Verenig in aanbidding onder ons Herder-Koning
“So spreek die Here HERE: Kyk, Ek gaan die kinders van Israel haal . . . en een Koning sal vir hulle almal koning wees.”—ESEGIËL 37:21, 22.
1, 2. (a) Wat stel die twee stukke hout ln Esegiël 37:16 voor? (b) Wat het met hierdie twee “houte” gebeur?
KONINKRYKSEENHEID sê ons. En dit strook met die laaste deel van hoofstuk 37 van Esegiël se profesie. Daar, in vers 16, sê Jehovah vir Esegiël om twee stukke hout te neem. Op die een moes hy skryf: “Vir Juda en vir die kinders van Israel, sy bondgenote.” Op die ander moes hy skryf: “Vir Josef (die hout van Efraim) en die hele huis van Israel, sy bondgenote.” Wat stel hierdie stukke hout voor?
2 Dit stel die twee dele van die koninkryk van Israel voor wat verdeel is in Juda na die suide en Efraim na die noorde. Albei is om die beurt in gevangenskap weggevoer—die noordelike koninkryk in 740 v.G.J. en die suidelike koninkryk in 607 v.G.J. Maar in 537 v.G.J. het ’n oorblyfsel van al 12 stamme van Israel na Jerusalem teruggekeer om die verenigde aanbidding van Jehovah daar te herstel. Hoe word dit in Esegiël se profesie uitgebeeld?
3. Wat moes onder God se herstelde volk heers, soos toegelig deur Esegiël 37:19?
3 Luister na Jehovah se woorde aan Esegiël, in vers 19:
3“Sê dan vir hulle: So spreek die Here HERE: Kyk, Ek sal die stuk hout van Josef neem, wat in die hand van Efraim is, en die stamme van Israel, sy bondgenote, en Ek sal hulle by hom voeg, by die stuk van Juda, en hulle een stuk hout maak; en hulle sal een word in my hand.”
Ja, eenheid moes onder Jehovah se herstelde volk heers!
Verenig in aanbidding
4. Hoe is Esegiël 37:21 vervul (a) ln 537 v.G.J.? (b) in ons dag?
4 God se volk sou nie langer in twee nasies verdeel wees met verdeelde lojaliteit tussen noordelike en suidelike koninkryke nie, maar hulle sou in werklikheid “een volk . . . in die land” wees. Esegiël spreek trooswoorde tot hulle, soos Jehovah beveel het:
“En sê vir hulle: So spreek die Here HERE: Kyk, Ek gaan die kinders van Israel haal tussen die nasies uit waarheen hulle getrek het, en Ek sal hulle van alle kante bymekaar laat kom en hulle bring in hul land. . . . en een Koning sal vir hulle almal koning wees” (Esegiël 7:21, 22).
Net soos hierdie woorde vir die verenigde oorblyfsel van Israel vervul is toe hulle in 537 v.G.J. uit gevangenskap teruggekeer het, het die herstelde oorblyfsel gesalfde Getuies van ons dag die vreugde gesmaak om in hulle paradysagtige land van geestelike voorspoed verenig te word.—Kyk ook Esegiël 36:33-36.
5. Hoe is God se volk van besoedeling gereinig?
5 God se volk is terselfdertyd gereinig van alle geestelike besoedeling wat deur Satan se wêreldryk van valse godsdiens, “Babilon die Grote”, veroorsaak is (Openbaring 17:5, NW; 18:2, 4). Hulle bevryding van valse godsdiensleerstellings en -gebruike is die hedendaagse groter vervulling van die profesie wat op klein skaal van toepassing was op Israel van die ou tyd toe hulle uit gevangenskap in letterlike Babilon herstel is:
“En hulle sal hul nie meer verontreinig met hulle drekgode en hulle verfoeisels en met al hulle oortredinge nie; en Ek sal hulle verlos uit al hulle woonplekke waarin hulle gesondig het, en sal hulle reinig. So sal hulle dan vir my ’n volk wees, en Ek vir hulle ’n God wees.”—Esegiël 37:23.
6. (a) Waarom geniet geestelike Israel nou intiemheid met hul God? (b) Watter eenheid moet ons bewaar, selfs al wyk iemand van die waarheid af?
6 Die walglike afgodediens van die gelowe van die Christendom en die heidendom is deur Jehovah se herstelde volk verwerp. Hulle verafgood nie meer skepsele nie en volg nie die gebruike van wêreldlike godsdiens, soos die viering van godonterende “feesdae” nie. Hulle aanbidding word nie verdeel tussen drie gode in een, die sogenaamde godheid van ’n geheimsinnige Drie-eenheid nie, maar hulle is verenig as die een volk wat die een God, Jehovah, aanbid. Hulle loof die Soewereine Heer van die heelal eenstemmig, en dit bind hulle saam in ’n eenheid wat ongekend is vir ander mense op aarde! (Jesaja 52:8). Selfs al verkry ’n voormalige metgesel ’n slegte gewete deur af te wyk van die versameling waarhede wat deur Jehovah voorsien is, staan ons verenig met God se organisasie in sy werk en in kosbare intiemheid met ons God.—Spreuke 3:32, NW; Hebreërs 10:22, 23.
Erken die Koning
7. Watter verenigende krag, benewens ware aanbidding, is aan God se volk beloof?
7 Toe eertydse Israel in hulle “land” herstel is, het ware aanbidding ’n verenigende krag onder hulle geword. Maar die koninkryk is nie herstel nie. Waarom praat Jehovah dan in Esegiël hoofstuk 37, verse 22 en 24, van ’n “koning” oor hulle? Verse 24 en 25 lui:
“En my kneg Dawid sal koning oor hulle wees, en hulle sal almal een herder hê; en hulle sal in my verordeninge wandel en my insettinge onderhou en daarna handel. En hulle sal woon in die land wat Ek aan my kneg Jakob gegee het, waar julle vaders in gewoon het; ja, hulle sal daarin woon, hulle kinders en hulle kindskinders tot in ewigheid; en my kneg Dawid sal hulle vors wees vir ewig.”
8. (a) Waarom moet hierdie verse op geestelike Israel van toepassing wees? (b) Hoe kan ons die tyd vir die vervulling daarvan noukeurig bepaal?
8 Daardie deel van die profesie is nooit deur vleeslike Israel vervul nie, en dit sal ook nooit so vervul word nie. Dit moet dus op geestelike Israel van toepassing wees. Maar wanneer? Wel, wanneer het ’n koning “wat daarop reg het” weer op die troon van Dawid gaan sit? Dit het gebeur toe “die tye van die nasies” in 1914 G.J. geëindig het. Toe die Tye van die Nasies verstryk het, het ‘die koninkryk van die wêreld die koninkryk van Jehovah en van sy Christus geword”, die Een wat deur Dawid afgebeeld is.—Esegiël 21:26, 27; Lukas 21:24; Openbaring 11:15, NW.
9. Watter twee dinge is vandag verenigende werklikhede?
9 Jehovah se Getuies word dus vandag nie alleen deur ware aanbidding verenig nie—al is sulke aanbidding baie belangrik—maar ons is ook verenig daar ons onder ons “vors” en Koning versamel is! Ons aanbidding sowel as die Koninkryk is vir ons werklikhede. En albei verenig ons in ons wêreldwye broederskap.
10. (a) Hoe beskou ons ons Herder-Koning? (b) Hoe handel ons na Jehovah se “verordeninge”?
10 Hoe lief is ons tog vir ons Koning! Vir ons almal is hy “een herder”—’n goedhartige Herder, wat ons na waters van die ewige lewe lei. Hy ken elkeen van ons by die naam, en hy wil ons uitroep en ons na groen geestelike weivelde lei. Maar net soos die skape van ’n kudde moet ons verenig bly, ‘in Jehovah se verordeninge wandel’. Ons moet afgeskeie bly van die volgende drie dele van Satan se organisasie: verdorwe politiek, hebsugtige kommersialisme en valse godsdiens. In eenheid soos dié van Jesus en sy vroeë dissipels toon ons dat ons “nie van die wêreld is nie”. Dit sluit in dat ons ook die wêreld se onsedelikheid vermy (Johannes 17:14, 16, 20, 21; 18:36). Daar moet geen verdeeldheid onder ons bestaan terwyl ons Jehovah se insettinge onderhou en gewis “daarna handel” nie.
11. Hoe vorm ons lewenswyse ’n teenstelling met dié van wêreldlike godsdiensbeoefenaars?
11 Hoe verskil hierdie lewenswyse tog van dié van wêreldlike godsdiensbeoefenaars! Vir hulle is enigiets gewoonlik toelaatbaar. Hulle laat die permissive gemeenskap met sy sedelike verdorwenheid toe. Hulle het dikwels verskillende standaarde vir verskillende dele van die wêreld. In ryk lande bly hulle min of meer by die reëling van een man een vrou; in ’n ander halfrond neem hulle persone aan wat daaraan gewoond is om baie vrouens te hê, en wat nog steeds baie vrouens het. (Vergelyk Mattheüs 19:4-6; 1 Timotheüs 3:2, 12.) Maar ons wat onder Christus, die Herder-Koning, verenig is, volg Bybel-insettinge en -beginsels in elke deel van die wêreld na. En wanneer nasies oorlog voer, weier ons om ons broers van ’n ander nasie om die lewe te bring, want in die woorde van Jesaja is daar van ons gesê: “Hulle sal nie meer leer om oorlog te voer nie.”—Jesaja 2:3, 4.
12. Hoe toon ons ons eenheid, “soos skape in ’n kraal”?
12 Hierdie eenheid van die oorblyfsel geestelike Israeliete is ook pragtig voorspel deur die teks in Miga 2:12, waar Jehovah sê: “Gewis sal Ek . . . almal bymekaarbring soos skape in ’n kraal, soos ’n kudde in sy weiveld; en dit sal dreun van mense.” Dit is iets wat ons by byeenkomste van Jehovah se volk sien: Duisende wat stil en aandagtig luister en graag elke woord wil hoor terwyl ons onder die herderlike toesig van Jehovah en sy Herder-Koning wei. Oosterlinge, Swart mense, Blankes—die gesalfde oorblyfsel en die “ander skape”—almal is verenig in hierdie kudde. Ons byeenkomste en ons gemeentelike vergaderinge bied onomstootlike bewys dat Koninkrykseenheid vandag wêreldwyd ’n werklikheid is!
13. Hoe “dreun” die kudde “van mense”?
13 Maar wat van Miga se woorde: “Dit sal dreun van mense”? Wat ondervind ons voor en na ons vergaderinge en byeenkomste? Ja, die gedreun van aangename omgang wanneer ons die vreugde van ons Christelike omgang in aangename gesprekke geniet en oor ons diens aan ons God praat. En die ‘gedreun’ van die wêreldwye gemeente word ook groter in die sin dat dit voortdurend groter word; namate nuwe gemeentes voortdurend gestig word, word die harmoniese loflied tot Jehovah dwarsoor die aarde harder.—Psalm 96:1-3.
14. Lig toe hoe die wêreld van ons eenheid kennis neem.
14 Hierdie vreugdevolle eenheid, soos die van ’n kudde in ’n kraal, bly nie onopgemerk in die wêreld nie. Ten tye van die “Koninkrykseenheid”-Streekbyeenkoms van Jehovah se Getuies in 1983 het die polisie in Taegu, Korea, die eerste dag 30 polisiemanne na die byeenkomssaal gestuur. Maar nadat hulle gesien het hoe ordelik die Getuies is en hoe hulle die verkeer buitekant beheer, het hulle die drie oorblywende dae net twee polisiemanne gestuur. In Taejŏn het die saalopsigter gesê: “Dit lyk of julle uit die hemel geïnspireer is—dit is wonderlik.” ’n Oordrywing, maar hy het nietemin sy punt gestel! In Rangoen, Birma, het ’n lid van die komitee van die Gandhi-saal gesê: “As die hele wêreld maar net ’n genootskap soos julle s’n gehad het, sou daar geen probleme in die wêreld wees nie.”
Jehovah se “verbond van vrede”
15. Watter begeerlike vrede word in Esegiël 37:26 beskryf?
15 Ware vrede behoort aan diegene wat deur ons Herder-Koning, Christus Jesus, na weivelde gelei word. Dit is ’n vrede wat gepaard gaan met eenheid, en daardie eenheid is inderdaad vandag ’n Koninkrykswerklikheid onder Jehovah se Getuies oor die hele aarde. Jehovah gee ’n wonderlike beskrywing hiervan in sy woorde aan Esegiël in hoofstuk 37, vers 26:
“En Ek sal ’n verbond van vrede met hulle sluit, dit sal ’n ewige verbond met hulle wees; en Ek sal hulle daar bring en hulle vermenigvuldig; en Ek sal my heiligdom in hulle midde vestig vir ewig”!
Vrede met God! Vrede wat vir ewig kan duur, danksy die liefdevolle offer wat ons Herder-Koning gebring het toe hy hier op aarde was!
16. Wat het daartoe gelei dat die “skape” vermenigvuldig word?
16 Noudat geestelike Israel vermenigvuldig is tot die volle 144 000, sluit ’n groot menigte “ander skape” by hulle aan in heilige diens by Jehovah se heiligdom. Daar is geen einde aan die vermenigvuldiging van die “skape” nie—daar is reeds miljoene van hulle! Hierdie Koninkryksverkondigers gaan rondom die aarde eensgesind van huis tot huis. Hierdie openbare aanbidding is vir ons werklik en doelgerig en identifiseer ons as die een volk op die ganse aarde wat daarin belangstel om Jehovah se naam te verheerlik en om sy Koninkryk van vrede te verkondig. Hoe bly is ons tog dat ons ’n party in sy verbond van vrede kan wees!
17. (a) Watter bemoediging gee Jehovah in Esegiël 37:27, 28? (b) Hoe weet ons dat Jehovah se waaksorg nie tot geestelike Israel beperk is nie?
17 In Esegiël 37, verse 27 en 28, lees ons Jehovah se slotwoorde van bemoediging aan sy verenigde kudde:
“En my tabernakel sal oor hulle wees, en Ek sal vir hulle ’n God wees en hulle vir my ’n volk wees. En die nasies sal weet dat Ek [Jehovah] is wat Israel heilig as my heiligdom vir ewig in hulle midde sal wees.”
Hoe bly is ons tog dat Jehovah se beskerming soos ’n tent oor sy volk oopgespan is! En hierdie liefdevolle waaksorg is nie net tot geestelike Israel beperk nie, want ons lees aangaande die “groot menigte”: “Hy wat op die troon sit, sal sy tent oor hulle oopspan.” Daar val geen hitte van Jehovah se misnoeë meer op hulle nie.—Openbaring 7:9-17.
18. (a) Hoe “heilig” Jehovah Israel? (b) Hoe verkry die “groot menigte” ook ’n regverdige naam by God?
18 Hoe bly is ons tog ook dat Jehovah te midde van geestelike Israel woon en sy heiligdom “vir ewig” in hulle midde oprig! Net soos hierdie sentrum van sy aanbidding heilig is, moet diegene wat soontoe kom om te aanbid, heilig, gewyd, afgesonder vir die diens van hulle God wees. Daar word van gesalfde Christene gesê dat hulle “af[ge]was, . . . geheilig, . . . geregverdig [is] in die Naam van die Here Jesus en deur die Gees van onse God” (1 Korinthiërs 6:11). En soos die bogemelde teks in Openbaring 7:9-17 toon, het die “groot menigte” met aardse verwagtinge ook “hul klere gewas en hul klere wit gemaak in die bloed van die Lam”, sodat hulle God “dag en nag in sy tempel” kan dien. Watter geweldige getuienis word tog deur daardie verenigde, wêreldwye diens gelewer!
19. (a) Hoe sal die nasies verplig word om die woorde in Esegiël 38:23 te erken? (b) Wat moet ons tot dan vasbeslote wees om te doen?
19 Maar ons grootste vreugde, terwyl ons in Koninkrykseenheid vooruitgaan, sal wees wanneer die dag van Jehovah se regverdiging aanbreek. Dan sal sy glorieryke naam geheilig word—ja, dit sal gesuiwer word van al die skandelike smaad wat daarop gewerp is. Die nasies sal verplig word om die verlossing van Jehovah se naamvolk te aanskou. Maar nog belangriker, “hulle sal weet dat Ek [Jehovah] is”, soos ons Soewereine Heer self gesê het (Esegiël 38:23). Laat ons aan ons Koninkrykseenheid, wat nou ’n werklikheid is, vashou totdat Jehovah se glorieryke naam inderdaad in die ganse heelal geheilig is!
Hoe is Esegiel 37:15-28 ten opsigte van die volgende vervul:
◻ Jehovah se volk word “een stuk hout” gemaak?
◻ Die aanstelling van ‘een koning en herder’?
◻ God se “verbond van vrede” met sy volk?
◻ God se tabernakel wat “oor hulle” is?
[Prent op bladsy 19]
Jehovah se “verbond van vrede” is nou met sy verenigde volk en verseker voorspoed reg tot in die paradysaarde