Astrologie in die sinagoges?
Biblical Archaeology Review van Mei/Junie 1984 het vertel van die ontdekking van goed bewaarde mosaïekwerk tydens argeologiese uitgrawings by die terrein van ’n antieke sinagoge. Dit is geleë by ’n plek bekend as Hammat Tiberias, aan die oewer van die See van Galilea. Die vlak van die uitgrawing word vaagweg gedateer tussen die tweede en vyfde eeu G.J. Die artikel sê: “Daar bestaan buitengewone verwarring onder geleerdes oor die datering van antieke sinagoges.”
Maar wat maak die mosaïek so buitengewoon? “Dit bestaan uit die Griekse god Helios [die songod] omring deur ’n diereriem. . . Die simbole van die 12 maande word afgebeeld in ’n band om die kring van Helios.” Nadat dit ingegaan het op die vraag of dit die werk van ’n Jood of ’n nie-Jood was, sê die artikel: “Die groter probleem is egter: Wat maak ’n diereriem en ’n Griekse god in ’n sinagoge? . . . Die probleem word vererger deur die feit dat die diereriem en Helios ’n tema uitmaak wat herhaal word in verskeie antieke sinagoges, waarvan Hammat Tiberias slegs die vroegste is.”
Maar was dit die eerste keer dat die Jode van vervloë tye heidense simbole en gode met hulle aanbidding vermeng het? Nee, want die Bybel toon dat astrologie reeds in die tyd van koning Manasse (716-661 v.G.J.) in Joodse aanbidding ingesluip het. Die Bybelverhaal deel ons mee: “Hy het die hoogtes weer gebou wat sy vader Hiskia verniel het, en altare opgerig vir Baäl en ’n heilige boomstam gemaak, soos Agab, die koning van Israel gemaak het, en hom gebuig voor die hele leër van die hemel en hulle gedien.”—2 Konings 21:3.
Later het die ywerige hervormer, koning Josia, hierdie valse gebruike uitgeroei. “Toe gee die koning die hoëpriester Hilkia en die priesters van die tweede rang en die drumpelwagters bevel om uit die tempel van die HERE al die voorwerpe uit te bring wat gemaak is vir Baäl en Asjera en die hele leër van die hemel; en hy het dit buitekant Jerusalem in die velde van Kidron verbrand en die as daarvan na Bet-el laat dra. En hy het die afgodspriesters uitgeroei wat deur die konings van Juda aangestel was om op die hoogtes in die stede van Juda en in die omgewing van Jerusalem rook te laat opgaan, en ook die wat vir Baäl, vir die son en die maan en die sterrebeelde en die hele leër van die hemel offerrook laat opgaan het.”—2 Konings 23:4, 5.
Watter lesse bevat hierdie geskiedkundige gebeure? Eerstens, dat daar geen plek vir astrologie, horoskope en ander spiritistiese gebruike in die aanbidding van die ware God, Jehovah, is nie. Tweedens, dat dit baie maklik is om in hierdie gebruike te verval as ’n mens jou verhouding met Jehovah verwaarloos en op menslike filosofie en sogenaamde wysheid ag slaan. Dit is dan maklik om ‘die skepsel te dien en te vereer in plaas van die Skepper’. Iets wat verhoed dat ’n mens sulke dinge beoefen, is om die Soewereine Heer van die heelal, Jehovah, en sy Seun, Christus Jesus, werklik te ken.—Romeine 1:20-25, 28, NAV; Johannes 17:3.