’n Byeenkoms wat ons vertroue in Jehovah versterk het

ONS hemelse Vader, Jehovah God, weet presies wat ons nodig het. En hy gee dit in die verstande van sy toegewyde knegte wat sy werk op die aarde rig om in daardie behoefte te voorsien. Dit was ongetwyfeld die geval met die “Vertrou op Jehovah”-Streekbyeenkomste wat vanaf Junie 1987 dwarsdeur die wêreld gehou is. Hulle het waarlik gehelp om Christene te versterk teen die skeptisisme, twyfel en wantroue wat so algemeen in die wêreld is.

Die tema, “Vertrou op Jehovah”, is meesterlik in die program ingevleg. Dit is beklemtoon deur stellings wat kragtig en saaklik was, en wat deur openhartigheid en eerlikheid gekenmerk is. Dit alles het die luisteraars se vertroue in Jehovah versterk. Hulle kon huis toe gaan met die tema onuitwisbaar in hulle harte en verstande geprent, en vasbeslote dat hulle deur hul dade en hul woorde aan almal sal verkondig dat hulle ten volle op Jehovah vertrou.

‘Vertrou op Jehovah’

Hierdie woorde wat in Jesaja 26:4 gevind word, was die tema vir die eerste dag. Die program het heel paslik geopen met die toespraak “Neig jou oor na God se woorde”. Die spreker het getoon dat hierdie uitdrukking wat dikwels in God se Woord voorkom, beteken dat ’n mens met jou verstand sowel as jou hart ten volle aandag skenk aan wat gesê word, met die doel om wat jy hoor toe te pas. Dit beteken dat ’n mens selfbeheersing moet beoefen en moet konsentreer op wat gesê word, sodat jou gedagtes nie dwaal nie. Ons vertroue in Jehovah sal alleenlik versterk word deur wat ons hoor as ons ons oor só neig, en dan sal ons beweeg word om te handel volgens wat ons hoor. En behoort dit nie ons gesindheid te wees elke keer as ons hoor hoe God se Woord uiteengesit word nie, soos by ons gemeentelike vergaderinge?

Die byeenkomsvoorsitter het die volgende onderwerp, “Diegene wat op Jehovah vertrou, is bly om hier te wees”, bespreek. Hy het daarop gewys dat hoe groter ons vertroue in Jehovah is, hoe groter ons geluk sal wees. Vertroue in Jehovah beteken dat ons volkome en met sekerheid op hom steun. Hoe groter ons kennis van Jehovah en ons liefde vir hom is, hoe sterker sal ons vertroue in hom wees. Die byeenkomstema was nie bloot ’n slagspreuk nie. Ons openbaar ons vertroue in Jehovah op talle maniere, waarvan bedagsaamheid teenoor ander ’n belangrike manier is. Aan die einde van sy toespraak en tot almal se vreugde het die voorsitter die eerste nuwe publikasie vertoon—’n kleurryke, praktiese getuienisinstrument. Dit was die traktaat Waarom jy die Bybel kan vertrou.

Na ’n bespreking van die merkwaardige voorbeeld van Dawid toe hy die reus Goliat aangedurf het, het die volgende spreker hedendaagse voorbeelde beklemtoon van “Hoe sommige op Jehovah vertrou het”. Daar was byvoorbeeld ’n suster wie se ongelowige man, wat ’n vuurwapen in die hand gehad het, gedreig het om haar dood te maak as sy sou aanhou om vergaderinge by te woon. Ander het hulle vertroue in Jehovah getoon toe hulle meegedeel is dat ’n bloedoortapping die enigste ding is wat hulle lewe kan red. Jongmense het hulle vertroue in Jehovah bewys deur nie te swig voor druk om hulle op sport toe te lê of om hoër onderwys te kies nadat hulle hulle hoërskoolloopbaan voltooi het nie.

Die program vir Vrydagoggend het afgesluit met die toespraak “’n Volk wat van die wêreld afgeskei is”. Ons toon dat ons op Jehovah vertrou deur ons gedrag met die ander geslag onberispelik te hou, deur toe te laat dat Christelike beginsels ons ontspanning bepaal en deur alle vorme van kleredrag en persoonsversorging te vermy wat dit moeilik maak om tussen die geslagte te onderskei. Deur sodoende afgeskeie van die wêreld te wees, lewer ons keer op keer ’n kragtige getuienis, wat selfs daartoe lei dat sommige die waarheid aanvaar.

Vrydagmiddag het die program begin met die toespraak “Die pionierdiens bespoedig geestelike groei”. En hoe waar is dit tog! Deur Jehovah se Woord, sy heilige gees en sy organisasie voorsien God wat ons nodig het om tot “’n volwasse man” te groei, maar die pionierdiens stel ons in staat om al hierdie geestelike voorsienings beter en deegliker te benut (Efesiërs 4:13). Pioniers het tydens onderhoude vertel hoe die voltydse bediening hulle gehelp het om die vrug van God se gees in groter mate aan te kweek, meer liefde aan mense te betoon, bekwamer in die bediening te wees en in groter mate op Jehovah te vertrou en sodoende ’n intiemer verhouding met hom aan te kweek. Al hierdie dinge het hulle geestelike groei bespoedig.

Die programrede “’n Volk wat altyd op Jehovah vertrou”, het daarop gevolg. Hierdie roerende toespraak het getoon dat ons anders as die wêreld is omdat ons ten volle op Jehovah vertrou. Die spreker het in hierdie toespraak, wat op verskeie tekste uit die boek Jesaja gebaseer was, getoon hoe ons hierdie uiters bemoedigende profesieë in Jehovah se Getuies in vervulling sien gaan het, omdat ons op God vertrou. Ons sien met vertroue uit na die tyd in die nabye toekoms wanneer Jehovah sy toorn oor alle nasies sal uitspreek en dan die Paradys tot stand sal bring.

Die byeenkomsgangers is aangespoor: “Verkondig goeie nuus by elke geleentheid.” Nadat die belangrikheid daarvan beklemtoon is, het ’n paar demonstrasies getoon hoe die nuwe traktaat Waarom jy die Bybel kan vertrou effektief in formele sowel as informele getuieniswerk gebruik kan word. Ons wil beslis altyd hierdie traktate by ons hê, want die verkondiging van die goeie nuus by elke geleentheid behoort kenmerkend van elke getuie van Jehovah te wees en is ’n manier om te toon dat ons op Hom vertrou.

Die toespraak “Ouers—Bereik julle kind se hart van kleins af” is veral waardeer. ’n Kind se opleiding moet van kleins af begin en moet voorkeur geniet sodat hy, wanneer hy groot is, op Jehovah kan vertrou. Slegs dan sal dit moontlik wees om al die slegte invloede van die televisie, die skool en die straat teë te werk. ‘Laat jou kind in jou sien wat jy wil hê hy moet wees’, is aan ouers gesê. Ja, die beste manier om jou kind se hart te bereik, is deur ’n goeie voorbeeld te stel. Alle aspekte van heilige diens moet spontaan kom en geluk verskaf om die atmosfeer tuis werklik geestelik te maak. Ons wil nooit die tyd en inspanning wat dit verg met teësin gee nie. Hou aan om die kind se hart ook deur goeie kommunikasie te bereik. Wees ferm, maar liefdevol, en help die kind om te verstaan waarom hy gedissiplineer word. Prys en beloon jou kind wanneer hy dit verdien, maar moet hom nooit omkoop nie.

Die toespraak “Jongmense—Moenie ’n dubbele lewe lei nie” het ’n ernstige probleem onder sommige jong Getuies bespreek. Waarom probeer sommige ’n dubbele lewe lei? Omdat hulle die goedkeuring van hulle ouers en die gemeente wil hê, maar bang is dat hulle wêreldse portuurs hulle sal bespot. Of hulle meen dat hulle ’n mate van plesier ontneem word as hulle nie rook, dwelms neem of ongeoorloofde geslagsomgang het nie. Maar ’n mens kan eenvoudig nie daarvan wegkom dat so ’n dubbele leefwyse Jehovah tot oneer strek, jou ouers leed aandoen en ellende vir jouself besorg nie. Enigiemand wat in die vlees saai, maai verderf, terwyl ’n mens teen ’n dubbele leefwyse beskerm word as jy ’n goeie verhouding met Jehovah behou en ten volle op hom vertrou.—Galasiërs 6:8.

Al hierdie beginsels is kragtig onderstreep deur die drama wat net daarna gevolg het. Dié drama met die titel Lojale onderdanigheid teenoor Jehovah en sy organisasie het baie stof tot nadenke bevat toe dit uitgebeeld het hoe ’n ouere man verplig gevoel het om uit te tree omdat dit aan die lig gekom het dat sy dogter ’n dubbele lewe lei. Die drama het talle entoesiastiese betuigings van waardering uitgelok.

‘Vertrou op Jehovah, en doen wat goed is’

Dit was die tema van die byeenkoms se tweede dag wat op Psalm 37:3 gebaseer was. Na ’n bespreking van die dagteks, wat bemoediging ingesluit het om dit daagliks te doen, is ’n driedelige simposium met die titel “Openbaar vertroue in Jehovah” gehou. Die eerste spreker het getoon hoe nodig dit is dat ons dit doen “Deur God se Woord ywerig te bestudeer”. Dit is nodig om die strik van selfvoldaanheid en die strikke van materialisme, geslagsonsedelikheid en afvalligheid te vermy. Die Genootskap het ’n oorvloed van Bybelstudiehulpe, soos die nuwe Watch Tower Publications Index 1930-1985, voorsien. Slegs deur hulle ten volle te benut, kan ons vol vertroue ’n goeie verhouding met ons hemelse Vader hê en bekwame getuies van hom wees.

Die volgende spreker het die feit beklemtoon dat vertroue in Jehovah geopenbaar word “Deur wat jy geleer het te beoefen”. Ja, ons wil daders van die Woord wees en altyd vooruitgang maak. Op watter gebiede? In ons optrede teenoor ander, wat ons kleredrag en persoonsversorging betref, deur eers God se Koninkryk te soek en vrede en eenheid onder ons broers te bevorder! As ons die sonde van vermetelheid wil vermy, moet ons sorg dat ons ons behoorlike plek in die gesin en die gemeente behou. As ons die dinge wat ons leer sodoende beoefen, sal dit vir almal duidelik wees dat ons op Jehovah vertrou.

Die simposium het afgesluit met ’n bespreking van die onderwerp “Openbaar vertroue in Jehovah—Deur jou in te span in die veld”. Ons toon ons liefde vir God en ons naaste en beskerm onsself deur dit te doen. Ons is miskien tevrede met halfhartige vormdiens, maar is Jehovah? Spoor sy Seun ons nie aan om al ons kragte in te span nie? (Lukas 13:24, NAV). Die vermeerdering wat ons sien in verkondigers, pioniers en die gemiddelde ure wat aan die veldbediening bestee word, behoort ons aan te spoor om persoonlik meer te probeer doen. Is dit nie waar nie? Deur sulke ywerige werk sal ons ’n goeie voorbeeld stel, ons vertroue in Jehovah toon en sy glimlag van goedkeuring wegdra.

Daarna is ’n beroep op ons gewete gedoen in die toespraak “Gee in volle maat”. Hoe oorvloedig voorsien Jehovah tog geestelik en materieel vir ons! Ons toon ons waardering deur hom na te volg wanneer ons getuig en ook wanneer ons geldelik tot die predikingswerk bydra. Kan ons duur vermaak inkort sodat ons in voller maat kan gee?

Die dooptoespraak “Jou toewyding en doop getuig van vertroue in Jehovah” het getoon waarom ons op God vertrou en nie op mense nie. Waterdoop dui aan dat ons ons vorige gedrag afsterf en tot ’n leefwyse opgewek word wat met die goddelike wil ooreenstem. Daarna moet ons aanhou ‘om reg te doen, liefde te betrag en ootmoedig met ons God te wandel’ (Miga 6:8). Onder diegene wat gedoop is, was ’n agtjarige meisie wat twee Bybelstudies met skoolmaats hou, asook ’n 79-jarige man en ’n 44-jarige kwadrupleeg.

Saterdagmiddag se program het begin met die toespraak “Doen die ‘noodsaaklike dinge’ om God te behaag”. Dit was op Handelinge 15:28, 29 gebaseer en het getoon hoe noodsaaklik dit is om ons dokters van ons standpunt ten opsigte van bloed in kennis te stel voordat ’n mediese krisis opduik, en het goeie wenke gegee oor hoe dit gedoen kan word.

“Verantwoordelike ouerskap in hierdie tyd van die einde” was ’n toespraak waaroor talle gunstige kommentare gemaak is. Dit het ’n gebalanseerde beskouing gegee en getoon dat hoewel ouerskap baie vreugde kan verskaf dit ook talle verantwoordelikhede meebring en dikwels tot hartseer lei, soos wanneer kinders die verkeerde pad inslaan. Veral moeders kan geestelik swak word weens die las van ouerskap.

Toe het die toespraak “Ouere manne—Bewaar julle pand” gevolg. Hierdie pand is om herders van God se kudde te wees—hulle te lei, te voed en te beskerm in ooreenstemming met Jesaja 32:1, 2. Dit is ’n ware uitdaging om reg te laat geskied aan gesinsverantwoordelikhede en terselfdertyd na gemeentelike pligte om te sien. Die bewaring van hulle pand beteken ook dat ouere manne die slaggate van materialisme, onmatige ontspanning en ongeoorloofde vermaak moet vermy. Onder diegene met wie daar by die Dortmund-streekbyeenkoms in die Bondsrepubliek van Duitsland ’n onderhoud gevoer is, was ’n ouere man wat sy pand al 60 jaar lank bewaar.

Die toespraak “Wees gehoorsaam aan dié wat die leiding gee”, het logieserwys daarop gevolg. Liefde sal ons help om onderdanig en gehoorsaam aan gemeentelike opsieners te wees en sal ons daarvan weerhou om ongeduldig te word omdat hulle nie volmaak is nie, want ons is ook nie (Hebreërs 13:17). As ons in klein en groot dinge vir die ouere manne respek toon, help ons hulle om hul las te dra, pleks van daaraan toe te voeg.

Saterdag se program het afgesluit met die driedelige simposium “Die Woord van God is lewend”, wat op Hebreërs 4:12 gebaseer was. Die eerste spreker het getoon dat dit lewend is, want “Dit oefen vernuwingskrag uit”. Vandag het ons, soos in Bybeltye, talle voorbeelde wat toon hoe vertroue in God se Woord mense groot veranderinge in hulle lewe laat aanbring het en hulle krag gegee het om onbevrees te getuig.

Deel twee van hierdie simposium oor God se Woord het getoon dat dit ‘skerper as enige tweesnydende swaard is’. Dit stel ons in staat om Babiloniese valse leerstellings te weerlê. Dit help ons ook om ‘siel en gees te skei’ deurdat dit ons in staat stel om te onderskei tussen ons dade en ons werklike beweegredes. Deur die “swaard” op hierdie manier te gebruik, sal ons Jehovah God meer behaag en groter vrede met ander en innerlik geniet.

Die slotgedeelte het getoon dat God se Woord lewend is, want “Dit versterk en beweeg ons hart”. In die Bybel word die woord “hart” gewoonlik figuurlik gebruik en slaan dit op die innerlike mens wat in ons verstandelike en emosionele eienskappe geopenbaar word. God se Woord versterk ons hart deurdat dit Sy wonderlike eienskappe deur sy handelwyse met die mensdom openbaar. God se onselfsugtige liefde beweeg ons om hom na te volg. In sy slotopmerkings het die spreker die Wagtoringgenootskap se geskiedenis hersien wat die druk van Bybels betref en die gehoor verbly deur die uitreiking van ’n pragtige luukse-sakuitgawe van die New World Translation aan te kondig.

‘Vertrou op Jehovah met jou hele hart’

Hierdie tema vir Sondag, wat uit Spreuke 3:5 geneem is, is deur ’n ouere man behartig wat die program begin en die dag se teks bespreek het. Toe het die sieldeursoekende toespraak “Aanvaar jy heilige dinge as vanselfsprekend?” gevolg. Die wêreld meen dat hulle God niks verskuldig is nie, maar as Jehovah se Getuies weet ons dat as ons sy goedkeuring wil hê ons die getroue manne van die ou tyd moet navolg deur waardering vir heilige dinge te toon. Die spreker het 13 hiervan bespreek, waaronder Jehovah se naam, sy Woord, sy heilige gees, sy wette, sy sigbare organisasie, ons verhouding met God, ons vergaderinge en ons diensvoorregte. As ons hierdie heilige dinge werklik waardeer, sal ons hulle eerste in ons lewe stel, ten volle op Jehovah vertrou en sal hy ons beloon.

Daarna het die kragtige toespraak “Verafsku die wêreld se skandelike weë met jou hele wese” gevolg. Omdat dit so reguit was, het dit kommentare uitgelok soos: “Dis net wat ons nodig gehad het!” Aangesien goddeloosheid so alledaags geword het, moet Christene daarteen waak dat hulle onsedelikheid en geweld nie vergoelik nie (2 Timotheüs 3:1-5). Ons moet derhalwe nie na sulke uitsendings op die TV of oor die radio kyk of luister nie. Ons moet ook nie in tydskrifte daarvan lees nie. Trouens, ons wil nie eers daaroor dink nie. ‘Ware Christene wat graag ’n goeie verhouding met Jehovah wil behou, kan eenvoudig niks met pornografie te doen hê nie’, nee, nie eers ’n bietjie nie!

Sondagoggend se program het afgesluit met die boeiende Bybeldrama Jehovah verlos die wat sy naam aanroep. Dit het gehandel oor ’n paar voorvalle in die lewe van Josua. Dit het realisties uitgebeeld hoe Jerigo se inwoners dit moes beskou het toe Israel se leër dag na dag om die stad geloop het. Ragab se groot geloof, wat redding vir haar en haar huisgesin tot gevolg gehad het, is ook beklemtoon. Ten slotte is almal gevra: “Het jy die vaste geloof en vertroue van Josua en sy onverskrokke metgeselle? As ons Ja antwoord, sal ons moontlik deel hê aan die finale oorwinning oor Jehovah se vyande.”

Die titel van die openbare toespraak van die “Vertrou op Jehovah”-Streekbyeenkoms was “Wie kan jy in ons angsvolle tye werklik vertrou?” Dit het die feit dat die mensdom ’n bron van vertroue dringend nodig het duidelik gestel! Dit het duidelik getoon hoe dwaas dit is om op mense te vertrou. God se Woord raai ons gevolglik aan om op Jehovah te vertrou en gee ons sterk redes om dit te doen. Ons moet op hom vertrou vanweë sy eienskappe en sy reputasie dat hy diegene verlos wat op hom vertrou, waarvan koning Hiskia ’n treffende voorbeeld is. Diegene wie se handelwyse vertroue in Jehovah openbaar, sal binnekort ’n soortgelyke verlossing ondervind.

“Hou aan om ‘vreedsaam te lewe’”, was die tema van die toespraak wat onmiddellik daarna gevolg het. ’n Vreedsame leefwyse beteken dat ons vrede daadwerklik bevorder. Dit beteken ook dat ons vrede in ons persoonlike lewe geniet, omdat ons ’n goeie gewete het. As ons die vrugte van God se gees openbaar, veral liefde en selfbeheersing, sal ons vreedsaam met ons gesinne en met die broers en susters in die gemeente kan lewe.

Dit ly geen twyfel nie dat hierdie byeenkoms ons almal toegerus het om ‘die toekoms met volle vertroue in Jehovah tegemoet te gaan’, die onderwerp van die slottoespraak. Hoe goed het dit die program tog opgesom! Die spreker het benadruk dat ons daagliks met ons hele hart op Jehovah moet vertrou, hom in al ons weë moet ken en moet toelaat dat hy ons paaie rig (Spreuke 3:5, 6). Byeenkomsgangers was baie bly om te hoor van die 16 nuwe openbare toesprake en ’n herdruk van ’n artikel oor bloed wat in Ontwaak! verskyn het en wat vir verspreiding onder ons dokters beskikbaar sal wees. Ja, en ons was verheug om te hoor van die uitreiking van nog ’n Bybeldramakasset en nog drie traktate!

Alle aanwesiges by die “Vertrou op Jehovah”-Streekbyeenkoms is geestelik grootliks opgebou. Hulle is nou gereed om die toekoms met volle vertroue in hul hemelse Vader tegemoet te gaan. En almal is gepas aangemoedig deur die slotvermaning: “Mag ons almal, namate ons die toekoms tegemoetgaan, deur ons leefwyse bewys dat ons op Jehovah vertrou.”

[Tabel op bladsy 26]

Verskillende “Vertrou op Jehovah”-Streekbyeenkomste

Opkoms Doopsyfer

Brasilië 442 731 7 626

Britse Eilande 156 417 1 225

Colombia 82 321 1 852

Denemarke 23 029 200

Finland 26 144 284

Frankryk 138 683 2 705

Hongkong 2 661 49

Ierland 4 326 61

Italië 221 227 5 496

Jamaika 18 540 184

Japan 232 904 3 416

Korea 82 296 2 013

Maleisië 1 154 15

Noorweë 12 703 218

Oostenryk 24 686 360

Porto Rico 49 953 377

Portugal 55 057 1 074

Spanje 105 591 2 394

Swede 30 099 312

Switserland 19 459 261

Trinidad 10 649 132

Venezuela 100 777 1 664

Verenigde State 1 288 313 13 562

Zimbabwe 45 544 580

[Prente op bladsy 25]

Gedagteprikkelende dramas het beklemtoon hoe belangrik dit is dat ons op Jehovah vertrou

F. W. Franz, ’n lid van die Bestuursliggaam van Jehovah se Getuies, spreek ’n aandagtige byeenkomsgehoor toe

[Prent op bladsy 26]

Talle het vertroue in Jehovah getoon deur hulle te laat doop om hul toewyding aan hom te simboliseer