Bly staande teen Satan se liste!
“Trek die volle wapenrusting van God aan sodat julle staande kan bly teen die liste van die duiwel.”—EFESIËRS 6:11.
1. Wat is die lot van Christene wat hulle voorregte naleef?
TOEGEWYDE getuies van Jehovah wat hulle voorregte naleef, geniet ’n geestelike paradys. Waar God se profeet Jesaja hulle hedendaagse toestand profeties beskryf, het hy geskryf: “Die reg woon in die woestyn, en die geregtigheid hou verblyf in die vrugteboord. En die werking van die geregtigheid sal vrede wees, en die voortbrengsel van die geregtigheid rus en veiligheid tot in ewigheid.”—Jesaja 32:16, 17.
2. Waarom moet ons immer op ons hoede wees?
2 Om hierdie gelukkige toestand te bewaar, moet ons immer op ons hoede wees, want Satan die Duiwel beny ons ons gelukkige en voorspoedige geestelike staat. As Gog van Magog gaan hy binnekort ’n volskaalse aanval op Jehovah se volk doen (Esegiel 38:8-12). Op die oomblik is hy hoegenaamd nie ledig nie. Trouens, omdat hy weet dat hy nou baie min tyd het, is hy toorniger as ooit op Jehovah se knegte.—Openbaring 12:12, 17.
3. Waarom is Satan toornig op Jehovah se knegte?
3 Satan beheer hierdie wêreld van onregverdige mense (Efesiërs 2:1, 2; 1 Johannes 5:19). Hulle het hulle almal aan sy kant geskaar in die groot geskil oor universele soewereiniteit. Hulle antwoord bevestigend op Satan se aantyging dat geen mense hulle onkreukbaarheid teenoor Jehovah God sal bewaar nie (Spreuke 27:11). Die feit dat selfs net ’n paar Christene toon dat die Duiwel ’n verwaande grootprater en gemene leuenaar is, maak hom woedend. Hy gebruik dus elke lis, elke slenter, tot sy beskikking om die oorhand oor hierdie getroue knegte van Jehovah te kry. Ons het gevolglik ’n “worstelstryd . . . teen die bose geeste in die lug”.—Efesiërs 6:12.
4. Waarom moet ons ons daarop toelê om ons swakhede te bowe te kom?
4 Jy kan jou dus gerus afvra: ‘Hoe kan ek staande bly teen hierdie magtige Teëstander?’ Soos ons gesien het, gebruik hy die swakhede van die sondige vlees om Christene te verstrik. Ons het persoonlik miskien nie die swakheid dat ons lui is nie, maar ons is dalk hoogmoedig. Ons is moontlik nie genotsugtig waar dit by fisiese genietinge kom nie, maar ons het dalk ’n sug na materiële gewin. Ons moet ons dus daarop toelê om ons swakhede te bowe te kom en die Duiwel teëstaan sodat hy van ons sal wegvlug.—Jakobus 4:7.
Ons geestelike wapenrusting
5. Waarom moet ons die volle wapenrusting van God opneem?
5 Ons Teëstander gebruik herhaaldelik dieselfde liste. Deur God se Woord te bestudeer, kan ons dus op ons hoede wees vir die liste wat Satan sedert Bybeltye gebruik, en kan ons leer hoe om staande te bly teen hom. Die apostel Paulus het geskryf: “Trek die volle wapenrusting van God aan, sodat julle staande kan bly teen die liste van die duiwel.” Hy het ook vermaan “Neem die volle wapenrusting van God op, sodat julle weerstand kan bied in die dag van onheil en, nadat julle alles volbring het, staande kan bly.” Let daarop dat Paulus beklemtoon dat “die volle wapenrusting van God” opgeneem moet word. Dit sal gevaarlik wees as daar selfs net een deel van hierdie wapenrusting wat deur God voorsien is, ontbreek, want Satan sal dit raaksien en ons op daardie kwesbare plek aanval. Dit kan vir ons geestelik noodlottig wees.—Efesiërs 6:11, 13.
6. Wat verg dit van ons om ‘ons lendene met die waarheid omgord te hê’?
6 Die apostel begin deur ons aan te spoor: “Staan dan vas, julle lendene met die waarheid omgord” (Efesiërs 6:14). Die militêre gordel van die ou tyd was ’n leergordel wat om die middel of heupe gedra is. Dit was dikwels van klein metaalplate voorsien wat verdere beskerming gebied het. En ’n kryger se swaard of dolk het daaraan gehang. Wat beteken dit vir ’n Christen as sy lendene met die waarheid omgord is? Om met die waarheid van God se Woord omgord te wees, beteken dat dit baie styf moet sit sodat ons die Skrif kan gebruik om vrae op te klaar. Daar die militêre gordel ’n beskerming was, sal die waarheid ons die vertroue gee om ons laste te dra en ons beskerm. As ons ons verstande besig hou met God se waarhede sal dit ons beslis help om staande te bly teen Satan.
7. Wat beteken dit om “die borswapen van die geregtigheid” aan te hê?
7 Die apostel sê vervolgens vir ons dat ons ‘die borswapen van geregtigheid moet aanhê’ (Efesiërs 6:14). In Bybeltye het ’n borswapen bestaan uit skubbe, kettingskakel of soliede metaal en veral die hart beskerm. Om hierdie borswapen van die geregtigheid aan te hê, moet ons bowenal ‘ons hart bewaak’ (Spreuke 4:23). Slegs dan kan ons staande bly teen Satan deur beweeg te word om Jehovah te dien en om rein lewens te lei wat sal verhoed dat ons ’n sedelik besoedelende invloed onder Jehovah se volk word.—1 Petrus 1:14-16.
8. Wat behels dit om geskoei te wees met “die bereidheid vir die evangelie van vrede”?
8 Paulus meld dan dat ons geskoei moet wees met “die bereidheid vir die evangelie van vrede” (Efesiërs 6:15). Wat word daardeur te kenne gegee? Dat ons baie bedrywig bly in die verkondiging van die Koninkryksboodskap op ’n vreedsame wyse, net soos Jesus die 70 evangeliste beveel het: “En in watter huis julle ook al mag ingaan, sê eers: Vrede vir hierdie huis!” (Lukas 10:5). Ons kom nie om met mense te stry nie. Ons kom eerder om vir hulle troos, vreugde, gemoedsrus en hoop te bring. Satan sal probeer om teenstand en strydlustigheid in sommige hoorders te wek om ons soortgelyk te laat optree. Om staande te bly teen Satan se liste moet ons dus taktvol en geduldig wees en ‘vir almal alles word’.—1 Korinthiërs 9:19-23.
9. Beskryf die skilde en vurige pyle van die ou tyd?
9 Die apostel vermaan voorts: “Behalwe dit alles neem die [groot] skild van die geloof op waarmee julle al die vurige pyle van die Bose sal kan uitblus” (Efesiërs 6:16, vgl. NW). Die Griekse woord wat hier weergegee word met “groot skild” dui een aan wat groot genoeg is om die grootste deel van die liggaam te beskerm. Wat die vurige pyle” betref, het die Romeine soms pyle gemaak van hol riete met klein houertjies wat hulle met brandende nafta gevul het. Paulus het moontlik na sulke vurige pyle verwys.
10. Wat gebruik Satan as “vurige pyle”?
10 Satan skiet verskeie soorte “vurige pyle” na Christene. Hierdie “pyle” sluit spot, smaad en laster in wat op God se volk gerig is en van hulle vyande kom. Hierdie “pyle” kan ook die pogings van sommige wees om Christenstryders te ontmoedig weens die sogenaamde powere resultate van hulle bedrywigheid in die bediening of gebrek aan vordering in die stryd teen vleeslike swakhede. Hierdie “pyle” sluit ook bittere woorde, sarkasme en wanvoorstellings in. Satan het Christene soms gewond deur hulle nuuskierigheid te wek oor wêreldlike wysheid in verband met okkultisme of filosofieë oor die oorsprong en lot van die mens. Jy moet sulke “dieptes van die Satan” tot elke prys vermy. Doen jy dit?—Openbaring 2:24.
11. Waarvan hang die grootte en doeltreffendheid van ons geestelike skild af?
11 Om ons harte teen Satan se “vurige pyle” te beskerm, het ons ’n groot, sterk skild van die geloof nodig. Hoe groot en ondeurdringbaar dit presies gaan wees, hang in ’n groot mate van ons af. In die mate waartoe ons die gunstige tyd uitkoop vir persoonlike Bybelstudie, bepeinsing oor God se Woord en omgang met medegetuies van Jehovah, dermate sal ons die nodige beskerming geniet. Ons moet natuurlik toepas wat ons leer, want ‘die geloof sonder die werke is dood’ (Jakobus 2:26). Een van die beste maniere om ons geloof te vergroot en te versterk om staande te kan bly, is gevolglik om ernstige pogings aan te wend om geloof by ander in te skerp.
12. Wat is ons geestelike helm, en van watter nut is dit vir ons?
12 Paulus sê voorts: “En neem aan die helm van verlossing” (Efesiërs 6:17). In die ou tyd is sommige helms van biesies gemaak, ander van opgestopte linne of leer en nog ander van metaal (1 Samuel 17:38). Maar waaruit bestaan ons geestelike helm? Paulus het vir Christene in Thessalonika gesê: “Laat ons . . . nugter wees, met die borswapen . . . aan, en as helm die hoop op die saligheid” (1 Thessalonicense 5:8). Ja, hoop kan ons inderdaad beskerm teen die houe en slae van Satan en sy agente. Sterk, Bybelse “hoop beskaam nie” (Romeine 5:5). Sulke hoop sal ons teen materialistiese propaganda beskerm, want dit sal ons aanspoor om eers God se Koninkryk te soek.—Mattheüs 6:33; Lukas 12:31.
13. Wat is “die swaard van die Gees”, en van watter nut is dit?
13 Laastelik kom ons by ons een stuk offensiewe wapenrusting, “die swaard van die Gees—dit is die woord van God” (Efesiërs 6:17). Die Griekse woord wat hier met “swaard” weergegee word, verwys na ’n kort swaard wat ooreenkom met ’n dolk, en dit dui op ’n stryd van digby. Met juiste kennis van God se Woord kan ons valse leerstellings deursteek of afkap en hulle gebrek aan logika en, in die besonder, hulle weerspreking van die Heilige Skrif, blootlê (2 Korinthiërs 10:4). Ons doen dit nie uit trots nie, maar uit nederigheid en liefde vir God, die waarheid en ons medemens. Gelukkig kan ons, met behulp van ware Christelike publikasies ‘’n vaste greep op die woord van die lewe’ kry.—Filippense 2:16, NW.
Christelike eienskappe as hulpmiddele
14. (a) Waarom het ons geen rede om hoogmoedig te wees nie? (b) Waarom moet ons nederig wees om teen Satan staande te bly?
14 Benewens ons geestelike wapenrusting sal Christelike eienskappe ons ook help om staande te bly teen die Duiwel. Aangesien Satan hoogmoed uitbuit, sal nederigheid en die gees van ’n gesonde verstand ons help in ons stryd teen hom. Trouens, geen Christen moet ‘meer van homself dink as wat ’n mens behoort te dink nie’. Wanneer ons alles gedoen het wat ons opgedra is, moet ons kan sê: “Ons is onverdienstelike diensknegte, want ons het gedoen wat ons verplig was om te doen.” Ons het boonop God se genade of onverdiende goedheid nodig om staande te bly teen Satan, en om dit te hê, moet ons nederig wees, want “God weerstaan die hoogmoediges, maar aan die nederiges gee Hy genade.”—Romeine 12:3; Lukas 17:10; Jakobus 4:6.
15. Van watter nut is selfbeheersing om staande te bly?
15 Selfbeheersing is nog ’n Christelike eienskap wat ons sal help om staande te bly teen Satan. As ons nie ons emosies soos woede kan beheers nie, of ons ons aan voedsel, drank of seks vergryp, stel dit ons bloot aan die aanvalle en manipulasie van die Duiwel. Toe ons “gewandel het in die begeerlikhede van ons vlees”, het ons in werklikheid gewandel “volgens die loop van hierdie wêreld, volgens die owerste [Satan die Duiwel] van die mag van die lug, van die gees wat nou in die kinders van die ongehoorsaamheid werk” (Efesiërs 2:1-3). As ons toelaat dat selfsugtige, onrein gedagtes en gevoelens van ons besit neem, loop ons gevaar om deur die Duiwel verstrik te word om sy wil te doen (2 Timotheüs 2:26). Om teen hom staande te bly, moet ons streng beheer uitoefen oor ons gedagtes en emosies asook oor ons woorde en dade. Ons moet ons verstande dissiplineer om deugsame, regverdige, rein en lieflike dinge te bedink.—Filippense 4:8.
16. Waarom kan onselfsugtige liefde ons help om staande te bly?
16 Onselfsugtige liefde in die besonder sal ons help om staande te bly teen Satan die Duiwel. Hy aarsel nie om enige selfsugtige karaktertrek wat hy in ons waarneem, uit te buit nie. In die mate dat onselfsugtige liefde ons besig hou in die diens en aanbidding van Jehovah, dermate sal ons onvatbaar wees vir Satan se aanvalle. Watter kans staan hy by ons as ons Jehovah met ons hele hart, siel, verstand en krag liefhet? Liefde maak ons ook besorg oor die redding van ander, en dit sal ons help om ons eie redding te verseker (Markus 12:30, 31; 1 Timotheüs 4:16). Solank ons liefde in al sy verskillende manifestasies openbaar, sal nòg Satan nòg enige van sy agente, sigbaar of onsigbaar, ons weerstand teen hom kan verswak.—1 Korinthiërs 13:4-8.
17. Waarom is gebed so belangrik om staande te bly?
17 Om staande te bly teen Satan se liste moet ons gebed ten volle benut. Waarom? Omdat dit eenvoudig onmoontlik is om in ons eie krag te seëvier. Ons het hulp van bo nodig. Nadat Paulus die geestelike wapenrusting beskryf het, het hy medegelowiges aangespoor om ‘met alle gebed en smeking by elke geleentheid in die gees te bid’. Te dien einde moes hulle “waak met alle volharding en smeking vir al die heiliges”, die apostel inkluis.—Efesiërs 6:18, 19.
18, 19. (a) Hoe kan lof en danksegging ons help? (b) Van watter nut is versoeke en smeking?
18 Wat sluit “alle gebed” in? Een vorm van gebed is lof. In die lig van wie Jehovah is, sy eienskappe en sy posisie in die heelal, verdien hy beslis ons lof (Psalm 33:1). Nog ’n vorm van gebed is danksegging. En hoeveel rede het ons tog om dank te bring aan die Gewer van “elke goeie gif en elke volmaakte gawe”! (Jakobus 1:17). Ons word heel gepas vermaan om Jehovah te “loof om sy goedertierenheid en om sy wonderdade aan die mensekinders” (Psalm 107:31). Harte en verstande vol waardering sal ons inderdaad help om staande te bly teen Satan.
19 Versoeke is nog ’n vorm van gebed. Ons kan gepas vra vir dinge soos wysheid (Jakobus 1:5), die heilige gees (Lukas 11:13), vergifnis van sondes (1 Johannes 1:9; 2:1, 2) en God se seën op ons werk (Psalm 90:17). Daar is ook smeking. Dit sien op ’n ernstige bede tot Jehovah God, soos in tye van groot spanning of gevaar. Toe Paulus in die gevangenis was, het hy dus versoek dat smeekbede vir hom gedoen moes word (Efesiërs 6:18-20). Hierdie vorme van gebed sal ons gewis help om staande te bly teen Satan.
Wees vasbeslote om staande te bly
20, 21. Hoe kan ons volkome seëvier?
20 As ’n groep geniet Jehovah se volk vandag waarlik die seëninge van ’n geestelike paradys. Maar as ons individueel hierdie geseënde toestand wil bly geniet, kan ons dit nie as vanselfsprekend aanneem nie. Ons moet voortdurend op ons hoede wees en staande bly teen ons Teëstander, Satan die Duiwel.—1 Petrus 5:8, 9.
21 Soos ons gesien het, het die Duiwel talle liste, en sy oogmerk is om ons ons onkreukbaarheid te laat prysgee en om ons te oorreed om op te hou om Jehovah God te dien. Maar Satan sal ons nie uitoorlê as ons ons geestelike wapenrusting van God af aanhou, voortgaan om vrugte van die gees soos liefde en selfbeheersing aan te kweek en in die gebed volhard nie. Met die liefdevolle hulp van ons God, Jehovah, sal ons dus ten volle toegerus wees om staande te bly teen Satan se liste.
Onthou jy?
◻ Waarom is Satan toornig op Jehovah se knegte?
◻ Waaruit bestaan die Christen se geestelike wapenrusting?
◻ Wat is sommige van Satan se “vurige pyle”, maar watter beskerming het ons daarteen?
◻ Waarom moet ons nederig wees om teen die Duiwel staande te bly?
◻ Waarom is gebed so belangrik om staande te bly?
[Prent op bladsy 19]
Gereelde gebed sal ’n gesin help om Satan se aanvalle te weerstaan