Jesus se lewe en bediening

Vind baat by Jesus se illustrasies

TOE die dissipels ná Jesus se toespraak vir die skare op die strand na hom toe kom, is hulle nuuskierig na sy nuwe onderrigmetode. O, hulle het hom voorheen illustrasies hoor gebruik, maar nog nooit so baie nie. Hulle wil dus weet: “Waarom spreek U tot hulle deur gelykenisse?”

Een rede waarom hy dit doen, is om die profeet se woorde te vervul: “Ek sal my mond open deur gelykenisse; Ek sal uitspreek dinge wat verborge was van die grondlegging van die wêreld af.” Maar dit is nie al nie. Sy gebruik van illustrasies help om te toon wat mense se gesindheid is.

Die meeste mense stel eintlik net in Jesus belang as ’n meesterlike verteller en wonderdoener, nie as iemand wat as Here gedien en onselfsugtig gevolg moet word nie. Hulle wil nie hê dat hulle beskouing van dinge of hulle lewenswyse versteur moet word nie. Hulle wil nie hê dat die boodskap hulle in so ’n mate moet beïnvloed nie, Jesus sê derhalwe:

“Daarom spreek Ek tot hulle deur gelykenisse, omdat hulle, terwyl hulle sien, nie sien nie, en terwyl hulle hoor, nie hoor of verstaan nie. En aan hulle word die profesie van Jesaja vervul wat sê: . . . Want die hart van hierdie volk het stomp geword.”

“Maar”, gaan Jesus voort, “julle oë is gelukkig, omdat hulle sien; en julle ore, omdat hulle hoor. Want, voorwaar Ek sê vir julle, baie profete en regverdiges het begeer om te sien wat julle sien, en het dit nie gesien nie, en om te hoor wat julle hoor, en het dit nie gehoor nie.”

Ja, die 12 apostels en die saam met hulle het ontvanklike harte. Daarom sê Jesus: “Dit [is] aan julle gegee . . . om die verborgenhede van die koninkryk van die hemele te ken, maar aan hulle is dit nie gegee nie.” Omdat hulle ’n begeerte het om te verstaan, verduidelik Jesus die illustrasie van die saaier aan sy dissipels.

“Die saad is die woord van God”, sê Jesus, en die grond is die hart. In verband met die saad wat op die harde grond langs die pad gesaai is, verduidelik hy: “Daarna kom die duiwel en neem die woord uit hul hart weg, sodat hulle nie sou glo en gered word nie.”

Saad wat op rotsagtige grond gesaai word, slaan andersyds op die harte van mense wat die woord met vreugde aanvaar. Maar omdat die woord nie in sulke harte diep kan wortelskiet nie, struikel hierdie mense wanneer ’n tyd van toetsing en vervolging aanbreek.

Wat die saad betref wat tussen die dorings val, sê Jesus voorts dat dit mense is wat die woord gehoor het. Hulle word egter meegesleep deur die sorge en rykdom en genietinge van die lewe en word derhalwe heeltemal verstrik en bring niks tot volmaaktheid nie.

Ten slotte, die saad wat op goeie grond gesaai is, sê Jesus, is diegene wat die woord, nadat hulle dit met ’n edele en goeie hart gehoor het, behou en met volharding vrug dra.

Hoe geseënd is hierdie dissipels tog wat na Jesus gekom het om ’n verduideliking van sy leer te kry! Jesus is van voorneme dat sy illustrasies verstaan moet word, om die waarheid met ander te deel. “Die lamp kom tog nie om onder die maatemmer of onder die bed gesit te word nie”, sê hy. Nee, “dit [is] om op die staander gesit te word”. Jesus voeg derhalwe by: “Pas dan op hoe julle hoor.” Mattheüs 13:10-23, 34-36; Markus 4:10-25, 33, 34; Lukas 8:9-18; Psalm 78:2; Jesaja 6:9, 10.

◆ Waarom het Jesus illustrasies gebruik?

◆ Hoe het Jesus se dissipels getoon dat hulle anders as die skare is?

◆ Hoe verduidelik Jesus die illustrasie van die saaier?