Geloof in God​—Is dit genoeg?

“GLO jy aan God of ’n universele gees?” het beroemde meningspeiler George Gallup jr. gevra. Dit het sommige moontlik verbaas dat 95 persent van die volwassenes (ouer as 30 jaar) sowel as die tienderjariges wat ondervra is ‘Ja!’ geantwoord het. Maar in watter mate word geloof in dade omgesit? Blykbaar nie veel nie. Mnr. Gallup het berig dat toe sommige jong volwassenes gevra is: “In watter mate beïnvloed jou godsdiensopvattinge jou daaglikse denke of dade?” slegs 26 persent gesê het: “In ’n groot mate.”a​—The Search for America’s Faith deur George Gallup jr. en David Poling.

Blote geloof in God is dan duidelik nie genoeg nie. Die dissipel Jakobus het geskryf: “Glo jy dat daar net een God is? Dit is reg. Die duiwels glo dit ook​—en hulle sidder . . . Geloof sonder dade [is] nutteloos” (Jakobus 2:19, 20, NAV). Die Bybel vertel andersyds van individue wat meer gedoen het as om net te glo. Henog het byvoorbeeld “met God gewandel” (Genesis 5:24). Die verhouding tussen Henog en sy God het dus so heg geword dat hulle as ’t ware saam gewandel het! Maar waarom is Henog met hierdie unieke verhouding begunstig? Hoewel hy in ’n ontaarde godsdiensatmosfeer gelewe het waar skokkende, “goddelose werke” algemeen was, het Henog ’n regverdige lewe gelei. Hy het sy tydgenote se bose weë moedig en onomwonde blootgelê en geprofeteer: “Kyk, die Here het gekom met sy heilige tienduisendtalle, om gerig te hou oor almal en al die goddelose mense onder hulle te straf oor al hulle goddelose werke wat hulle goddelooslik gedoen het, en oor al die harde woorde wat die goddelose sondaars teen Hom gespreek het.”​—Judas 14, 15.

Die feit dat Henog met God gewandel het, het hom in ernstige gevaar geplaas. Sy vyande het skynbaar planne beraam om hom te vermoor en ’n einde aan sy irriterende profesieë te maak. Die God met wie hy gewandel het, het egter tussenbeide getree. Die Bybel sê: “Deur die geloof is Henog weggeneem om die dood nie te sien nie; en hy is nie gevind nie, omdat God hom weggeneem het.” Ja, “God het hom weggeneem” in die dood, en hom skynbaar ’n gewelddadige dood deur sy vyande gespaar.​—Hebreërs 11:5, 13; Genesis 5:24; vergelyk Johannes 3:13.

Noag was nog ’n man wat “met God gewandel” het. Soos Henog was Noag “’n regverdige, opregte man onder sy tydgenote” (Genesis 6:9). En dit was ondanks die feit dat losbandigheid in sy dag algemeen was en geweld hoogty gevier het. Noag het egter godvrugtige vrees aan die dag gelê en uitgeblink as ’n “prediker van geregtigheid”. God het hom en sy gesin dus bewaar toe hy die sondvloed oor daardie eertydse wêreld gebring het!​—2 Petrus 2:5; Hebreërs 11:7, NW; Genesis 6:5, 11.

Rig God steeds die uitnodiging om met hom te wandel? Ja, beslis! Die apostel Paulus het gesê God “is nie ver van enigeen van ons af nie” as ons “rondtas om Hom te vind” (Handelinge 17:27, NAV). Maar hoe kan ons dit doen? En wat behels dit werklik om met God te wandel?

[Voetnote]