Waarsêery—nog steeds in die mode
“’N MENS sou dink dat dit in hierdie dag van wydverspreide verligting en ontwikkeling onnodig sou wees om opvattings wat op towerkuns en bygeloof gebaseer is aan die kaak te stel.” Dit was ’n deel van ’n verklaring wat deur 186 vooraanstaande wetenskaplikes, onder meer 18 Nobelpryswenners, onderteken is. Waarvan het hulle gepraat? Astrologie, ’n algemene vorm van waarsêery aan die hand van die sterre, wat volgens hulle “die moderne gemeenskap deurdring”. Glo jý aan party vorme van waarsêery? Of is jy miskien skepties of, soos hierdie vooraanstaande wetenskaplikes, selfs hewig daarteen gekant? Jou beskouing van hierdie saak is belangrik. Kom ons kyk waarom.
Hierdie gebruik is baie algemeen. Volgens die woordvoerder van ’n kongres van waarsêers in Parys “gaan 4 miljoen Franse elke ses maande na spiritistiese mediums”. In die Verenigde State is daar na raming 175 000 deeltydse en 10 000 voltydse astroloë. Hulle is ook talryk in Groot-Brittanje, waar hulle hulle eie skole het. En die Franse tydskrif Ça m’intéresse (Dis interessant) sê: “Ons vind oral, selfs in die mees ontwikkelde gemeenskappe, soortgelyke statistiek. Spiritistiese mediums floreer aan die einde van ons eeu.”
Wie gaan na hulle toe—en waarom?
Party glo dalk dat slegs swak opgevoede mense van die laer klas belangstel in die okkulte “wetenskappe”, waarvan astrologie waarskynlik die algemeenste is. Maar madame Soleil, ’n beroemde Franse astroloog, onthul: “Hulle almal kom na my toe, hetsy regs- of linksgesind, politici van alle oortuigings, en buitelandse staatshoofde. Daar is selfs priesters en kommuniste wat na my toe kom.” In ooreenstemming hiermee het daar ná die dood van die towernaar Frédéric Dieudonné ’n artikel in Le Figaro, ’n ernstige Franse dagblad, verskyn wat gemeld het dat hy “’n baie groot kliënteel van Paryse figure, ministers, hoë amptenare, skrywers en akteurs” gelok het.
Dobbelaars raadpleeg astroloë om uit te vind waarop hulle moet wed. Sakemanne besoek hulle om uit te vind hoe om hulle geld te belê. Astroloë is selfs bereid om vir jou te sê wanneer om op reis te gaan of wat om te kook. En waarsêery het ook ander gebiede binnegedring. Die polisie in verskillende lande maak van sieners gebruik om na misdadigers of vermiste persone te soek. En volgens die Franse weekblad Le Figaro Magazine “is daar 34 heldersiendes in die Pentagon se diens om inligting te voorsien oor wat in geheime militêre basisse in die USSR aangaan”. Dieselfde tydskrif berig dat Amerikaanse kongreslid Charles Rose gesê het dat die Russe ook van spiritistiese magte gebruik maak.
Waarom is astrologie nog steeds so in die mode? Is dit ’n onskuldige vorm van vermaak of tydverdryf? Is dit die beste manier om uit te vind wat die toekoms inhou—of is daar ’n beter manier? Kom ons kyk of ons die antwoorde op hierdie belangrike vrae kan vind.