Koninkryksverkondigers berig
Groter fasiliteite om met Koninkryksvermeerdering tred te hou
DIE toewydingsdag van die onlangs vergrote takfasiliteite van Jehovah se Getuies was ’n baie vreugdevolle dag op die Karibiese eiland Jamaika. Hierdie uitbreiding was nodig as gevolg van Jehovah se seën op die getroue pogings van die broers om die goeie nuus op hierdie pragtige tropiese eiland te verkondig.
’n Sendinghuis is reeds in 1946 in Jamaika geopen. Met die sendelinge aan die spits van die werk het die verkondigers vinnig vermeerder, sodat die gemiddelde getal Getuies wat maandeliks gerapporteer het in net tien jaar van 732 tot 3 216 toegeneem het. Reëlings vir nuwe fasiliteite moes toe getref word om met die vermeerdering tred te hou.
In 1954 is geskikte grond bekom en is ’n stewige, nuwe dubbelverdiepinggebou in ’n stil voorstad van Kingston gebou. Dit is in Mei 1958 voltooi. Die getal verkondigers het daardie jaar tot ’n hoogtepunt van 4 367 gestyg.
Daar is voortgegaan om te ‘plant’ en ‘nat te maak’, en Jehovah “het laat groei”, sodat die getal verkondigers teen 1983 tot meer as 7 000 gestyg het (1 Korinthiërs 3:6). Verdere uitbreiding was gevolglik nodig. Die Takkomitee, met die goedkeuring van die Bestuursliggaam, het besluit om die bestaande fasiliteite te vergroot. Meer as 250 broers van dwarsoor die eiland het kom help. Vakmanne en ongeskoolde werkers het vrywillig hulle dienste aangebied as messelaars, timmermans, elektrisiëns en loodgieters. Hulle ouderdomme het van 10 tot 86 jaar gewissel. Party het die projek finansieel ondersteun, ander het kos vir die werkers bygedra, en nog ander het vrywilligers wat van ver gekom het in hulle huise gehuisves. Die projek, wat die toevoeging van ’n derde verdieping met vyf kamers en ’n ontspanningsgebied, ’n kamer op die tweede verdieping en 37 vierkante meter bergruimte behels het, is in een jaar voltooi en kon deur die 11 lede van die Bethelgesin in gebruik geneem word.
Milton Henschel, ’n lid van die Bestuursliggaam van Jehovah se Getuies in Brooklyn, New York, het op 22 Februarie 1986 die toewydingstoespraak gehou. Die tema van sy toespraak was “Die triomftog” (2 Korinthiërs 2:14, vgl. NW). Altesaam 2 949 het na die toewydingsprogram geluister. Hiervan was 380 in die Koninkryksaal en ander dele van die gebou, en die res was in ander Koninkryksale in die stad en ’n skoolsaal waar hulle deur middel van telefoon- en radioverbinding na die program geluister het.
Die meeste van die wat na die tak se Koninkryksaal genooi is, was broers en susters wat al 30 jaar of langer in die waarheid is. Talle het hulle waardering vir die uitstekende aanbousel uitgespreek. Ons hoop dat nog baie van die “groot menigte” “ander skape” by die triomftog sal aansluit namate die nuwe takfasiliteite gebruik word om na die Koninkryksvermeerdering in Jamaika om te sien.