Hoe ruim is jou liefde?
DIE eendmossel is ’n klein skulpdiertjie wat in die water lewe. Min mense steur hulle aan hom. Maar die eendmossel het een merkwaardige vermoë: hy weet hoe om aan goed vas te klou. Sy geheim? Hy maak ’n gom wat so sterk is dat ’n lagie van net 0,00762 millimeter ’n „skuifvastheid” van 493 kilogram per vierkante sentimeter het! Enigiemand wat al probeer het om ’n eendmossel van sy gekose ankerplek los te wikkel, sal getuig van die sterkte van sy bindmiddel.
Christene is bekend met iets soortgelyks. Jehovah se organisasie op aarde bestaan uit mense van alle nasies, tale, rasse en maatskaplike groepe. Tog is die organisasie sterk verenig. Sy geheim? Hy het ook ’n sterk bindmiddel, een wat baie sterker is as die gom van die eenvoudige eendmossel. Die apostel Paulus het ons meegedeel wat daardie bindmiddel is toe hy geskryf het: „Beklee julle . . . met die liefde wat die band van die volmaaktheid is.”—Kolossense 3:14.
Dit is natuurlik nie alles wat liefde heet wat mense verenig nie. Baie oorloë is al gevoer in naam van „vaderlandsliefde”. Selfsugtige liefde kan tot jaloesie lei. Liefde vir geld, of geldgierigheid, „is ’n wortel van alle euwels” (1 Timotheüs 6:10). En vandag se swaar tye is deels te wyte aan die feit dat mense „liefhebbers van hulleself” is.—2 Timotheüs 3:1, 2.
Watter soort liefde is dit dan wat Christene saambind? ’n Onselfsugtige, ruim liefde.
Wat is die bron van hierdie liefde?
Hierdie vraag word in drie kort woorde van die apostel Johannes beantwoord: „God is liefde” (1 Johannes 4:8). Jehovah se liefde blyk uit sy goedheid teenoor ons. Alle goeie dinge wat ons het, kom oorspronklik van hom af. „Elke goeie gif en elke volmaakte gawe daal van bo af neer” (Jakobus 1:17). Dit geld vir die fisiese wêreld wat ons geniet, en veral vir die geestelike seëninge wat so mildelik op waarderende Christene uitgestort word.
Jesus Christus het ons aandag op ’n ander merkwaardige manifestasie van Jehovah se liefde gevestig toe hy gesê het: „Hy [Jehovah] laat sy son opgaan oor slegtes en goeies, en Hy laat reën op regverdiges en onregverdiges” (Mattheüs 5:45). En Jehovah se liefde vir die mensdom in sy geheel strek verder as die verskaffing van materiële seëninge, want Jesus het verduidelik: „So lief het God die wêreld gehad, dat Hy sy eniggebore Seun gegee het, sodat elkeen wat in Hom glo, nie verlore mag gaan nie, maar die ewige lewe kan hê” (Johannes 3:16). Kan daar ruimer liefde wees as dit?
Deur sulke liefde vir die mensdom te toon, gee Jehovah uiting aan ’n liefde wat stewig op beginsels gegrond is. In Grieks word daardie liefde a·gaʹpe genoem. Jehovah toon hierdie liefde ook aan Christene. Maar sy liefde vir hulle kry ’n bykomende aspek. Wanneer iemand op God se liefde reageer, betoon Jehovah phi·liʹa, ’n Griekse woord wat „vriendskap” of „geneentheid” beteken. Jesus verseker ons: „Die Vader self het geneentheid vir julle, omdat julle geneentheid vir my gehad het.”—Johannes 16:27, NW.
Volg God se liefde na
Die liefde wat Christene saambind, is ’n weerspieëling van Jehovah se voortreflike liefde. Soos die apostel Johannes gesê het: „Ons het Hom lief, omdat Hy ons eerste liefgehad het” (1 Johannes 4:19). Hierdie liefde is die kenmerk van ’n ware Christen en is inderdaad ’n vrug van God se heilige gees.—Johannes 13:34, 35; Galasiërs 5:22.
’n Christen moet allereers sy hemelse Vader liefhê. Dan moet hy ook liefde aan sy medemens betoon (Mattheüs 22:37-39). Aangesien God se liefde baie omvattend is, moet ons liefde vir medegelowiges ook ruim en omvattend wees. Die apostel Paulus het in hierdie verband vir Korinthiese Christene gesê: „Ons mond het teenoor julle oopgegaan, Korinthiërs, ons hart het verruim geword. . . . julle [moet] ook verruim word.”—2 Korinthiërs 6:11-13.
Hoe kan ons Jehovah se omvattende liefde navolg? Kom ons beskou ’n paar voorbeelde.
‘Verruim’ liefde in die gesin
Paulus het gewaarsku dat daar in „die laaste dae” ’n gebrek aan „natuurlike liefde” sal wees (2 Timotheüs 3:1-3). In die Christengesin moet liefde nietemin oorvloedig wees, sowel die liefde wat op beginsels gegrond is (a·gaʹpe) as die vriendelike, toegeneë soort liefde (phi·liʹa).—Mattheüs 10:37; Efesiërs 5:28; Titus 2:4.
Dit is nie altyd maklik om liefde te toon nie. Geldprobleme veroorsaak dikwels gekrenkte gevoelens in die gesin. Een huweliksmaat voel soms gegrief oor die eise wat aan die tyd van die ander gestel word. ’n Vrou kan voel dat sy verwaarloos of as vanselfsprekend beskou word. Baie tieners meen dat hulle ouers hulle nie verstaan nie. Hoe kan hierdie en ander soortgelyke probleme opgelos word?
Die basiese oplossing is dat al die betrokkenes God se voorbeeld navolg en ,verruim word’ in hulle liefde. „Vroue, wees julle mans onderdanig soos dit betaamlik is in die Here”, het Paulus vermaan. „Manne, julle moet jul vroue liefhê en nie teen hulle verbitter word nie. Kinders, julle moet jul ouers in alles gehoorsaam wees, want dit is die Here welbehaaglik. Vaders, moenie julle kinders terg nie, sodat hulle nie moedeloos word nie.”—Kolossense 3:18-21.
Wanneer probleme opduik, is dit beslis nuttig om deur middel van gebed hulp te soek met die betoning van liefde. Nog hulpmiddele is goeie gesinskommunikasie en gereelde Bybelbesprekings (Deuteronomium 6:4-9). Baie gesinne het dit nuttig gevind om die rubriek „God se Woord is lewend” in Die Wagtoring en die rubriek „Jongmense vra” in Ontwaak! as ’n grondslag vir sulke liefdevolle kommunikasie te gebruik.
Omvattende liefde in die gemeente
Dit is jammer wanneer ouers en kinders mekaar nie liefhet nie. Dit is ook jammer wanneer Christene versuim om mekaar met liefde te bejeën. Die apostel Johannes sê tereg: „Wie sy broeder wat hy gesien het, nie liefhet nie, hoe kan hy God liefhê wat hy nie gesien het nie?”—1 Johannes 4:20.
Liefde help ons om die beste te hoop vir ons geestelike broers (1 Korinthiërs 13: 4, 7). Ons sien miskien hoe ons broer met probleme worstel. Dit kan selfs wees dat hy ,maai wat hy gesaai het’ deur sy onverstandige optrede van die verlede (Galasiërs 6:7). Liefde sal ons nietemin help om ’n positiewe gesindheid teenoor hom te behou. Ons sal gedagtes vermy soos: ,Ek het nog altyd my bedenkinge oor hom gehad.’ AI is ons broer swak in die geloof, kan ons Jehovah se lankmoedigheid met die swakkes weerspieël en probeer om Sy liefdevolle barmhartigheid na te volg.—2 Petrus 3:9.
Die liefde wat onder Jehovah se knegte heers, help om jong Christene gedurende die moeilike tienderjare te stabiliseer. Toe ’n jong meisie in Afrika gevra is wat haar gehelp het om standvastig te bly in ware aanbidding, het sy gesê: „Ek dink dit was nie net wat ek uit die Bybel geleer het nie, maar die liefde wat ek gesien het toe ek Christenvergaderinge bygewoon het en die manier waarop ek aanvaar is wat my die meeste beïndruk het.”
Ja, ’n omvattende liefde kan die gemeente saambind. Maar onthou, Jehovah se liefde sluit die hele mensdom in. Hoe kan ons hom in hierdie opsig navolg?
Liefde vir mense wat ons nie ken nie
Jesus het een belangrike manier genoem waarop ons liefde kan betoon aan mense wat ons nie ken nie. Hy het gesê: „Hierdie evangelie van die koninkryk sal verkondig word in die hele wêreld tot ’n getuienis vir al die nasies; en dan sal die einde kom” (Mattheüs 24:14). Ja, Jehovah se Getuies toon hulle liefde vir ander wanneer hulle die goeie nuus aan volslae vreemdelinge verkondig.
Liefde vir mense in die algemeen beweeg Christene om vreemdelinge ook op ander maniere te help. Soos die Samaritaan van Jesus se gelykenis probeer hulle om goeie bure te wees en ,aan almal goed te doen’, dikwels met onverwagte en aangename resultate (Galasiërs 6:10; Lukas 10:29-37). Beskou byvoorbeeld die geval van ’n jong meisie in Alaska wat sowat 260 kilometer van haar huis af met die evangelisasiewerk besig was. Daar het sy ’n brandarm gesin ontmoet wie se motor onklaar geraak het. Toe die meisie se vader van die gesin se verknorsing hoor, het hy 520 kilometer ver gery om hulp te verleen. Dit het hom die geleentheid gebied om vir die gesin van Jehovah se voorneme en Koninkryk te vertel. Nadat hulle ’n studie van die Bybel gemaak het, het die man en vrou hulle toewyding aan Jehovah gesimboliseer. Nou smaak hulle ook die vreugde daarvan om die goeie nuus met ander te deel.—Handelinge 20:35.
Kan jy diegene liefhê wat jou haat?
Christelike liefde behels egter meer as liefde vir vreemdelinge. Jesus het sy dissipels aangespoor: „Julle moet jul vyande liefhê; seën die wat vir julle vervloek, doen goed aan die wat vir julle haat, en bid vir die wat julle beledig en julle vervolg.”—Mattheüs 5:44, 45.
Is dit regtig moontlik om mense lief te hê wat jou vervolg? Gedurende die Tweede Wêreldoorlog is Jehovah se Getuies in Nazi-Duitsland wreed geslaan en gedwing om hard te werk terwyl hulle min kos gekry het. Hulle kon natuurlik nie veel geneentheid (phi·liʹa) vir hulle vervolgers gevoel het nie. Maar hulle het dieselfde beginselvaste liefde (a·gaʹpe) aan hulle betoon as wat Jehovah aan die ganse mensdom betoon. Dit het die Getuies beweeg om, waar moontlik, die lewegewende waarheidsboodskap met die vervolgers te deel. En sommige van daardie vyande het uiteindelik Christene geword.
Baie van die mense wat God se knegte vervolg, doen dit in onwetendheid, soos Saulus, wat later die apostel Paulus geword het (Galasiërs 1:13, 14). Wanneer ons besef dat sulke vervolgers in sekere sin slagoffers van Satan se valse propaganda is, help dit ons om ’n liefdevoller gesindheid teenoor hulle te openbaar.—2 Korinthiërs 4:4.
Jehovah, die God van innige hartlikheid, skep behae daarin om diegene te beloon wat ruimhartige liefde in die gesin, in die gemeente, teenoor vreemdelinge en selfs teenoor vyande betoon. Sulke liefde bind gesins- en gemeentelede heg saam, net soos die gom van ’n eendmossel hom so stewig aan ’n rots laat klou. Bowendien moedig liefde buitestaanders aan om te kom en Christeneenheid te geniet. Het ons dan nie rede om met waardering op God se liefde te reageer deur ons liefde nog meer te verruim nie? Ons het inderdaad! Laat ons dan aanhou „om oorvloediger te wees” in ons liefde.—1 Thessalonicense 4:9, 10.