God se Woord is lewend

Gierigheid lei tot ’n man se ondergang

Naäman is dankbaar dat hy van sy melaatsheid genees is. Hy toon sy dankbaarheid deur vir Elisa ’n geskenk van duisende goud- en silwerstukke, sowel as tien stelle van die beste klere, aan te bied. Maar Elisa wys die geskenk van die hand. Dit was eintlik Jehovah wat die wonderbaarlike genesing gedoen het, en Elisa wil geen eer daarvoor neem deur ’n geskenk te aanvaar nie.

Maar wat van Elisa se dienaar Gehasi? Hy kyk met gierige oë na daardie pragtige klere en al daardie geld. Wat sal gebeur as Gehasi aanhou wens dat hy van daardie goed in die hande kon kry? Die verkeerde begeerte kan hom wegsleep en verlok sodat hy sondig.​—Jakobus 1:13-15.

Wel, Naäman en sy dienaars neem uiteindelik afskeid en pak die terugreis na Aram aan. Maar Gehasi hou nie op om aan daardie pragtige klere en al daardie geld te dink nie. Kyk daar! Gehasi hardloop iewers heen. Waarheen gaan hy?

Gehasi hardloop agter Naäman aan en haal hom in. Naäman groet Gehasi en vra: ,Is alles reg?’

‘Ja’, antwoord Gehasi. ,Maar Elisa het my na u gestuur om vir u te sê dat twee besoekers nou net daar aangekom het. En Elisa vra dat u vir hulle twee stelle klere en ’n bietjie silwer gee.’ Dit was ’n leuen. Gehasi wou self hierdie goed hê. Maar Naäman weet dit nie, en daarom is hy alte bly om die geskenk te gee. Hy dring selfs daarop aan dat Gehasi meer geld neem as waarvoor hy vra. Toe Gehasi by die huis kom, vra Elisa hom: ,Waar was jy gewees?’

‘Ag, nêrens nie’, antwoord hy. Maar Jehovah het aan Elisa geopenbaar watter slegte ding Gehasi gedoen het. Elisa sê toe: ,Dit is nie nou die tyd om geld en klere te aanvaar nie! Daarom sal Naäman se siekte oor jou en jou kinders kom.’ Oombliklik word Gehasi melaats, en hy ly vir die res van sy lewe aan hierdie vreeslike siekte. Die verhaal van Gehasi toon hoe gierigheid ’n mens se ondergang kan beteken.​—2 Konings 5:5, 15-27.