Jesus se lewe en bediening

Baie Samaritane glo

WANNEER die dissipels met kos van Sigar af terugkom, vind hulle Jesus by die fontein van Jakob waar hulle hom gelaat het. Maar nou is hy besig om met ’n Samaritaanse vrou te praat. Toe die dissipels daar aankom, los sy haar waterkan daar en gaan sy terug stad toe.

Sy stel intens belang in die dinge wat Jesus vir haar vertel het en sê vir die mense van die stad: “Kom kyk ’n man wat my alles vertel het wat ek gedoen het.” Om hulle nuuskierigheid te prikkel, vra sy dan: “Is Hy nie miskien die Christus nie?” Die vraag het die gewenste uitwerking: die mense gaan kyk self.

Intussen spoor die dissipels Jesus aan om die kos te eet wat hulle van die stad af gebring het. Maar hy antwoord: “Ek het voedsel om te eet waar julle nie van weet nie.”

“Het iemand dan vir Hom ete gebring?” vra die dissipels mekaar. Jesus verduidelik: “My voedsel is om die wil te doen van Hom wat My gestuur het en om sy werk te volbring. Sê julle nie: Dit is nog vier maande, dan kom die oes nie?” Maar met verwysing na die geestelike oes sê Jesus: “Hy wat maai, ontvang loon en vergader vrug vir die ewige lewe.”

Miskien kon Jesus alreeds die goeie gevolg van die Samaritaanse vrou se getuienis sien​—dat baie in hom glo vanweë haar getuienis. Toe die mense van Sigar na hom toe kom by die fontein, vra hulle hom om by hulle te bly en hulle meer te vertel. Jesus aanvaar die uitnodiging en bly twee dae daar.

Baie meer van die Samaritane glo wanneer hulle na Jesus luister. Dan sê hulle vir die vrou: “Ons glo nie meer op grond van wat jy gesê het nie, want ons het self gehoor en ons weet dat Hy waarlik die Christus, die Saligmaker van die wêreld, is.” Die Samaritaanse vrou is beslis ’n goeie voorbeeld van hoe ons oor Christus kan getuig deur luisteraars se nuuskierigheid te prikkel sodat hulle verder ondersoek sal instel!

Onthou dat dit vier maande voor die oes is​—blykbaar die garsoes, wat in Palestina in die lente ingesamel word. Dit is dus nou ongeveer November of Desember. Dit beteken dat Jesus en sy dissipels ná die paasfees van 30 G.J. ’n stuk of agt maande in Judea deurgebring het, waar hulle mense geleer en gedoop het. Hulle vertrek nou na hulle tuisomgewing, Galilea. Wat wag dáár op hulle? Johannes 4:27-42.

♦ Watter getuienis gee die Samaritaanse vrou, en met watter resultaat?

♦ Hoe hou Jesus se voedsel met die oes verband?

♦ Hoe kan ons die lengte van Jesus se bediening in Judea na die paasfees van 30 G.J. bepaal?

[Volbladillustrasie op bladsy 25]