Voed jouself met die vervulling van Jehovah se woorde

“Die mens sal nie van brood alleen lewe nie, maar van elke woord wat deur die mond van God uitgaan.”​—MATTHEÜS 4:4.

1. Hoe is Jehovah die Groot Voedselvoorsiener, maar watter verklaring het Jesus oor die mens se behoeftes gedoen?

JEHOVAH is die Groot Voedselvoorsiener. Hy het homself in die eerste hoofstuk van die Bybel as sodanig aan die mens voorgestel (Genesis 1:29, 30). Baie later het die psalmis Dawid met dankbaarheid aan Jehovah gesê: “Die oë van almal wag op U, en U gee hulle hul spys op die regte tyd. U maak u hand oop en versadig alles wat lewe met welbehae” (Psalm 145:15, 16). Ja, Jehovah het ’n oorvloed voedsel vir die mens sowel as vir die diere voorsien. Daar is egter ’n verskil. Terwyl diere slegs fisiese voedsel nodig het, het Jesus getoon dat die mens meer as net fisiese brood, of voedsel, nodig het. Hy moet ook ‘lewe van elke woord wat deur die mond van Jehovah uitgaan’.​—Mattheüs 4:4.

2. Wat moet ons weet omtrent die betekenis van Jesus se woorde in Mattheüs 4:4?

² Jesus het hierdie verklaring gemaak in ’n antwoord aan Satan, wat Hom probeer versoek het om klippe wonderdadig in brood te verander. Die Duiwel het nie daarop aangedring nie, maar gou ’n ander versoeking geopper. Te oordeel aan die verkeerde manier waarop hy toe Psalm 91:11, 12 toegepas het, het Satan moontlik nie eers verstaan wat Jesus met Sy antwoord op die eerste versoeking bedoel het nie (Mattheüs 4:3-7). Maar ons as knegte van Jehovah stel baie belang in wat Jesus gesê het. Ons wat dit geniet om dieper in die Bybel te delf sodat ons die maksimum geestelike voordeel daaruit kan put, kan vra: Het Jesus bedoel dat as die mens ’n sinvolle lewe wil lei hy “elke woord wat deur die mond van God uitgaan”, moet bestudeer en miskien memoriseer? Of wat het hy bedoel?

Jehovah se woorde

3, 4. Watter tweevoudige betekenis het die Griekse en die Hebreeuse woorde vir “woord”? Lig toe.

³ In sy antwoord aan Satan het Jesus Deuteronomium 8:3 volgens die Griekse Septuaginta se weergawe van hierdie Hebreeuse teks aangehaal. Die Griekse woord wat met “woord” (rheʹma) vertaal is, het ’n tweevoudige betekenis. Dit word soms met “woord”, “uiting” of “uitspraak” vertaal. Maar soos sy Hebreeuse ekwivalent (da·varʹ) kan dit ook “ding” beteken.

⁴ In Lukas 1:37 (NW) lees ons: “By God sal geen verklaring [rheʹma] onmoontlik wees nie.” Lukas 2:15 lui: “Die herders [sê] vir mekaar: Laat ons dan na Betlehem gaan en hierdie ding [rheʹma] sien wat gebeur het, wat die Here aan ons bekend gemaak het.” Veral wanneer dit in verband met Jehovah gebruik word, kan hierdie Griekse woord dus dui op ’n “woord”, ’n “verklaring” of ’n “uitspraak” van God. Of dit kan slaan op ’n “ding”, hetsy dit verwys na ’n “gebeurtenis”, of ’n beskrewe “daad”, die gevolg van wat gesê is, die vervulde woord.

5. Wat beteken Lukas 1:37?

⁵ In die lig van hierdie begrip beteken Lukas 1:37 nie dat God sommer enigiets kan sê nie. ’n Mens sal moontlik, al sal sy woorde waarskynlik nie bewaarheid word nie of sinloos wees. Maar wat God se verklarings betref, beteken Lukas 1:37 dat geen woord of verklaring van Jehovah onvervuld kan bly nie. Die verklaring wat die engel aan Maria gemaak het, moes dus bewaarheid word. Die gedagte agter die Hebreeuse en die Griekse woorde wat vir Jehovah se “woord”, “uitspraak” en “uiting” of “verklaring” gebruik word, word pragtig weergegee in die boek Jesaja. Jehovah sê: “Want soos die reën en die sneeu van die hemel neerdaal en daarheen nie terugkeer nie, maar die aarde deurvogtig en maak dat dit voortbring en uitspruit en saad gee aan die saaier en brood aan die eter; so sal my woord [Hebreeus, da·varʹ; Grieks, rheʹma] wees wat uit my mond uitgaan: dit sal nie leeg na My terugkeer nie, maar doen wat My behaag en voorspoedig wees in alles waartoe Ek dit stuur.”​—Jesaja 55:10, 11.

‘Nie van brood alleen nie’

6, 7. Wat was die geskiedkundige en geografiese verband van Deuteronomium 8:2, 3?

⁶ Om nou terug te keer tot die punt, wat het Jesus bedoel toe hy Deuteronomium 8:3 aangehaal en gesê het “die mens sal nie van brood alleen lewe nie, maar van elke woord wat deur die mond van God uitgaan”? (Mattheüs 4:4). Het hy gesê dat die godvrugtige persoon net met uitsprake, woorde of verklarings gevoed word? Sou blote kennis van sulke goddelike uitinge genoeg wees? Kom ons ondersoek die geskiedkundige verband van die woorde wat Jesus uit Deuteronomium aangehaal het.

⁷ Die Bybelstudiehulp “All Scripture Is Inspired of God and Beneficial” sê vir ons op bladsy 36: “Die boek Deuteronomium bevat ’n dinamiese boodskap vir Jehovah se volk. Nadat hulle veertig jaar in die woestyn rondgetrek het, het die seuns van Israel nou op die drumpel van die Beloofde Land gestaan.” Die jaar was 1473 v.G.J. Die plek? Die vlaktes van Moab. In sy tweede toespraak aan die vergaderde Israeliete het Moses gesê: “Jy moet dink aan die hele pad waarlangs die HERE jou God jou nou veertig jaar lank in die woestyn gelei het tot jou verootmoediging en beproewing, om te weet wat in jou hart is, of jy sy gebooie sal hou of nie. En Hy het jou verootmoedig en jou laat honger ly en jou die manna laat eet wat jy en jou vaders nie geken het nie, om aan jou bekend te maak dat die mens nie van brood alleen lewe nie, maar dat die mens lewe van [elke uiting] wat uit die mond van die Here uitgaan.”​—Deuteronomium 8:2, 3, vgl. NW.

8. Wat was die Israeliete se situasie, en waarom het Jehovah dit toegelaat?

⁸ Stel jou voor! Etlike miljoene Israeliete​—oud en jonk, mans, vroue en kinders—​het 40 jaar lank rondgetrek in ‘die groot en vreeslike woestyn met giftige slange en skerpioene, ’n dorsland sonder water’ (Deuteronomium 8:15). Hulle moes water drink en voedsel eet. Jehovah het soms toegelaat dat hulle dors kry en honger ly. Waarom? Om by hulle in te skerp dat “die mens nie van brood alleen lewe nie, maar dat die mens lewe van elke uiting wat uit die mond van die HERE uitgaan”.

9. Hoe het Jehovah se woorde in die Israeliete se behoeftes voorsien?

⁹ Wat was die verband tussen die Israeliete se behoeftes en die uitinge, of woorde, wat uit Jehovah se mond uitgaan? Wel, watter tasbare dinge het die Israeliete ervaar as gevolg van Jehovah se woorde? Moses het geskryf: “Jou klere het aan jou nie verslyt en jou voet het nou veertig jaar lank nie geswel nie. . . . [Jehovah het] vir jou water uit die klipharde rots laat kom [en] jou in die woestyn manna laat eet” (Deuteronomium 8:4, 15, 16). Die verband is dit: Die Israeliete sou nie een van hierdie dinge ontvang het as Jehovah nie beveel het dat dit plaasvind nie. Die Israeliete het dus letterlik gelewe “van elke uiting [of bevel] wat uit die mond van die HERE uitgaan”.

Gevoed met Jehovah se woorde

10, 11. In watter ander opsigte kon die Israeliete hulle met Jehovah se woorde voed?

¹⁰ Hoe anders kon die Israeliete met Jehovah se woorde gevoed word, benewens om van Jehovah afhanklik te wees vir materiële voordele soos voedsel, water en klere? Daar was ook geestelike voordele. Moses het vir die Israeliete gesê dat Jehovah hulle hierdie ervaringe in die woestyn laat ondergaan het ‘om hulle nederig te laat word en hulle op die proef te stel om te weet wat in hulle hart is, of hulle sy gebooie sou gehoorsaam of nie’. Hy het bygevoeg: “Jy moet diep in jou hart weet: soos ’n man dissipline by sy seun kweek, so het die Here jou God vir jou dissipline geleer . . . om agterna weer aan jou goed te doen.”​—Deuteronomium 8:2, 5, 16, NAV.

¹¹ Ja, as die Israeliete hulle ondervindinge in die woestyn ten volle benut het, sou hulle geleer het om te ‘lewe van elke uiting wat uit Jehovah se mond uitgaan’, nie net deur te leer om sy geskrewe gebooie te gehoorsaam nie, maar deur die gevolge van Jehovah se woorde in hulle lewe as ’n nasie en as individue te ervaar. Hulle is genoeg geleentheid gebied om ‘te smaak en te sien dat Jehovah goed is’ (Psalm 34:9). Hierdie verrykende ervaringe in verband met Jehovah se woorde​—wat geuiter sowel as vervul is—​moes hulle geestelik gevoed het.

12, 13. Hoe het Josua homself op die hoogte gestel van Jehovah se woorde, en waarvan het hy getuig?

¹² Josua, wat Moses as leier van Israel opgevolg het, het homself op die hoogte gestel van Jehovah se woorde deur sy verstand daarmee te vul. Die vervulling daarvan het sy geloof versterk. Na Moses se dood het Jehovah hierdie woorde tot Josua gespreek: “Hierdie wetboek mag nie uit jou mond wyk nie; maar bepeins dit dag en nag, sodat jy nougeset kan handel volgens alles wat daarin geskrywe staan; want dan sal jy in jou weë voorspoedig wees, en dan sal jy met goeie gevolg handel.”​—Josua 1:8.

¹³ Aan die einde van sy lewe kon Josua, nadat hy Jehovah se woord getrou gehoorsaam en die vervulling daarvan op Jehovah se volk gesien het, getuig: “Die Here het aan Israel die hele land gegee wat Hy met ’n eed aan hulle voorvaders beloof het. Hulle het dit in besit geneem en daar gaan woon. Die Here het hulle na alle kante toe rus gegee soos Hy met ’n eed aan hulle voorvaders beloof het. Nie een van al hulle vyande kon teen hulle standhou nie. Die Here het al hulle vyande in hulle mag oorgegee. Nie een van al die goeie beloftes [Hebreeus, da·varʹ, Grieks, rheʹma] wat die Here aan Israel gemaak het, het onvervul gebly nie. Almal is nagekom” (Josua 21: 43-45, NAV). Josua het waarlik gelewe van en is gevoed met, nie net letterlike brood nie, “maar elke woord wat deur die mond van God uitgaan”.​—Mattheüs 4:4.

Lewe vandag deur Jehovah se woorde

14. (a) Hoe kan ons ’n beter begrip verkry van wat Jesus bedoel het deur dieper te delf in Mattheüs 4:4? (b) Wat het waarderende Israeliete versterk?

¹⁴ Noudat ons ’n bietjie dieper gedelf het in die voormelde woorde wat Jesus in antwoord op die Duiwel se versoeking aangehaal het, kan ons beter verstaan wat Jesus bedoel het. Die geskiedkundige en geografiese verband van Moses se verslag wat Jesus aangehaal het, toon dat die woorde van Jehovah waardeur godvrugtige manne en vroue moet lewe nie net woorde is wat soos ’n papegaai geleer is nie. Vir daardie Israeliete het “elke uiting wat uit die mond van die HERE uitgaan” verband gehou met die manna, die water en die klere wat nie verslyt het nie. Ja, die woorde het hulle vervulling ingesluit, die wonderlike dinge wat Jehovah vir sy volk gedoen het. Dit was hulle belewenis van hierdie dinge, ter vervulling van Jehovah se woorde, wat die waarderende Israeliete versterk het.

15. Hoe kan Jehovah se woorde ons voed?

¹⁵ Dit is vandag eweneens nie net die lees en bestudering van Jehovah se woorde, ofskoon dit baie belangrik is, wat Jehovah se volk voed nie. Dit is die belewenis, kollektief en individueel, van die wonderlike manier waarop Jehovah met ons handel en ten behoewe van ons optree. Hoe bewuster ons is van Jehovah se handelinge met ons, des te meer sal sulke vervulde woorde ons voed en ons geloof, ons geestelikheid, versterk.

16. (a) Waarmee het ’n psalmis hom besig gehou? (b) Hoe moet ons dieselfde doen, en hoe sal dit ons help?

¹⁶’n Psalmis het geskryf: “Ek dink aan die dade van die HERE; ja, ek wil dink aan u wonders uit die voortyd en al u werk oordink, en ek wil peins oor [“my besig hou met”, NW] u dade” (Psalm 77:12, 13). As ons onsself besig hou met Jehovah se dade, wonders en werke ten behoewe van sy volk, en besef dat dit ’n tasbare gevolg van sy woorde is, sal hierdie goddelike voorsienings vir ons soos geestelike brood wees. Dit sal ons in ’n intiemer persoonlike verhouding met Jehovah bring. Ons sal soos Jesus wees. Hy het geweier om op versoek van die Duiwel klippe in brode te verander. Ons sal eweneens sorg dat materiële dinge of onnodige besorgdheid oor materiële behoeftes ons nie in die Duiwel se strik laat trap en Jehovah se aanbidding die rug laat toekeer nie.

17. In watter opsig was Jesus ’n wonderlike voorbeeld?

¹⁷ Jesus het gesê: “My voedsel is om die wil te doen van Hom wat My gestuur het en om sy werk te volbring” (Johannes 4:34). Hy was ’n wonderlike voorbeeld en het ons op ’n praktiese wyse getoon dat “die mens . . . nie van brood alleen lewe nie, maar van elke woord wat deur die mond van God uitgaan”.​—Mattheüs 4:4.

Wag vir verdere instruksies

18. Watter goddelike uiting word nou vervul?

¹⁸ Jehovah het deur sy Seun gesê dat “hierdie evangelie van die koninkryk verkondig sal word in die hele wêreld” voor die einde aanbreek (Mattheüs 24:14). Daardie goddelike woorde ondergaan vervulling as gevolg van die wêreldwye predikingswerk van Jehovah se Getuies. ‘Lewe’ jy van daardie woorde uit Jehovah se mond deur ’n volle aandeel in die predikingswerk te hê en gevolglik geestelike voeding te ontvang omdat jy sy wil doen?

19, 20. Watter ander goddelike woorde sal binnekort opwindende gebeure laat plaasvind?

¹⁹ Ander woorde van Jehovah gaan in die nabye toekoms opwindende gebeure laat plaasvind. “Die tien horings” en “die dier” gaan “die hoer”, Babilon die Grote, aanval. Ja, die vernietiging van daardie wêreldryk van valse godsdiens deur ongodsdienstige elemente in die Verenigde Volke sal ’n uitsonderlike daad wees ter volbrenging van een van Jehovah se uitinge.​—Openbaring 17:16, 17.

²⁰ ’n Ander merkwaardige goddelike uiting sal geskied wanneer Jehovah op simboliese wyse “hake” in die kakebene van Gog, of Satan, sit en hom en sy “leër” uitdaag om Sy volk op aarde aan te val (Esegiël 38:2-4, 8-12). Nog ’n goddelike uiting sal die vernietiging van Gog se hordes meebring (Esegiël 39:1-6).a Dit sal “die oorlog van daardie groot dag van die almagtige God” by Armageddon beteken (Openbaring 16:14, 16; 19:11-21). Hoe opwindend sal dit tog vir Jehovah se getroue volk wees om die vervulling van hierdie goddelike woorde te sien en om, te midde van die stryd, figuurlik gesproke hierdie verdere woorde te hoor: “Bly staan en aanskou die redding van die HERE by julle.”​—2 Kronieke 20:17.

21. Watter ander verwikkelinge sal veroorsaak word deur die vervulling van Jehovah se woorde?

²¹ Dan sal Christus nog ’n goddelike uiting uitvoer en Satan en sy demone “duisend jaar lank” in die afgrond werp (Openbaring 20:1-3). Ander woorde van Jehovah sal tydens daardie duisend jaar vervul word, onder meer die opstanding van die dode en die “genesing van die nasies”, die gehoorsame mensdom (Openbaring 20:11-15; 22:1, 2). Gedurende hierdie duisendjarige oordeelstydperk sal Jehovah blykbaar addisionele instruksies, wat tans vir ons onbekend is, gee wanneer nuwe “boeke” geopen word (Openbaring 20:12). Hoe wonderlik sal dit tog nie vir die oorlewendes van die “groot verdrukking” en vir die verresenes wees om onderrig en leiding te ontvang uit hierdie verdere instruksies wat uiteengesit is in hierdie geopende “boeke” van Jehovah en om dit met vreugde uit te voer nie!

22. Wat word ons aangespoor om nou te doen?

²² Met so ’n wonderlike vooruitsig voor ons moet ons ten volle gebruik maak van die geleentheid wat ons nou het om vertroud te raak met Jehovah se woorde en sy Woord persoonlik en ernstig te bestudeer en deel te neem aan die predikingswerk met ’n immertoenemende bewustheid van Jehovah se dade ten behoewe van ons.

[Voetnote]

Kan jy onthou?

◻ Hoe het die Israeliete geleer om “van elke uiting wat uit die mond van die HERE uitgaan” te lewe?

◻ Hoe kon die Israeliete hulle geestelik met Jehovah se woorde voed?

◻ Hoe kan ons vandag van Jehovah se woorde lewe?

◻ Watter uitinge van Jehovah moet vervul word?

[Prent op bladsy 14]

Wat beteken Jesus se antwoord op ’n versoeking van Satan vir jou?

[Prent op bladsy 16]

Die feit dat die Israeliete gelewe het “van elke uiting wat uit die mond van die HERE uitgaan”, het regstreekse fisiese voordele gehad