Wees eerlik in alle dinge
“Ons vertrou dat ons ’n eerlike gewete het, aangesien ons ons in alle dinge eerlik wil gedra.”—HEBREËRS 13:18, NW.
1, 2. (a) Wat het in ons tyd van eerlikheid geword? (b) Watter soort mense is oneerlik?
OUER persone kan ’n tyd onthou toe mense in baie plekke nie hulle deure gesluit het nie. Dit het nie by hulle opgekom om by ander te steel of hulle te bedrieg nie. As hulle geld geleen het, het hulle aan hulle eer verplig gevoel om dit terug te betaal. En hulle woord was hulle eer. Daar was weliswaar oneerlikheid, maar dit was nie aldeurdringend nie. Vandag is diefstal, leuens en bedrog egter dwarsoor die wêreld algemeen. En talle oneerlike dade word gepleeg deur sogenaamd fatsoenlike mense wat in ordentlike woonbuurte woon en werk, goed aantrek, moontlik tot ’n godsdiens behoort en hulleself as goeie burgers beskou. Oneerlikheid is inderdaad welbekend onder staatsamptenare en sakemanne.
2 In die Verenigde State word daar elke jaar ruim 11 miljoen ernstige misdade aangemeld waarby oneerlikheid betrokke is. En die versuim om alle belasbare inkomste aan te gee, beloop meer as R640-miljard per jaar. In die stad New York ry nagenoeg honderdduisend mense elke dag met die ondergrondse trein sonder om reisgeld te betaal. ’n Beampte het gesê dat as al hierdie bedrieërs gearresteer sou word “ons die hofstelsel maande lank druk besig sou hou”. In Japan het ’n opname onder belastingbetalers getoon dat 95 persent met hulle belastingopgawe kul, met inbegrip van 92 persent van die regsgeleerdes. In een maand is meer as 16 000 mense betrap dat hulle trein ry sonder om te betaal.
3. Hoe het oneerlikheid in die huwelik algemener geword?
3 Oneerlikheid het ook in die huwelikslewe toegeneem. Enkele jare gelede het ’n opname getoon dat 30 persent van Amerikaanse vrouens hulle “aan buite-egtelike geslagsomgang skuldig gemaak het”. In ’n onlangser opname onder meer as honderdduisend getroude vroue het 50 persent erken dat hulle “al minstens een buite-egtelike verhouding gehad het”. ’n Waarnemer het gesê dat moontlik “90 persent van die getroude mans” eweneens kul.
’n Kenmerk van “die laaste dae”
4. Waarom verbaas die toename in oneerlikheid ons nie?
4 Vir Jehovah se knegte is dit nie verbasend dat oneerlikheid toegeneem het nie. Hulle weet dat dit deel uitmaak van die teken van hierdie “laaste dae”. God se Woord het voorspel dat mense in ons tyd ‘liefhebbers van hulleself, geldgierig, dislojaal, bandeloos en sonder liefde vir die goeie sal wees, dat hulle ’n gedaante van godsaligheid sal hê, maar die krag daarvan sal verloën, en dat hulle van kwaad tot erger sal voortgaan’ (2 Timotheüs 3:1-5, 13). ’n Groep deskundiges het erken dat mense in die wêreld “tradisionele waardes van reg en verkeerd al hoe meer opsyskuif en die gewete ignoreer”.
5. Wat het gebeur toe ’n toestand soortgelyk aan dié van ons dag in die eertydse tienstammeryk van Israel geheers het?
5 Die toestand in die wêreld is vandag erger as wat dit was net voordat Jehovah sy strafgerig aan die eertydse tienstammeryk van Israel voltrek het. Hosea 4:1-3 sê van daardie tyd: “Die HERE het ’n regsaak met die inwoners van die land, omdat daar geen trou en geen liefde en geen kennis van God in die land is nie. Hulle sweer en lieg en moor en steel en pleeg owerspel; hulle breek in, sodat bloedbad aan bloedbad raak. Daarom treur die land, en alles wat daarop woon, kwyn weg.” Jehovah se strafgerig is in 740 v.G.J. voltrek toe hy toegelaat het dat Assirië Israel en sy hoofstad Samaria verower en die inwoners daarvan in ballingskap wegvoer.
6. Waarom gaan God sy oordeel aan die huidige stelsel voltrek, en hoe seker is daardie oordeel?
6 Jehovah het eweneens “’n regsaak” met hierdie oneerlike wêreld. Die Skrif toon duidelik dat dit deur Jehovah veroordeel is en in vernietiging sal ‘wegkwyn’. “Die teenswoordige hemele en die aarde is . . . as ’n skat weggelê en word vir die vuur bewaar teen die dag van die oordeel en die verderf van die goddelose mense” (2 Petrus 3:7). Die vervulling hiervan is so seker dat God se Woord daarvan praat asof dit reeds gebeur het: “Kyk, die Here het gekom met sy heilige tienduisendtalle, om gerig te hou oor almal en al die goddelose mense onder hulle te straf oor al hulle goddelose werke wat hulle goddelooslik gedoen het.”—Judas 14, 15.
7. Voor watter uitdagings kom Jehovah se knegte te staan totdat hy hierdie verdorwe wêreld vernietig?
7 Maar totdat God hierdie oneerlike wêreld vernietig, moet sy knegte daarin lewe. Christene is “in die wêreld”, hoewel, soos Jesus gesê het, “hulle nie van die wêreld is nie” (Johannes 17:11-14). Daar word dus daagliks van hulle vereis om sedelike besluite rakende eerlikheid te neem. Dit sluit situasies by die werk, by die skool, in die gesin of met vriende in. Wanneer daar ’n uitdaging aan hulle Bybelopgeleide gewete gestel word, wil Jehovah se knegte altyd voel soos die apostel Paulus toe hy gesê het: “Ons vertrou dat ons ’n eerlike gewete het, aangesien ons ons in alle dinge eerlik wil gedra.”—Hebreërs 13:18, NW.
Nie net lonend nie
8. Waarom is eerlikheid die weg vir Jehovah se knegte?
8 Daar is al gesê dat eerlikheid lonend is, wat beteken dat eerlikheid praktiese vrugte afwerp. Maar vir Christene gaan die saak dieper. Vir hulle is eerlikheid die enigste weg. As knegte van Jehovah is hulle verplig om nie hierdie veroordeelde wêreld se oneerlikheid na te volg nie—kom wat wil. Al hulle doen en late moet eerder met God se wette strook. En in hierdie opsig het sy wette nie verander nie.
9. Hoe het Jehovah se Wet aan eertydse Israel eerlikheid beklemtoon?
9 Jehovah het byvoorbeeld vir eertydse Israel gesê: “Jy mag nie egbreek nie. Jy mag nie steel nie. Jy mag geen valse getuienis teen jou naaste spreek nie. Jy mag nie . . . iets [begeer] wat van jou naaste is nie” (Exodus 20:14-17). Levitikus 19:11, 12 sê eweneens: “Julle mag nie steel nie, en julle mag nie lieg nie, en julle mag die een die ander nie bedrieg nie. En julle mag nie vals sweer by my Naam en so die Naam van jou God ontheilig nie. Ek is die HERE.”
10. Hoe lê die Christelike godsdiens klem op eerlikheid?
10 Sulke wette is vir Christene herhaal. God se Woord sê derhalwe: “Weet julle nie dat die onregverdiges die koninkryk van God nie sal beërwe nie? Moenie dwaal nie! Geen hoereerders of afgodedienaars of egbrekers of wellustelinge of sodomiete of diewe of gierigaards of dronkaards of kwaadsprekers of rowers sal die koninkryk van God beërwe nie”; ook nie iemand wat “leuens beoefen” nie (1 Korinthiërs 6:9, 10; Openbaring 22:15, NW). Almal wat in God se nuwe stelsel wil lewe, moet sy eienskappe weerspieël, en een daarvan is dat “God . . . nie kan lieg nie” (Titus 1:2; Hebreërs 6:18). Satan, wat ‘die vader van die leuen is’, is die bron van oneerlikheid.—Johannes 8:44.
11, 12. (a) Waarom moet ons nou leer om eerlik te wees? (b) Waarom voel ons veilig in God se sigbare organisasie?
11 Aangesien “geregtigheid” in God se beloofde ‘nuwe aarde sal woon’, sal ‘die inwoners van die wêreld geregtigheid leer’ (2 Petrus 3:13; Jesaja 26:9). Dit is waarom die snel toenemende aantal toekomstige burgers van die paradysaarde nou ‘Jehovah se weë geleer word’, met inbegrip van eerlikheid (Jesaja 2:3, 4). God se Woord vermaan ons derhalwe: “Lieg nie vir mekaar nie, omdat julle die oue mens met sy werke afgelê het” (Kolossense 3:9). Dit sê ook: “Laat die een wat steel, nie meer steel nie; maar laat hom liewer arbei deur met sy hande te werk wat goed is, sodat hy iets kan hê om mee te deel aan die een wat gebrek het.”—Efesiërs 4:28.
12 Jehovah se knegte moet in alle dinge eerlik wees. Aangesien dit is wat almal in die nuwe stelsel sal moet wees, is dit wat God se volk nou moet wees. En watter vreugde is dit tog om verbonde te wees aan ’n internasionale gemeenskap van miljoene mense wat eerlikheid aankweek! Hoe veilig voel ons tog in hierdie geestelike paradys wat ’n produk is van God se kragtige heilige gees, “wat God gegee het aan die wat Hom gehoorsaam is” (Handelinge 5:32). Vergelyk dit met die onheilsame gees wat hierdie wêreld onder Satan die Duiwel, “die god van hierdie wêreld”, deurdring.—2 Korinthiërs 4:4; Galasiërs 5:19-24.
Ander sien eerlikheid raak
13, 14. Wat het ander oor die eerlikheid van Jehovah se volk gesê?
13 Ander sien dikwels die eerlikheid van God se volk raak. Die Italiaanse koerant Il Piccolo het byvoorbeeld ’n brief van een van sy lesers gepubliseer wat gesê het: “Ek wil die dame bedank wat haarself as een van Jehovah se Getuies geïdentifiseer het en wat bewys van voorbeeldige eerlikheid gelewer het deur ’n groot som geld, wat ek verloor het, deur middel van hierdie koerant aan my terug te stuur.” In die Verenigde State het The Indianapolis Star geskryf van ’n Getuie-egpaar wat $4 000 (R10 260) gevind en aan die eienaar terugbesorg het. Die koerant het gesê dat daar by die egpaar “geen twyfel bestaan het oor wat hulle moes doen nie”. Waarom nie? Hulle het gesê: “Ons kon dit nie hou nie. Ons is Jehovah se Getuies.”
14 Toe ’n Getuie in Missouri $9 500 (R24 360) gevind en dit aan die polisie oorhandig het, het ’n koerant ’n offisier soos volg aangehaal: “Dit is uiters seldsaam dat iemand soveel geld vind en dit ingee. Ek kan nie onthou dat iemand dit al ooit gedoen het nie. Dit was absoluut verstommend.” Die artikel het gemeld dat die Getuie “dit nooit eens oorweeg het om die geld te hou nie”. Die verantwoordelike offisier het gesê dat die Getuie “sy geloof herstel het dat daar nog eerlike mense onder die mensdom is”. Die Getuie het geantwoord: “As ’n groep beroem ons ons daarop dat ons in alle opsigte eerlik is.”
15, 16. Watter ondervindinge toon dat ander eerlikheid selfs in klein dingetjies raaksien?
15 Ons moenie net in groot dinge eerlik wees nie. Eerlikheid in klein dingetjies is ook noodsaaklik (Lukas 16:10). Toe ’n Getuiegesin byvoorbeeld in ’n hotel in Florida (VSA) gebly het, het hulle seun per abuis ’n kussingsloop geneem in die waan dat dit sy onderhemp was. Die gesin het dit aan die hotel teruggestuur, en die hotelbestuurder het geskryf: “Ons wil julle hartlik bedank vir julle eerlikheid. Hoewel dit waarskynlik vir julle ’n doodnatuurlike daad was om ons kussingsloop terug te stuur, was dit vir ons iets prysenswaardigs.” Toe ’n Getuie-egpaar per ongeluk ’n skryfpen uit ’n hotel in Georgia geneem en dit toe teruggestuur het, het die bestuurder insgelyks geskryf: “Ek wil julle bedank dat julle die moeite gedoen het om die pen, wat julle per ongeluk saam met julle besittings ingepak het, terug te stuur. Dit is verfrissend om briefies soos julle s’n van sulke eerlike en bedagsame mense te ontvang!”
16 ’n Getuieseun in standerd drie het bofbal by die skool gespeel. Hy het ’n lopie gedoen, en dit was naelskraap, maar hy het geweet dat hy “uit” was. Sy spanmaats het probeer sê dat hy “veilig” was. Maar toe het ’n lid van die ander span gesê dat daar ’n gewisse manier is om die waarheid vas te stel. Hy het gesê: “Vra hom of hy uit is of nie. Hy is ’n Getuie, en Getuies lieg nie.” Die seun se goeie gedrag in alledaagse dinge is deur ander raakgesien. Waarlik, as God se standaarde nageleef word, kan Jehovah selfs “uit die mond van kinders” geloof word.—Mattheüs 21:16.
17, 18. Watter goeie uitwerking kan Jehovah se beginsels oor eerlikheid op opregte mense hê?
17 In Nigerië was die man van ’n Getuie sterk daarteen gekant dat sy ’n kringbyeenkoms bywoon. Hy het haar dus soontoe gevolg en ’n steurnis probeer veroorsaak. Na die sessie het die man gesê: “Nou gaan ek julle Getuies op die proef stel.” Toe niemand kyk nie, het hy geld uit sy sak geneem, dit gemerk, opgefrommel en op die vloer laat val. Later het hy gemeld dat hy geld verloor het. Maar hy is meegedeel dat hy hom nie moes bekommer nie, want dit sou gevind word. Hy het teruggegaan na die plek waar hy die geld laat val het, maar dit was weg. “A, ek het julle betrap dat julle oneerlik is!” het hy gesê. Toe is daar vir hom gesê dat die geld nie daar sou wees nie, aangesien iemand dit na die afdeling vir vermiste goedere sou geneem het. Die gemerkte geld was inderdaad by daardie afdeling, en dit is aan hom terugbesorg. Hierdie ondervinding het hom aangespoor om sy vrou se geloof te ondersoek, en vandag is hy een van Jehovah se Getuies.
18 In ’n brief aan die wêreldhoofkwartier van Jehovah se Getuies in New York het ’n vrou, wat nie ’n Getuie is nie, gesê dat sy graag wil vertel wat met haar dogter op skool gebeur het. Haar dogter het ’n duur rytoom gehad wat op ’n dag gesteel is. Twee jaar later het die dogter ’n brief ontvang wat gelui het: “Liewe Lili, Hier is jou toom wat ’n paar jaar gelede gesteel is. Dit was ek wat dit gevat het, maar ek is nou een van Jehovah se Getuies en my nuwe gewete sal my nie toelaat om dit te hou nie. Ek is regtig jammer. Vergewe my asseblief.” Ja, diegene wat Jehovah wil dien, moet “’n eerlike gewete aankweek, aangesien ons ons in alle dinge eerlik wil gedra’.—Hebreërs 13:18, NW.
Die organisasie word rein gehou
19. (a) Wat moet ’n Christen doen as hy hom aan oneerlikheid skuldig gemaak het? (b) Wat sal met diegene onder ons gebeur wat volhou met oneerlike dade, en waarom?
19 As ’n kneg van God onopsetlik iets oneerliks doen, moet hy daarvoor vergoed sodra hy dit besef of dit onder sy aandag gebring word. En as sommige individue onder ons hulle waardering vir Bybelbeginsels verloor en volhou met oneerlike gebruike, sal hulle nie toegelaat word om God se volk te besmet nie. Hulle sal uitgesit word (1 Korinthiërs 5:11-13). Hierin kan ons op hemelse bystand staatmaak, want Jesus het voorspel: “Die Seun van die mens sal sy engele uitstuur, en hulle sal uit sy koninkryk bymekaarmaak al die struikelblokke en die wat die ongeregtigheid doen . . . Dan sal die regverdiges skyn soos die son in die koninkryk van hulle Vader.”—Mattheüs 13:41-43.
20, 21. (a) Waarom kan ons sagmoediges met vrymoedigheid nooi om Jehovah saam met ons te aanbid? (b) Watter aspek van eerlikheid sal in die volgende artikel bespreek word?
20 Jehovah se organisasie word aldus rein gehou. Dit “skyn” gevolglik helder as ’n ligbaken vir opregte mense. Dit is waarom ons met vrymoedigheid vir die sagmoediges van die aarde sê: “Kom, laat ons optrek na die berg van die HERE [die verhewe plek of posisie van ware aanbidding] . . . dat Hy ons in sy weë kan leer en ons in sy paaie kan wandel.”—Miga 4:2.
21 Aangesien Jehovah se knegte in alle dinge eerlik moet wees, sal dit natuurlik hulle saketransaksies met ander Getuies insluit. Hier kan ook uitdagings ontstaan om eerlik te wees. Wat is party daarvan? Hoe kan ons hulle hanteer? Die volgende artikel sal hierdie aspek van eerlikheid bespreek.
Vrae ter hersiening
◻ Wat het in ons tyd van eerlikheid geword? Waarom?
◻ Hoe toon God se Woord die nodigheid vir eerlikheid?
◻ Waarom moet ons selfs voor die nuwe stelsel eerlikheid aankweek?
◻ Watter ondervindinge toon die waarde van eerlikheid?
◻ Watter versekering is daar dat eerlikheid onder ons gehandhaaf sal word?
[Prent op bladsy 13]
Die toekomstige burgers van God se nuwe stelsel word nou in Jehovah se weg van eerlikheid onderrig