Toon jy goddelike goedheid?
KAN jy die laaste keer onthou dat iemand jou waarlik met goedheid behandel het? Ons waardeer almal die behulpsaamheid, simpatie en sagtheid van ’n goedhartige mens.
Hoewel goedheid of vriendelikheid dikwels skaars is, is dit nie in vandag se wêreld onbekend nie. Winkelklerke word geleer om dit teenoor hulle klante te toon. Sakemanne weet hoe waardevol dit is wanneer hulle met hulle kliënte sake doen. Goedheid word weliswaar dikwels met bybedoelinge getoon. Maar wedersydse goedheid onder mense, oftewel mensliewendheid, bestaan tog. Daarom was ’n egpaar wat ver moes reis om die man se vader te besoek nadat hy deur ’n beroerte aangetas is en skaars kon beweeg, verheug om te sien dat die bure reeds na sommige van die noodsaaklike takies omgesien het!
Die Bybel bevat ’n paar besondere voorbeelde van mensliewendheid. Terwyl hulle per skip na Rome gereis het, het Julius, die leëroffisier wat oor die apostel Paulus aangestel is, toegelaat dat sy gevangene vriende in Sidon besoek en versorg word. Ja, Julius “het Paulus mensliewend behandel” (Handelinge 27:3). Toe hulle kort daarna skipbreuk gely het, het die bewoners van Melite “buitengewone mensliewendheid” aan die 276 passasiers en bemanningslede getoon. Trouens, Publius, “die hoof van die eiland”, was besonder gasvry.—Handelinge 28:1-10.
Die apostel Paulus het getoon dat alle mense, wat na God se beeld geskape is, in sekere mate Jehovah se persoonlikheid kan weerspieël: “Wanneer die heidene, wat geen wet het nie, van nature die dinge van die wet doen, is hulle vir hulleself ’n wet, al het hulle geen wet nie; omdat hulle toon dat die werk van die wet in hulle harte geskrywe staan” (Romeine 2:14,15; Genesis 1:26). ’n Mate van goedheid is derhalwe eie aan die mens. Maar ons verwag tereg dat ware Christene kenmerkend goddelike goedheid sal toon. Watter soort goedheid is dit? Hoe toon God goedheid? En hoe kan ons hom navolg deur hierdie vrug van sy gees te openbaar?—Galasiërs 5:22.
Jehovah se goedertierenheid
Die Bybel prys God se goedertierenheid herhaaldelik. “Halleluja! Loof die HERE, want Hy is goed, want sy goedertierenheid [“liefderyke goedheid”, NW] is tot in ewigheid”, het die psalmis gesê (Ps. 106:1; 107:1). In die Hebreeuse Skrifte slaan die woord wat vir “goedertierenheid” gebruik word op ’n eienskap wat hom liefdevol aan ’n voorwerp heg totdat die doel daarmee verwesenlik is. God het dus uit liefde vir die mensdom en met die oog op die mens se verlossing goedertierenheid beoefen. Anders sou die mensdom lankal vergaan het. Omdat God geen sonde duld nie, het hy ons eerste menseouers, Adam en Eva, uit die tuin van Eden weggestuur. Tog het hy goedertierenheid getoon deur hulle van klere te voorsien, hulle toe te laat om kinders te hê en hulle ten spyte van hulle opstandige dade geruime tyd te laat lewe.—Genesis 3:21-4:2; 5:4, 5.
Jehovah het op baie maniere goedertierenheid aan Adam se sondige nakomelinge getoon. Die apostel Paulus kon byvoorbeeld vir beoefenaars van valse godsdiens in Listre sê dat God “Homself nie onbetuig gelaat [het] nie, deur goed te doen, van die hemel vir ons reën en vrugbare tye te gee en ons harte met voedsel en vrolikheid te vervul” (Handelinge 14:16, 17). Hoewel hulle ’n valse god aanbid het, het Jehovah hulle goedgunstig van ’n oorvloed stoflike dinge voorsien.
Die goedertierenheid wat God aan Adam se ongebore nakomelinge betoon het, was egter baie belangriker. Jehovah het deur die beloofde “saad” hoop op verlossing van menslike sonde en die dood voorsien (Genesis 3:15; Romeine 5:12). Hoewel die mens God nie geëer het nie, het God die mens nie verlaat nie. Hy het selfs sy mees geliefde en eniggebore Seun as ’n losprysoffer om hulle ontwil gegee! (Johannes 3:16). En God het sy “onverdiende goedheid” verder getoon deur te reël dat sommige mense wat onkreukbaarheid handhaaf mede-erfgename met Jesus Christus sal wees in die hemelse Koninkryk wat die gehoorsame mensdom sal seën.—Romeine 5:8, 15-17, NW; 8:16, 17; Openbaring 14:1-4.
Toon goddelike goedheid
Hoe kan onvolmaakte mense goddelike goedheid toon? Wel, Jesus het ’n voorbeeld gestel en riglyne voorsien wat ons kan help om sulke goedheid te beoefen (1 Petrus 2: 21; Mattheüs 11:28-30). Hy het byvoorbeeld aangedui dat ons selfs ons vyande met goedheid moet behandel. Jesus het gesê: “Julle moet jul vyande liefhê en goed doen en leen sonder om iets terug te verwag, en julle loon sal groot wees; en julle sal kinders van die Allerhoogste wees; want Hy self is goedertieren oor die ondankbares en slegtes” (Lukas 6:35). As ons dus die voortreflike eienskap van goddelike goedheid wil toon, sal ons nie net gesinslede, vriende en Christenbroers met goedheid behandel nie, maar ook diegene wat ondankbaar is en bewys het dat hulle ons vyande is. Dit word nie gedoen om hulle te irriteer nie, maar om hulle te help en die beste in hulle na vore te bring.—Galasiërs 6:10; Romeine 12:20, 21.
Aangesien die menslike neiging is om ander te behandel soos hulle ons behandel, moet ons Jehovah se aanmaning onthou: “In liefderyke goedheid het ek behae geskep, en nie in slagoffer nie” (Hosea 6:6, NW). As ons Jehovah se guns wil hê, moet ons derhalwe daarna streef om altyd goddelike goedheid, of liefderyke goedheid, in ons omgang met ander te toon. (Vergelyk Miga 6:8.) Maar om hierdie goddelike eienskap te openbaar, moet ons Jehovah op ’n spesifieke manier navolg. Hoe? Wel, net soos hy goedgunstig die eerste stappe gedoen het sodat ons ’n goedgekeurde verhouding met hom kan hê, moet ons die inisiatief neem om Bybelwaarhede met ander te deel. AL word ons aanvanklik afgejak, moet ons steeds liefderyke goedheid beoefen deur herhaaldelik te probeer om hulle harte met die goeie nuus van God se Koninkryk te bereik. Hoe goed is dit tog wanneer hierdie betoning van goddelike goedheid ander help om die weg na die lewe te vind!—Mattheüs 7:13, 14.
Hoe om dit aan te kweek
Goddelike goedheid kan slegs aangekweek word deur God se gedagtes, soos dit in die Bybel uiteengesit word, te leer en ooreenkomstig daarmee op te tree. Ja, ons moet eers juiste kennis van die waarheid opdoen. Paulus het Christene in Kolosse geprys en gesê dat die waarheid vrug gedra het “van die dag af dat [hulle] dit gehoor het en die genade [“onverdiende goedheid”, NW] van God in waarheid leer ken het” (Kolossense 1:5, 6). Maar geen Christen bereik die punt waar hy nie verder vooruitgang kan maak nie. Daarom moet ons almal “toeneem in die genade en kennis van onse Here en Saligmaker, Jesus Christus”.—2 Petrus 3:18.
Aangesien goedheid ’n vrug van God se heilige gees is, sal Christene wat hulle aan die invloed van daardie gees onderwerp goedheid toon. Trouens, Paulus bring goddelike heiligheid uitdruklik met goedheid in verband deur te sê: “Beklee julle dan, as God se uitverkorenes, heilig en bemind, met die tere eienskappe van barmhartigheid, goedheid” (Kolossense 3:12, NW). Ons moet dus God se heilige gees hê om goddelike goedheid te kan toon.
Maar hoe kry ons Jehovah se gees? Deur hom—herhaaldelik—daarom te vra. Jesus het getoon dat, as ons nederig om hierdie kosbare gawe tot Jehovah bid, Hy aan ons hartgrondige versoek sal voldoen. Nadat Jesus gesê het dat ons moet “bly vra” en “bly soek”, het hy bygevoeg: “As julle dan wat sleg is, weet om goeie gawes aan julle kinders te gee, hoeveel te meer sal die hemelse Vader die Heilige Gees gee aan die wat Hom bid?” (Lukas 11:9-13, vgl. NW). As ons Jehovah om sy gees vra en spesifiek versoek dat hy ons help om goedheid in ’n groter mate te openbaar, kan ons seker wees dat hy ons sal verhoor (1 Johannes 5: 14, 15). Ons dade moet natuurlik met ons versoek om God se gees strook.
Nog ’n hulpmiddel om hierdie eienskap aan te kweek, is bepeinsing oor die blyke van Jehovah se goedheid wat ons om ons kan waarneem. Die psalmis het van God gesê: “[Ek wil] al u werk oordink, en ek wil peins oor u dade” (Psalm 77:13). Dit is goed om te let op en te peins oor God se hoedanighede wat in die alledaagse lewe waargeneem kan word. Die pragtige skepping, die heerlike voedsel en drank, die dinge wat ons nodig het vir ons gemak en genot, die vreugde wat kinders bring—selfs die manewales van diere—getuig almal van God se goedheid aan die mens. Ja, ’n mooi sonsondergang, ’n kleurryke reënboog, ’n smaaklike maaltyd of ’n kosbare vriendskap kan ons daaraan herinner dat God goedgunstig baie dinge vir ons genot voorsien. Waarlik, goedheid is een van “sy onsigbare [hoedanighede wat] van die skepping van die wêreld af in sy werke verstaan en duidelik gesien [kan] word” (Romeine 1:20, vgl. NW). Bepeinsing oor sulke dinge is noodsaaklik as ons waarlik ons groot God van goedheid wil navolg.
Stel jou dit ten doel
Dit is beslis die moeite werd om ons dit ten doel te stel om goddelike goedheid aan te kweek. Persoonlike en gesinsverhoudinge sal ongetwyfeld verbeter as goedheid getoon word. Goedheid trek mense ook tot die Koninkryksboodskap aan. Talle twyfelaars is beweeg om die waarheid te ondersoek omdat Jehovah se Getuies goedheid in die bediening getoon het. Ja, goedheid het die beste na vore gebring in diegene wat anders vyandig sou wees.
In die bediening van huis tot huis het een jong Getuie ’n vrou teëgekom wat haar afgejak het. Die suster het opgelet dat die vrou siek was en gevra of sy enigiets vir haar kon doen. Die vrou het die hulp koel geweier. Maar twee weke later het die jong suster die vrou weer besoek en haar gevra of sy sedert hulle ontmoeting enige voedsel kon koop. Aangesien die vrou dit nie kon doen nie, het die suster daarop aangedring om die nodige by die winkel te gaan koop. Daarna was hierdie vrou baie vriendeliker teenoor Getuies wat haar besoek het—net omdat die suster goddelike goedheid getoon het.
Hierdie uiters gewenste eienskap trek mense aan. ’n Jong vrou met ’n universiteitsgraad se opmerkings nadat sy die eerste keer na die Koninkryksaal gegaan het, lig dit toe. By die saal was die Getuies met eenvoudige agtergronde bekommerd oor hoe hierdie vrou op hulle en hul spraak sou reageer. Maar hierdie geleerde vrou het nie hulle tekortkominge onthou nie. Sy het eerder net onthou dat almal baie vriendelik was teenoor haar, en die opregte belangstelling wat hulle in haar getoon het, het haar beïndruk. Sy is deur hulle voorbeeld aangespoor om haar lewe aan God toe te wy. Sy het weldra onselfsugtige belangstelling in ander begin toon as ’n gewone pionier en later as ’n lid van die Bethelgesin.
Goddelike goedheid is waarlik ’n uiters gewenste eienskap. Dit is ’n eienskap wat altyd in ons omgang moet blyk. Toon jy dit?