Lewe ons in “die tyd van die einde”?

“En jy, Daniël, hou die woorde geheim en verseël die boek tot die tyd van die einde toe.”​—Daniël 12:4.

DIE eter was verward. Terwyl hy deur die venster van ’n restourant in die middel van Manhattan oor Times Square in die stad New York gekyk het, het sy oë heen en weer beweeg tussen drie verskillende digitaalklokke wat almal die tyd in yslike letters aangegee het. Volgens die een klok was dit 11:28. Asof dit getwyfel het of dit werklik so laat is, het ’n ander een die tyd aangegee as 11:26, terwyl die derde ongeduldig reeds 11:29 aangegee het.

‘’n Minuut of twee maak nie eintlik saak nie’, sê jy dalk. Probeer egter om ’n persoon wat pas tevore sy bus, trein of vliegtuig nie met minute nie, maar slegs met sekondes verpas het daarvan te oortuig! Dit is belangrik om te weet presies hoe laat dit is. Dit is selfs belangriker om te weet waar ons in God se rooster is.

Die moontlikheid van uitwissing

Soos jy weet, praat mense natuurlik al eeue lank oor “die tyd van die einde”, of soos sommige sê, ‘die einde van die wêreld’ of ‘die oordeelsdag’. Die profeet Daniël het 25 eeue gelede daarvan gepraat (Daniël 12:4). Maar volgens onafhanklike joernalis James David Besser verg dit deesdae “nie meer godsdienstige of bonatuurlike geloof om die moontlikheid van die oordeelsdag te aanvaar nie; dit verg bloot toegang tot die televisienuus”. Stem jy nie saam nie?

Die televisie maak wêreldnuus ongetwyfeld toegankliker deur die aksie reg tot in ons woonkamers te beeld send. Dit laat probleme ernstiger en persoonliker lyk. Dit herinner ons aan die feit dat die stad of dorp wat in ’n moontlike kernramp uitgewis word, die seun of dogter wat in ’n moontlike misdaadvlaag wreed behandel word, die moeder of vader wat in ’n moontlike terroriste-aanval as gyselaar aangehou word almal moontlik ons probleme kan wees. Hierdie moontlikhede bewys natuurlik nie op sigself dat uitwissing ons in die gesig staar nie. Maar dit laat dit waarskynliker lyk en maak die vraag: Lewe ons in “die tyd van die einde”? dringender.

Jesus, Daniël en die einde van die wêreld

Meer as 19 eeue gelede het Jesus se dissipels vir hom gevra: “Wat is die teken van u koms en van die voleinding van die wêreld?” (Mattheüs 24:3). Toe Jesus vir hulle ’n teken gegee het, het hy gepraat van talle bewyse, wat almal gesamentlik daarop sou dui dat ons “die voleinding van die wêreld” bereik het. Blaai in jou Bybel na Mattheüs hoofstukke 24 en 25, Markus hoofstuk 13 en Lukas hoofstuk 21, en lees self daarvan.

Jy sal dalk verbaas wees om te ontdek dat die dinge wat jy lees feitlik na ’n opsomming van vandag se televisienuus klink. Jy sal lees van oorloë, groot aardbewings, pessiektes en hongersnode wat almal wêreldwyd voorkom. Jy sal ook lees van “benoudheid van nasies in hulle radeloosheid” en van mense wie se “harte beswyk van vrees en verwagting van die dinge wat oor die wêreld kom”. Kan jy aan gepaster woorde dink om die wêreldsituasie, waarvan vandag se televisieprogramme ons soveel vertel, te beskryf?​—Lukas 21:10, 11, 25, 26.

Hierdie sterk omstandigheidsgetuienis dat ons in “die tyd van die einde” lewe, is nie al wat ons het nie. Soos ons vroeër gesê het, vind ons stawende getuienis deur nog 500 jaar terug te gaan na die dae van die Joodse profeet Daniël. Jesus het hom by name genoem en gepraat oor die vervulling van sy profesie. (Vergelyk Mattheüs 24:3, 15, 21 met Daniël 11:31; 12:1, 4.) Sodoende het Jesus getoon dat hy nie gedink het dat Daniël se woorde in die “Ou Testament” verouderd of onbelangrik is nie. Ons moet ook nie.

Let op die ooreenkoms tussen Daniël se woorde en dié van Jesus soos hierbo uiteengesit. Vra jou dan af: ‘Het hulle nie van dieselfde ding gepraat nie?’

Dit is duidelik dat sowel Daniël as Jesus dieselfde ding, “die tyd van die einde”, waartydens Christus in koningsmag teenwoordig sou wees, voorspel het. Aan die einde van daardie tydperk sou hy al sy vyande hier op aarde in ’n groot verdrukking uitwis. Maar God se volk sal behoue bly.

Wil jy graag onder daardie oorlewendes wees? Beskou dan die getuienis wat Daniël oor “die tyd van die einde” verstrek. Dit help ons om te weet presies waar ons in God se rooster is.

[Venster op bladsy 4]

DANIËL

“In die tyd van die einde . . . sal Migael[Jesus Christus] . . . optree; en dit sal ’n tyd van benoudheid wees soos daar nie gewees het vandat ’n volk bestaan het tot op die tyd nie; maar in die tyd sal jou volk gered word.”​—Daniël 11:40; 12:1.

JESUS

“Wat is die teken van u koms en van die voleinding van die wêreld?

“Dan sal daar groot verdrukking wees soos daar van die begin van die wêreld af tot nou toe nie gewees het . . . nie.

“As daardie dae nie verkort was nie, sou geen vlees gered word nie; maar . . . daardie dae [sal] verkort word.”​—Mattheüs 24:3, 21, 22.