Hoe na is God aan jou?

RAPHAEL, wat drie jaar oud is, het sy gebed op hierdie eenvoudige manier begin: “Hoe gaan dit, Jehovah?” Hoewel ons so ’n benadering deur volwassenes sal afkeur, glimlag ons miskien oor hierdie jong persoon se kinderlike opregtheid. Die feit is dat Raphael duidelik na aan God voel. God is vir hom meer as ’n abstrakte krag. Hy is ’n werklike persoon. Is God vir jou so werklik, is hy so na aan jou?

Hoe vreemd is dit tog dat baie mense wat bely dat hulle in God glo nooit probeer om meer omtrent hom te leer of na aan hom te kom nie! Sommige word deur hoogmoed verhinder om tot God te nader. God se “oë is teen die hoogmoediges”, het koning Dawid gesê (2 Samuel 22:28). Ander is te beskeie en dink dat dit onmoontlik is om ’n verhouding met God te hê. Die hoogmoediges moet kinderlike ontvanklikheid aankweek. Jesus het gesê: “Voorwaar Ek sê vir julle, as julle nie verander en soos die kindertjies word nie, sal julle nooit in die koninkryk van die hemele ingaan nie!” (Mattheüs 18:2-4). En dit sal diegene wat oorbeskeie is miskien tot voordeel strek om in ’n groter mate die kinderlike gesindheid aan te kweek wat Raphael in staat stel om God so sonder aarseling te nader.

Maar hoewel die regte gesindheid ’n goeie begin is, is meer nodig om werklik na aan God te voel. In die eerste plek moet daar ’n bewustheid van hom wees. Word jy, wanneer jy na die wonderlike skeppingswerke van God kyk, beweeg om aan hom te dink, om hom te loof en te dank soos die psalmis Dawid gedoen het? Hy het gevra: “As ek u hemel aanskou, die werk van u vingers, die maan en die sterre wat U toeberei het—wat is die mens dat U aan hom dink, en die mensekind dat U hom besoek?” (Psalm 8:4, 5). Die band van liefde tussen jou en God sal ongetwyfeld versterk word as jy tyd opsysit om met waardering oor God se skepping te peins.

“Nader tot God”

Wanneer twee magnete reg opgestel is, trek hulle mekaar aan. Trouens, hoe nader hulle aan mekaar geskuif word, hoe sterker word daardie aantrekkingskrag. Iets soortgelyks kan in ons verhouding met God gebeur, want die dissipel Jakobus sê: “Nader tot God, en Hy sal tot julle nader.”—Jakobus 4:8.

Een manier om tot God te “nader” is deur van hom te leer (Johannes 17:3). Slegs deur God se Woord, die Bybel, te studeer, kan ’n mens sy naam, Jehovah, en die waarheid omtrent sy voornemens met die aarde en sy eienskappe, soos liefde, wysheid, geregtigheid en krag, leer (Psalm 83:18 NW). Jy sê miskien: ‘Maar ek weet reeds dat God almagtig, volkome regverdig en vol wysheid en liefde is.’ Maar beteken dit op sigself dat jy ware en genoegsame kennis van God het? Nie noodwendig nie.

Blote verklaringe oor God en sy eienskappe kan op sigself taamlik sinloos lyk, veral as jy dit nie met jou persoonlike ondervinding in verband kan bring nie. Hoe kan ’n persoon wat doof gebore is byvoorbeeld begryp wat “hard” en “sag” beteken? Hoe kan hy die verskil tussen die getjirp van ’n mossie en die gekoer van ’n duif ken as hy geen manier het om ’n vergelyking tussen hulle te tref nie? Net so kan die verklaring: “God is liefde” op sigself bloot na ’n nugtere feit klink (1 Johannes 4:8). Maar om God se liefde verstandelik sowel as emosioneel ten volle te begryp, moet ’n persoon in ag neem hoe daardie liefde teenoor die mensdom bewys is (Johannes 3:16). Hy moet ook God se liefde met sy eie persoonlike ondervinding in verband kan bring. “Smaak en sien dat die HERE goed is”, het die psalmis gesê (Psalm 34:9). Wanneer ’n individu dit doen, kan hy nie anders as om tot God aangetrokke te voel nie.

Klein Larry het eenkeer vir sy vader gevra: “Ek weet dat ek Jehovah meer as enigiets anders moet liefhê, maar hoe kan ek hom meer liefhê as vir Pappie? Ek kan Pappie sien en ek het Pappie lief, maar ek kan Jehovah nie sien nie.” Die vader het die kind gerusgestel deur te verduidelik dat so ’n gevoel aanvanklik heeltemal normaal is. En hy het die kind verseker dat hy, as hy eers geleer het wat die Bybel omtrent Jehovah se wonderlike eienskappe en dade sê, en God se liefdevolle sorg persoonlik ondervind het, meer geheg sou wees aan Jehovah as aan enige ander persoon! (Mattheüs 22:37, 38). So ook enigeen van ons wat die tyd opsysit om van Jehovah God te leer.

Wat dit beteken om God te “ken”

Ons gebruik dikwels die woord “ken” om te verwys na ’n kort kennismaking of blote herkenning van ’n persoon. ‘As ek my nie misgis nie ken ek hom’, sê ons dalk. Ons sê dit miskien selfs al het ons die persoon net skrams iewers raakgesien of al is ons net kortliks aan hom voorgestel.

Die apostel Johannes help ons om te besef dat ‘kennis’ van God meer as terloopse ‘kennismaking’ met Hom behels. Beskou ’n paar van die punte wat in Johannes se eerste goddelik geïnspireerde brief gestel word. Hy sê onder meer: Om God te ken, is om God lief te hê. Om God te ken en lief te hê, is om sy gebooie te bewaar. Dit beteken dat ons ophou om in die duisternis te wandel, en die waarheid doen. Dit beteken dat ons die leiding van God se Woord en gees volg en by die waarheid bly. Omdat ons God ken, nader ons hom vrymoedig in die gebed met die oortuiging dat hy ons hoor en ons gebed sal verhoor deur vir ons al die dinge te gee wat nodig is om sy wil te doen.—1 Johannes 1:5-7; 2:3, 4, 13, 14; 3:19-24; 4:6-8, 13; 5:3, 14, 15.

Dit is dus duidelik dat ’n mens God nie passief kan ken nie. Baie inspanning is nodig om Jehovah God te leer ken en ’n intieme verhouding met hom te geniet. Daar is ongetwyfeld meer nodig as om bloot sekere godsdiensritusse te volg. ’n Mens ken God ook nie deur ’n skielike emosionele sensasie te ervaar, soos wat baie “wedergebore Christene” na bewering geniet het nie. Die psalmis het gesê: “HERE, maak my u weë bekend; leer my u paaie. Lei my in u waarheid en leer my, want U is die God van my heil. U verwag ek die hele dag” (Psalm 25:4, 5). As ’n mens God “ken”, is dit derhalwe ’n hele lewenswyse!

Nadat die psalmis ons vermaan het om ‘te smaak en te sien dat Jehovah goed is’, sê hy: “Wyk af van wat verkeerd is, en doen wat goed is; soek die vrede en jaag dit na” (Psalm 34:9, 15). In sommige gevalle is drastiese optrede nodig om ‘af te wyk van wat verkeerd is’.

Mari, wat gedurende die sestigerjare ’n hippie was, het byvoorbeeld baie dwelms gebruik. Dit het aanleiding gegee tot diefstal, onsedelikheid, aborsie—selfs prostitusie. Na verloop van tyd het sy egter met Jehovah se Getuies in aanraking gekom en begin besef dat sy veranderinge sou moes aanbring as sy na aan God wou wees. “Ek het my strawwe rokery (twee tot drie pakkies per dag) en alle dwelms laat staan en my vas voorgeneem om Jehovah se bevel aangaande hoerery te gehoorsaam. Ek het al my boeke oor drome, astrologie en spiritisme weggegooi en het van al my afgodiese beelde, kerse en prente ontslae geraak.” Sy het haar uiteindelik aan Jehovah toegewy en dien hom vandag nog.

Maar sal jy die nodige poging aanwend om God te leer ken? Hoewel jou lewenswyse miskien nie so flagrant soos Mari s’n is nie, moet jy dalk ingrypende veranderinge aanbring. Maar jy kan seker wees dat God diegene wat opreg en nederig na hom soek met kinderlike gretigheid om sy wil te leer ken en te doen, nie teleurstel nie.

[Prent op bladsy 4]

’n Begeerte om God te leer ken, spoor baie aan om drastiese veranderinge in hulle lewens aan te bring