Oefen jou met godsvrug as jou doel

“Oefen jou met godsvrug as jou doel.”—1 TIMOTHEÜS 4:7, NW.

1. Waarom het een goeie hardloper nie gewen nie?

SY WAS die beste hardloper in die span vir haar nommer. Vorige oorwinnings het haar nasionale status verleen. Daar is dus verwag dat sy by hierdie belangrike atletiekbyeenkoms sou wen. Maar tot haar afrigter, spanmaats en haar eie teleurstelling het sy slegter gehardloop as ooit in haar loopbaan. Waarom? “Ek het laat slap lê en nie meer so hard geoefen nie”, het die jong vrou erg verleë erken. “My afrigter het my probeer aanpor om harder te werk en my gewaarsku, maar ek het nie geluister nie.” Haar versuim om behoorlik te oefen, het haar die oorwinning gekos waarna sy gestreef het.

2. Waarvoor moet Christene oefen, en waarom behoort almal te wil weet hoe?

² As ’n Christen het jy ook, veral as jy jonk is, ’n belangrike oefenprogram. “Oefen jou met godsvrug as jou doel” (1 Timotheüs 4:7, NW). Die Griekse woord vir “oefen” (gy·mnaʹzo) het die veeleisende en dikwels pynlike oefeninge beskryf wat al die atlete in die gimnasium gedoen het. Daarom het die apostel Paulus aangaande godsvrug en die beloninge daarvan bygevoeg: “Met hierdie vooruitsig span ons ons kragte in en stry ons” (1 Timotheüs 4:10, NAV). Hierdie noodsaaklike eienskap is nie iets wat vanself kom of deur jou godvrugtige ouers oorgedra kan word nie. Maar watter stappe moet jy doen? Christene van alle ouderdomme behoort dit te wil weet.

Goeie kommunikasie met God

3. (a) Waarom is persoonlike studie so belangrik? (b) Watter eienskappe van God trek jou aan?

³ Aangesien godsvrug hartgrondige waardering vir Jehovah se hoedanighede behels, moet jy weet watter soort persoon hy werklik is. Jehovah vertel ons dit in die Bybel. Maar jy moet sy Woord en Bybelpublikasies noukeurig bestudeer en sodoende ‘gevoed word met die woorde van die geloof en van die goeie leer’ (1 Timotheüs 4:6). Sodanige studie sal jou help om “die lieflikheid van die HERE” te sien.​—Psalm 27:4.

4. Watter ondervindinge toon die waarde van persoonlike studie, en watter vrae moet jy ernstig oorweeg?

⁴ “Hoe meer jy van Jehovah leer, des te nader voel jy aan hom”, sê ’n 22-jarige voltydse evangeliedienaar (pionier). “Wanneer ek profesieë lees en sien hoe hulle vervul word, vul dit my met ontsag vir hom. Persoonlike studie help my werklik.” ’n Sestienjarige, wat baie terneergedruk was, het oor een van die artikels in die reeks “Jongmense vra” wat gereeld in Ontwaak! verskyn, geskryf: “Net toe ek heeltemal moed opgegee het, het hierdie artikel verskyn. Ek was so opgewonde dat ek dit nie kon neersit nie! Dit het my baie nader aan Jehovah laat voel, en ek het besef dat hy verstaan en baie omgee. Ek voel ek kan nou weer aangaan.”a Stel jy jou dit ten doel om elke nommer van ons tydskrifte te lees? Sonder jy tyd af om jou verstand en hart deur persoonlike Bybelstudie te voed al verg dit inspanning? Deur self navorsing te doen, kan jy vir jouself bewys dat jy die waarheid het. Wanneer sulke kennis die hart raak, sal dit jou seer seker beweeg, want dit is “die leer in ooreenstemming met godsvrug”.​—1 Timotheüs 6:3, NW; Romeine 12:2.

5, 6. Watter soort gebede bring jou nader aan God? Lig toe.

⁵ Goeie kommunikasie met God behels ook innige en spesifieke gebede. Dit dra by tot ’n persoonlike vriendskap met Jehovah. Wanneer jy foute begaan, moet jy gewillig wees om soos Dawid te smeek: “Dink nie aan die sondes van my jonkheid en aan my oortredinge nie” (Psalm 25:7, 11). En weet dat hy jou sal vergewe as jy berou het. Leer om nie haastig te bid nie, maar stort jou hart uit. Hoewel sy in ’n godvrugtige huis grootgemaak is, het een jeugdige toegelaat dat ’n spraakgebrek haar beoefening van ware aanbidding belemmer. “Toe het ek Jehovah een aand gesmeek: ‘Help my om u te wil dien, en nie net omdat die ouere manne of my ouers wil hê ek moet dit doen nie’“, het hierdie 22-jarige gesê. Hoe het haar lewe tog begin verander! Ondanks haar gehakkel het sy begin om ’n volle aandeel aan die bediening te hê. Sy sê met vreugde: “Ek vertrou nou baie meer op Jehovah, want ek weet dat hy ’n mens altyd te hulp kom.”​—Psalm 62:9.

⁶ Een jong Christin het spesifiek gebid oor haar planne om ’n pionier te word. Toe haar gebede verhoor is, het sy uitgeroep: “Ek het geweet Jehovah bestaan en dat hy vir ons omgee! Ek het voorheen gedink dat ek ’n verhouding met hom opgebou het, maar nou is hy meer soos ’n vriend​—my beste vriend.” Jehovah reageer nie altyd op ’n opvallende wyse nie, maar as jy opreg is en in ooreenstemming met jou gebede optree, sal jy sy lief devolle leiding ervaar.​—Psalm 145:18.

Behou ’n goeie gewete

7. Wat is die gewete, en waarom moet jy aan ’n goeie gewete vashou?

⁷ Toe Paulus Timotheüs aangespoor het om ‘aan ’n goeie gewete vas te hou’, het die apostel geweet dat dit doelgerigte inspanning sou vereis (1 Timotheüs 1:19). Hoe so? Ons gewete is ons Godgegewe hoedanigheid om onsself te ondersoek en te beoordeel wat ons gedoen het of van plan is om te doen. Dit kan ons òf ‘beskuldig’, ons weg pynlik veroordeel, òf ‘verontskuldig’, goedkeur wat ons doen (Romeine 2:15). Maar as dit ontaard, kan dit foutiewe boodskappe uitstuur. Party met ’n gebrekkige gewete kan soos genadelose diere optree, en tog ‘beskuldig’ die ‘innerlike stem’ hulle nie. Hulle kan selfs “bely dat hulle God ken, maar hulle verloën Hom deur die werke”. Hoe kan jy daarteen waak dat jy ’n gebrekkige gewete ontwikkel?​—Titus 1:10-16.

8. Hoe het party in die eerste eeu ’n goeie gewete “weggestoot”?

⁸ Paulus het vir Timotheüs gesê dat party Christene hulle goeie gewete “weggestoot” het deur hulle ‘besig te hou met fabels’ of verdigsels en “onheilige, onsinnige praatjies” (1 Timotheüs 1:4, 19, 20; 6:20; 2 Timotheüs 2:16-18). Omdat hulle na hierdie dinge geluister het, is hulle geloof ondermyn en het dit tot geestelike skipbreuk gely. Paulus het egter getoon dat daar ander dinge benewens afvallige leringe is wat “met die gesonde leer in stryd is”. In 1 Timotheüs 1:9, 10 meld hy dinge soos moord, hoerery en homoseksualiteit.

9, 10. (a) Wat kan ons leer uit die voorbeeld van ’n Christenpaartjie wat versuim het om ’n goeie gewete te behou? (b) Hoe kan ons voorkom dat ons gewete toegeskroei word?

⁹ Vandag is rolprente en TV-programme sowel as die gedrukte bladsy vol geweld en geslagsonsedelikheid. As ons ons verstand met sulke dinge voed, kan ons gewete geleidelik toegeskroei word. Dit het met ’n jong Christenpaartjie gebeur wat hulle kort voor hulle huweliksdag aan hoerery skuldig gemaak het. “Ek dink dit het te doen gehad met waarna ons op TV gekyk het”, het die jong vrou erken. “Jy sien hoe mense mekaar heeltyd liefkoos, en daarom lyk dit nie so ernstig nie. Jy raak daaraan gewoond. Ons het dit begin doen. As ek maar net meer gedink het aan hoe ernstig dit is!” Voor sy dit besef het, het sy haar goeie gewete verloor. Die jong man het bygevoeg: “Ek het ook ’n probleem met selfbevlekking gehad, en dit brandmerk jou gewete sodat dit nie so moeilik is om jou skuldig te maak aan liefkosery en uiteindelik aan hoerery nie.” Hoewel hulle oënskynlik ’n goeie voorbeeld voor ander gestel het, het dit waarna hulle vir vermaak gekyk het, sowel as ’n geheime, onrein gebruik, saamgewerk om die gewete te brandmerk net soos vlees toegeskroei word wanneer dit herhaaldelik met ’n vuurwarm brandyster gebrand word.​—1 Timotheüs 4:2.

¹⁰ Kan jou gewete eweneens toegeskroei word deur die dinge waarna jy kyk of wat jy vir vermaak lees? Lê jy jou werklik daarop toe om enige slegte gewoonte wat jou gewete kan besoedel te oorkom? Vir jou beskerming kan jy positiewe stappe doen deur Bybellektuur wat oor jou probleem handel te lees​—en weer te lees—​of deur die probleem met ’n ouere man te bespreek. ’n Goeie, skoon gewete is ’n kosbare gawe van God wat jou sal help om godsvrug aan te kweek. Moenie dat enigiets jou dit laat verloor nie!

Kies goeie metgeselle

11, 12. (a) Watter waarskuwing word in 2 Timotheüs 2:20, 21 gegee? (b) Hoe kan jy op daardie waarskuwing ag slaan?

¹¹ Die apostel Paulus skryf: “In ’n groot huis [die gemeente] is daar nie alleen voorwerpe van goud en silwer nie, maar ook van hout en erdewerk, en sommige vir ’n eerbare doel, maar ander vir ’n doel waaraan geen eer verbonde is nie. Indien iemand dus uit die laaste se weg bly, sal hy ’n voorwerp vir ’n eerbare doel wees, geheilig, bruikbaar vir sy eienaar, toeberei vir elke goeie werk” (2 Timotheüs 2:20, 21, NW). Ons emosies en gedrag word grootliks beïnvloed deur diegene wat ons as vriende kies. Ongelowiges is duidelik nie die beste metgeselle nie. Maar Paulus sê hier reguit dat daar selfs in die gemeente persone kan wees wat ongewenste metgeselle is. Dit is miskien wel pret om saam met hulle te wees, maar hulle invloed sal jou nooit help om “vir die begeerlikhede van die jonkheid” te vlug of om godsvrug aan te kweek nie. Soek opbouende metgeselle in die gemeente. Paulus sê verder in vers 22: “Jaag na geregtigheid, geloof, liefde, vrede, saam met die wat die Here uit ’n rein hart aanroep.”​—Vergelyk Filippense 4:8, 9.

¹² Beskou die geval van een jong Christin wat ondanks ’n godvrugtige opvoeding altyd in die moeilikheid beland het. “Dit was hoofsaaklik weens die mense met wie ek omgegaan het”, het sy gesê. Toe sy sien dat haar lewe op ’n mislukking afstuur, het sy ander vriende gesoek. Sy sê: “As jy vriende het wat Jehovah liefhet, help dit jou om ’n sensitiewe gewete te behou en uit die moeilikheid te bly. As hulle ’n afkeer het van verkeerde dinge, laat dit jou ook so voel.” Deur weg te bly van twyfelagtige metgeselle het sy ’n voorwerp geword wat “bruikbaar vir [haar eienaar], toeberei vir elke goeie werk” was. Na 10 jaar van pionierdiens voeg sy by: “Jehovah het my nou gebruik om ander te help.”​—2 Timotheüs 2:21; Spreuke 15:31.

13. Hoe kan jy vasstel wie goeie metgeselle is, en hoe kan hulle jou beïnvloed?

¹³ Beskou jou metgeselle dus realisties. Jaag hulle geregtigheid, geloof, liefde en vrede na? Is hulle gevul met Christelike ywer? As sulke persone jou intieme metgeselle is, kan jy net soos Timotheüs, die intieme metgesel van Paulus, ’n voorbeeld in woord, in wandel, in liefde, in geloof, in reinheid word. Dit beteken nie dat jy kil of onvriendelik teenoor minder voorbeeldiges moet word nie. Jou vreugdevolle voorbeeld kan hulle aanspoor om ook reguit paaie vir hulle voete te maak.​—1 Timotheüs 4:12; Hebreërs 12:12-15.

Maak opofferinge vir God

14, 15. (a) Wat is van eertydse atlete vereis terwyl hulle geoefen het? (b) Watter werk verg opofferinge, en watter goeie voorbeelde het ons?

¹⁴ In Timotheüs se dag het atlete “selfbeheersing in alle dinge” beoefen en hulleself talle regmatige genietinge ontsê terwyl hulle geoefen het (1 Korinthiërs 9:25, NW). Hulle het ’n streng dieet gevolg. Volgens Horatius, ’n digter in die eerste eeu v.G.J., het hulle hulle “van vroue en wyn onthou” om “die verlangde doelwit te bereik”. Dit verg eweneens opoffering om jou met godsvrug as jou doel te oefen. Paulus het van Timotheüs gesê: “Ek het trouens niemand met dieselfde gesindheid as hy . . . nie. Al die ander soek net hulle eie belange, nie die van Jesus Christus nie. Maar . . . hy [het] saam met my die saak van die evangelie gedien.”​—Filippense 2:19-22, NAV.

¹⁵ Timotheüs is beveel: “Doen die werk van ’n evangelis; vervul jou bediening” (2 Timotheüs 4:5). Ongeag hoe aanloklik sy persoonlike belange moontlik was, hy het hulle opgeoffer om God se werk te volbring. Is jy gewillig om dieselfde te doen? Vandag jaag sommige jong Christene wat geen swaar Skriftuurlike verantwoordelikhede het nie geleerdheid of goed besoldigde betrekkings na eerder as om die Christelike bediening hulle loopbaan te maak. Een van hulle het gretig na so ’n werk uitgesien. Maar voordat hy begin werk het, het hy op uitnodiging van ’n pionieregpaar die hele somer saam met hulle velddiens gedoen. Hy het baie daarvan gehou. Hy het gevolglik daardie veelbegeerde voltydse werk opgeoffer en ’n minder interessante deeltydse werk aanvaar om die pionierdiens te kan betree. Vanweë hierdie gesindheid soos dié van Timotheüs dien hy nou by die wêreldhoofkwartier van Jehovah se Getuies. Die bereidwilligheid om opofferinge te maak, is ’n bewys van opregte liefde, en die opofferinge verinnig daardie liefde, soos hy uitgevind het.

16. Watter opofferinge moet jongmense dalk maak?

¹⁶ As “’n prediker en apostel” het Paulus nadruk gelê op die wenslikheid van beskeie kleredrag. Sal jy bereid wees om ’n bepaalde soort kleredrag of ’n sekere voorkoms prys te gee wat ander kan ontstel of jou sukses as ’n prediker kan belemmer? (1 Timotheüs 2:7-10). Paulus het voorts geskryf: “Almal wat ook godvrugtig wil lewe . . ., sal vervolg word” (2 Timotheüs 3:12). Is jy gewillig om vir die waarheid op te kom wanneer dit bespotting kan beteken en jou minder gewild by jou klasmaats kan maak? Alle sodanige opofferinge wat met die regte beweegrede gemaak word, sal jou help om godsvrug aan te kweek en sal jou terselfdertyd leer om op Jehovah te vertrou en sy gevoelens bowenal in ag te neem.

Hou aan om vooruitgang te maak

17. Hoe was Timotheüs ’n voorbeeld vir jong bedienaars vandag wanneer dit by vooruitgang kom?

¹⁷ Die aankweek van godsvrug is ’n volgehoue proses. Paulus het vir Timotheüs gesê: “Wees vlytig in hierdie dinge, leef daarin, sodat jou vooruitgang vir almal duidelik kan wees” (1 Timotheüs 4:15). Omdat hulle te jonk is om ’n bedieningskneg of ’n ouere man te wees, dink party dalk dat hulle nooit vooruitgang sal maak nie omdat hulle meen vooruitgang slegs aan gemeentelike verantwoordelikhede en voorregte gemeet word. Timotheüs het weliswaar nie net in geestelike vordering nie maar ook in ouderdom gekwalifiseer om as ’n ouere man te dien. Maar Timotheüs moes hom voortdurend inspan, en hierin het hy ’n uitstekende voorbeeld vir ander jong bedienaars gestel wat hulle op alle gebiede moet volg.​—1 Timotheüs 4:12, 13.

18. Op watter maniere kan jong Christene vooruitgang maak?

¹⁸ As ’n kneg van Jehovah wat vooruitgang maak, kan jy dus soos Timotheüs “ ’n voorbeeld vir die gelowiges” wees deur die waarheid ’n groot invloed op jou lewenswyse te laat hê en vordering in jou bediening te maak. Jy kan nou daarna streef om vooruitgang te maak deur eienskappe soos matigheid in gewoontes, ordelikheid, gasvryheid en erns aan te kweek. Deur jouself beskikbaar te stel vir die ouere manne en alle take wat jy gevra word om te verrig ernstig op te neem, kan jy jou daarop toele om jou ‘geskiktheid’ te bewys (1 Timotheüs 3:1, 2, 8-10, NW). AI sien ander jou vooruitgang nie gou raak nie, kan jy seker wees dat Jehovah dit sien. Ander sal dit ook mettertyd opmerk.​—1 Timotheüs 5:25.

19. Waarom moet jy, ondanks die inspanning, jou met godsvrug as jou doel oefen?

¹⁹ Moet nooit vergeet dat jy ’n goedgekeurde, persoonlike verhouding met Jehovah kan verkry deur godsvrug aan te kweek nie. ’n Gebrek aan geestelike oefening lei tot ’n baie groter verlies as dié van die verleë hardloper wat aan die begin van hierdie artikel gemeld is. Dit is harde werk om godsvrug aan te kweek. Maar ’n menigte vreugdevolle, jong stemme weergalm dwarsoor die wêreld: DIT IS DIE MOEITE WERD! Hierdie eienskap lei tot ’n bevredigende lewenswyse nou, met geen verwyte nie, en dit hou die hoop op ewige geluk in. Hou dus aan oefen. Doen steeds jou bes selfs wanneer dit moeilik is. Put troos uit die wete dat “die God van alle onverdiende goedheid . . . self jou opleiding sal voleindig, hy sal jou standvastig maak, hy sal jou versterk. Aan hom die mag tot in ewigheid. Amen.”​—1 Petrus 5:10, 11, NW.

[Voetnote]

Wat sê jy?

◻ Wat is nodig om goeie kommunikasie met God te behou?

◻ Wat beteken dit om ’n goeie gewete te behou?

◻ Hoe kan 2 Timotheüs 2:20-22 toegepas word wanneer dit kom by die aankweek van godsvrug?

◻ Hoe kan jong Christene vooruitgang maak?

[Venster op bladsy 17]

Party hoedanighede van ons liefdevolle God

▪ Hy het gevoelens, en daarom kan ons dade hom òf ‘grief òf verbly.​—Psalm 78:40; Spreuke 27:11.

▪ Terwyl mense dikwels net na iemand se voorkoms kyk, ‘sien hy die hart aan’.​—1 Samuel 16:7.

▪ Hy gee vir ons om, nooi ons om ons bekommernis op hom te werp en hy is “’n toevlug in die dag van benoudheid”.​—Nahum 1:7; 1 Petrus 5:7.

▪ Hy word “die gelukkige God” genoem en hy ‘het ’n welbehae’ in sy knegte.​—1 Timotheüs 1:11, NW; Psalm 35:27.

▪ Hy sal nooit onregverdig of partydig wees nie.​—Job 34:10; Handelinge 10:34, 35.

▪ Hoewel hy sonde nie vergoelik nie, is hy “vergewensgesind” wanneer ons berou het oor ’n fout of ’n swakheid, en “handel met ons nie na ons sondes en vergeld ons nie” na wat ons verdien nie.​—Psalm 86:5; 103:8-14.

▪ Hy is genaakbaar en spoor sy lojale skepsele aan om hulle vermoëns te gebruik. Ondanks sy oneindige wysheid luister hy na voorstelle. “U eie deemoed sal my groot maak”, het koning Dawid geskryf​—Psalm 18:35, NW; 1 Konings 22:19-22

[Prent op bladsy 20]

Baie Christene put groter vreugde uit die bediening as uit goed besoldigde betrekkings