Jesus se lewe en bediening

Die kind van die belofte

JOSEF en Maria keer nie na Nasaret terug nie, maar bly in Betlehem. En toe Jesus agt dae oud is, laat hulle hom besny soos God se Wet aan Moses bepaal. Dit is skynbaar ook die gebruik om ’n seuntjie op die agtste dag sy naam te gee. Hulle noem gevolglik hulle kind Jesus, soos die engel Gabriël vroeër beveel het.

Meer as ’n maand verstryk, en Jesus is 40 dae oud. Waarheen neem sy ouers hom nou? Na die tempel in Jerusalem, wat net ’n paar kilometer van hulle huis af is. Volgens God se Wet aan Moses moet ’n moeder 40 dae na die geboorte van haar seun ’n reinigingsoffer by die tempel bring.

Dit is wat Maria doen. Sy bring twee voëltjies as haar offer. Dit verraai iets aangaande die geldelike situasie van Josef en Maria. Die Wet van Moses bepaal dat ’n jong ram, wat baie waardevoller is as voëls, geoffer moet word. Maar as die moeder dit nie kon bekostig nie, sou twee tortelduiwe of jong duiwe voldoende wees.

In die tempel neem ’n ou man Jesus in sy arms. Sy naam is Simeon. God het aan hom geopenbaar dat hy nie sal sterf voordat hy Jehovah se beloofde Christus, of Messias, gesien het nie. Toe Simeon op hierdie dag by die tempel kom, rig die heilige gees hom na die kind wat deur Josef en Maria gedra word.

Terwyl Simeon vir Jesus vashou, dank hy God met die woorde: ‘U het u belofte gehou, want ek het met my eie oë die reddingsmiddel gesien wat u berei het.’ Josef en Maria is verbaas toe hulle dit hoor. Daarna seën Simeon hulle en sê hy vir Maria dat haar seun ‘bestemd is tot ’n val en ’n opstanding van baie in Israel’ en dat droefheid haar siel soos ’n skerp swaard sal deurboor.

Die 84-jarige profetes Anna is ook daardie dag by die tempel. Trouens, sy het nooit weggebly van die tempel nie. In dieselfde uur kom sy daar en begin sy om God te dank en oor Jesus te praat met almal wat wil luister.

Hoe verheug is Josef en Maria tog oor daardie gebeure by die tempel! Dit maak hulle nog sekerder dat die kind die Beloofde van God is. Lukas 2:21-38; Levitikus 12:1-8.

♦ Wanneer was dit skynbaar die gebruik om ’n Israelitiese seuntjie sy naam te gee?

♦ Wat moes ’n Israelitiese moeder doen wanneer haar seun 40 dae oud was, en hoe het die nakoming van hierdie vereiste Maria se geldelike situasie verraai?

♦ Wie het by hierdie geleentheid die identiteit van Jesus herken, en hoe?