Die soeke na ware vriende
’N JONG man is ernstig beseer in ’n motorfietsongeluk. Hy was weke lank in ’n koma en het toe geleidelik begin herstel. “Ek sou baie vinniger herstel het as ek net soveel goeie vriende as kennisse gehad het”, het hy gesê. ‘Baie van die vriende wat ek voor die ongeluk gehad het, het my in die steek gelaat. Maar goeie vriende kan baie genesend wees.’
Hierdie situasie is kenmerkend van die hedendaagse, onvriendelike wêreld. Sogenaamde vriende kan volop wees wanneer alles goed gaan. Maar sodra teëspoed toeslaan, verdwyn hulle. Dit is in die reël moeilik om ware vriende te vind.
Maar net een of twee ware, hartlike vriende maak ’n ontsaglike verskil in die lewe. Deskundiges op die gebied sê: “Die hunkering na hegter persoonlike bande is ’n belangrike tema van ons tye.” En soos ’n ou spreekwoord dit stel: ‘In die nood leer ’n mens sy vriende ken.’
Daar was ’n tyd toe mense meer besorg was oor ander en bereid was om hulle vriende of bure te help. Maar die kritieke tydperk van die Eerste Wêreldoorlog het ’n algemene agteruitgang in menseverhoudinge teweeggebring. ’n Ondankbare, gevoellose, egoïstiese gesindheid is nou die reël.
Hierdie treurige toedrag van sake is 19 eeue gelede met hierdie woorde voorspel: “In die laaste dae van die wêreld sal daar moeilike tye wees. Mense sal net aan hulleself dink. Geldmaak sal vir hulle alles wees. Hulle sal grootpraat en hoogmoedig wees. Hulle sal beledigend wees teenoor ander mense en na hulle ouers sal hulle nie luister nie. Hulle sal ondankbaar wees en geen eerbied vir God hê nie. Daar sal by hulle geen liefde wees nie maar hardkoppigheid, kwaadpratery en ongedissiplineerdheid. Hulle sal wreed wees en enigiets goeds veroordeel. Hulle sal selfs hulle vriende verraai.”—2 Timotheüs 3:1-4, Die Lewende Bybel.
Wat ’n somber, dog juiste beskrywing van die hedendaagse wêreld! En dit gee ons skynbaar weinig hoop om ware vriende te vind. Dit is nietemin moontlik om selfs nou ware vriende te maak. En hoe kosbaar is hulle tog! Jy kan jou altyd tot hulle wend om hulp, raad, troos en hartlike kameraadskap. Maar dit is noodsaaklik om tussen ware en valse vriende te onderskei.
Nie alle “vriende” is ware vriende nie
Die voormelde jong man wat in die ongeluk beseer is, was ’n lid van ’n voetbalspan en het baie “vriende” gehad. Lede van klubs en klein gemeenskappe kweek dikwels aangename verhoudinge. Maar sulke “vriendskappe” is miskien nie baie standhoudend nie. En om talle “vriende” te hê en hulle dan almal te verloor, is baie ontmoedigend, soos die jong man ontdek het. Om kennisse te verkry is maklik; om ware vriende te maak is nie.
Ryk mense of hooggeplaastes kan maklik baie “vriende” maak. Soos die Bybel sê: “Die vriende van die ryke is talryk.” “Baie soek die guns van die edele, en die man van geskenke het ’n hoop vriende” (Spreuke 14:20; 19:6). Maar hoeveel van hulle het bedekte beweegredes? En as die persone met baie vriende hulle rykdom of status verloor, kan hulle spoedig heeltemal vriendeloos wees.
Mense wat fisies aantreklik is, het dikwels ook baie “vriende”—van wie heelparty deur fisiese faktore beïnvloed word. Maar sulke “vriendskappe” kan baie skadelik wees en kan te midde van teëspoed soos mis voor die son verdwyn. Daar bestaan dus ’n groot behoefte aan . . .
Selektiwiteit
Ja, dit is verstandig om selektief te wees wat vriende betref. Valse vriende is dikwels groot vleiers wat met een of ander bybedoeling witvoetjie soek. “’n Man wat sy naaste vlei, sprei ’n net uit voor sy voetstappe.”—Spreuke 29:5.
Dink gevolglik versigtig na oor jou huidige vriendekring. Beïnvloed hulle jou ten goede of ten kwade? Is hulle egosentries, eiesinnig of verwaand? Tree hulle roekeloos op en geniet hulle dit om waaghalsig te wees? Wat is hulle houding teenoor diegene van die ander geslag? Is hulle hoflik en eerbiedig of vrypostig, dalk inderdaad onsedelik? Is jou vaste metgeselle oneerlike, onbetroubare mense? Is hulle dwelmslawe? Strawwe drinkers? Dan verkeer jy in gevaar. Jy is moontlik eerlik, skoon en beskeie, maar onthou: “Slegte geselskap bederf goeie sedes.”—1 Korinthiërs 15:33, NAV.
Die groot gevaar van slegte geselskap is dat jy hulle sal nadoen. Hulle gewoontes en gesindhede sal jou stadig, moontlik onmerkbaar, beïnvloed. Soos die Bybel sê: “Gaan met die wyse om, dan word jy wys; maar hy wat met dwase verkeer, versleg.”—Spreuke 13:20.
Dit is maklik om ’n fout te begaan wanneer jy vriende maak. Maar moenie moed verloor nie. Daar is steeds miljoene gawe, vriendelike mense in die wêreld. Hoe kan jy dus sulke ware vriende vind?
[Prent op bladsy 4]
Jou metgeselle kan ’n sterk invloed op jou hê