Is jy dankbaar vir wat Jesus gedoen het?
WATTER eenvoudiger en direkter manier kan daar wees om dankbaarheid te betuig as deur die woordjie “Dankie”? Maar nie almal wat “Dankie” sê, waardeer werklik wat hulle ontvang het nie. Daardie woordjie kan om ander redes gesê word, soos uit blote hoflikheid ter erkenning van iemand anders se optrede. Gepas, dog meganies.
Wanneer ’n mens ’n geskenk ontvang, veral een waaraan jy groot waarde heg, is opregte, hartgrondige dankbetuigings uiters gepas. ’n Geskenk kan ons gelukkig maak; dit kan in ’n behoefte voorsien. Wanneer dit albei hierdie dinge doen, het die geskenk besondere waarde. Maar as die geskenk daarna geïgnoreer of misbruik word, was enige dankbetuiging niks meer as leë woorde nie. Waardering, of gebrek daaraan, word dus meermale getoon deur hoe ons oor ’n geskenk voel en hoe ons dit gebruik.
Die Skepper van die mensdom, Jehovah, het ons sy kosbaarste besitting, sy Seun, as ’n geskenk gegee. Johannes 3:16 sê: “Want so lief het God die wêreld gehad, dat Hy sy eniggebore Seun gegee het, sodat elkeen wat in Hom glo [“geloof beoefen”, NW], nie verlore mag gaan nie, maar die ewige lewe kan hê.” Daardie geskenk of gawe sal ons gelukkig maak en sal in ons behoeftes voorsien as ons opregte dankbaarheid toon. Maar waarom moet ons dankbaar wees teenoor Jesus as Jehovah die Gewer is?
Wat Jesus vir jou gedoen het
‘Wat het Jesus vir my gedoen?’ vra jy dalk. Selfs voor jou geboorte het Jesus iets vir jou gedoen. Wat was dit? Jesus het sy hemelse, voormenslike bestaan prysgegee om as ’n mens uit die maagd Maria gebore te word (Lukas 1:26-33). Dit was geen geringe opoffering nie. Sou jy bereid wees om weg te trek van ’n huis van vrede, sekuriteit en gesondheid, waar jy omring is deur lojale vriende, om te gaan woon in ’n plek waar onmin, gevaar en siekte heers en waar vyande saamsweer om jou dood te maak? ‘So nooit as te nimmer’, sal die meeste antwoord. En tog is dit wat Jesus gedoen het.—Johannes 17:5; Filippense 2:5-8, vgl. NW.
Omdat Jehovah God en nie ’n mens nie sy Vader was, was Jesus sonder sonde (Lukas 1:34, 35). Hy het nie een maal in gedagte, woord of daad oortree nie. Ten spyte van die sondige toestande om hom heen en die teenstand wat hy moes verduur, kon hy vir sy teenstanders vra: “Wie van julle kan sonde by My aanwys?” Niemand kon nie! Soos die apostel Petrus dit gestel het: “Hy wat geen sonde gedoen het nie, en in wie se mond geen bedrog gevind is nie” (Johannes 8:46, NAV; 1 Petrus 2:22). Laat ons nou, op grond van hierdie feite, verder toelig hoe dit jou raak.
Baie mense hou nie eens daarvan om siekes in ’n hospitaal te besoek nie, laat staan nog saam met hulle te woon. Jesus was liggaamlik volmaak, wat beteken dat hy volmaakte gesondheid geniet het. Nogtans het hy hom nie van ander afgeskei of verkies om in ’n steriele omgewing te woon nie. Nee, maar uit liefde het Jesus geredelik saam met die siek en sterwende mensdom geëet, geslaap en gelewe.—Mattheüs 15:30-37; Markus 1:40-42.
Daarna het Jesus vrywillig daardie volmaakte mensebestaan ter wille van die mensdom opgeoffer. Omdat hy volmaak was, het hy die reg op eindelose menselewe gehad, en dit het hy prysgegee om ons ’n wonderlike geleentheid te bied. Soos hy self gesê het: “Die Seun van die mens [het gekom] . . .om te dien en sy lewe te gee as ’n losprys vir baie” (Mattheüs 20:28). Sy apostels het soortgelyk getuig oor hierdie saak: “Ons sien Hom, naamlik Jesus, wat vir ’n kort tydjie minder as die engele gemaak is, . . . sodat Hy deur die genade van God vir elkeen die dood sou smaak” (Hebreërs 2:9). Jesus se opoffering van sy menselewe ten behoewe van die mensdom was die grootste liefdesdaad wat enige mens kon doen. Daardeur het hy die grootste gawe geskenk wat ons as onvolmaakte menseskepsele ooit kon ontvang, naamlik die geleentheid om die ewige lewe te verkry.—Johannes 3:16; 15:13.
‘Jesus het gewis baie vir my gedoen’, besef jy dalk nou, ‘maar hoe kan ek my dankbaarheid toon?’