Wagtoringgenootskap derhalwe ’n toespraak in Los Angeles, Kalifornië, gehou oor ’n onderwerp wat later deur honderde ander sprekers herhaal sou word. Die titel was “Die wêreld het geëindig, miljoene wat nou lewe sal nooit sterf nie.” Toe, in 1923, het The Watch Tower aangetoon dat die “ander skape” van Johannes 10:16 dieselfde is as die “skape” van Jesus se gelykenis van die skape en bokke, en dat hulle alreeds na vore begin kom. In 1931 is daar getoon dat hulle in Esegiel 9:1-11 afgeskadu is as persone wat ’n teken vir oorlewing op die voorkop ontvang. In 1932 is daar onthul dat hierdie selfde klas afgebeeld is deur Jonadab, wat besef het hoe noodsaaklik dit is dat Jehovah uitsluitlike toewyding ontvang. Hierdie goddelik beskikte voorbereidingsprogram het in 1935 ’n hoogtepunt bereik toe daar by ’n byeenkoms in Washington, D.C., aangetoon is dat die “groot menigte” van Openbaring 7:9-17 ook daardie aardse klas is en honderde in die gehoor hulle as lede van daardie groep geïdentifiseer het. Onder die leiding van Jehovah se gees het die insameling van hierdie groep nou vinnig vooruitgegaan.
12. (a) Waarom het die samevoeging van persone met ’n aardse hoop en diegene wat ’n hemelse hoop het nie tot onenigheid gelei nie? (b) Wat was, danksy Jehovah se seën, tot dusver die resultaat van hulle eendragtige werk?
12 Het hierdie samevoeging van ’n aardse klas by diegene wat ’n hemelse hoop het tot onenigheid in die organisasie gelei? Glad nie. Soos Jesus voorspel het, het hulle “een kudde” geword met hom as hulle “een herder” (Johannes 10:16). Hulle besef dat altwee verwagtinge ’n blyk van Jehovah se onverdiende goedheid is, dat hulle almal die voorreg en verantwoordelikheid het om getuies van Jehovah se naam en Koninkryk te wees en dat dieselfde Christelike standaard van getrouheid vir hulle almal geld. Hulle is waarlik ’n verenigde volk. Saam het hulle hulle daarop toegelê om die Koninkryksgetuienis in die hele bewoonde aarde te gee, en dit het ’n groot insameling tot gevolg gehad. Na die Eerste Wêreldoorlog was daar net ’n paar duisend wat Jehovah se Koninkryk in die openbaar verkondig het. Dit was eers in 1941 dat oor die 100 000 wêreldwyd aan hierdie werk deelgeneem het. Vandag is daar 2 652 323 wat verenig is as openbare verkondigers van die Koninkryksboodskap. Dit is net soos Jehovah by monde van die profeet Jesaja voorspel het: “Die kleinste sal ’n geslag word en die geringste ’n magtige nasie. Ek, die HERE, sal dit op die regte tyd gou laat kom.”—Jesaja 60:22.
Samewerking om die nodige geriewe te voorsien
13. Watter uitwerking het hierdie groei op die drukwerk van die Wagtoringgenootskap gehad, en hoe is daar in die behoefte voorsien?
13 Hierdie ontsaglike getalleaanwas onder Jehovah se Getuies het groter en beter geriewe noodsaaklik gemaak. Gedurende die twintigerjare is die meeste van die Bybellektuur wat deur die Getuies gebruik is in Brooklyn, New York, gedruk. Vandag word sulke drukwerk ook in nagenoeg 30 ander lande gedoen. Vrywillige bydraes voorsien die nodige fondse, en waar daar ’n gebrek in een land is, word dit deur milde hulp van ander lande aangevul.—Vergelyk 2 Korinthiërs 8:14.
14. Hoe is die nodige nuwe Koninkryksale sedert 1935 voorsien?
14 In dieselfde jaar dat die “groot menigte” korrek geïdentifiseer is as ’n aardse klas, het J. F. Rutherford, destyds die president van die Wagtoringgenootskap, die naam Koninkryksaal aan ’n vergaderplek van Jehovah se Getuies in Hawaii gegee. Sedertdien gebruik Jehovah se Getuies deurgaans hierdie benaming vir hulle vergadersale. Van 1940 tot op hede het die aantal gemeentes van 5 118 tot ver oor die 46 000 aangegroei. Weens hierdie wêreldwye vermeerdering is duisende nuwe Koninkryksale sowel as groter byeenkomssale gebou. Dit het samewerking vereis, wat die finansiering sowel as die bouwerk self betref. Jehovah se verenigde volk het hulle heelhartige ondersteuning gegee!
15. Waarom is dit belangrik dat ons toereikende vergaderplekke het?
15 Vandag stroom meer mense as ooit tevore na die Koninkryksale van Jehovah se Getuies, en die getalle neem vinnig toe. Ons verwelkom almal wat werklik Jehovah se weë wil leer sodat hulle in sy paaie kan wandel (Jesaja 2:2, 3; Hebreërs 10:23-25). Ons wil ook seker maak dat daar toereikende geriewe is vir diegene wat waardering toon vir hierdie voorsiening van Jehovah. Hoe kan dit gedoen word?
16. (a) Hoe moet ons oor die werk en koste voel indien ons groeiende gemeente ’n nuwe Koninkryksaal nodig het, hetsy ons persoonlik die nuwe saal sal gebruik of nie? (b) Hoe kan nuwe Koninkryksale voorsien word wanneer daar groot vermeerderinge is in gebiede waar die koste van eiendom baie hoog is?
16 Ofskoon ons in baie plaaslike gemeentes byeenkom, is ons net “een kudde”, een verenigde volk. Ons belangstelling in die uitbreiding van ware aanbidding en ons liefde vir ons broers sal ons beweeg om op enige moontlike manier te help, ongeag waar die hulp nodig is. Vereis die feit dat meer gemeentes ’n sekere Koninkryksaal gebruik dat ’n nuwe saal gebou word? Hoe goed sal dit wees indien diegene wat aanhou om die ouer saal te gebruik op elke moontlike manier hulp verleen sodat ’n saal gebou kan word vir die gemeente wat hervestig moet word! In sommige gebiede het broers hulself beskikbaar gestel om te help met die bou van ander Koninkryksale wat nodig is. Met sorgvuldige beplanning en goeie samewerking is pragtige nuwe Koninkryksale al in twee dae of minder gebou. In party lande het die hoë koste van eiendom in stedelike gebiede dit egter vir individuele gemeentes onmoontlik gemaak om die nodige geriewe te finansier. Maar wat vir een gemeente onmoontlik is, kan deur ’n gesamentlike poging bereik word. Hoe sal ons reageer wanneer ons hoor van maniere waarop ons kan help?
17. Watter Bybelbeginsels is in hierdie verband gepas?
17 Toe die Israeliete die geleentheid gebied is om skenkings te doen vir die bou van Jehovah se heilige tabernakel, het hulle gewillige harte hulle beweeg om oorgenoeg te voorsien (Exodus 35:5-9; 36:5-7). Groot bydraes ter ondersteuning van ware aanbidding is nie die enigste bydraes wat waardeer word nie. Jesus het die milddadigheid geprys wat weerspieël is deur die geringe bydrae van ’n arm weduwee (Lukas 21:1-4). Die apostel Paulus het die volgende geskryf in verband met voorsienings om medeknegte van God op materiële wyse te help: “As die bereidwilligheid daar is, is dit welgevallig volgens wat iemand besit, nie volgens wat hy nie besit nie. . . . sodat ook hulle oorvloed julle gebrek kan aanvul . . . Soos geskrywe is: Hy wat baie gehad het, het nie te veel gehad nie: en hy wat weinig gehad het, het nie te min gehad nie” (2 Korinthiërs 8:12-15). Ons kan ons deur daardie beginsel laat lei terwyl ons saamwerk om nuwe of groter Koninkryksale te voorsien waar dit nodig is, hetsy ons self in die gebied woon of nie.
18. (a) Wat het ons beweeg om by die onlangse streekbyeenkomste ’n Verklaring van Eenheid af te lê? (b) Wat beteken die eerste punt in daardie Verklaring? (c) die tweede? (d) die derde? (e) Met watter gebed word daardie Verklaring gepas afgesluit?
18 ‘Eenheid van gees’ is ’n kenmerk van Jehovah se organisasie, en ons het persoonlik die voorreg om ’n lewende bewys daarvan te wees. By ons onlangse byeenkomste wêreldwyd het ons ’n tydige verklaring hieroor afgelê. Dit verskyn op bladsy 14. Ons moedig jou aan om nou daardie Verklaring te hersien en jouself aldus die geleentheid te gee om weer na te dink oor maniere waarop jy dit persoonlik kan toepas in die dae wat voorlê.
Hoe sal jy antwoord?
◻ Hoe het Jehovah die eenheid van sy knegte bewaar?
◻ Hoe het Jehovah sake gerig sodat die insameling van die Koninkryksklas voltooi sou word?
◻ Hoe is Jehovah se Getuies versterk vir die intense vervolging wat hulle voor en gedurende die Tweede Wêreldoorlog ondervind het?
◻ Hoe het God sy Getuies voorberei vir die insameling wat in 1935 begin het?
◻ Hoe kan ons help om die Koninkryksale te voorsien waaraan daar so ’n dringende behoefte is?
[Venster op bladsy 14]
VERKLARING VAN EENHEID
Ons, Jehovah se Getuies, wat by ons “Koninkrykseenheid”-Streekbyeenkoms byeen is, wil ons diepe waardering uitspreek vir alles wat Jehovah vir ons gedoen het. Ons is waarlik dankbaar vir die offerande van sy geliefde Seun en vir sy keuse van ons as ’n volk vir sy Naam.
Daarom VERKLAAR ONS dat ons vasbeslote is om, ten eerste, die wonderlike eenheid te bewaar waarin Jehovah ons versamel het soos ’n kudde in sy kraal, met onvoorwaardelike vertroue in sy bestuur en die leiding van sy heilige gees; ten tweede, om te alle tye daarna te strewe om ons lewenswandel onder die heidene skoon te hou terwyl ons ywerig die Koninkrykshoop verkondig aan almal wat wil hoor; en, ten derde, om te waak teen enige afwyking van Jehovah se saak, ongeag wie ook al probeer om ons in ’n verkeerde rigting te beïnvloed.
En ONS BID dat ons die liefde wat Jehovah teenoor ons bewys het waardig mag bly, terwyl ons altyd ons voorreg waardeer om sy Naam te dra en om die goeie nuus van sy Koninkryk in die hande van Christus te verkondig.
[Prent op bladsy 16]
Dit kos samewerking om genoeg Koninkryksale te voorsien, wat finansiering sowel as bouwerk betref