God—Hoe ons hom kan leer ken

PARTY mense glo dat God oral is, dat hy in die sterre en planete, in die reënboog, in ’n voël se vlerk en in ’n grassprietjie teenwoordig is. Die Bybel leer egter dat God, as ’n Persoon, ’n definitiewe woonplek het. Wyse koning Salomo het in gebed aan God gesê: “Luister tog uit die hemel, uit u woonplek.” En in die Bybelboek Jesaja word God self aangehaal: “Die hemel is my troon.”—1 Konings 8:49, NAV; Jesaja 66:1.

Hoewel God self nie in sy skepping teenwoordig is nie, word sy eienskappe daarin weerspieël. Die apostel Paulus het in Romeine 1:20 gesê: “Sy onsigbare dinge [“hoedanighede”, NW] kan van die skepping van die wêreld af in sy werke verstaan en duidelik gesien word, naamlik sy ewige krag en goddelikheid.” Die psalmis Dawid het eweneens geskryf: “Die hemele vertel die eer van God, en die uitspansel verkondig die werk van sy hande. Die een dag stort vir die ander ’n boodskap uit, en die een nag kondig vir die ander kennis aan.”—Psalm 19:2, 3.

Ja, kyk op ’n sterrenag na buite en peins vir ’n oomblik oor die ontsaglike wysheid en krag wat dit geverg het om ons heelal te skep en te onderhou! (Vergelyk Jesaja 40:26.) Die skepping is inderdaad ’n onuitputlike bron van inligting oor God se persoonlikheid. En die mens kan nooit die ontsaglike getuienis wat dit oor God se eienskappe en hoedanighede gee ten volle verstaan nie. Die boek Job deel ons mee: “Kyk, dit is maar die uitlopers van sy weë, en wat ’n fluisterwoord hoor ons maar van Hom!” (Job 26:14). Daar is ’n ou Sweedse gesegde: ‘Die meester is groter as sy werke.’ As die skepping groots is, moet God gevolglik grootser wees; as die skepping wysheid openbaar, moet God wyser wees; as die skepping krag openbaar, moet God selfs kragtiger wees!

Die Bybel—God se boek

Die skepping verstrek baie inligting oor God. Maar kan ’n studie van die skepping vir jou sê wat God se naam is? Sal dit aandui wat die doel met die skepping is of waarom hy goddeloosheid toelaat? Antwoorde op sulke vrae verg meer as ’n studie van God se stoflike werke. Gelukkig het God toegesien dat sulke inligting oor hom in die Bybel verstrek word.

Dit stel God nooit as ’n abstrakte, ondefinieerbare intelligensie of ’n alomteenwoordige krag voor nie. In Handelinge 3:19 lees ons van “die aangesig van die Here”. Die Bybel sê dat toe sy Seun, Jesus Christus, uit die dood opgewek is, hy in die hemel ingegaan het om voor “die aangesig van God” te verskyn (Hebreërs 9:24). Jesus het God beslis nooit ’n Groot Krag of ’n Oneindige Intellek genoem of enige ander abstrakte uitdrukking gebruik toe hy van hom gepraat of tot hom gebid het nie. Inteendeel, hy het hom dikwels hemelse Vader genoem, ’n benaming wat sy intimiteit met God geopenbaar het.—Mattheüs 5:48; 6:14, 26, 32.

God is derhalwe nie ’n naamlose “Iets” nie, maar eerder ’n Persoon met ’n naam. Psalm 83:18 (NW) sê: “Sodat mense kan weet dat U, wie se naam Jehovah is, alleen die Allerhoogste oor die hele aarde is.” Die Bybel gebruik weliswaar ook titels of beskrywende benamings vir God: “Almagtige”, “Koning van die eeue”, “Heiland”, “herder”, “Oue van dae”, “Opsiener”, “Grootse Onderrigter”, “Grootse Maker”, “Rots” (Rut 1:20; 1 Timotheüs 1:17; Jesaja 43:11; Psalm 23:1; Daniël 7:9, 13, 22; 1 Petrus 2:25; Jesaja 30:20, NW; 54:5, NW; Deuteronomium 32:4). Sulke benamings openbaar egter verdere fasette van God se persoonlikheid, soos sy almag, sy liefdevolle besorgdheid vir sy volk en sy oneindige wysheid.

Omdat God ’n Persoon is, het hy ook simpatieë en antipatieë—selfs gevoelens. Die Bybel vertel ons dat hy sy volk liefhet (1 Konings 10:9), hom oor sy werke verheug (Psalm 104:31), afgodediens haat (Deuteronomium 16:22) en smart ervaar oor goddeloosheid (Genesis 6:6). In 1 Timotheüs 1:11 (NW) word hy selfs “die gelukkige God” genoem.

Intieme kennis van God

Geen menseverstand is weliswaar groot genoeg om die hele openbaring van God se persoonlikheid in te neem nie. “O, diepte van die rykdom en wysheid en kennis van God! Hoe ondeurgrondelik is sy oordele en onnaspeurlik sy weë! Want wie het die gedagte van die Here geken, of wie was sy raadsman gewees?” (Romeine 11:33, 34). Vir iemand wat geloof het, kan God nietemin net so werklik soos enige ander persoon wees. Die Bybel sê dat Noag “met God gewandel” het asof Jehovah aan sy sy was (Genesis 6:9). God was ook vir Moses so werklik dat dit was asof hy ‘die Onsienlike gesien het’ (Hebreërs 11:27). En Abraham is “’n vriend van God” genoem.—Jakobus 2:23.

God het hom natuurlik aan Noag, Abraham en Moses geopenbaar. ‘Wel, as God homself op so ’n wyse aan my sou openbaar’, sê party dalk, ‘sal hy ook vir my werklik wees.’ Maar onthou dat Noag, Abraham en Moses nie die Bybel gehad het nie. Hulle het nie van Jesus Christus geweet of van die tientalle profesieë wat hy vervul het nie. Hulle was derhalwe nie vertroud met enige van die dinge wat Jesus Christus oor God geopenbaar het nie. Onder sulke omstandighede was dit nodig en gepas vir God om sulke regstreekse openbaringe van homself te gee.

Vandag het ons egter die Bybel sowel as die perspektief van eeue se vervulling van Bybelprofesieë. Ons het die Evangelieverslae oor Jesus Christus se lewe, werke en woorde. En Paulus sê: “In hom [Christus] woon die hele volheid van die goddelike hoedanigheid liggaamlik” (Kolossense 2:9, NW). Ja, ons is in ’n posisie om God intiemer te ken as wat in die dae van die aartsvaders moontlik was. Vergoed dit nie oorweldigend vir die feit dat hy hom nie regstreeks aan ons geopenbaar het nie?

Skriflesing bring ons na aan God

Ons lees in Jakobus 4:8: “Nader tot God, en Hy sal tot julle nader.” Deur die Bybel te lees, kan ons na aan God kom. Maar hoe? Eerstens, deur elke dag ’n deel van die Bybel te lees, kan jy van nuwe eienskappe en hoedanighede van sy persoonlikheid te wete kom. Vra jou kort-kort af terwyl jy lees: ‘Wat het ek in hierdie vers of deel van God geleer?’ Daarbenewens kan jy om God se gees bid om jou te help om te verstaan en nader aan God te kom.—Johannes 14:26.

“Ek het dit waardeer dat ek ’n baie beter begrip van Jehovah as persoon gekry het”, het een Christin gesê wat die Bybel van voor tot agter gelees het. Sy was ’n student aan die Wagtoring-Bybelskool Gilead, waar sendelinge opgelei word en dan dwarsoor die wêreld gestuur word. Watter Bybelstudiemetode word in hierdie skool gebruik? Een van die instrukteurs verduidelik: “Ons het begin met ’n projek om die hele Bybel as ’n groep te bestudeer. Ons het elke dag 10 tot 15 bladsye gevat en dan het al . . . die studente navorsing gedoen en tot ons bespreking bygedra. Wanneer ons op ’n moeilike vers afgekom het, het ons gekyk na (1) die verband, (2) die omstandighede toe dit neergeskryf is en (3) die betekenis van die sleutelwoorde in die teks. Ons het voortdurend gevra: ‘Wat leer dit ons omtrent Jehovah en sy eienskappe?’ Ons het gevind dat dit ons altyd iets omtrent hom geleer het.”

Hoewel jy miskien nie die voorreg het om die Bybel formeel in hierdie skool te bestudeer nie, kan jy en jou gesin party van hierdie studiemetodes met welslae toepas. Dit is byvoorbeeld die gewoonte van Jehovah se Getuies om elke week ’n paar hoofstukke van die Bybel ter voorbereiding van hulle gemeentevergaderinge te bestudeer. Volg gerus hierdie rooster vir Skriflesing as ’n gesin. Die Wagtoringgenootskap publiseer ook navorsingshulpe, soos Aid to Bible Understanding en die naslaanuitgawe van die New World Translation, wat jou met moeilike Bybelgedeeltes kan help.a ’n Program van gereelde Skriflesing kan jou waardering vir Jehovah se persoonlikheid grootliks verdiep.

Jy kan ook ’n Bybelgedeelte kies wat vir jou besonder interessant is. As jy byvoorbeeld besluit om die 17 verse van Psalm 86 te bestudeer, sal jy ten minste 15 van God se eienskappe vind: Hy is goed, vergewensgesind, groot van goedertierenheid, bereid om gebede te verhoor, sonder gelyke onder die gode, onoortreflik as ’n skepper, ’n soewereine heerser, ’n grootse wonderdoener, ’n redder uit die dood, barmhartig, genadig, lankmoedig, groot van trou, ’n helper en ’n vertrooster. Watter beter doelwit is daar as om van jou Skepper te probeer leer?

Groot voordele wat uit kennis van God spruit

Om ons einddoel, naamlik die ewige lewe, te bereik, is net een voordeel wat uit kennis van God spruit (Johannes 17:3). Daarbenewens is daar die voordeel om ’n daaglikse metgesel te hê wat vir jou omgee en wat so bestendig soos ’n rots is (Psalm 18:32). Toe koning Dawid gevoel het dat hy deur vyande omring en deur probleme beswaar is, het hy gevind dat God die enigste ware helper was tot wie hy hom kon wend. Hy het derhalwe gesê: “Werp jou sorg op die HERE, en Hy sal jou onderhou; Hy sal nooit die regverdige laat wankel nie.”—Psalm 55:23.

Jy kan ook so ’n verhouding met God geniet, as jy maar net die tyd afstaan om hom te leer ken. Dit is nie te moeilik nie. Doen die moeite om sy Woord te lees. Gaan om met diegene wie se lewe toon dat hulle God ken, soos die persone wat hierdie tydskrif vir jou gebring het. Bid tot Jehovah, want God is nie ’n onpersoonlike krag wat nie na jou geroep sal luister nie. Hy is ’n lewende God en ’n “Hoorder van die gebed”. En “as jy Hom soek, sal Hy Hom deur jou laat vind”.—Psalm 65:3; 1 Kronieke 28:9.

[Voetnoot]

[Prent op bladsy 5]

God het hom aan Noag, Abraham en Moses geopenbaar

[Prent op bladsy 7]

Die Skepping is ’n onuitputlike bron van inligting oor God se persoonlikheid