Bou jou toekoms saam met Jehovah se organisasie
“Wees altyd ywerig om die Here te dien; dan sal jy ’n toekoms hê en jou hoop sal jou nie ontneem word nie.”—SPREUKE 23:17, 18, NAV.
1, 2. Wat het die apostel Johannes onder meer teen die einde van die eerste eeu G.J. gesien?
JEHOVAH openbaar toekomstige gebeure aan sy volk, en dit stel hulle in staat om verstandig op te tree (Jesaja 42:9). Teen die einde van die eerste eeu G.J. het God byvoorbeeld gesigte van ’n hoopinboesemende toekoms aan die bejaarde apostel Johannes gegee. Hoe bly kan ons tog wees dat Johannes getuig het van “alles wat hy gesien het” en dat dit opgeteken is in die Bybelboek Openbaring!—Openbaring 1:1, 2.
2 Johannes het onder meer gesien hoedat “vier engele” “winde” vashou wat die “groot verdrukking” sou veroorsaak. Hoe lank sou die engele verplig wees om daardie vernietigende winde te bedwing? ’n Ander engel het vir hulle gesê: “Moenie die aarde of die see of die bome beskadig voordat ons die diensknegte van onse God op hulle voorhoofde verseël het nie.”—Openbaring 7:1-3, 14; Mattheüs 24:21, 22.
3. Wat sou plaasvind voordat die losgelate “winde” verwoesting onder Satan se organisasie saai, en hoe is dit gedoen?
3 Wanneer die “winde” losgelaat word, sal hulle verwoesting saai in Satan die Duiwel se aardse organisasie en dit heeltemal vernietig. (Vergelyk Jeremia 25:32, 33.) Maar voordat dit gebeur, moet die oorblyfsel gesalfdes wat saam met Jesus Christus in die hemel gaan regeer, verseël word. Hierdie “diensknegte van onse God [word] op hulle voorhoofde verseël” deur middel van God se heilige gees, of werkende krag, wat gesalfde Christene as ’n onderpand van hulle hemelse erfenis ontvang het (2 Korinthiërs 1:21, 22; Efesiërs 1:12-14). Die verkondiging van die evangelie van God se Koninkryk “aan die einde van die dae” voleindig die insameling van hierdie “uitverkorenes”.—Miga 4:1; Mattheüs 24:14, 31.
4. Hoeveel “diensknegte van onse God” sal permanent verseël word, en hoe kan jy jou antwoord uit die Bybel staaf?
4 Hoeveel “diensknegte van onse God” sal permanent verseël word? Johannes, wat een van hulle was, het getrou berig: “En ek het die getal van die verseëldes gehoor: honderd-vier-en-veertigduisend verseëldes.” Hulle maak “die Israel van God” uit, geestelike Israel, wat uit 12 stamme van 12 000 elk bestaan (Openbaring 7:4-8; Galasiërs 6:16). Wat ’n organisasie tog! Onder die Koning Jesus Christus sal die 144 000 “’n koninkryk en priesters vir ons God [wees] en hulle sal oor die aarde regeer”.—Openbaring 5:10, NAV; 14:1-4.
5. (a) Wie is vandag verbonde aan die oorblyfsel van geestelike Israel? (b) Wat maak almal wat Jehovah vrees uit, en wat bestaan volgens Spreuke 23:17, 18 vir hulle?
5 Nadat die apostel Johannes geestelike Israel gesien het, het hy ’n “groot menigte” gesien en gewonder wie hulle was. Hy is meegedeel: “Dit is hulle wat uit die groot verdrukking kom, en hulle het hul klere gewas en hul klere wit gemaak in die bloed van die Lam.” Diegene wat die “groot menigte” uitmaak, is die aardse onderdane van die Koninkryk, en daar is voorspel dat “die Lam”, Jesus Christus, hulle “na lewende waterfonteine [sou] lei”—ja, na die ewige lewe op ’n paradysaarde (Openbaring 7:9, 14, 17; Lukas 23:43, NW). Hierdie “ander skape” vorm nou “een kudde” saam met die oorblyfsel Koninkrykserfgename, en al hierdie persone wat Jehovah vrees, maak God se aardse organisasie uit (Johannes 10:16). Deur aan hom getrou te bly, sal hulle ’n geseënde toekoms hê, want ons lees: “Wees die hele dag in die vrees van die HERE. Waarlik, daar is ’n toekoms, en jou hoop sal nie verydel word nie.”—Spreuke 23:17, 18.
Hierdie ou stelsel het geen toekoms nie!
6. Waar bevind ons ons nou in die tydstroom?
6 Ons is nou diep in “die laaste dae” van hierdie goddelose stelsel (2 Timotheüs 3:1-5). Wêreldgebeure en Bybelchronologie bevestig gesamentlik die feit dat Jesus Christus in die noordelike herfs van 1914 in die hemele begin heers het (Psalm 110:1, 2). Nuusberigte toon daagliks dat die samegestelde “teken” van Jesus se “teenwoordigheid” en die voleinding van hierdie stelsel gesien word (Mattheüs, hoofstukke 24, 25). Die “geslag” wat gelewe het ten tye van die Koninkryk se oprigting in 1914 is weliswaar nou bejaard. Maar Jesus se woorde toon dat dit “sekerlik nie [sal] verbygaan” voordat die “groot verdrukking” ’n einde gemaak het aan hierdie wêreld, hierdie onregverdige mensegemeenskap wat “in die mag van die Bose”, Satan die Duiwel, lê nie. Hoe gou gaan dit gebeur? Gewis binnekort, want dit is die 70ste jaar van Koninkryksheerskappy!—Mattheüs 24:21, 34; 1 Johannes 5:19.
7. (a) Wat sal gedurende die eerste fase van die “groot verdrukking” gebeur? (b) Wat sal plaasvind kort nadat valse godsdiens vernietig is?
7 Die “groot verdrukking” sal verbasend skielik begin (Mattheüs 24:36-44). Gedurende die eerste fase daarvan sal “Babilon die Grote”, die wêreldryk van valse godsdiens, vernietig word. Die verwoesting van hierdie belangrike deel van Satan se stelsel sal die politieke en kommersiële elemente raak. In hierdie verband het die apostel Johannes geopenbaar dat “die konings van die aarde” soos volg sal weeklaag: “Wee, wee jou, o groot stad Babilon, o sterk stad, want in een uur het jou oordeel gekom!” En wat van die handelswêreld? Johannes voeg by: “En die handelaars van die aarde sal ween en rou bedrywe oor haar, omdat niemand hulle koopware meer koop nie” (Openbaring 18:1-19). Kort na valse godsdiens se vernietiging sal Jesus Christus sy hemelse leër gebruik om die res van hierdie goddelose stelsel te vernietig. Dit sal vergaan in die vinnig naderende “oorlog van daardie groot dag van die almagtige God” te Armageddon.—Openbaring 16:14-16; 19:11-21.
8. Watter organisasie is die enigste een met ’n blywende toekoms, en waarom is dit die geval?
8 Wat beteken dit vir diegene met ’n heilsame vrees vir Jehovah? Dit beteken dat hierdie wêreld onder Satan se beheer geen toekoms het nie! Die tyd wat dit gehad het, het feitlik verstryk! Jehovah se organisasie is gevolglik die enigste waarmee ’n mens ’n ewige toekoms kan bou.
9. (a) Watter vrae kan tereg gestel word met die oog op wat voorlê? (b) Watter tydige raad vind ons in 1 Timotheüs 6:17-19?
9 Sou dit dan, met die oog op wat voorlê, van geloof, of selfs van gesonde verstand, getuig indien iemand sou probeer om ’n veilige toekoms in die een of ander vertakking van hierdie gedoemde stelsel te bou? By watter wêreldlike korporasie of firma kan jy byvoorbeeld met veiligheid ’n blywende toekoms bou? By nie een nie! Is dit dan nie verstandig om vergenoeg te wees met voedsel en klere terwyl Koninkryksbelange die voorkeur in die lewe geniet nie? (Mattheüs 6:33; 1 Timotheüs 6:7-12; 2 Timotheüs 2:4). Die apostel Paulus se volgende raad is veral nou tydig: “Beveel die rykes in die teenwoordige wêreld om nie hoogmoedig te wees nie en ook nie hulle hoop te stel op die onsekerheid van die rykdom nie, maar op die lewende God wat ons alles ryklik verleen om te geniet; dat hulle goed moet doen en ryk wees in goeie werke, vrygewig, mededeelsaam, en vir hulle ’n skat weglê, ’n goeie fondament vir die toekoms, sodat hulle die ewige lewe kan verwerf.”—1 Timotheüs 6:17-19.
Bou jou toekoms verstandig
10. Wat moet vir ons van die grootste belang wees aangesien die “groot verdrukking” reg voor ons opdoem?
10 Watter geestelike balans blyk tog uit daardie woorde van die apostel! Jehovah se volk sien daarin ’n sleutel tot oorlewing. Dit is naamlik: Hou materiële dinge op hulle plek, in die besef dat dit nie onsekere “rykdom” is wat beklemtoon moet word nie, maar ‘rykheid in goeie werke’. Dit sal beslis ywerige, gereelde deelname aan die Christelike bediening insluit. Aangesien die onweerswolke van die “groot verdrukking” reeds op die horison saampak, is dit nie nou die tyd om ’n gelukkige toekoms in ’n wêreldse firma te beplan of die suksesleer te klim nie. Dit is tyd om die goeie nuus van God se Koninkryk te verkondig en die niksvermoedendes teen die dreigende gevaar te waarsku. Daarbenewens het Jesus Christus ons die opdrag gegee om te preek en dissipels te maak. As Jehovah se Getuies moet dit gevolglik vir ons van die grootste belang wees.—Mattheüs 24:14; 28:19, 20; Jesaja 43:10-12.
11. Wat is sommige blywende voordele van die Christelike bediening?
11 Baie beroepe waarin mense van die wêreld nou arbei, sal vir ewig gedurende die “groot verdrukking” eindig. Party soorte werk sal weliswaar weer in God se beloofde nuwe stelsel gedoen word. Maar weet jy van enige hedendaagse beroep met soveel voordelige aspekte as die Christelike bediening? Die geestelike ontwikkeling en vooruitgang wat deur hierdie Godgegewe werk teweeggebring word, sal in die Nuwe Orde uiters voordelig wees. Die sterk verhouding met Jehovah wat in die bediening aangekweek word, sal tot in daardie stelsel voortduur. En die beter onderrigvermoëns sal heel moontlik nuttig wees om miljoene verresenes op te lei.—Jesaja 54:13; Johannes 5:28, 29; Openbaring 20:12.
12. Watter wonderlike vooruitsigte het ons as Jehovah se knegte, maar wat moet ons doen?
12 As dit nou vir ons van die grootste belang is om God te behaag en sy wil te doen, het ons waarlik wonderlike vooruitsigte (Psalm 40:9; Romeine 12:1, 2). As ons inderdaad ‘altyd ywerig is om Jehovah te dien, sal ons ’n toekoms hê en sal ons hoop ons nie ontneem word nie’ (Spreuke 23:17, 18, NAV). Die ewige lewe sal ons lot wees as ons voortgaan om “die pad van die lewe” in die vrees van God te bewandel (Psalm 16:11). Maar langs die pad moet ons redelike, teokratiese doelwitte stel en bereik.
’n Paar redelike doelwitte
13. (a) Om watter Skriftuurlike rede kan ons sê dat Jehovah se aanbidding steeds verhef word? (b) Wat is, in sekere sin, sommige van die doelwitte wat honderdduisende bereik het?
13 Sommige het so pas begin met wat hulle bestyging van “die berg van die huis van die HERE” genoem kan word. Sedert die oorlogsjare 1914-18 word die aanbidding van Jehovah, wie se tempel of “huis”’ eens op ’n berg in Jerusalem gestaan het, steeds verhef. Dit het “’n blywende plek” gekry “bokant die bergtoppe” waarop tempels vir valse gode gebou is. Jehovah se aanbidding is sodoende ‘verhef bo die heuwels’. Menigtes stroom na die verhewe aanbidding van Jehovah aanbidding van Jehovah (Miga 4:1-4, vgl. NAV; Jesaja 2:2-4). Nadat hulle juiste kennis van die Skrif verkry het, toon hulle berou, bekeer hulle hulle, wy hulle hulle in gebed aan God toe en simboliseer hulle dit deur waterdoop (Johannes 17:3; Handelinge 2:28; 3:19, vgl. NW). Dit is, in sekere sin, doelwitte wat bereik word deur honderdduisende mense uit alle nasies wat Jehovah daarna getrou as deel van sy aardse organisasie dien. Hoe bly is hulle tog om deel te hê aan die verhewe aanbidding van die enigste ware God! Maar wat van jou? Het jy hierdie stappe gedoen?
14. Waartoe moet ons voortgaan selfs nadat ons begin het om Jehovah te aanbid, en hoe kan dit gedoen word?
14 Selfs nadat ons begin het om Jehovah saam met sy volk te aanbid, moet ons ’n goeie geestelike aptyt ontwikkel en behou. Nadat ons “die grondleer oor die Christus” geleer het, moet ons “tot rypheid voortgaan” deur al die geestelike voorsienings te benut wat Jehovah deur die “getroue en verstandige dienskneg” maak (Hebreërs 6:1-3, NW; Mattheüs 24:45-47). Jy kan jouself dus gerus afvra: Lees ek God se Woord gereeld? Is ek ’n goeie student van die publikasies wat deur die “dienskneg”-klas voorsien word?—Hebreërs 5:11-14.
15. (a) Watter raad het Paulus in Hebreërs 10:24, 25 gegee, maar wat doen party? (b) Wat word voorgestel indien daar ruimte vir persoonlike verbetering ten opsigte van vergaderingbywoning of die Christelike bediening is?
15 En ons moet ook let op Paulus se raad: “Laat ons ook na mekaar omsien deur mekaar aan te spoor tot liefde en goeie dade. Ons moenie van die samekomste van die gemeente af wegbly soos party se gewoonte is nie, maar mekaar eerder aanmoedig om daarheen te gaan, en dit des te meer namate julle die oordeelsdag sien nader kom” (Hebreërs 10:24, 25, NAV). Die gereelde bywoning van Christenvergaderinge is deel van ons “heilige diens”. Maar sommige woon elke week slegs die openbare toespraak by en verlaat die Koninkryksaal gereeld voordat die studie van Die Wagtoring begin. Ander mis dikwels die Diensvergadering. Het dit vir hulle minder betekenisvol geword omdat hulle nie baie bedrywig is in die getuieniswerk van huis tot huis en ander vertakkinge van die Christelike bediening nie? As jy vind dat daar ruimte vir persoonlike verbetering in enige van hierdie opsigte is, kan jy gerus tot Jehovah bid oor sulke sake en hom vra om jou te help om gereeld en voorbeeldig te wees in alle aspekte van “heilige diens”.—Hebreërs 12:25-29, vgl. NW.
16. (a) Watter redelike, teokratiese doelwitte word hier gemeld? (b) Wat is moontlik selfs al verhinder Skriftuurlike verpligtinge ’n mens om sulke doelwitte te bereik?
16 Watter ander redelike, teokratiese doelwitte is daar? Wel, ’n immer toenemende getal individue is nou in die voltydse bediening as gewone of hulppioniers. Kan jy jou bediening op sulke maniere uitbrei? Maar selfs al verhinder jou Skriftuurlike verpligtinge jou om sulke doelwitte te bereik, kan jy morele ondersteuning aan voltydse predikers gee terwyl jy soveel in God se diens doen as wat jou omstandighede toelaat. Deur getroue aanbidding en diens tot Jehovah se lof kan ons almal toon dat ons ‘nie ons hoop stel op die onsekerheid van die rykdom nie, maar op God’. En vir diegene wat pionierdiens kan doen, is dit beslis een van die beste maniere om ‘die ewige lewe te verwerf’.—1 Timotheüs 6:17-19.
17. (a) Watter diensvoorreg kan veral jonger persone oorweeg? (b) Watter bevrediging ervaar lede van die Bethelgesin?
17 Diens in een van die Bethelhuise rondom die wêreld is nog ’n wonderlike voorreg, een wat jonger persone in die besonder biddend kan oorweeg. Betheldiens bied uitstekende opleiding in menseverhoudinge, want Bethelwerkers werk ten nouste met mekaar saam ter bevordering van Koninkryksbelange. Sekere vermoëns wat by Bethel ontwikkel is, kan nuttig wees in die geweldige predikingswerk wat in die Nuwe Orde gedoen gaan word. Omdat baie persone vroeg in hulle lewe in Bethel begin dien, het hulle nie baie materiële besittings nie. Maar hulle is vergenoeg met voedsel en klere en ervaar die innige bevrediging wat verskaf word deur die wete dat hulle werk baie ander geestelik tot voordeel strek.—Prediker 3:12, 13.
18. Wat kan die voltydse diens ’n persoon leer, en hoe word dit deur die Skrif gestaaf?
18 Deelname aan verskillende vertakkinge van die voltydse diens kan ’n persoon leer om meer op Jehovah God te vertrou. Wêreldse mense wat hulle vertroue op ‘onsekere rykdom’ stel, huldig dikwels die beskouing dat ’n persoon vir homself moet sorg. Maar veral die voltydse bedienaar leer dat Jehovah oorgenoeg voorsien vir diegene wat ‘eers die Koninkryk en Sy geregtigheid soek’ (Mattheüs 6:25-34). Duisende wat jare lank in die pioniergeledere gedien het, sal getuig dat dit hulle nooit aan die lewensbenodigdhede ontbreek het nie. Praat met hulle en jy sal vind dat hulle heelhartig saamstem met die psalmis Dawid, wat gesê het: “Ek was jonk, ook het ek oud geword, maar nooit het ek die regverdige verlate gesien, of dat sy nageslag brood soek nie.”—Psalm 37:25.
Bou ’n veilige toekoms
19, 20. (a) Waarmee moet ons besig wees aangesien hierdie stelsel baie min tyd oor het? (b) Hoe kan ons dus verstandig optree met die oog op die toekoms?
19 As ons Jehovah se lojale getuies is, besef ons dat hierdie stelsel baie min tyd oorhet. Wat moet ons gevolglik doen? Ons moet verstandig optree ooreenkomstig hierdie woorde van die apostel Petrus: “Terwyl al hierdie dinge dan vergaan, hoedanig moet julle nie wees in heilige wandel en godsvrug nie?—julle wat die koms van die dag van God verwag en verhaas, waardeur die hemele deur vuur sal vergaan en die elemente sal verbrand en versmelt.”—2 Petrus 3:11, 12.
20 Die apostel Johannes het ook duidelik getoon dat hierdie wêreld verbygaan (1 Johannes 2:15-17). Hierdie ou stelsel sal binnekort vergaan. Almal wat God vrees, moet gevolglik nou besig wees met ‘heilige wandel en godsvrug terwyl hulle die dag van Jehovah verwag en verhaas’. Moet nooit vergeet dat slegs God se organisasie die einde van hierdie sterwende stelsel sal oorleef nie. Tree dus verstandig op en beraam planne om vir ewig te lewe en jou toekoms saam met Jehovah se organisasie te bou.
Ter hersiening
◻ Wat maak alle persone wat Jehovah vrees uit, en watter versekering bied Spreuke 23:17, 18 hulle?
◻ Wat is die enigste organisasie met ’n toekoms, en waarom sê jy so?
◻ Wat moet vir Jehovah se Getuies van die grootste belang wees noudat die “groot verdrukking” so naby is?
◻ Wat is van die teokratiese doelwitte wat deur baie bereik kan word?
[Lokteks op bladsy 17]
Alle persone wat God opreg vrees, het vandag vir Jesus as hulle Herder en dien saam in eenheid as Jehovah se aardse organisasie
[Prent op bladsy 18]
As gevolg van God se seën op die Koninkrykspredikingswerk, stroom menigtes na die verhewe aanbidding van Jehovah
[Lokteks op bladsy 19]
Bou jy jou toekoms saam met Jehovah se organisasie? Pionierdiens en Betheldiens is van die voortreflike teokratiese doelwitte wat baie bereik het