Bly jy in elke opsig rein?
“Vertrek, vertrek, gaan weg daarvandaan, raak nie aan wat onrein is nie; gaan uit hulle midde uit, reinig julle, draers van die heilige voorwerpe van die HERE.”—JESAJA 52:11.
1. (a) Hoe het ’n koninklike bevel dit moontlik gemaak dat die voorwerpe van Jehovah na Jerusalem teruggeneem kon word? (b) Hoe is sommige van daardie voorwerpe besoedel?
METEENS was hulle vry—na 70 jaar van slawerny! ’n Koninklike bevel van omstreeks 538 v.G.J. het dit vir die Joodse nasie moontlik gemaak om terug te keer ‘en die huis van Jehovah die God van Israel te herbou’ (Esra 1:2, 3, NW). Toe gebeur nog iets verbasends: “Koning Kores [van Persië] het die voorwerpe van die huis van die HERE uitgelewer wat Nebukadnesar uit Jerusalem weggevoer . . . het” (Esra 1:7, 8). Daaronder was die heilige voorwerpe wat Belsasar en sy maghebbers op die nag van Babilon se val besoedel het deur dit onbeskaamd ter ere van valse gode te gebruik! (Daniël 5:3, 4). Nou kon die gewese ballinge hierdie voorwerpe na Jerusalem terugneem en dit tot lof van Jehovah gebruik!
2. (a) Watter profesie van Jesaja sou die terugkerende Jode onthou? Op wie sou dit van toepassing wees? (b) Waarom is hulle vermaan om niks onreins aan te raak nie?
2 Terwyl hulle opgewonde vir die terugtog voorberei het, het die terugkerende Jode ongetwyfeld die woorde van die profeet Jesaja onthou: “Vertrek, vertrek, gaan weg daarvandaan, raak nie aan wat onrein is nie; gaan uit hulle midde uit, reinig julle, draers van die heilige voorwerpe van die HERE” (Jesaja 52:11). Dit was natuurlik die Leviete se taak om die voorwerpe te vervoer (Numeri 1:50, 51; 4:15). Jesaja het egter voorspel dat almal wat terugkeer eredraers van die voorwerpe sou wees. Almal was dus verplig om rein te wees. Hulle moes nie die Babiloniërs hulle kosbaarhede ontneem soos die Israeliete gedoen het toe hulle uit Egipte getrek het nie. (Vergelyk Exodus 12:34-38.) Hulle moes nie om enige materialistiese of selfsugtige rede teruggekeer het nie. Die blote aanraking van een van Babilon se “drekgode” sou besoedelend weesa (Jeremia 50:1, 2). Slegs deur in elke opsig rein te wees kon die Jode met “die heilige weg” langs na Jerusalem terugkeer.—Jesaja 35:8, 9.
3. Wie dra vandag Jehovah se “voorwerpe”? Waarom is dit vir hulle so ’n uitdaging om rein te bly?
3 Jehovah se Getuies moet vandag eweneens rein wees as draers van Jehovah se “voorwerpe”. Die apostel Paulus het Jesaja se woorde aangehaal en op Christene van sy dag toegepas deur te sê: “Laat ons ons van alle besoedeling van die vlees en die gees reinig, en laat ons die heiligmaking in die vrees van God volbring” (2 Korinthiërs 6:17–7:1). Buiten dat ons in ’n onrein wêreld lewe, worstel ons ook nog met ons oorgeërfde sondige neigings (Genesis 8:21). Jeremia 17:9 herinner ons: “Bedrieglik is die hart bo alle dinge, ja, verdorwe is dit; wie kan dit ken?” Sommige bedrieg hulleself en ander deur te dink dat hulle lewe rein en aanneemlik is voor God, terwyl dit in werklikheid nie die geval is nie. Hulle maak hulle aan ’n vorm van geveinsdheid skuldig. Elkeen van ons moet hom dus afvra: ‘Doen ek my bes om in elke opsig rein te bly voor Jehovah?’ Laat ons nou vier aspekte van reinheid ondersoek om ons in hierdie verband te help.
Fisiese reinheid: ’n prioriteit
4. (a) Waarom is fisiese reinheid ’n prioriteit onder Jehovah se volk? (b) Waarom is dit soms moeilik om ’n hoë standaard van sindelikheid te handhaaf?
4 Fisiese reinheid is vandag ’n prioriteit onder Jehovah se volk net soos dit in vergange tye was (Exodus 30:17-21; 40:30-32). Sou ons immers eerbied toon vir die ‘voorwerpe van Jehovah’ as ons hare, hande, gesig, tande of naels vuil was of as ons slegte liggaamsreuke afgegee het? Tog is dit maklik om deur die wêreld se lae standaarde beïnvloed te word.—Romeine 12:2.
5. (a) Waarom is dit so belangrik dat ons ’n hoë standaard van sindelikheid handhaaf? Meld plaaslike voorbeelde van hoe hierdie raad toegepas kan word. (b) Hoe kan ouere manne help?
5 Hoe kan ons opvallend anders as die wêreld wees as ons die wêreld se lae standaarde aanvaar? Sou ’n vuil huis of ’n slordige plek van aanbidding nie daartoe aanleiding gee dat ‘die woord van God belaster word’ nie? (Titus 2:5). Maar wanneer ons behoorlike liggaamshigiëne handhaaf, die rommel by byeenkomsplekke optel, help met die instandhouding van die Koninkryksaal, en ons huise—selfs die nederigste woonplek—netjies en skoon hou, verheerlik ons ons God! (Vergelyk 1 Petrus 2:12.) Ouere manne, stel ’n goeie voorbeeld ten opsigte van sindelikheid. Moenie skroom om gepaste raad te gee waar dit nodig is nie.—Handelinge 20:20.
6. Wat moet ons kleredragstandaard vir vergaderinge en velddiens wees?
6 Wat van die klere wat ons dra wanneer ons vir aanbidding vergader en wanneer ons velddiens doen? Moet dit nie ‘beskeie en behoorlik’ wees nie? (1 Timotheüs 2:9; Hebreërs 10:23-25). Moenie redeneer dat ons net goed gekleed hoef te wees as ons ’n deel op die program het nie. Slenterdrag is onbeskeie en onvanpas vir aanbidding. ’n Gehawende boeketas en ’n Bybel met eselsore of wat vuil is, kan ook afbreuk doen aan die Koninkryksboodskap.
Vermy verstandelike besmetting
7. Wat is die sleutel tot verstandelike reinheid, volgens Filippense 4:8?
7 In Filippense 4:8 het Paulus vermaan: “Verder, broeders, alles wat waar is, alles wat eerbaar is, alles wat regverdig is, alles wat rein is, alles wat lieflik is, alles wat loflik is—watter deug en watter lof daar ook mag wees, bedink dit.” Ons word nietemin uit alle oorde bestorm met versoekings om in “die dieptes van die Satan” in te kyk.—Openbaring 2:24.
8. Hoe kan die gevare van verskillende soorte vermaak toegelig word? Meld plaaslike voorbeelde.
8 Die geredelike beskikbaarheid van pornografiese en hoogs gewelddadige materiaal het byvoorbeeld gelei tot ernstige probleme vir sommige gebruikers van videokassetopnemers. In Europa het ’n getroude broer na onrein bande gekyk nadat sy vrou gaan slaap het. Die saad van sonde is deeglik geplant en die uiteinde was owerspel. (Vergelyk Jakobus 1:14, 15.) In een Afrikaland het ’n groep jong Getuies onrein bande by skoolmaats geleen en daarna gekyk terwyl hulle ouers weg was. ’n Ouere man in Nigerië het egter opgemerk: ‘Daar skuil dikwels groter gevaar in gewone TV-programme wat soortgelyke geweld, misdaad en oorlog, slaapkamertonele en minagting vir huwelikstrou uitbeeld.’ Goedkoop prentekoerante, pornografiese tydskrifte, prikkelromans, rolprente en verderflike musiek is ook wesenlike gevare.
9. (a) Waarom moet ons die materiaal waarna ons luister, waarna ons kyk en wat ons lees versigtig kies? (b) Hoe moet ons reageer as ons met twyfelagtige materiaal te doen kry?
9 Ons kan nie bekostig om ons verstande te bevuil met dinge wat ‘skandelik is selfs om te noem’ nie (Efesiërs 5:12). Jy moet dus die materiaal waarna jy luister, waarna jy kyk en wat jy lees versigtig kies. Wees op jou hoede en verwerp twyfelagtige materiaal summier (Psalm 119:37). Dit sal ware selfbeheersing verg, en jy sal miskien figuurlik ‘jou liggaam moet kasty en dit diensbaar maak’ (1 Korinthiërs 9:27). Maar onthou altyd dat die dinge waarna ons in die geheim kyk sigbaar is vir “die Onsienlike” (Hebreërs 11:27). Vermy dus enigiets wat twyfelagtig is. “Beproef wat die Here welbehaaglik is.”—Efesiërs 5:10.
‘Waak’ om sedelik rein te bly
10. (a) Wat is een rede waarom so baie elke jaar tereggewys of uitgesit word? (b) Watter Bybelbeginsel moet ons gedrag tydens vakansies en by die werk rig?
10 In Efesiërs 5:5 het Paulus gewaarsku: “Dit moet julle weet dat geen hoereerder of onreine of gierigaard, wat ’n afgodedienaar is, ’n erfdeel het in die koninkryk van Christus en van God nie.” Nogtans word daar elke jaar duisende tereggewys of uitgesit weens geslagsonsedelikheid—‘sonde teen die liggaam’ (1 Korinthiërs 6:18). Die rede is dikwels dat hulle nie ‘bly waak het volgens God se woord’ nie (Psalm 119:9, NW). Baie broers laat byvoorbeeld hulle morele waaksaamheid verslap wanneer hulle vakansie hou. Hulle verwaarloos teokratiese omgang en knoop vriendskappe met wêreldlike vakansiegangers aan. Sommige Christene redeneer dat dit ‘regtig gawe mense’ is en neem dan saam met hulle aan verdagte aktiwiteite deel. Ander weer het oorvriendelik geraak met hulle werkmaats. Een Christen- ouere man het so betrokke geraak by ’n werkneemster dat hy sy gesin verlaat en by haar gaan woon het! Hy is uitgesit. Hoe waar is die Bybel se woorde tog: “Slegte omgang bederf nuttige gewoontes”!—1 Korinthiërs 15:33, NW.
11. Waarom moet daar behoorlike toesig by Christelike gesellighede wees?
11 Uit Suid-Afrika kom hierdie berig: “Nog ’n gevaar wat die sedelike onkreukbaarheid van baie bedreig, is groot partytjies . . . waarvan sommige ná sessies van die streekbyeenkoms gehou is.” Kleiner Christelike gesellighede waar daar goeie toesig is, ontaard daarenteen selde in ‘brasserye’ (Galasiërs 5:21). Indien sterk drank aangebied gaan word, moet dit onder toesig en in matigheid geskied. “Die wyn is ’n spotter”, en onder die invloed daarvan het sommige broers hulle morele waaksaamheid laat verslap of sluimerende swakhede laat ontwaak (Spreuke 20:1). Twee jong bedienaars het byvoorbeeld homoseksuele dade gepleeg nadat hulle hulle aan alkohol vergryp het.
12, 13. (a) Hoe het sommige persone onsedelike gedrag probeer verskoon? Waarom is hierdie redenasie vals? (b) Hoe kan ons bly waak teen dinge wat goeie sedes bedreig?
12 Wanneer ons in die versoeking kom om te sondig, moet ons onthou dat, ongeag hoe rein ons uiterlik mag lyk, dit die innerlike is wat tel (Spreuke 21:2). Sommige meen blykbaar dat God herhaalde gevalle van onsedelike gedrag sal vergewe omdat hulle swak is. Maar is hulle nie besig om “die genade van onse God te verander in ’n verskoning vir losbandigheid” nie? (Judas 4, NW). Sommige verbeel hulle selfs dat ‘Jehovah hulle nie sien nie’ (Esegiël 8:12). Onthou egter dat “geen skepsel onsigbaar [is] voor Hom nie, maar alles is oop en bloot voor die oë van Hom met wie ons te doen het”.—Hebreërs 4:13.
13 Wees dus op jou hoede teen dinge wat goeie sedes bedreig! “Hoerery en allerhande onreinheid of hebsug moet onder julle selfs nie genoem word nie, soos dit die heiliges betaam; ook nie gemeenheid en dwase of lawwe praatjies wat nie pas nie” (Efesiërs 5:3, 4). “Verafsku wat sleg is”, al is dit ook hoe genotvol vir die vlees.—Romeine 12:9.
Bly geestelik rein
14, 15. (a) Hoe het sommige hulle aan geestelike besmetting blootgestel? (b) Hoe gebruik afvalliges hulle ‘mond om hulle naaste in die verderf te stort’? (c) In watter opsigte is afvalliges werklik onrein, en wat het hulle vergeet?
14 Sommige stel hulle aan moontlike geestelike besmetting bloot deur op godsdiensprogramme oor die radio en televisie in te skakel. In een Afrikaland het sommige na TV-dramas gekyk wat die bygelowe van tradisionele animistiese godsdienste in ’n goeie lig stel. Maar die apostel Paulus het teen ’n selfs dodeliker gevaar gewaarsku—afvallige mense wat ‘die geloof van sommige omgekeer het’ (2 Timotheüs 2:16-18). Daar bestaan nog sulke mense! (2 Petrus 2:1-3). En soms slaag hulle daarin om die denke van ander te besoedel. Soos Spreuke 11:9 (NW) sê: “Deur sy mond stort ’n afvallige sy naaste in die verderf.”
15 Afvalliges probeer dikwels die ego streel deur te beweer dat ons van ons vryhede beroof is, soos die vryheid om self die Bybel uit te lê. (Vergelyk Genesis 3:1-5.) Hierdie voornemende besoedelaars bied in werklikheid niks beters aan as ’n terugkeer na die walglike leringe van “Babilon die Grote” nie (Openbaring 17:5, NW; 2 Petrus 2:19-22). Ander rig hulle na die vlees en spoor voormalige metgeselle aan om ‘dit kalm te vat’ omdat die nederige werk om van huis tot huis te getuig “onnodig” of “onskriftuurlik” is. (Vergelyk Mattheüs 16:22, 23, NW.) Sulke vleiers lyk miskien uiterlik rein, wat liggaam en sedes betref. Maar van binne is hulle geestelik onrein omdat hulle geswig het voor trotse, onafhanklike denke. Hulle het alles vergeet wat hulle aangaande Jehovah, sy heilige naam en eienskappe geleer het. Hulle erken nie meer dat alles wat hulle omtrent Bybelwaarheid geleer het—die heerlike hoop van die Koninkryk en ’n paradysaarde en die weerlegging van valse leerstellings soos die Drie-eenheid, die onsterflike mensesiel, ewige pyniging en die vaevuur—ja, dat al hierdie dinge deur middel van “die getroue en verstandige dienskneg” aan hulle geopenbaar is nie.—Mattheüs 24:45-47.
16. Hoe word die regverdiges “deur kennis” gered?
16 ’n Kringopsiener in Frankryk maak ’n interessante kommentaar: “Sommige broers word bedrieg weens hulle gebrek aan juiste kennis.” Dit is waarom Spreuke 11:9 sê: “Deur kennis word die regverdiges gered.” Dit beteken nie dat ons ons ore vir afvalliges moet uitleen of hulle geskrifte moet lees nie. Dit beteken eerder dat ons “tot ’n juiste kennis van die heilige geheim van God” moet kom deur ywerige studie van die Bybel en die Genootskap se Bybelpublikasies. Met hierdie juiste kennis sal ons nooit eens nuuskierig genoeg word om enige aandag aan afvallige uitinge te skenk nie. Mag niemand jou “met oorredende argumente mislei nie”! (Kolossense 2:2-4, NW). Valse godsdienspropaganda uit enige bron moet soos gif vermy word! Dit is duidelik dat ons Heer “die getroue en verstandige dienskneg” gebruik om “die woorde van die ewige lewe” aan ons oor te dra. Waarom sou ons dan ooit elders wou soek?—Johannes 6:68.
Sal jy rein bly?
17, 18. Waarom is dit van lewensbelang om (a) fisiese reinheid, (b) verstandelike reinheid (c) sedelike reinheid en (d) geestelike reinheid te kweek?
17 Volgehoue reinheid voor Jehovah God behels dus baie. Wanneer ons ons liggaam, ons huis, ons klere en ons Koninkryksale skoon hou, versier ons die Koninkryksboodskap. As ons verstandelik rein bly, help dit ons om sedelik en geestelik rein te bly. Dit beteken dat ons ag moet slaan op Paulus se raad in Filippense 4:8 om dinge te bedink wat waar, rein en loflik is.
18 Ons besef ook meer as ooit tevore dat ons sedelik rein moet bly in woord en daad. Jehovah waarsku ons uitdruklik dat diegene wat enige vorm van onsedelikheid bedryf nie God se Koninkryk sal beërf nie (1 Korinthiërs 6:9-11). Hoe aangenaam sulke onrein dinge ook al lyk, as ons na die vlees saai, sal ons verderf uit die vlees maai (Galasiërs 6:8). Ten slotte is daar die vereiste om geestelik, leerstellig, rein te bly. Sulke reinheid help ons om die suiwerheid van ons harte en verstande te bewaar. So word ons beweeg om altyd God se gedagtes oor sake te probeer verkry—nie ons eie nie.
19. Wat kan die gesalfdes sowel as die “groot menigte” help om in alle opsigte rein te bly?
19 Eersdaags sal die hoofvoorstander van onreinheid—Satan die Duiwel—saam met sy demone in die diep afgrond gewerp word. Mag al Jehovah se knegte—van die gesalfdes en van die “groot menigte”—tot daardie tyd rein bly as draers van Jehovah se voorwerpe (Openbaring 7:9, 13-15; 19:7, 8; 20:1-3). Die stryd is meedoënloos en moeilik. Maar onthou dat Jehovah sy ‘gees van heiligheid’ vryelik gee (Romeine 1:4). Sy rein organisasie, met die ouere manne, staan ook gereed om ons te help deur grondige, Skriftuurlike advies te gee. Met hierdie hulp en ons eie vasbeslotenheid kan ons in elke opsig rein bly!
[Voetnoot]
a Die Hebreeuse woord vir drekgode, gil·lu·limʹ, was ’n uitdrukking van veragting wat oorspronklik “kuttels” of “drekballetjies” beteken het, iets wat vir die Jode verfoeilik was.—Deuteronomium 23:12-14; 1 Konings 14:10; Esegiël 4:12-17.
Hersieningsvrae
◻ Waarom moes die Jode wat uit Babilon teruggekeer het rein wees?
◻ Hoe kan ons aandag gee aan fisiese reinheid?
◻ Hoe kan ons ons verstande teen besmetting beskerm?
◻ Hoe kan ons bly waak teen morele gevare?
◻ Hoe kan ons ons geestelike reinheid bewaar?
[Prent op bladsy 16]
Ons huise moet voorbeeldig skoon wees
[Prent op bladsy 17]
Christene moet goeie oordeel gebruik deur videobande en TV-programme wat die verstand kan besmet te vermy
[Prent op bladsy 18]
Klein gesellighede kan moreel opbouend wees
[Prent op bladsy 19]
Ywerige Getuies bly geestelik rein en vind beskerming en vreugde deur naarstige Bybelstudie