Jou toekoms—’n Beter manier om uit te vind wat dit inhou

IN 1962 het Indiese astroloë ’n wêreldramp voorspel “as gevolg van ’n seldsame konjunksie van agt planete in die teken van die Steenbok”. Niks het egter daarvan gekom nie. In onlangs er tye, aan die einde van 1980, was die meeste Franse astroloë die mening toegedaan dat die destydse president van Frankryk, Giscard d’Estaing, vir ’n tweede dienstermyn herkies sou word. Maar sy teenstander, François Mitterrand, het die verkiesing gewen. Sulke mislukkings herinner ons daaraan dat astrologie nie ’n onfeilbare manier is om uit te vind wat die toekoms inhou nie.

Is daar dan ’n ander manier? Sal die wetenskaplikes se pogings om die toekoms te voorspel jou byvoorbeeld help? Wel, beskou die voorspelling wat die McGraw Hill-Instituut (Verenigde State) in 1970 gemaak het oor wat teen 1980 sou gebeur: “Geneesmiddels om kanker te oorwin, bemande ruimtevlugte na Mars en Venus, ’n permanente maanbasis, elektriese motors, die algemene gebruik van tuisrekenaars, die moontlikheid om jou baba se geslag te kies en driedimensionale televisie en bioskoop.”

In 1970 het die wetenskaplikes van hierdie instituut gesê: “Hierdie metode [van voorspelling] strewe na ’n betroubare voorspelling deur middel van die eenstemmige mening van ’n groep deskundiges.” Maar hierdie deskundiges se voorspellings was verkeerd op hierdie en ’n aantal ander gebiede, soos die politiek en die ekonomie.

’n Onfeilbare inligtingsbron

Beteken dit dat dit onmoontlik is om betroubare inligting oor die toekoms te verkry, aangesien astroloë en wetenskaplikes nie met sekerheid kan voorsien wat gaan gebeur nie? Voor ons tou opgooi, moet ons kyk wat die Bybel oor die onderwerp sê. Onthou dat Jehovah, die Outeur van die Bybel, beskryf word as die Een “wat van die begin af verkondig die einde, en van die voortyd af wat nog nie gebeur het nie”.—Jesaja 46:10.

God se Woord bevat talle profesieë. Hoe verskil hulle van die voorspellings van astroloë? ’n Werk met die titel The Great Ideas verstrek die volgende antwoord: “Maar sover dit die voorkennis van sterflike mense betref, skyn die Hebreeuse profete uniek te wees. Anders as heidense voorspellers of waarsêers . . . hoef hulle nie kunste of middels in te span om goddelike verborgenhede te deurgrond nie. . . . In die meeste gevalle is hulle profetiese uitinge, in teenstelling met dié van die orakels, skynbaar ondubbelsinnig. Dit lyk ten minste asof dit die bedoeling is om God se plan te openbaar, nie te verberg nie, waar dit kom by sake waarin Hy wil hê dat die mens die weg van die voorsienigheid moet voorsien.”

Baie inligting oor Jesus is byvoorbeeld talle eeue voor sy geboorte in die Bybel opgeteken. Daar is voorspel dat hy in die dorp Betlehem en uit die geslag van Isai, die vader van koning Dawid, gebore sou word (Miga 5:1; Jesaja 11:1, 10). Die Skrif het ook voorspel dat hy aan ’n folterpaal om die lewe gebring sou word, maar dat nie een van sy bene gebreek sou word, soos die gebruik met sulke teregstellings was nie. Hierdie besonderhede is bewaarheid, en dit is net ’n paar voorbeelde van die meer as 120 profesieë wat volgens die skatting van een Bybelgeleerde ten opsigte van Jesus vervul is.—Psalm 22:17, 18; 34:21.

’n Profesie wat vandag vervul word

Die Bybel bevat boonop profesieë wat op ons dag betrekking het. Kom ons kyk na een van die belangrikstes hiervan. Dit beskryf ’n reeks gebeure wat die tydperk onmiddellik voor ’n dramatiese ingryping deur God se Koninkryk in aardse aangeleenthede sou kenmerk. Hierdie gebeure sluit wêreldoorloë, aardbewings, epidemies, hongersnode en toenemende wetteloosheid in. Het die toename van hierdie dinge nie gedurende ons 20ste eeu in die wêreldnuus na vore gekom nie?—Mattheüs 24:3, 7-14; Lukas 21:7, 10, 11; 2 Timotheüs 3:1-5.

Jesus het verduidelik dat die vervulling van hierdie profesieë die koms van sy Koninkryk net so seker sou aandui as wat die botsels aan die bome die koms van die lente aankondig. Hy het selfs gespesifiseer dat hulle in net een geslag vervul moes word. Sedert 1914 het ons die vervulling van al die aspekte van die teken, met inbegrip van bogemelde besonderhede, gesien.a Ons kan derhalwe daarvan seker wees dat die Koninkryk binnekort sal optree.—Lukas 21:29-33.

Nog ’n aspek wat vir hierdie tyd voorspel is, was “benoudheid van nasies in hulle radeloosheid” (Lukas 21:25). Hoekom is mense vandag so behep met astrologie en ander vorme van die okkulte? Die Franse koerant Le Monde Dimanche antwoord: “Wanneer mense voor die krisis te staan kom, sal hulle vir niks stuit om gerusstelling te vind nie. Parapsigologie bied groot vertroosting vir min inspanning, en in hierdie eeu van vreeswekkende wetenskaplike prestasies, soos op die gebied van kernkrag en geensplyting, kom mense in die versoeking om hulle toevlug tot die onbekende en irrasionele te neem om weer sin in die lewe te vind.” Ons moet dus nie verbaas wees oor die wydverspreide belangstelling in okkulte gebruike soos astrologie nie. Dit is een van die simptome van die “benoudheid” wat mense vandag ter vervulling van Jesus se profesie ervaar.

“Hef julle hoofde op”

Wat moet Christene doen wanneer hulle al hierdie dinge sien? Moet hulle swig voor vrees, soos die mense om hulle? Jesus het die volgende raad gegee: “En as hierdie dinge begin gebeur, kyk dan na bo en hef julle hoofde op, omdat julle verlossing naby is.”—Lukas 21:28.

Wil jy meer besonderhede oor jou toekoms weet? Staan dan die tyd af om die Bybel noukeurig te ondersoek en “die geïnspireerde uitinge te beproef om te sien of dit uit God voortspruit” (1 Johannes 4:1, NW). Jy kan dit doen met behulp van Die Wagtoring, wat gereeld Bybelprofesieë bespreek en hulle toepassing in ons dag uiteensit. Namate jy daarvan oortuig raak dat die einde van hierdie veelbewoë wêreld naby is, sal jy ook ‘jou hoof kan ophef’. Jy sal boonop leer wat jy moet doen om die seëninge te geniet van die Messiaanse Koninkryk, wat binnekort tot voordeel van alle regverdige mense in wêreldaangeleenthede sal ingryp.

[Voetnoot]

[Venster op bladsy 5]

“En die teken . . . kom uit”

‘Wat is daarmee verkeerd om na ’n waarsêer te gaan of jou horoskoop in ’n koerant te lees? Is dit nie net onskadelike pret nie?’

Die Bybel beskou die saak nie so lig nie. Trouens, dit waarsku ons teen mediums en waarsêers. In die boek Deuteronomium gee Jehovah die volgende waarskuwing: “As ’n profeet of een wat as dromer optree . . . jou ’n teken of wonder aankondig, en die teken of wonder kom uit wat hy jou beloof het met die woorde: Laat ons agter ander gode aan loop . . . , dan moet jy nie luister na die woorde van dié profeet of na dié man wat as dromer optree nie.”—Deuteronomium 13:1-3.

Let daarop dat die Skrif nie die feit bevraagteken dat party voorspellings van mediums en astroloë kan uitkom nie. Die Bybel waarsku ons eerder dat, indien hierdie voorspellings op tekens in die hemele of ander metodes van waarsê gebaseer is, dit van die demone kom, misleidend is en mense van die ware God kan afkeer.—Kyk Handelinge 16:16-18.

Iemand wat luister na astroloë of na ander wat beweer dat hulle die toekoms voorspel, loop gevaar om ernstige geestelike probleme op te doen en ’n dienskneg van “die bose geeste in die lug” te word (Efesiërs 6:12). God beskou dit dus as ’n ernstige sonde om sulke persone te raadpleeg; diegene wat sulke dinge beoefen, is ’n gruwel in sy oë en hulle sal nie sy Koninkryk beërwe nie.—Openbaring 22:15.

Dit is derhalwe in ons eie belang dat die Bybel ons teen astrologie en ander vorme van waarsêery waarsku.

[Venster op bladsy 6]

DIE BYBEL HET VOORSPEL:

◆ Jesus sou in Betlehem gebore word.—Miga 5:1

◆ Hy sou uit die geslag van Isai, die vader van koning Dawid, gebore word.—Jesaja 11:1, 10

◆ Hy sou aan ’n folterpaal om die lewe gebring word.—Psalm 22:17, 18

◆ Nie een van sy bene sou gebreek word nie.—Psalm 34:21