’n Regering wat doen wat die mens nie kan doen nie
„Kom hoor wat God gedoen het, kom hoor van sy magtige dade onder die mense.”—PSALM 66:5, NAV.
1, 2. (a) Hoe getuig die sigbare heelal van die ontsagwekkende krag van die Skepper? (b) Waarom moet ons glo wat Jehovah se profetiese Woord oor ons tyd sê?
JEHOVAH het die mag om te doen wat die mens nie kan doen nie. Ter toeligting: Mense staan verstom oor die krag van die kernbom; maar dit is onbeduidend in vergelyking met die ontsaglike krag in ons son. En tog is die son maar net een van sowat 200 miljard sterre in ons Melkweg alleen. Sterrekundiges raam dat daar ongeveer 100 miljard melkweë in die heelal kan wees, elkeen met miljarde sterre. Watter ontsettende krag het dit tog nie geverg om dit alles te skep nie! (Jesaja 40:26). Hierdie ontsagwekkende krag van die Skepper laat die krag van mense heeltemal onbeduidend lyk.—Jesaja 40:15.
2 Niemand moet dus daaraan twyfel dat Jehovah kan doen wat hy sê hy sal doen nie (Jesaja 46:9, 10; 55:11). Ons moet dit glo wanneer sy profetiese Woord vir ons sê dat ons die einde nader van die tyd waarin hy toegelaat het dat mense hulle eie kop volg. Die geskiedenis toon dat wat mense aan ander mense en aan diere, sowel as aan die aarde self, gedoen het, ’n skande, ’n klad op God se heelal, is. Daarom het Jehovah die volste reg om hierdie klad eens en vir altyd uit te wis.—Hosea 4:1-3; Judas 14, 15.
3. Wat sê Bybelprofesie oor die nabye toekoms?
3 Wat vandag op die wêreldtoneel plaasvind, is ’n duidelike bewys dat hierdie stelsel inderdaad die finale deel van „die laaste dae” bereik het wat in 2 Timotheüs hoofstuk 3 voorspel is. Jehovah gaan eersdaags hierdie stelsel verbrysel en die hoof daarvan, Satan die Duiwel, buite aksie stel. Dit sal gevolg word deur ’n splinternuwe stelsel op aarde, wat beheer sal word deur die hemelse regering waarvoor Jesus sy volgelinge soos volg leer bid het: „Laat u koninkryk kom; laat u wil geskied, soos in die hemel net so ook op die aarde.”—Mattheüs 6:10; Daniël 2:44; Romeine 16:20.
Die vrykoopbeginsel
4. Hoe het Jehovah die vrykoopbeginsel in eertydse Israel gebruik?
4 Menseregerings kan nie sonde, siekte en die dood elimineer nie. Maar God se regering sal doen wat mense nie kan doen nie. Ons kry ’n mate van insig in hoe dit sal plaasvind wanneer ons Jehovah se handelinge met sy eertydse volk Israel ondersoek. God het destyds die vrykoop- of losprysbeginsel gebruik. As ’n Israeliet byvoorbeeld arm geword het, moes hy hom moontlik as ’n slaaf aan ’n nie-Israeliet verkoop. Maar ’n naverwant kon hom loskoop as hy die gepaste koopsom gehad het.—Levitikus 25:47-49.
5, 6. (a) Hoe is die vrykoopbeginsel toegepas om die mensdom van erfsonde te bevry? (b) Word almal outomaties van sonde bevry?
5 Op soortgelyke wyse het God gereël dat die mensdom uit slawerny aan die sonde vrygekoop word. Die prys moes gelyk wees aan wat verloor is (Deuteronomium 19:21). Adam het volmaakte, ewige menselewe verloor. Aangesien sondige mense niks besit at daardie waarde ewenaar nie, kan hulle nie eens „’n broer loskoop nie” (Psalm 49:8). Die Bybel het egter die koms voorspel van die een wat kan. Hy was Jesus Christus. Daar is geopenbaar dat Jesus ’n voormenslike bestaan in die hemel gehad het. Maar sy lewe is deur Jehovah se krag na die moederskoot van Maria oorgeplaas. So is hy as ’n mens gebore. Maar met God as sy Vader het hy nie die sondigheid geërf wat die res van die mensdom verlam het nie.—Mattheüs 1:18-21; Johannes 1:1, 14; 1 Petrus 2:22.
6 Jesus het dus die enigste ding besit wat gelykwaardig was aan ’n volmaakte menselewe—nog ’n volmaakte menselewe. Maar anders as ongehoorsame Adam het Jesus aan God gehoorsaam gebly. En toe hy sy lewe ten behoewe van die mensdom geoffer het, het Jehovah dit as die gepaste losprys aanvaar (Galasiërs 1:4). Maar beteken dit dat almal outomaties van sonde bevry is en volmaaktheid onder Koninkryksheerskappy sal bereik? Nee, want Johannes 3:16 (NW) sê: „God het die wêreld so liefgehad dat hy sy eniggebore Seun gegee het, sodat elkeen wat geloof beoefen in hom, nie vernietig sou word nie, maar die ewige lewe sou hê.” Dit is alleen deur die losprysvoorsiening te aanvaar en iets daaromtrent te doen dat ons die volmaking van liggaam en verstand in die Paradys sal ervaar.—Openbaring 21:4.
Opvoeding in die Nuwe Orde
7, 8. Hoe groot is die leerpotensiaal van die menslike brein?
7 Die verstand het ’n ontsaglike potensiaal om kennis in te neem, selfs in die mens se huidige onvolmaakte toestand. Maar dit is net ’n breukdeel van wat dit in die Nuwe Orde sal kan leer, waar die brein se vermoë nie deur sonde belemmer sal word nie. In The Brain Book sê die skrywer: „Binne-in ons kop is een van die ingewikkeldste stelsels in die bekende heelal. Die krag en veelsydigheid daarvan oortref dié van menige mensgemaakte rekenaar verreweg.” Hy voeg by: „Daar word dikwels gesê dat ons net 10 persent van ons volle verstandelike potensiaal gebruik. Dit wil nou voorkom of dit ’n growwe oorskatting is. Ons gebruik waarskynlik nie eens een persent nie—bes moontlik 0,1 persent of minder.”
8 Stel jou voor wat die brein mense in staat sal stel om te doen wanneer hy in die Nuwe Orde sy volle potensiaal bereik. Dink aan al die fassinerende dinge wat Jehovah op hierdie aarde gesit het waarvan ons kan leer, soos die diere-, see- en plantelewe. En hoe wonderlik sal dit nie wees om van die verbasende heelal en sy miljarde melkweë te leer nie. Dink aan al die vaardighede wat ons op die gebied van die kuns, musiek, handwerk en op ’n magdom ander gebiede sal kan bemeester.
9. Watter soort opvoeding sal in die Nuwe Orde die grootste voordeel meebring?
9 Daar sal ’n ander soort opvoeding in die Nuwe Orde wees wat vir almal die grootste voordeel sal meebring. Jesus het gesê: „Hulle sal almal deur God geleer wees” (Johannes 6:45). Dit is die hoogste opvoeding. En dit sal beskikbaar gestel word aan al die onderdane van God se Koninkryk, met inbegrip van die wat die einde van hierdie stelsel oorleef (Openbaring 7:9, 14). Ander Koninkryksonderdane word in Johannes 5:28 en 29 gemeld, waar Jesus gesê het: „Daar kom ’n uur wanneer almal wat in die grafte is, sy stem sal hoor en sal uitgaan.” Hierdie opstanding van miljarde gestorwenes—iets wat vir mense onmoontlik is om te bewerkstellig—beteken dat ’n groot opvoedingswerk ten behoewe van hulle gedoen sal moet word.
10. Hoe sal opvoeding in die Nuwe Orde verskaf word?
10 Vandag is daar baie botsende opvoedingstelsels. Maar in die Nuwe Orde sal God se hemelse regering een wêreldwye opvoedingstelsel voorsien om mense op eenvormige wyse die waarheid aangaande Jehovah te leer. Dit sal onderrigting oor goeie menseverhoudinge insluit. Mense sal nie geleer word om hulle op hulle ras, nasionaliteit of sosiale stand te beroem nie. Die aarde se bewoners sal eerder leer om mekaar lief te hê en mekaar se waardigheid te respekteer. Sulke opvoeding sal ook lei tot ’n gesonde vernuwing van persoonlikhede sodat dit die verhewe eienskappe van Jehovah weerspieël.—Handelinge 10:34, 35; Kolossense 3:9-12.
11, 12. Hoe kan ons seker wees dat sulke opvoeding in die Nuwe Orde geslaag sal wees?
11 Kan sulke opvoeding werklik slaag? Ons is seker dat dit kan en sal slaag. Een rede is dat God, wat nie kan lieg nie, sê dat dit sal slaag (Titus 1:2). Buitendien, hierdie soort opvoeding slaag nou reeds! Jehovah het alreeds ’n wêreldwye onderrigtingsorganisasie wat miljoene mense van sy Koninkryksregering en die vereistes daarvan leer. Dit gebeur omdat Koninkryksheerskappy reeds sedert die begin van „die laaste dae” in 1914 ’n werklikheid is.
12 Sedert daardie tyd word die profesie van Mattheüs hoofstuk 25 vervul. Dit toon dat Jesus Koninkryksmag ontvang terwyl God se vyande nog op aarde is. Vers 32 sê: „Voor Hom sal al die nasies versamel word, en Hy sal hulle van mekaar afskei soos die herder die skape van die bokke afskei.” Jehovah leer vandag hierdie sagmoedige „skape” deur middel van sy groeiende sigbare organisasie. Omdat hulle waardeer wat hulle leer, probeer hulle hulle persoonlikhede na God se beeld vernuwe. En die feit dat hierdie opvoeding nou reeds ’n goeie invloed op miljoene mense het, is ’n gewisse teken dat dit in God se Nuwe Orde ’n baie groter invloed ten goede sal hê.
Die totstandbrenging van ’n paradys
13. Watter groot vernuwingswerk sal onder Koninkryksheerskappy gedoen word?
13 ’n Ander soort werk onder Koninkryksheerskappy sal wees om hierdie aarde in ’n paradys te verander. En daar kan nie krotbuurte of armoede in die Paradys wees nie. Mense wil ordentlike huise en grond met bome, blomme en tuine hê. Diegene wat bereid is om deur God geleer te word, sal al daardie dinge hê. Jesaja 65:21 en 22 voorspel: „En hulle sal huise bou en bewoon, en wingerde plant en die vrug daarvan eet: hulle sal nie bou dat ’n ander dit bewoon nie; hulle sal nie plant dat ’n ander dit eet nie . . . en my uitverkorenes sal die werk van hulle hande self geniet.”
14, 15. Waarom kan ons daarvan seker wees dat Jehovah se knegte ’n paradys tot stand sal kan bring?
14 Moenie twyfel aan wat Jehovah in die Nuwe Orde deur middel van die gewillige harte en hande van sy volk sal doen nie. Selfs vandag staan die boubedryf verstom oor wat Jehovah se Getuies doen wanneer hulle geboue oprig, soos die vinnig geboude Koninkryksale. Nadat een van hierdie Koninkryksale in die Verenigde State gebou is, het ’n koerant in sy hoofartikel gesê: ,Iets waardevollers as ’n gebou is deur daardie 2 000 vrywilligers opgerig. Stadsleiers behoort goed te kyk na wat verlede naweek gedoen is. Geesdrif, toewyding en die begeerte om ’n doelwit te bereik, is met verstommende resultate ingespan. As plaaslike groepe maar net daardie selfde bronne kon aanwend, sou enige doelwit—hetsy dit hersiklussering, misdaadvoorkoming of gemeenskapsontwikkeling is—binne bereik wees. ’n Menigte werkers het bewys watter potensiaal daar in die siel is wanneer ’n gemeenskap verenig is. Ons hoop dat die Koninkryksaal ’n bron van inspirasie vir die gemeente van Getuies sal wees. Dit is alreeds ’n inspirasie vir ons almal.’
15 Hierdie gewilligheid en toenemende vaardigheid van Jehovah se knegte sal met selfs groter voordeel in God se Nuwe Orde aangewend word. En watter genot sal dit tog nie wees om al die ongewenste plekke op te ruim en dit deur pragtige huise en omgewings te vervang nie! Hoe bevredigend sal dit nie wees om te weet dat jou pogings die aarde elke dag ’n dag nader aan ’n wêreldwye paradys sal bring nie!
’n Verenigde, wêreldwye gesin
16. Waarom sal die bewoners van die Nuwe Orde nooit deur geweld bedreig word nie?
16 Die inwoners van die Nuwe Orde sal ook nooit bedreig hoef te voel deur misdadigheid, onluste of oorlog nie. Psalm 46:9 (NAV) sê: „Die oorloë oor die hele aarde laat [God] ophou.” Die „Vredevors”, Jesus Christus, sal blywende wêreldvrede handhaaf, want „sy heerskappy sal uitbrei, en Hy sal vir altyd vrede en voorspoed bring” (Jesaja 9:5, 6, NAV). Met ware vrede wat heers, en met die hele mensdom wat in dieselfde hoë standaarde onderrig is, sal almal verenig wees in ’n onverbreeklike band van liefde. Gevolglik sal daar nie meer verdelende landsgrense wees nie.
17. Hoe verreikend is die vrede en eenheid wat God se knegte nou reeds geniet?
17 Is sulke beloftes te goed om waar te wees? Nee, want vrede en eenheid is reeds ’n werklikheid onder diegene wat hulle lojaal aan Koninkryksheerskappy onderwerp! Dink hieraan: Daar is meer as twee en ’n half miljoen getuies van Jehovah rondom die aarde. En hulle vervul alreeds Jesaja 2:4, wat sê: „Hulle sal van hul swaarde pikke smee en van hul spiese snoeimesse; nie meer sal nasie teen nasie die swaard ophef nie, en hulle sal nie meer leer om oorlog te voer nie.” Onder geen omstandighede sal Jehovah se Getuies opsetlik die lewe van hulle broers, of enigiemand anders, in enige land neem nie. Soos die Italiaanse publikasie Il Corriere di Trieste opgemerk het: „Hulle sal liewer sterf as om die grondreël . . . JY MAG NIE DOODSLAAN NIE te skend!” Omdat hulle by God se standaarde bly, geniet Jehovah se Getuies ware vrede en eenheid, iets wat heeltemal buite die bereik van hierdie wêreld is. En die feit dat miljoene van hulle hierdie toestand in ’n wêreld vol tweedrag geniet, is ’n bewys van wat sal gebeur wanneer God se Koninkryk al die aarde se sake beheer.—Johannes 13:34, 35; 1 Johannes 3:10-12.
18, 19. Meld ander voordele wat mense geniet wanneer hulle by God se hoë standaarde bly
18 Benewens hierdie internasionale vrede en eenheid bring gehoorsaamheid aan God se verhewe standaarde mense voort wat vir hulle naaste en hulle naaste se eiendom omgee. Hulle ,gedra hulle in alle dinge eerlik’ (Hebreërs 13:18, NW). ’n Frans-Kanadese rubriekskrywer het in hierdie verband in Le Journal de Montreal oor Jehovah se Getuies gesê: „As hulle die enigste mense in die wêreld was, sou ons nie saans ons deure hoef te sluit en die inbraakalarm aan te skakel nie.”
19 Hierdie lojale onderdane van God se regering het geen misdaadprobleem in hulle geledere nie, terwyl dit in die wêreld hoogty vier. En omdat hulle by die Bybel se hoë sedelike standaarde bly, word hulle nie geteister deur die geslagsiektes of aborsies wat in elke nasie ’n epidemie is nie. Jehovah se knegte het ook diepe eerbied vir die huwelik, in teenstelling met die wêreld se permissiewe beskouing van die huweliksreëling. Waarom kan Jehovah se Getuies sulke standaarde handhaaf? Omdat Jehovah sy lojale aanbidders lei, en „by God is alle dinge moontlik”.—Mattheüs 19:26.
Versamel vir ware aanbidding
20. Wat is die belangrikste beweging van ons tyd?
20 Of mense dit besef of nie, die wêreldwye insameling van sagmoedige mense in Jehovah se organisasie is die belangrikste beweging van ons tyd. Dit vervul die merkwaardige profesie van Jesaja 2:2, 3: „En aan die einde van die dae sal die berg van die huis van die HERE [sy verhewe, ware aanbidding] vasstaan op die top van die berge en verhewe wees bo die heuwels, en al die nasies sal daarheen toestroom. En baie volke sal heengaan en sê: Kom laat ons optrek na die berg van die HERE, . . . dat Hy ons sy weë kan leer en ons in sy paaie kan wandel.”
21. Wat word opregtes van hart aangemoedig om te doen?
21 Ons moedig alle opregtes van hart aan om ’n deel te word van hierdie wêreldbeweging na ware aanbidding en regverdige regering. Geniet die seëninge wat nou reeds voortvloei uit omgang met ’n volk wat in God se wette en beginsels onderrig word. Onderwerp jou lojaal aan die Koninkryksregering wat binnekort hierdie aarde in ’n paradys sal begin omskep. Stel jou vertroue in daardie Koninkryk en nie in die planne van hierdie wêreld nie, want soos Psalm 127:1 sê: „As die HERE die huis nie bou nie, tevergeefs werk die wat daaraan bou.” Gee gehoor aan die uitnodiging van Psalm 66:5 (NAV): „Kom hoor wat God gedoen het, kom hoor van sy magtige dade onder die mense.” Ja, kom na die God wat die allerbeste regering vir die mensdom waarborg, die regering wat sal doen wat die mens nie kan doen nie, die regering wat in die nabye toekoms die enigste regering oor hierdie aarde sal wees.
Hoe sal jy antwoord?
◻ Waarom kan ons daarvan seker wees dat Jehovah sy voornemens sal verwesenlik?
◻ Hoe word die vrykoopbeginsel toegepas om mense van hulle sonde te bevry?
◻ Watter groot opvoedings- en vernuwingswerk sal in die Nuwe Orde gedoen word?
◻ Watter getuienis is daar vandag dat vrede, eenheid en liefde in die Nuwe Orde oor die hele aarde sal heers?
[Prent op bladsy 17]
Onder Koninkryksheerskappy sal waarheidliewende mense „almal deur God geleer wees”
[Prent op bladsy 19]
Vrede en eenheid is reeds ’n werklikheid onder diegene wat hulle aan die Koninkryksregering onderwerp