Koninkryksverkondigers berig
Getuieniswerk by die skool
„LÊ JOU daarop toe om jou beproef voor God te stel as ’n werker wat hom nie hoef te skaam nie, wat die woord van die waarheid reg sny”, het die apostel Paulus vir die jongman Timotheüs geskryf (2 Timotheüs 2: 15). Baie van Jehovah se Getuies se kinders het die geleentheid om by die skool oor die goeie nuus van God se Koninkryk te praat. Hulle is nie skaam om dit te doen nie en baie van die ander leerlinge stel dit hoog op prys.
◻ ’n Voorbeeld hiervan kom uit Martinique. ’n Meisie, wat by die skool bekendstaan as een van Jehovah se Getuies, se onderwyser het haar dikwels om haar mening oor godsdiensonderwerpe gevra. Sy het verskeie besprekings met hierdie onderwyser gehad, en die onderwyser het van die Wagtoringlektuur aanvaar.
Eendag is die oorbevolking van die aarde gedurende ’n klasbespreking behandel. Toe daar bespreek is hoe om die oorbevolking van die aarde te stuit, is voorbehoedmiddels en aborsie gemeld. Party leerlinge was ten gunste van aborsie en sommige daarteen. Die onderwyser het die jong suster om haar mening gevra. Sy het gesê dat sy graag die volgende dag ’n volledige verduideliking sou wou gee. Daardie aand het sy voorberei en die volgende dag het sy nommers van Ontwaak! skool toe gebring wat die Skriftuurlike beskouing van aborsie behandel het. Na sy die materiaal gelees het, het sy vrae aan die klas gestel, en aan die einde van die bespreking „het almal in die klas hulle teen aborsie uitgespreek”, het sy gesê. Party leerlinge het ingeteken op Ontwaak!
◻ ’n Ander ondervinding kom uit Swede waar die broers dikwels genooi word om lesings in skole te hou. Een spesialepionierbedienaar van Jehovah se Getuies is genooi om verskeie lesings in ’n klas te hou. Die onderwyser het gesê: „Ons het ander predikante hier gehad, maar hulle speel net die kitaar en sê vir die leerlinge om goed te wees. Dit is goed en wel”, het die onderwyser gesê, „maar ek wil hê dat my leerlinge ook iets moet leer.” Toe het hy reëlings getref dat die Getuie ’n gereelde Bybelstudie met die klas hou.
Leerlinge, sowel as mense oral in die wêreld, het vandag baie vrae oor wêreldtoestande of gesins- en maatskaplike probleme wat hulle beantwoord wil hê. Wat ’n voorreg is dit tog vir Jehovah se Getuies wat nog op skool is om hulle toe te lê op persoonlike studie en die bywoning van gemeentelike vergaderinge, sodat hulle die Bybel kan verstaan en sulke persone kan help om die Bybel se antwoorde te leer! Die Bybelspreuk maan: „Hou ’n weldaad nie terug van hom aan wie dit toekom as dit in jou mag is om dit te doen nie.”—Spreuke3:27.