Waar kan ons eenheid vind in hierdie wêreld vol tweedrag?
“Ek sal hulle bymekaarbring soos skape in ’n kraal.”—MIGA 2:12, NAV.
1, 2. Waarom kan ons nie op wêreldleiers vertrou om die mensdom te verenig nie?
DUISENDE jare al is die mensdom tragies verdeeld. Politieke, ekonomiese en maatskaplike verskille het die mensdom in opponerende, strydende faksies verdeel. Ons twintigste eeu het die ergste gevolge hiervan beleef. Die Tweede Wêreldoorlog alleen het byvoorbeeld nagenoeg 55 miljoen lewens geëis en gekulmineer in die verwoesting van Hirosjima en Nagasaki deur atoombomme.
2 In onlangse dekades het tientalle ander botsings nog miljoene lewens geëis. Nou bedreig die kernwapens van botsende politieke stelsels selfs die voortbestaan van lewe op aarde. En, soos The Guardian, van Engeland opmerk, word voorbereidings vir oorlog, “materieel sowel as geestelik, ywerig getref deur die nasies, groot en klein. Dit blyk dus duidelik dat ons nie op wêreldleiers kan staatmaak om die mensdom te verenig nie.
Die reputasie van wêreldgodsdiens
3, 4. Wat leer die geskiedenis ons omtrent wêreldlike godsdiens as ’n potensiële krag om mense te verenig?
3 Maar kan ons op die godsdienste van hierdie wêreld staatmaak om volke te verenig? Boesem hulle reputasie enigsins groter vertroue in? Die geskiedenis antwoord nee. ’n Hoofartikel in die Chicago Tribune het verklaar: “Elke groot godsdiens verkondig vrede en broederskap en barmhartigheid, en tog het van die wreedste en onverdraagsaamste verdrukkinge in die geskiedenis in die naam van God plaasgevind.” Koerantredakteur C. L. Sulzberger het eweneens gesê: “Moet ons nie, al is dit ook ’n onsmaaklike onderwerp, besef dat, benewens die ander oorsake—imperialisme, rassisme, militarisme—godsdiens ’n groter bedreiging vir menselewe geword het nie?”
4 Ja, die geskiedenis is rooi van die bloed van godsdienstig geïnspireerde of goedgekeurde tweedrag. In ons eeu alleen, gedurende die nasionalistiese wêreldoorloë en ander botsings, het ons die godonterende gebruik aanskou dat Katoliek Katoliek om die lewe bring, dat Protestant Protestant om die lewe bring, dat Moslem Moslem om die lewe bring en dat Jood Jood om die lewe bring. Die feite van die geskiedenis toon inderdaad dat wêreldgodsdiens allermins ’n krag was wat mense verenig het; dit het eerder die verdeeldheid vererger.
5. Wat is die oorsprong van hierdie wêreld se verdeelde godsdienste?
5 Die verwarde en verdeelde toestand van hierdie wêreld se godsdienste toon duidelik dat God hulle nie ondersteun nie. Dit is moontlik ’n verrassing vir diegene wat dink dat alle godsdiens goed moed wees as dit daar op aanspraak maak dat dit God verteenwoordig. Maar God se eie geïnspireerde Woord sê reguit: “God is nie ’n God van wanorde nie, maar van vrede” (1 Korinthiërs 14:33). Dit is nie God se heilige gees, of werkende krag, nie, maar ’n onheilige gees, of besielende krag, wat ‘vyandskap, twis, naywer, tweedrag, partyskap’ voortbring (Galasiërs 5:19, 20). Jakobus 3:14, 15 identifiseer die wysheid wat met hierdie slegte gees gepaard gaan as “duiwels”, afkomstig van “die god van hierdie wêreld”, Satan die Duiwel.—2 Korinthiërs 4:4.
’n Verdeelde huis
6. Watter beginsel wat deur Jesus gegee is, geld vir hierdie wêreld?
6 Die verdeelde toestand van die mensdom herinner ons aan hierdie woorde van Jesus: “Elke koninkryk wat teen homself verdeeld is, word verwoes; en elke stad of huis wat teen homself verdeeld is, sal nie bly staan nie” (Mattheüs 12:25). Op daardie grondslag moet hierdie verdeelde wêreld val. Trouens, selfs die nasies stem saam met die uitdrukking: “Eendrag maak mag, tweedrag breek krag.”
7. Wat besef party mense is nodig om ’n ramp af te weer?
7 Om ’n rampspoedige val te probeer voorkom, vra talle vooraanstaande persone om ’n drastiese verandering in die mense se denke. Die kernwetenskaplike Harold Urey het gesê: “Daar is geen konstruktiewe oplossing vir die wêreld se probleme nie behalwe uiteindelik ’n wê-reldregering wat in staat is om die wet oor die hele aardbodem te handhaaf.” En Albert Einstein het eweneens “volgehou dat vrede onder nasies in die atoomeeu slegs gehandhaaf kon word deur alle mense onder ’n wêreldwetstelsel te verenig”. Hy het gemaan: “Ons moet die verskriklike skeidsmure—landsgrense—te bowe kom.” Ja, baie mense besef dat ’n wêreldregering nodig is.
8. Kan hierdie verdeelde wêreld bly staan?
8 Maar is dit waarskynlik dat die nasies van hierdie wêreld hulle soewereiniteit sal prysgee? En aan wie? Beslis nie aan die Verenigde Volke-organisasie nie. Baie nasies voer liewer oorlog as om hulle aan die besluite van die VV te onderwerp. Nee, hierdie wêreld, met sy verdeelde politieke, kommersiële, maatskaplike en godsdiensstelsel, stuur op ’n val af.—Sefanja 3:8; 1 Johannes 2:15-17.
’n Waarlik verenigde volk
9. Hoe waarskynlik is dit dat die mensdom verenig sal word?
9 Beteken dit dan dat wêreldeenheid buite die kwessie is? Glad nie! Inteendeel, wêreldeenheid is nie net moontlik nie, dit is onvermydelik! Trouens, die grondslag vir wêreldeenheid is reeds gelê! Daar is reeds mense wat doen wat Einstein gesê het, naamlik wat ‘die skeidsmure van nasionalisme te bowe kom’! Daar bestaan reeds ’n verenigde volk oor die hele aarde. Daar bestaan reeds ’n voortreflike wêreldregering aan wie miljoene mense in alle nasies hulle hoogste trou toesê.
10. Watter kenmerke moet ’n werklike regering hê?
10 Baie sal dink dat so ’n beskouing vergesog is. Hulle vra dalk: ‘Praat julle van ’n regte regering, met regte wette en regte burgers? Waar vind al hierdie dinge dan plaas? Wie is daarby betrokke?’ Wel, waaruit bestaan ’n regering? Uit verskeie dinge: (1) Dit moet regte, lewende leiers hê; (2) die setel daarvan moet ook ’n werklike plek wees; (3) die nasie moet regte wette hê om die orde te bewaar; (4) dit moet regte onderdane—mense—hê. In die Verenigde State is daar byvoorbeeld ’n uitvoerende amptenaar (die president) met ’n regering wat in Washington, D.C., gesetel is. Daar is ’n wetgewende liggaam (die Kongres) wat wette maak. Daar is ’n regbank (geregshowe) wat die landswette toepas. En daar is meer as 230 miljoen mense as onderdane. Sou enigiemand aanvoer dat al hierdie dinge nie werklik bestaan nie?
11. Hoe word die bestaan van ’n waarlik verenigde volk selfs deur die wêreldlike pers erken?
11 Net so seker bestaan daar vandag ’n waarlik verenigde volk! Waar? Watter regering dien hulle? Waarom kan ons sê dat hulle ten volle verenig is? Die Brasiliaanse koerant O Tempo het hierdie unieke volk uitgewys toe dit geskryf het: “Hoewel daar talle indrukwekkende gelowe met hulle propaganda in alle dele van die aarde is, bestaan daar vandag nie ’n enkele een op die ganse aardbodem wat dieselfde liefde en eenheid as die Teokratiese organisasie van Jehovah se Getuies openbaar nie.”
12. Watter sienswyse wat in ’n Belgiese koerant uitgespreek is, stem ooreen met ’n werklikheid wat deur Jehovah se Getuies erken word?
12 In België het die koerant La Nouvelle Gazette die volgende opskrif bevat: “Om ’n kernoorlog oor 25 jaar te voorkom, het Amerikaanse deskundiges net een oplossing gevind: Dié van Jehovah se Getuies!” Die artikel het gesê dat die enigste oplossing “’n radikale verandering in die lewenswyse van die mensdom . . . ten gunste van ’n wêreldregering” is. Die publikasie het daarop gewys dat hierdie beskouing presies ooreenstem “met die proposisie wat Jehovah se Getuies onderskryf. En watter “proposisie” is dit? Die een wat Jesus die sentrale tema van sy prediking gemaak het: God se nuwe regering vir die hele aarde. Sy hemelse Koninkryk met Christus as heerser. Daardie regering is God se oplossing, die enigste oplossing vir al die mensdom se euwels, met inbegrip van sy verdeeldheid. Jesus het mense geleer om vir daardie regering te bid toe hy gesê het: “Laat u koninkryk kom; laat u wil geskied, soos in die hemel net so ook op die aarde” (Mattheüs 6:10). En volgens die profesie in Daniël 2:44 gaan daardie regering van God binnekort “al daardie koninkryke verbrysel . . . maar self sal dit vir ewig bestaan”.
Ware liefde en eenheid word geopenbaar
13. Wat het sedert 1914 gebeur met betrekking tot ’n wêreldregering om mense te verenig?
13 Wêreldgebeure ter vervulling van Bybelprofesie toon dat God se hemelse regering in 1914 die bewind aanvaar het. In daardie jaar het God sy beproefde Koning, Jesus Christus, op die troon geplaas (Mattheüs 24:3-14; 2 Timotheüs 3:1-5; Openbaring 12:10). Daardie regering het verhewe wette en beginsels, soos opgeteken in die allerheiligste dokument, God se geïnspireerde Woord, die Bybel (2 Timotheüs 3:16, 17). En sedert 1914 versamel die Goeie Herder, Jesus Christus, die burgers van God se Nuwe Orde. Die grondslag van daardie nuwe aardse gemeenskap word dus op hierdie oomblik gelê! Ja, dit is alles baie werklik. Dit is nie net ’n droom nie.—Mattheüs 25:31-46; Johannes 10:14-16; 2 Petrus 3:13.
14. Watter verdelende faktor het Jehovah se Getuies te bowe gekom?
14 As burgers van die Nuwe Orde is Jehovah se Getuies in elke land allereers getrou aan God se hemelse Koninkryksregering. Wanneer Jehovah se Getuies dus die gebod van Jesus lees, naamlik dat “julle mekaar moet liefhê net soos Ek julle liefgehad het”, neem hulle dit letterlik op en doen hulle dit wêreldwyd (Johannes 15:12). Gevolglik het hulle waarlik die beperkende bande van kleingeestige nasionalisme verbreek. Hulle kan ware liefde aan die hele mensdom betoon, ongeag ’n persoon se ras, stam of nasionaliteit.
15, 16. Hoe erken buitestaanders dat Jehovah se Getuies nasionalisme te bowe gekom het?
15 In hierdie verband het ’n Rooms-Katolieke non die volgende oor Jehovah se Getuies geskryf in die Italiaanse kerkblad Andare alle genti: “Hulle verdien ons bewondering vir die wyse waarop hulle alle vorme van geweld verwerp en die talle beproewinge wat hulle weens hulle opvattings ondervind gedwee verduur . . . Hoe anders sal die wêreld tog wees as ons almal een oggend wakker word met die vaste voorneme om, net soos Jehovah se Getuies, nooit weer die wapen op te neem nie, ongeag die koste of die rede!”
16 Die Italiaanse koerant Il Corriere di Trieste het gesê: “Jehovah se Getuies moet bewonder word vir hulle fermheid en samehorigheid. In teenstelling met ander gelowe verhoed hulle eenheid as ’n volk hulle om in die naam van dieselfde Christus tot dieselfde God te bid om twee strydende partye in ’n konflik te seën of om politiek met godsdiens te vermeng om die belange van staatshoofde of politieke partye te bevorder.”
17. Hoe onderskei 1 Johannes 3:10-12 en Johannes 13:35 tussen God se kinders en Satan se kinders?
17 Let op hoe dit met 1 Johannes hoofstuk 3, vers 10 tot 12, ooreenstem. Daar lees ons: “Hierin is die kinders van God en die kinders van die duiwel openbaar: elkeen wat die geregtigheid nie doen nie, is nie uit God nie, en hy ook wat sy broeder nie liefhet nie. Want dit is die boodskap wat julle van die begin af gehoor het, dat ons mekaar moet liefhê; nie soos Kain wat uit die Bose was en sy broer doodgeslaan het nie.” Nee, God se kinders slaan nie hulle broers dood nie. Dit is Satan se kinders wat dit doen.—Johannes 13:35.
18. Wat gebeur met eens verdeelde mense wanneer hulle Jehovah se Getuies word?
18 Dit is om hierdie rede dat, wanneer Arabiere, Jode en verklaarde Christene in Israel en Libanon Jehovah se Getuies word, hulle in ’n onverbreeklike band van liefde en eenheid verenig word. So ook voormalige Katolieke en Protestante in Noord-Ierland. So ook Swart en Wit in die Verenigde State. So ook lede van verskillende stamme in Afrika wat mekaar tevore gehaat en met mekaar baklei het. Die Britse tydskrif New Society het geskryf: “Die Getuies is waarskynlik suksesvoller as enige ander groep waar dit kom by die spoed waarmee hulle stamdiskriminasie onder hulle bekeerlinge uitwis.”
Die Bron van eenheid
19. In watter twee belangrike opsigte is Jehovah se Getuies buitengewoon?
19 Waarom kan Jehovah se Getuies sulke liefde en eenheid openbaar? Is dit te danke aan hulle wêreldlike geleerdheid, prominensie, rykdom of skranderheid? Nee, hulle is doodgewone mense. Maar hulle is buitengewoon in twee uiters belangrike opsigte. Ten eerste, Jehovah se Getuies aanvaar die hele Bybel as die geïnspireerde Woord van God, en hulle doen hulle uiterste bes om daarvolgens te lewe. Soos die apostel Paulus gesê het: “Toe julle die woord van God ontvang het wat deur ons verkondig is, [het] julle dit aangeneem . . . nie as die woord van mense nie, maar, soos dit waarlik is, as die woord van God wat ook werk in julle wat glo” (1 Thessalonicense 2:13). Ten tweede, Jehovah se Getuies neem dieselfde standpunt in as Jesus se apostels, wat vir die heersers gesê het: “Ons moet aan God [as heerser] meer gehoorsaam wees as aan die mense.”—Handelinge 5:29, vgl. NW.
20. Wat is die ware bron van eenheid onder Jehovah se Getuies?
20 Wat gebeur met ’n volk wat die hele Bybel as God se Woord aanvaar, daarvolgens lewe en God in alle opsigte as hulle Heerser gehoorsaam? Handelinge 5:32 sê dat God sy kragtige heilige gees, of werkende krag, gee “aan die wat Hom gehoorsaam is”. Dit is die bron van krag wat Jehovah se Getuies in staat stel om ’n wêreldeenheid te bewerkstellig en te handhaaf wat vir ander onmoontlik is.
21, 22. (a) Wie vervul die profesie van Jesaja 2:2-4? (b) Watter profetiese vervullings beleef Jehovah se Getuies vandag?
21 Wie vervul dan, in die lig van die getuienis, die profesie van Jesaja hoofstuk 2, verse 2 tot 4? Daardie profesie praat van die tyd waarin ons lewe en sê dat die ware aanbidding van Jehovah deeglik bevestig sal word onder Koninkryksheerskappy, en dat baie sal sê: “Kom laat ons optrek na die berg van die HERE, . . . dat Hy ons sy weë kan leer en ons in sy paaie kan wandel.” Die profesie sê ook: “Hy sal oordeel tussen die nasies en regspreek oor [sake regstel met betrekking tot, NW] baie volke; en hulle sal van hul swaarde pikke smee en van hul spiese snoeimesse; nie meer sal nasie teen nasie die swaard ophef nie, en hulle sal nie meer leer om oorlog te voer nie.”
22 Wie is dit wat toegelaat het dat God en sy Woord “sake regstel” onder hulle? Wie het werklik gehoor gegee aan God se bevel om ‘nie meer te leer om oorlog te voer nie’? Wie het in ons dag gesamentlik duisende jare in tronke en konsentrasiekampe deurgebring omdat hulle nie hul naaste wou doodmaak nie? Wie toon respek vir die Bybel as God se geïnspireerde Woord en is aan God as Heerser gehoorsaam? Wie vorm ’n internasionale broederskap wat uniek is in hierdie wêreld vol tweedrag? Die antwoord kan net wees: Jehovah se Getuies. En nou word die “ander skape” by die honderdduisende versamel as metgeselle van die oorblyfsel van die gesalfde “klein kuddetjie” (Johannes 10:16; Lukas 12:32). Ook hulle vind baat by die vervulling van ’n profesie wat in Hosea se tyd gegee is. Dit het voorspel dat Jehovah se knegte “almal saam vergader” sou word onder een Hoof, Jesus Christus, in Koninkryksmag (Hosea 1:11). Hulle beskou hulle eenheid ook as ’n vervulling van die woorde van Jesus toe hy tot God gebid het dat sy volgelinge “een kan wees, net soos Ons een is” (Johannes 17:20-22). God het dus sy belofte van lank gelede teenoor hulle gehou: “Ek sal hulle bymekaarbring soos skape in ’n kraal.”—Miga 2:12, NAV.
Onthou jy hierdie gedagtes?
◻ Waarom moet ons tot die slotsom kom dat God nie wêreldlike godsdiens ondersteun nie?
◻ Hoe identifiseer 1 Johannes 3:10-12 diegene wat waarlik verenig is in hierdie wêreld vol tweedrag?
◻ Wat is die ware bron van krag wat Jehovah se knegte in staat stel om wêreldeenheid te handhaaf, en waarom het hulle daardie bron van krag?
◻ Watter wonderlike profesieë met betrekking tot die eenheid van God se knegte word vandag voor ons oë vervul?
[Prent op bladsy 24]
Die grondslag vir wêreldeenheid is reeds gelê!