Die ruiters van Openbaring​—Hoe hulle tog jou raak

VIR baie pendelaars in Toronto, Kanada, was Maandag, 1 April 1985, nie ’n gewone dag nie. Mense het gedreig om die stad se ondergrondse treinspore in die lug te blaas. Waarom? Om die aandag te vestig op ’n beweerde poging jare gelede om die Armeense volk in Turkye uit te wis, iets wat die Turkse regering herhaaldelik ontken het.

Die meeste van die pendelaars het waarskynlik weinig of niks geweet van daardie saak van jare gelede nie. Nietemin het hulle ’n mate van ongerief en angs verduur. Ons word dikwels geraak deur dinge waarvan ons baie min weet.

Gedurende die tweede dekade van die twintigste eeu het belangrike dinge begin plaasvind ter vervulling van die merkwaardige Bybelprofesie in Openbaring 6:1-8. Soos aan die Christenapostel Johannes onthul is, sou perderuiters in die laaste dae ’n tog onderneem. En hoewel miljoene nie daarvan weet nie, raak die tog van daardie ruiters van Openbaring elke mens op aarde. Dit raak jou ook. Maar hoe? Ons sal sien wanneer ons nou elk van die ruiters bespreek.

Die vuurrooi perd

Een van die perde wat Johannes gesien het, was “’n vuurrooie, . . . en aan hom wat daarop sit, is dit gegee om die vrede van die aarde af weg te neem en dat hulle mekaar sou doodmaak; en ’n groot swaard is aan hom gegee”.​—Openbaring 6:4.

Hierdie ruiter se “groot swaard” simboliseer oorlogvoering. In ooreenstemming hiermee het sowat 69 miljoen mense sedert 1914 in die twee wêreldoorloë gesterf. Wat ’n slagting! Ja, ’n mag der menigte weduwees en wese getuig van die feit dat die ruiter van die vuurrooi perd, ofte wel internasionale oorlogvoering, hulle lewens regstreeks geraak het.

Daarbenewens gaan die jonger geslag steeds swaar gebuk onder oorloë en oorlogsbedreigings. In lande waar daadwerklike konflik woed, is baie tienderjariges by die gevegte betrokke. Die uitwerking van oorlog op hierdie jongmense word opgesom in hierdie vraag wat deur die voorsitter van een menseregte-agentskap gestel is: “Hoe kan hulle ooit tot verstandige en gebalanseerde volwassenes ontwikkel?”

Jeugdiges in baie lande wat direk deur oorlog geraak word, het geleer om tyd in ure en dae pleks van in maande en jare te tel. Hulle vra: “Later, wie bekommer hom oor later? Kan jy waarborg dat ’n bom nie vanaand my kamer sal tref wanneer ek bed toe gaan nie?”

Wat van die kinders wat in vreedsame lande woon? Ondervind hulle die gevolge van die oorlogsruiter? Ja, die sombere bedreiging van kernoorlog het ’n diepgaande sielkundige uitwerking op hulle. Oor die wanhoop wat haar leerlinge uitgespreek het, het een onderwyseres opgemerk: “Keer op keer wanneer ek hierdie kommentare gehoor het, het dit my totaal oorbluf gelaat. Hierdie jong kinders het ’n vlak van wanhoop ondervind wat ek my nie eens veroorloof nie.” Dokter Richard Logan van Quebec, Kanada, voeg by: “Hulpeloosheid en magteloosheid is die sielkundige definisie van depressie. Dis wat ons in ’n groot aantal jongmense sien.”

Maar gestel jy woon nie in ’n oorloggeteisterde land nie, of jy meen nie dat die probleem jou emosioneel raak nie. Wat dan? Wel, die ruiter van die vuurrooi perd het nogtans ’n invloed op jou lewe. Elke minuut word R3,25-miljoen regstreeks vir militêre doeleindes aangewend​—’n wêreldwye besteding van nagenoeg R1,65-biljoen per jaar. Wie betaal daarvoor? Jy. Waar jy ook al woon, jy word geraak deur die ruiter van die vuurrooi perd.

Die swart perd

Johannes beskryf ’n ander perd van die tafereel met die volgende woorde: “En ek het gesien, en kyk, daar was ’n swart perd; en hy wat daarop sit, het ’n skaal in sy hand. En ek het ’n stem tussen die vier lewende wesens hoor sê: ’n Rantsoen koring vir ’n penning en drie rantsoene gars vir ’n penning; en moenie die olie en die wyn beskadig nie.”​—Openbaring 6:5, 6.

Is jy honger? Miljoene is. Hulle word regstreeks geraak deur die ruiter van die swart perd, wat hongersnood voorstel. Elke minuut sterf daar 30 kinders omdat hulle nie genoeg kos of medisyne het nie​—meer as 15 miljoen per jaar! Miljoene der miljoene ander lewe in haglike omstandighede. Volgens Robert McNamara, voormalige president van die Wêreldbank, word hulle “so erg gestrem deur analfabetisme, wanvoeding, siekte, hoë kindersterfte en ’n kort lewensduur dat dit hulle selfs die potensiaal ontsê van die gene waarmee hulle gebore word”.

In die laaste maande het ons dikwels foto’s gesien van verhongerde Afrikane​—mans, vrouens en kinders. Die sekretaris-generaal van die VV, Javier Pérez de Cuéllar, het die omvang van hierdie lyding grafies beskryf toe hy gewaarsku het: “Meer mense kan in Afrika besuide die Sahara sterf as gedurende die hele Tweede Wêreldoorlog. Selfs die oorlewendes kan vir die res van hulle lewe gestrem wees, hetsy fisies of verstandelik.” Hierdie slagoffers word regstreeks geraak deur die tog van die swart perd.

Al ly jy nie honger nie, word jy sekerlik geroer deur die neerdrukkende foto’s van verhongerde mense. Volgens ’n hoofartikel in The New York Times van 20 Mei 1985 is meer as R2,5-miljard tot op daardie tydstip geskenk om hongergeteisterdes te help. Hoewel jy dalk nie persoonlik geld geskenk het nie, het sommige regerings groot skenkings uit belastinggeld gedoen. Ja, die tog van die swart perd het sowel ’n regstreekse as onregstreekse uitwerking op alle mense.

Die vaal perd

In die gesig van Johannes word ’n ander perd en sy ruiter vervolgens beskryf: “Ek het gesien, en kyk, daar was ’n vaal perd. En hy wat daarop sit, sy naam is die dood, en die doderyk het hom gevolg. En aan hulle is mag gegee oor die vierde deel van die aarde om dood te maak met swaard en hongersnood en pes en deur die wilde diere van die aarde.”​—Openbaring 6:8.

Die dood ry op die vaal perd, en “pes” is net een van die maniere waarop lewe uitgewis word tydens die tog van hierdie ruiter. Ondanks vordering op die gebied van die mediese wetenskap word die wêreld nog steeds op alle fronte deur siekte geteister. Hoewel ons nie tans ’n epidemie ondervind met die omvang van die sogenoemde Spaanse griep wat op die Eerste Wêreldoorlog gevolg het nie, eis kanker, hartkwaal en talle ander siektes steeds ’n ontsettende aantal lewens. Die Wêreldgesondheidsorganisasie skat byvoorbeeld dat 5,9 miljoen nuwe gevalle van kanker elke jaar in die wêreld voorkom. Rivierblindheid, malaria, bilharziase, cholera en ’n magdom ander siektes tel onder die plae wat mense vandag teister.

Maar jy redeneer dalk: ‘Ek het nie een van daardie siektes nie.’ Dit kan so wees, maar die tog van die vaal perd raak jou nogtans. Hospitaal- en doktersgelde is geweldig hoog. Dit laat mense gesondheidsversekering uitneem. Baie lande verskaf gesondheidsdienste wat deur belasting gefinansier word. En dink aan die geweldige koste in verlore werktyd, wat uiteindelik na jou deurgevoer word in die vorm van hoër pryse. Ja, die tog van die vaal perd raak jou.

Wat die wit perd bring

Na ’n bespreking van die skadelike gevolge van die tog van die ander ruiters, is dit bemoedigend om te sien wat Johannes te sê gehad het oor die wit perd en sy ruiter, wat voor die ander uitry. Die apostel het gesê: “Ek het gesien, en kyk, daar was ’n wit perd. En hy wat daarop sit, het ’n boog; en aan hom is ’n kroon gegee, en hy het uitgegaan as ’n oorwinnaar en om te oorwin.”​—Openbaring 6:2.

Jesus Christus ry op die wit perd (Openbaring 19:11). Sy hemelse heerskappy het in 1914 begin en het met opwindende gebeure gepaard gegaan. Oorlog in die hemel het daartoe gelei dat die Duiwel en sy engele na die aarde neergewerp is. Daarna het ’n stem uit die hemel gesê: “Wee die bewoners van die aarde en die see, want die duiwel het na julle neergedaal met groot woede, omdat hy weet dat hy min tyd het.” Dit was toe dat die perderuiters met hulle tog begin het.​—Openbaring 12:7-12.

Maar hoe raak die tog van Jesus Christus jou? Jesus het in verband met sy heerskappy voorspel: “Hierdie evangelie van die koninkryk sal verkondig word in die hele wêreld tot ’n getuienis vir al die nasies; en dan sal die einde kom” (Mattheüs 24:14). Jehovah se Getuies verkondig Christus se opgerigte Koninkryk vandag in meer as 200 lande en eilande. Het hulle jou al by jou huis besoek? Dan word jy geraak deur die tog van hierdie ruiter.

Jesus het ’n verdere profesie gegee oor hoe sy heerskappy mense sou raak: “Wanneer die Seun van die mens in sy heerlikheid kom en al die heilige engele saam met Hom, dan sal Hy op sy heerlike troon sit; en voor Hom sal al die nasies versamel word, en Hy sal hulle van mekaar afskei soos die herder die skape van die bokke afskei; en Hy sal die skape aan sy regterhand en die bokke aan sy linkerhand sit.”​—Mattheüs 25:31-33.

As gevolg van hierdie skeidingswerk wat tydens Jesus se tog op die wit perd gedoen word, word alle mense as òf “skape” òf “bokke” geïdentifiseer. Let op die uitslag. Die “bokke” “sal weggaan in die ewige straf, maar die regverdiges [die “skape”] in die ewige lewe” (Mattheüs 25:46). Jou reaksie op die verkondiging van die koninkryksboodskap sal dus vir jou die lewe of die dood beteken.

Al het jy nog nooit tevore nagedink oor hoe die ruiters van Openbaring jou raak nie, spoor ons jou aan om ag te slaan op die goeie nuus dat hulle tog binnekort gaan eindig. Daarna sal die aarde talle seëninge geniet onder die heerskappy van Jesus, die ruiter van die wit perd. Kyk hoe die Bybel sommige van daardie seëninge profeties beskryf het: “In sy dae sal die regverdige bloei en [in die afwesigheid van die ruiter van die vuurrooi perd] volheid van vrede, totdat die maan nie meer is nie. Mag daar [in die afwesigheid van die ruiter van die swart perd] volheid van koring wees in die land, op die top van die berge.”​—Psalm 72:7, 16.

Toe Jesus Christus op die aarde was, het hy sy Godgegewe mag oor dinge soos walglike siektes en selfs die dood getoon. Gedurende sy heerskappy as Koning sal hy daardie mag op veel groter skaal gebruik om die aarde van alle pessiektes, hongersnode en oorloë te reinig. So sal die ruiter van die wit perd ’n einde maak aan die vernietigende tog van die ander ruiters van Openbaring.

[Venster op bladsy 3]

DIE RUITERS GEÏDENTIFISEER

Die Wagtoring het in sy nommer van 1 Januarie verduidelik hoe die tog van die ruiters van Openbaring in vervulling begin gaan het.

WIT PERD: Jesus Christus ry op hierdie perd as die pasbekroonde Koning in die hemel. Hy word uitgebeeld as ’n regverdige oorwinnaar wat sedert sy troonsbestyging in 1914 opruk.

VUURROOI PERD: Die ruiter van hierdie perd stel oorlog voor. Vrede word van die aarde weggeneem, en wêreldoorlog breek uit.

SWART PERD: Die ruiter van hierdie perd stel voedselskaarste en hongersnood voor. Terwyl miljoene honger ly, is ander nog in staat om luuksevoedsel te koop.

VAAL PERD: Die dood ry op die vaal perd. Ontydige dood word afgebeeld. Dit spruit uit pessiektes en ander faktore.