’n Tyd van toetsing en sifting

“En skielik sal daar na Sy tempel kom die ware Heer, na wie julle mense soek, en die boodskapper van die verbond . . . En hy moet sit as ’n louteraar en reiniger.”—MALEAGI 3:1, 3, NW.

1, 2. (a) Watter toestande het in die vyfde eeu v.G.J. onder God se volk bestaan? (b) Waarom moet Maleagi se profesie vir ons van belang wees?

“WAAR is die God van geregtigheid?” Diegene wat daardie uitdagende vraag in die vyfde eeu v.G.J. gestel het, het ook beweer: “Dit is tevergeefs om God te dien.” Godsdienstige en sedelike verval onder God se volk, die Jode, het skeptisisme oor goddelike geregtigheid laat ontstaan. Maar die oë van die ware God, wat nie slaap nie, was op hulle. En hy het die Hebreeuse profeet Maleagi opdrag gegee om hulle in kennis te stel dat ’n reinigingswerk, ’n tyd van toetsing en sifting, voorgelê het. Hulle sou weet waar “die God van geregtigheid” was wanneer hy skielik gekom het om te oordeel!—Maleagi 2:17, NW; 3:1, 14, 15.

² Maleagi se profesie moet vir ons nie net van geskiedkundige belang wees nie. Waarom? Omdat dit klaarblyklik in ons dag vervul word (Romeine 15:4). Ja, Jehovah se hedendaagse volk leef in ’n tyd van toetsing en sifting! Hoe so? ’n Nadere ondersoek van Maleagi se profesie sal ons help om daardie vraag te beantwoord.

3. Wat het die antieke louteringsproses behels?

³ Maar, eers, waarom laat Jehovah toe dat sy volk getoets en gesif word? As die Een ‘wat harte toets’, het hy hom voorgeneem om sy georganiseerde volk te louter (Spreuke 17:3; Psalm 66:10). In Bybeltye het loutering geskied deur ’n metaal tot die smeltpunt te verhit en dan die onsuiwerhede, of skuim, af te skep. Ons lees: “Terwyl hy staan of sit, hou die louteraar die proses in alle erns dop totdat . . . die [vloeibare] metaal soos ’n blink gepoleerde spieël lyk wat alles daaromheen weerspieël; selfs die louteraar kan, wanneer hy op die gesmelte metaal afkyk, homself asof in ’n spieël sien, en sodoende kan hy die suiwerheid van die metaal baie goed beoordeel. As hy tevrede is, word die vuur kleiner gemaak en word die metaal uit die smeltoond gehaal; maar as daar gemeen word dat dit nie suiwer is nie, word nog lood bygevoeg en word die proses herhaal” (Cyclopedia of Biblical, Theological, and Ecclesiastical Literature, deur J. McClintock en J. Strong). Sulke gelouterde goud of silwer was kosbaarder.—Vergelyk Openbaring 3:18.

4. Waarom laat Jehovah toe dat sy volk getoets en gesif word?

⁴ Jehovah laat toetsing en sifting toe om sy volk te louter, of te reinig, en dit help hulle om sy beeld akkurater te weerspieël (Efesiërs 5:1). Tydens die louteringsproses skep hy die skuim af deur onrein leerstellings en gebruike uit die weg te ruim (Jesaja 1:25). Hy sif ook diegene onder sy volk uit wat weier om hulle aan die louteringsproses te onderwerp en “struikelblokke [is] en die wat die ongeregtigheid doen”. Dit baan die weg vir “die kinders van die koninkryk”, die geestelike Israeliete, om helder te skyn sodat ’n aardse klas ook ingesamel kan word en hulle as ’n organisasie kan aanhang om behoue te bly.—Mattheüs 13:38, 41, 43; Filippense 2:15.

Maleagi se opdrag

5, 6. (a) Wie in die besonder was verantwoordelik vir die lae geestelike vlak van die Israeliete in Maleagi se dag? Waarom? (b) Watter slegte uitwerking het dit op die Israeliete oor die algemeen gehad?

⁵ Maleagi het na 443 v.G.J. geprofeteer, feitlik ’n eeu nadat die Joodse ballinge uit Babilon teruggekeer het. Meer as 70 jaar het verstryk sedert die inwyding van die tempel wat deur Serubbabel herbou is. Die geestelike toestand van die Israeliete het tot ’n lae vlak gedaal. Wie in die besonder was daarvoor verantwoordelik? Die priesters! Hoe so? Hulle het Jehovah se naam “verag” deur siek en lam offers te aanvaar (Maleagi 1:6-8). Hulle het “baie laat struikel in die wet” deur na te laat om die volk te onderrig en deur partydig te handel by die regspraak.—Maleagi 2:6-9, NW; Jakobus 3:1.

⁶ Die Israeliete oor die algemeen het gevolglik begin om die waarde van diens aan God te bevraagteken, en hulle het selfs geweier om die tiende te betaal wat deur die wet vereis is (Maleagi 3:6-10, 14, 15; Levitikus 27:30). Hulle toegewydheid aan God se Wet het dermate afgeneem dat sommige “ontrou geword het” aan hulle vroue, klaarblyklik deur van hulle te skei om met heidense vroue te trou. Gruwels soos towery, egbreuk, leuens en bedrog was nou glad algemeen onder God se volk!—Maleagi 2:10-16; 3:5.

7, 8. Wat was die profeet Maleagi se opdrag?

⁷ Maleagi se opdrag was duidelik. Hy het die nalatige priesters onomwonde aan die kaak gestel en hy het die volk bewus gemaak van hulle ware geestelike toestand. Hy het egter aangetoon dat die God van barmhartige liefde bereid was om te vergewe. “Keer terug na My, en Ek wil na julle terugkeer”, het Jehovah gepleit (Maleagi 3:7). Maleagi het voorspel dat “die ware Heer” na sy tempel kom om te oordeel. Die priesters moes gereinig word om mense te word wat “aan die HERE in geregtigheid ’n offer sal bring” (Maleagi 3:1-3). Die volk is daarbenewens in kennis gestel dat “die ware Heer” “’n haastige getuie” sou word teen diegene wat in hulle gruwels volhard het.—Maleagi 3:5.

⁸ Maleagi het sy opdrag getrou uitgevoer; hy het die waarskuwing gerig. Wat hy gesê het, was vir die priesters en die mense van sy dag nuttig. Maar etlike eeue het verstryk voordat sommige fasette van sy profesie in ’n eerste vervulling bewaarheid is.

Die eerste-eeuse vervulling

9. Wie was die “boodskapper” ter vervulling van Maleagi se profesie? Waarom sê jy so?

⁹ Vanaf sy verhewe troon in die hemel sê die Groot Regter: “Kyk, Ek stuur my boodskapper wat die weg voor My uit sal baan” (Maleagi 3:1a). Wie was daardie “boodskapper”? Die Bybelskrywer Markus kombineer die profesieë van Maleagi 3:1 en Jesaja 40:3 en pas albei op Johannes die Doper toe (Markus 1:1-4). Ook Jesus Christus het Johannes later as daardie “boodskapper” geïdentifiseer (Mattheüs 11:10-14). So het dit dan gekom dat Johannes die Doper in die noordelike lente van 29 G.J. met sy werk as ’n “boodskapper”, ’n voorloper, begin het. Hy moes die weg baan vir die koms van Jehovah om te oordeel deur die Israeliete voor te berei op die koms van God se Vernaamste Verteenwoordiger, Jesus Christus.

10. Hoe het Johannes die Doper gehelp “om vir die Here ’n toegeruste volk te berei? (Lukas 1:17).

¹⁰ Die feit dat Johannes vooruit gestuur is, was ’n blyk van God se goedertierenheid teenoor die Jode. Daar hulle in ’n verbondsverhouding met Jehovah was, moes hulle berou hê oor hulle sondes teen die Wet. Johannes het godsdienssake reg gestel en godsdienshuigelary blootgelê (Mattheüs 3:1-3, 7-12). Hy het regskape Jode wakker gemaak om die Christus te verwag sodat hulle Hom kon volg.—Johannes 1:35-37.

11. Hoe kan ons “die ware Heer” wat skielik na die tempel sou kom, identifiseer?

¹¹ Maleagi se profesie lui voorts: “‘En skielik sal daar na Sy tempel kom die ware Heer, na wie julle mense soek, en die boodskapper van die verbond, in wie julle behae het. Kyk! Hy sal stellig kom’, het Jehovah van die leërskare gesê” (Maleagi 3:1b, NW). Wie was “die ware Heer” wat “skielik”, of onverwags, na sy tempel sou kom? Die Hebreeuse uitdrukking wat gebruik is, is ha·’A·donʹ. Die gebruik van die bepaalde lidwoord ha (“die”) voor die titel ’A·donʹ (“Heer; Meester”) beperk die toepassing van hierdie titel uitsluitlik tot Jehovah God. Trouens, dit was na “Sy tempel” dat Jehovah sou kom.—Habakuk 2:20; Psalm 11:4.

12. Wie is “die boodskapper van die verbond”, en van watter “verbond” is hy “die boodskapper”?

¹² Nadat Maleagi een boodskapper gemeld het, het hy aangedui dat “die ware Heer” na “Sy tempel” sou kom vergesel van ’n ander, ’n verskillende boodskapper, “die boodskapper van die verbond”. Wie sou dit wees? Wel, in die lig van hoe sake verloop het, is dit redelik om die gevolgtrekking te maak dat “die boodskapper van die verbond” Jesus Christus is, wat Johannes die Doper aan sy dissipels voorgestel het as “die Lam van God” (Johannes 1:29-34). Van watter “verbond” is die Messias “die boodskapper”? Die getuienis van Lukas 1:69-75 en Handelinge 3:12, 19-26 dui daarop dat dit die Abrahamitiese verbond is, waarkragtens die Jode die eerstes was wat die geleentheid gebied is om Koninkrykserfgename te word.

13. In watter sin sou “die ware Heer” Jehovah na die tempel kom?

¹³ “Die ware Heer” Jehovah het nie persoonlik na die letterlike tempel in Jerusalem gekom nie (1 Konings 8:27). Hy het verteenwoordigend gekom, dit wil sê, deur middel van sy “boodskapper van die verbond”, Jesus Christus, wat in Jehovah se naam en met die steun van God se heilige gees gekom het.a

14. (a) Waarom was Jesus se reiniging van die tempel in 30 G.J. klaarblyklik net ’n voorsmaak van wat voorgelê het? (b) Hoe en wanneer is die tempel ter vervulling van Maleagi 3:1 gereinig?

¹⁴ In die noordelike lente van 30 G.J. het Jesus na Jehovah se tempel in Jerusalem gekom en diegene wat dit” ’n handelshuis” gemaak het, uitgedryf (Johannes 2:13-16). Maar dit was slegs ’n voorsmaak van wat later ter vervulling van Maleagi se profesie sou gebeur. Na hierdie voorval het Johannes, as “die boodskapper”, voortgegaan om te doop en sy dissipels na Jesus te rig (Johannes 3:23-30). Op 9 Nisan 33 G.J. het Jesus egter seëvierend in Jerusalem ingery en homself as Koning aangebied (Mattheüs 21:1-9; Sagaria 9:9). Johannes se werk was toe reeds voltooi aangesien hy ongeveer ’n jaar tevore deur Herodes onthoof is. Toe Jesus dus op 10 Nisan na die tempel gekom het, het hy amptelik gekom as “die boodskapper van die verbond”, die regterlike verteenwoordiger van “die ware Heer” Jehovah, ter vervulling van Maleagi 3:1. Jesus het die tempel gereinig deur diegene wat daar handel gedryf het uit te jaag en die tafels van die geldwisselaars om te gooi. Hy het herhaaldelik gesê: “Is daar nie geskrywe [in Jesaja 56:7]: My huis moet ’n huis van gebed genoem word vir al die nasies nie? Maar julle het dit ’n rowerspelonk gemaak.”—Markus 11:15-18.

15. Hoe het die Joodse godsdiensleiers as ’n klas op die louteringsproses gereageer, maar wat was waar van sommige priesters?

¹⁵ Israel se godsdiensleiers is sodoende in kennis gestel dat hulle uur aangebreek het. As ’n klas het hulle geweier om Jehovah se “boodskapper van die verbond” te aanvaar. Hulle het nie ‘die dag van sy koms verdra nie’, want hulle het geweier om hulle nederig aan die louteringsproses van die Groot Louteraar te onderwerp (Maleagi 3:2, 3). Hulle is tereg uitgesif as persone wat vernietiging verdien. Maar daar was klaarblyklik sommige “seuns van Levi” met goeie harte, want nie lank na Jesus se dood nie het” ’n groot menigte van [Levitiese] priesters . . . gehoorsaam geword aan die geloof”.—Handelinge 6:7.

16. Hoe en wanneer het ’n “groot en vreesinboesemende dag van Jehovah” daardie Joodse nasie oorval?

¹⁶ Op 11 Nisan, die dag nadat Jesus die tempel gereinig het, het hy die godsdienshuigelaars kragtig aan die kaak gestel en die vernietiging van die tempel en die Joodse stelsel voorspel (Mattheüs, hoofstukke 23, 24). “Die God van geregtigheid” het inderdaad 37 jaar later, in 70 G.J., as “’n haastige getuie” na daardie Joodse nasie gekom toe ’n “groot en vreesinboesemende dag van Jehovah” hulle oorval het (Maleagi 2:17, NW; 3:5; 4:5, 6, NW). As ’n boomagtige organisasie wat in gebreke gebly het om goeie vrugte te dra, is Israel toe kollektief “uitgekap en in die vuur gegooi” toe hulle deur die Romeine vernietig is (Lukas 3:3-14). Al hierdie dinge het hulle oorgekom ‘omdat hulle die tyd toe hulle geïnspekteer is, nie onderskei het nie’.—Lukas 19:44, NW.

Die hedendaagse vervulling

17. Wat dui daarop dat Maleagi se profesie ’n verdere vervulling in ons dag sou hê?

¹⁷ Maar wat van ’n tweede, of hedendaagse, vervulling van Maleagi se profesie? In die eerste eeu het die eerste vervulling gevolg op Jesus se salwing met die heilige gees om die aangewese Koning van God se Koninkryk te word. Daar moet logies ’n verdere vervulling van die profesie wees nadat Jesus Christus in 1914 in die hemele op die troon geplaas is. Die profesie self het getoon dat dit vervul sou word “voor die koms van die groot en vreesinboesemende dag van Jehovah” (Maleagi 4:5, NW). Hoewel ’n “dag van Jehovah” in 70 G.J. oor die Joodse stelsel gekom het, wys die Skrif op ’n toekomstige “dag van Jehovah” gedurende hierdie tyd van Christus se “teenwoordigheid”.—Mattheüs 24:3, NW; 2 Thessalonicense 2:1, 2, NW; 2 Petrus 3:10-13.

18. Hoe is God se volk in 1922 daarvan bewus gemaak dat hulle in ’n oordeelstyd is?

¹⁸ Reeds in 1922 is Jehovah se volk bewus gemaak van die feit dat hulle hulle in ’n oordeelstyd bevind ter vervulling van Maleagi se profesie. The Watchtower van 1 September het gesê: “Maar Maleagi se profesie reik verder as die gedeeltelike vervulling tydens ons Heer se eerste koms, en reg tot by die tyd wanneer die Messias in heerlikheid en krag sou kom en wanneer hy onder sy volk sou oordeel . . . Die oordeelstyd het nou weer eens aangebreek; sy verklaarde volk word weer beproef soos deur vuur, en die trouhartige seuns van Levi word bymekaargemaak vir diens.”

19. Hoe is ’n “boodskapper” in die hedendaagse vervulling vooruit gestuur?

¹⁹ Soos aangetoon in Maleagi 3:1, is ’n spesiale boodskapper vooruit gestuur. Dit was nie ’n enkele individu nie, maar ’n klas wat soos Johannes die Doper dien. Sedert 1881 gebruik hierdie klas dit wat nou die Wagtoring- Bybel- en Traktaatgenootskap is in ’n merkwaardige Bybelopvoedkundige werk. Dit het gelei tot die herstel van talle basiese waarhede in die harte van Bybelliefhebbers. Sommige van hierdie opklarings is: Die mens het nie ’n onsterflike siel nie, maar hy is ’n siel; daar is geen brandende hel nie; Jesus Christus sou nie in die vlees terugkeer nie; Jehovah is een God, nie ’n Drie-eenheid nie. Dit was inderdaad ’n werk wat ‘die weg voor Jehovah uit gebaan het’ vir sy oordeelswerk.

20. (a) Wanneer het Jehovah klaarblyklik na die tempel gekom? (b) Watter vrae laat dit ontstaan?

²⁰ Skielik het Jehovah, as “die ware Heer”, na sy geestelike tempel gekom. Wanneer? Die voorbeeld is in die eerste-eeuse vervulling gestel. Destyds het Jesus gekom en die tempel gereinig drie en ’n half jaar nadat hy by die Jordaanrivier as Koning gesalf is. Aangesien Jesus in die noordelike herfs van 1914 as Koning op die troon geplaas is, lyk dit, ooreenkomstig daardie voorbeeld, redelik om te verwag dat hy drie en ’n half jaar later “die ware Heer” Jehovah na die geestelike tempel sou vergesel. Wat sou volgens die profesie van toe af gebeur? Daar sou getoets en gesif word. Maar dit laat enkele belangrike vrae ontstaan: Watter blyke is daar van hierdie reiniging? Duur dit voort tot die hede? En hoe raak hierdie dinge jou persoonlik? Kom ons kyk.

[Voetnote]

Kan jy onthou?

◻ Waarom laat Jehovah toe dat sy volk getoets en gesif word?

◻ Hoe het Johannes die Doper gedien as ’n “boodskapper”, ’n voorloper?

◻ Hoe het Jesus in die eerste eeu as “die boodskapper van die verbond” na die tempel gekom?

◻ Hoe weet ons dat Maleagi se profesie ’n hedendaagse vervulling sou hê?

[Prent op bladsy 13]

As ’n boodskapper het Johannes die Doper die volk voorberei vir die komende “boodskapper van die verbond”